Tomadiho Maorona Idia Diba Taudia be mai Edia Maduna
“Dirava ena hereva idia kamonaia bona idia badinaia taudia be idia moale bada.”—LUKA 11:28.
1. Edena bamona taudia be tomadiho maorona idia davaria murinai idia badinaia?
BEMA hereva maorodia bona momokanidia ita ura henidia, tomadiho momokanina ita diba sibona be hegeregere lasi, to eda mauri lalodiai do ita badinaia danu be namo. Tomadiho momokanina be lalohadai mo sibona lasi; ia be noho dalana ta.—Salamo 119:105; Isaia 2:3; ma danu Kara 9:2 itaia.
2, 3. (a) Iesu ese edena bamona ia hahedinaraia Dirava ena ura karaia be mai anina bada? (b) Tomadiho maorona idia diba taudia iboudiai edia maduna be dahaka?
2 Iesu Keriso ese ia hahedinaraia gau badana be Dirava ena ura do ita karaia, ia hahedinaraia hegeregerena. Ia gwau ia do idia hereva henia, do idia gwau “Lohiabada e,” taudia, (sibodia be Keristen idia gwauraia taudia unai), iboudiai lasi be Basileia lalonai do idia vareai; ena Tamana ena ura idia karaia taudia mo ese. Ia gwau oredia do ia dadaraidia, badina be idia be “dika karaia taudia.” Idia be taravatu utua taudia, badina be Dirava ena ura ia karaia lasi tauna be kara dika tauna, bona kara dikadia iboudiai be taravatu utua karadia. (Mataio 7:21-23; 1 Ioane 3:4; ma danu Roma 10:2, 3 itaia.) Reana ta be tomadiho momokani ia diba, bona idia hahedibalaia bona idia badinaia taudia ia hanamodia reana, to ia danu be sibona ena mauri lalonai do ia badinaia be namo. (Iakobo 4:17) Bema unai maduna ia huaia, do ia davaria ena mauri do ia namo bona moale idauna do ia davaria.
3 Hereva gunana lalonai, tomadiho momokani ena toana 6 ai herevalaidia. Ita idia durua, tomadiho maorona ita diba totona, bona idia ese danu maduna ita idia henia bona dala idia kehoa iseda.
Dirava Ena Hereva Oi Abia Dae A?
4 Kamonai matamata taudia be Iehova ena Witness taudia ese Baibel amo idia hadibadia noho lalonai, idia momo idia lalo-parara haraga idia hadibalaidia herevadia be Baibel amo. Edia henanadai idia haerelaidia negadiai, tomadiho oreadia edia hereva, o sene herevadia, o ladana bada taudia edia lalohadai, be idia herevalaidia lasi, to Dirava ena Hereva mo. Kingdom Hall idia lao neganai, idia itaia unuseniai danu idia gaukaralaia momo bukana be Baibel. Hereva momokani be mai edia momokani ida idia tahua taudia idia lalo-parara haraga, Iehova ena Witness taudia edia moale ena badina badana be Dirava ese ena Hereva ia ubulaidia namonamo dainai.—Isaia 65:13, 14.
5 Bema inai oi diba, ia dainai dahaka oi karaia? Bema oi lalo-pararalaia, oi noho kava be namo lasi. Baibel ese ia hahedinaraia, hereva idia “kamonai sibona” to idia “badinaia lasi” taudia be ‘sibodia idia koia noho.’ (Iakobo 1:22, 23) Badina be, herevana dahaka idia gwau, to Dirava idia kamonai henia lasi neganai, idia hahedinaraia idia lalokau henia momokani lasi. Bema ta ia gwau ia be mai ena abidadama, to ena kara be lasi, ena abidadama be mase gauna. (Iakobo 2:18-26; 1 Ioane 5:3) To Iehova ia lalokau henia dainai kara “ia karaia” tauna be idau; ‘ia karaia neganai, ia be namo.’ Oibe, Keriso ia hereva bamona, “Dirava ena hereva idia kamonaia bona idia badinaia taudia be idia moale bada.”—Iakobo 1:25; Luka 11:28; Ioane 13:17.
