“Dirava Gari Henia” Distrik Hebouhebouna Oi Lao Henia!
Lagani 1994 ena “Dirava Gari Henia” Distrik Hebouhebouna, Iehova ena Witness taudia edia, do oi lao henia dalana be oi lailaia vadaeni a? Momokani, bema dina toiosi iboudiai oi lao, namo do oi davaria! Papua New Guinea ai hebouhebou 15 do idia karadia, bona reana ta be emu noho gabuna kahirakahira ai do idia karaia.
Gari ena mamina ta ese lalo-goada ia hamaragia diba bona helaro ia haorea diba, to Friday dabai idia ese Dirava gari henia karana ena hahenamo momo do idia herevalaidia. Momokani, hebouhebou ena program ibounai lalonai unai hahenamo do idia gwauraidia momo.
Friday adorahi ai do oi kamonai, Dirava gari henia karana ese headava bona ruma bese maurina edena bamona ia hagoadadia, bona memero kekeni edena bamona ia durudia, Dirava do idia badinaia goadagoada noho totona. Adorahi ena program ena dokonai, hereva ta ladana “Mase Idia Lalohisihisilaia Taudia Hagoadadia Daladia” do idia harorolaia. Unai hereva lalonai do idia gwauraia sisibana namona do oi laloa bada.
Saturday ena program ese do ia hahedinaraia gauna be inai: Dirava gari henia karana ese ita edena bamona ia hagoadaia, Iehova ese kongregesen bona eda hesiai gaukarana ia haheganilaidia herevadia do ita badinadia namonamo totona. Hereva ta ladana “Dina ta ta Iboudiai, Dirava Ena Hereva, Buka Helaga, Oi Duahia,” lalonai Baibel duahia bona stadilaia daladia be hebou taudia do idia sisibalai henidia. Saturday ena program ena dokonai, mai anina bada herevana ta ladana “Iehova Ena Hahegari Dinana be Kahirakahira” do idia harorolaia.
Sunday ena program lalonai, hereva ta ladana “Kara Maoromaoro Taudia Do Idia Toreisi Lou” be do idia harorolaia. Unai murinai hereva ta ladana “Hisihisi Bada Hereana Lalona amo Do Ia Hamauridia” lalonai, Iesu ena gwauhamata namo hereana, haida be do idia mase lasi herevana, ena anina do idia gwauraia hedinarai.—Ioane 11:26.
Sunday daba ena program ena dokonai, drama ta ladana Oi Abidia Hidi Diba Gaudia do idia karaia. Ia dainai hebou taudia ese Iosua ena nega do idia laloa lou, iena lalona ia hadaia auka Iehova ena hesiai do ia lao henia. Elia ena nega danu do idia laloa lou, ia ese lahi amo dirava ia tohodia. Unai sivarai ruaosi edia anina amo hebou taudia do idia durudia, hari inai negai Dirava do idia gari henia totona. Adorahi ai, hebouhebou ena hereva badana ta, pablik tok ladana “Dahaka Dainai Dirava Momokanina be Hari Ita Gari Henia be Namo?” be do idia kamonaia.
Do oi lao dalana be hari oi hegaegaelaia. Hebou gabudia be Witness taudia oi nanadailaidia, eiava inai magasin ia halasia oreana oi tore henia. Noga! magasin, October-December 1994 gauna, ese hebouhebou edia gabu, Papua New Guinea, Australia, New Zealand, bona Solomon Islands ai, do ia halasidia.
[Picture Credit Line on page 32]
T. Rosenthal/SUPERSTOCK