6. Bema Dirava ena Hereva be momokani ita laloa bada, dahaka dala do ita tahudia?
6 Emu diba Iehova ena ura dekenai do ia bada ia lao noho bona oi dibadia gaudia do oi badinadia noho lalonai, unai moale do ia dobu ia lao. Dirava ena Hereva stadilaia totona do oi gaukara goadagoada a? Taunimanima tausen momo, guna idia duahiduahi diba lasi, be idia gaukara goadagoada do idia diba totona, badina korikorina be idia ura Baibel do idia duahia diba bona haida do idia hadibalaidia diba. Ma haida be daba daba iboudiai idia toreisi haraga, Baibel bona Baibel stadi gaudia, Gima Kohorona hegeregerena, do idia duahidia totona. Baibel oi duahia hesiriu negadiai, eiava stadi herevadia lalodiai idia gwauraidia siridia be Baibel lalonai oi duahidia negadiai, Iehova ena taravatu bona ena hahegani oi lalodia namonamo, unai hereva amo edena bamona ita ia hakaua. Kaha ta ta oi lalodia namonamo, idia ese Dirava, iena palani, bona taunimanima ia kara henidia karadia edena bamona idia hahedinaraidia. Nega oi atoa, unai ese emu lalona do ia haidaua totona. Oi laloa, Baibel ena sisiba sibomu emu mauri lalonai badinaia karana do oi habadaia be mai dalana eiava.—Salamo 1:1, 2; 19:7-11; 1 Tesalonika 4:1.
Iehova Oi Badinaia Guguru A?
7 Dirava momokanina be Toi Tamona lasi—unai idia kamonai neganai, taunimanima milion milion edia lalodia idia hegeregere. Toi Tamona Diravana, idia lalo-pararalaia lasi Diravana, dekenai edena bamona idia raka kahirakahira lao diba? Toi Tamona Diravana herevana dainai, Tamana idia laloaboio, badina be ena ladana be dubu lalonai idia kamonai lasi, bona Iesu idia tomadiho henia edia Dirava, eiava Maria idia tomadiho henia, badina be idia hadibadia ia be “Dirava Ena Sinana.” To Iehova ena Witness tauna ta ese Baibel ia kehoa bona Dirava ena ladana ia hahedinarai henidia neganai, edia lalodia idia moale. (Salamo 83:18) Venezeula ai, Witness kekenina ta ese Dirava ena ladana be hahine ta ia haheitalaia neganai, hahine ese ia rosia bona ena lalona ia hegeregere Baibel stadi be iena ruma ai do idia karaia. Unai bamona taudia ese Iesu be ena Tamana na “egu Dirava bona emui Dirava” bona “Dirava momokani tamona” ia gwauraia herevana idia dibaia neganai, edia lalodia idia parara Baibel ese Dirava ia gwauraia herevadia be idia lalo-pararalaidia diba. (Ioane 17:3; 20:17) Iehova ena kara idia diba neganai, ia idia ura henia, idia guriguri henia matama, bona idia ura do idia hamoalea. Unai dainai dahaka ia vara?
8. (a) Iehova idia lalokau henia bona hamoalea urana idia ura dainai, taunimanima milion milion be dahaka idia karaia? (b) Dahaka dainai Keristen bapatisona be mai anina bada?
8 Idia hanai laganidia 10 lalodiai, tanobada hegegemadai taunimanima 2,528,524 ese edia mauri be Iehova idia gwauhamatalai henia bena bapatiso idia abia, unai be edia gwauhamata edia toana. Oi be idia ta a, eiava hari oi hegaegae bapatiso do oi abia totona a? Bapatiso be mai anina bada karana, Keristen taudia momokanidia iboudiai edia mauri lalodiai. Iesu ese ena orea taudia ia haganidia bese iboudiai be hahediba taudia ai do idia halaodia bona do idia bapatisodia. (Mataio 28:19, 20) Inai danu do ita laloa be namo: Iesu be bapatiso ia abia murinai, maoromaoro Iehova ese guba amo ia hereva henia, ia gwau: “Oi be lauegu Natuna, lauegu lalokau, lau moale oi dekenai.”—Luka 3:21, 22.
9. Iehova ese ita do ia lalo namo henia noho totona, dahaka do ita karaia be namo?
9 Iehova ena lalo-namo do ita laloa bada be namo. Bema gwauhamata bona bapatiso amo oi abia vadaeni, do idia koua diba gaudia iboudiai amo oi raka siri. Mauri ena hekwarahi idauidau o kohu bona moni oi lalodia bada lasi, Dirava ena lalo-namo do oi laloa maragi garina. (1 Timoteo 6:8-12) Hereva Lada-isidia 3:6 ena sisiba oi badinaia momokani: “Emu dala iboudiai lalodiai [Iehova] oi laloa, bena ia ese emu dala do ia hamaoromaorodia.”
Keriso Ena Lalokau ese Emu Lalona Ia Hamarerea Bada A?
10 To bema ta ia diba Iehova be Dirava momokani tamona, ia be unai dainai Iesu Keriso do ia laloa nege lasi. Lasi, badina be Apokalupo 19:10 ia gwau: “Iesu ia hedinaraia gauna ese peroveta taudia edia lauma ia hasiahua noho.” Genese amo ela bona Apokalupo, edia peroveta herevadia ese Iesu Keriso ena ahuna Iehova ena palani lalonai be idia gwauraia. Ta be unai ia diba neganai, Kerisendom ena hereva gagevadia ese idia havaradia lalohadaidia kereredia ia negedia diba bona ena lalona ia parara momokani.
11. Poland ai hahine ta ese Dirava ena Natuna sivaraina momokanina ia duahia dainai, dahaka ia karaia?
11 Ta ese Dirava ena Natuna sivaraina ia lalo-pararalaia neganai, unai ese ena lalona ia hamarerea bada diba. Poland ai, hahine ta ladana Danuta be lagani 8 lalodiai Iehova ena Witness taudia edia hereva ia kamonai loulou bona unai hereva ia moalelaidia, to tomadiho momokanina ia badinaia lasi. Bena buka ta ladana Tau Hereadaena ia abia, ia lalonai Keriso sivaraina be hereva haragadia ai idia torea.a Hanuaboi ai buka ia kehoa, karoa tamona ia duahia gwauraia, to ia atoa diho lasi ela bona dabarere ai ia duahia ore. Ia tai, ma ia noinoi, ia gwau: “Iehova e, egu dika mani oi gwauatao.” Ia duahidia herevadia dainai, Iehova bona ena Natuna edia lalokau ia lalo-pararalaia momokani. Ena lalona ia parara ia ese lagani 8 lalodiai Iehova ena heduru, mai ena haheauka ida ia henia toho heduruna, be ia dadaraia loulou. Vadaeni, lagani 1993 lalonai bapatiso ia abia, unai amo ia hahedinaraia Iesu Keriso ia abidadama henia dainai Iehova ia gwauhamata henia.
12. Iesu Keriso diba maoromaoro karana ese eda mauri edena bamona ia haidaudia?
12 Keristen taudia, ‘iseda Lohiabada Iesu Keriso idia diba goevagoeva’ taudia, be idia gaukara, bona edia gaukara ese anina ia havaraia. (2 Petero 1:8, NW) Unai Basileia sivaraina harorolaia gaukarana ai do oi durudia a? Ta ta ena heduru ena heduru edia bada be gau idauidau momo dainai do idia idauidau. (Mataio 13:18-23) Unai gau haida ita haidaudia diba; haida be lasi. Dahaka ese eda lalona do ia hamareredia, eda diba hegeregerena haida do ita haidaudia totona? Aposetolo Paulo ia gwau: “Keriso ena lalokau ese ai ia biagua noho,” anina be, iena lalokau dainai ena mauri be ita dainai ia atoa diho, bona unai ita laloa bada neganai, iseda lalona ia hamareredia bada. Unai dainai ita diba siboda eda ura do ita tahua guna be maoro lasi. Iseda noho dalana ita haidaua, Keriso ese ena hahediba taudia ia hadibalaidia gaukarana do ita tahua guna totona.—2 Korinto 5:14, 15.
Tanobada amo Do Ita Gini Siri Vaitani A?
13 Kerisendom bona tomadiho oreadia ma haida idia ura tanobada ena gau ai do idia lao dainai idia karaia karadia be idia hedinarai goevagoeva. Edia moni amo gavamani hamorudia karadia idia durudia. Fada taudia haida be unai kara lalodiai idia tuari. Dina ta ta iboudiai, niuspepa lalodiai tomadiho oreadia idauidau idia sivarailaidia, tanobada ena kahana idauidau ai idia tuari heheni noho. Edia imadia be rara ai idia honu. (Isaia 1:15) Bona tanobada ibounai lalonai tomadiho gunalaia taudia ese politik taudia idia biagudia toho. Tomadiho momokani taudia be unai ibounai amo idia raka siri.—Iakobo 4:1-4.
14. (a) Tanobada amo do ita gini siri totona, dahaka kara amo do ita siri be namo? (b) Dahaka ese ita ia durua diba, tanobada ena lalohadai bona ena kara ese ita do idia idoaia lasi totona?
14 To tanobada amo gini siri karana ena anina be unai sibona lasi. Tanobada taudia momo ese moni bona moni amo idia hoidia diba gaudia idia ura henidia bada, idia ura edia ladadia do idia bada, bona moale karadia idia tahudia doko lasi. Haida edia namo idia tahudia momokani lasi, idia koikoi, idia hereva dika, siahu taudia idia gwau-edeede henidia, bona idia lebulebu. (2 Timoteo 3:2-5; 1 Ioane 2:15, 16) Ita goevadae lasi dainai, reana nega haida unai kara haida ita karaia. Dahaka ese ita do ia durua, unai idoa amo do ita raka siri totona? Unai ibounai ia havaraia tauna do ita laloa be namo. “Satani ese tanobada taudia ibounai ia gunalaia noho.” (1 Ioane 5:19) Herevana dala ta ena toana be dahaka namo, bona herevana taunimanima hida be edia mauri lalodiai idia rakalaia, to ia biagua tauna, Iehova ena inai tauna badana, Satana Diabolo, be ita laloa neganai, ita diba unai dala be dika rohoroho.—Salamo 97:10.
Emu Lalokau be Ede Badana?
15 Iehova ena Witness taudia oi bamodia matama neganai, edia lalokau ese emu lalona ia veria, badina be ia be idau vaitani, tanobada ena lalohadai hegeregerena lasi. Iehova tomadiho henia karana goevana be tomadiho daladia haida hegeregeredia lasi, badina be sibona ena namo ia tahua lasi lalokauna ia hahedinaraia badabada. Reana unai dainai oi laloa Iehova ena Witness taudia ese tomadiho maorona idia badinaia noho. Iesu Keriso ia gwau: “Taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.”—Ioane 13:35.
16. Ita ta ta be eda lalokau edena bamona do ita halababaia diba?
16 Emu lalokau ese ia hahedinaraia oi danu be Keriso ena hahediba tauna ta a? Emu lalokau hahedinaraia daladia do oi halababadia be namo a? Momokani, ita ibounai be unai bamona do ita karaia be namo. Kingdom Hall ai ita gado namo heheni sibona be hegeregere lasi. Bona ita idia lalokau henia taudia mo bema ita lalokau henidia, ita be tanobada amo ita idau lasi, ani? Baibel ia gwau: “Gau badana momokani be inai: umui ta ta do umui lalokau henia mai emui lalona ibounai.” (1 Petero 4:8) Eda lalokau be daidia dekediai do ita habadaia be namo? Eda Keristen tadikakana o taihuna, ena noho dalana be eda hegeregerena lasi bona ena kara haida ita badulaia tauna ta dekenai, a? Eiava ia gorere o ia buruka dainai hebou ia lao henidia loulou diba lasi tauna dekenai, a? Eiava eda adavadia dekediai a? Eiava iseda tamadia sinadia burukadia dekediai a? Haida be lalokau bona lauma ena huahua oredia idia hahedinaraidia namonamo vadaeni, to edia famili tauna ta mai gorerena badana naria karana idia hekwarahilaia matama neganai, mamina idia abia unai huahua idia dibadia toho lou. To, momokani, iseda famili taudia mo sibodia lasi, to ma haida danu be unai bamona do ita naridia mai eda lalokau ida be namo.
Basileia Harorolaia Gaukarana Ena Anina Oi Dekenai be Ede Badana?
17 Iseda dekena taudia ita lalokau henidia dalana badana be, Dirava ena Basileia ita harorolai henidia. Inai gaukara be Iesu ese ia perovetalaia bona Iehova ena Witness taudia mo sibodia ese idia karaia noho. (Mareko 13:10) Inai gaukara amo namo ita abia vadaeni. Hari ita ese haida do ita durulaidia be namo. Bema Dirava ena lalohadai ita abia, inai gaukara do ita goadalaia.
18. Bema buka ladana Jehovah’s Witnesses—Proclaimers of God’s Kingdom ita duahia, unai ese iseda ahuna Basileia harorolaia gaukarana lalonai edena bamona do ia habadaia reana?
18 Hari inai negai Basileia sivaraina be tanobada ena daudau gabudia idia laohaia sivaraina be buka ladana Jehovah’s Witnesses—Proclaimers of God’s Kingdom lalonai idia torea. Bema nao gado oi diba, do oi duahia be namo. Bona do oi duahia neganai, Witness taudia ta ta ese Basileia idia harorolaia daladia idauidau iboudiai mani oi lalodia. Haida edia kara do oi tohotohoa diba a? Dala momo idia hekeho ita ibounai eda. Namona be do ita gaukaralaidia namonamo, Iehova ita lalokau henia dainai.
19. Tomadiho maorona ita diba dainai ita abia madunana bema ita huaia, dahaka hahenamo do ita abidia?
19 Iehova ena ura unai bamona do ita karaia neganai, inai henanadai, Mauri ena anina be dahaka? ena haere do ita davaria. (Apokalupo 4:11) Eda daradara bona eda lalo-hesiku do idia ore. Iehova ena hesiai bema oi lao henia mai emu lalona ibounai ida, emu lalona do ia hegeregere momokani. Bema unai bamona do ita karaia, mauri hanaihanai mai moalena be Dirava ena tanobada matamatana lalonai do ita abia, bona eda tauanina bona eda lalona be iena palani hegeregerena do ita gaukaralaidia guguru diba, taunimanima ia karadia neganai mai ena lalokau ida ia lalohadailaia palanina unai.
[Footnotes]
a Watchtower Bible and Tract Society of New York, Inc. ese idia halasia.
Edena Bamona Do Oi Haere?
◻ Dahaka dainai gau badana be tomadiho ta ese Baibel ia abia dae Dirava ena Hereva bona Iehova ia matauraia ia be Dirava korikorina?
◻ Tomadiho momokanina ese Iesu ena kara, mauri davalaia karana, edena bamona ia gwauraia?
◻ Dahaka dainai Keristen taudia be tanobada amo do idia gini siri bona sibona ena namo ia tahua lasi lalokauna do idia hahedinaraia be namo?
◻ Basileia harorolaia gaukarana ena anina tomadiho maorona lalonai be dahaka?
4. (a) Kamonai matamata taudia ese idia itaia Iehova ena Witness taudia ese Baibel be edena bamona idia gaukaralaia? (b) Iehova ese ena hesiai taudia be lauma dalanai ia ubudia namonamo dainai, idia be edena bamona?
5. (a) Iehova ena Witness taudia idia itadia namonamo taudia be edena bamona do idia kara be namo? (b) Idia be Witness taudia ida edena bamona do idia moale hebou diba?
7. (a) Toi Tamona Diravana herevana dainai taunimanima edia tomadiho be edena bamona? (b) Ta ese Iehova herevana momokanina ia diba neganai, reana dahaka do ia vara?
10. Ena be Iehova ita tomadiho henia, to dahaka dainai Iesu ita laloa nege lasi?
13. Dahaka dainai tanobada ia tura henia tomadihona ita dadaraia be namo?
15. Sibona ena namo ia tahua lasi lalokauna oi itaia neganai, unai ese oi edena bamona ia durua, tomadiho maorona oi diba totona?
17. Bema ita be Iehova ena Witness taudia edia vadivadi amo namo ita davaria vadaeni, dahaka be mai eda ura ida do ita karaia be namo?
[Picture on page 16]
Bapatiso be mai anina bada, tomadiho momokanina ena maduna abia dae karana ai. Hua ta ta iboudiai, tanobada hegegemadai 25,000 bamona be bapatiso idia abia
Russia
Senegal
Papua New Guinea
U.S.A.
[Picture on page 17]
Baibel ena hereva momokani harorolaia be tomadiho momokanina ena kahana ta
U.S.A.
U.S.A.
Brazil
Hong Kong