Hahediba Herevadia Maoromaorodia be Emu Mauri ai Oi Badinadia
“Dirava badinaia karana ese gau iboudiai ia hanamodia.”—1 TIMOTEO 4:8, NW.
KAHIRAKAHIRA taunimanima iboudiai do idia gwau, gorere momo lasi maurina idia abia be mauri ena kohu namona ta. Nega bona moni bada idia negea tauanina goadana idia abia totona bona idia gorere neganai doketa namona ena heduru idia abia totona. Hegeregere, United States dekenai, vanegai lagani ta dekenai gorere koua davana be K900 bilion ia hanaia. Unai ena anina be lagani tamona lalonai, unai tanobada dekenai, tau, hahine, bona natudia ta ta iboudiai durudia totona K3,000 K3,000 idia negea, bona kohu momo tanobadadia ma haida dekenai unai bamona davana idia negea danu.
2 Ena be nega, goada, bona moni bada idia negea, to dahaka ia havaraia? Momokani, reana ita ibounai ita gwau diba, hari inai nega lalonai, hospital ena medikal kohu be momo bona edia heduru be idauidau, guna unai bamona heduru ita davaria diba lasi. To, ita gwau diba lasi unai ese taunimanima ia durudia gorere momo lasi maurina do idia abia totona. Oibe, gorere koua dalana ena hebou lalonai, do idia karaia gwauraia gaudia ia herevalaia neganai, United States ena presiden be ena hereva dekenai ia gwau, “iseda gabu dekenai dagedage karadia dainai moni bada ita negea,” to unai sibona lasi, kohu momo tanobadadia idauidau iboudiai amo United States taudia be “AIDS gorere idia abia bada, kuku idia ania bada, bona kekero muramura idia inua bada, kekeni momo idia rogorogo kava, bona beibi idia vara neganai edia metau be bada lasi.” Ena hereva dokona be dahaka? Ia gwau: “Bema ita ura iseda bese taudia idia gorere momo lasi, gau badana be iseda kara do ita haidaua.”—Galatia 6:7, 8.
Gorere Momo Lasi Maurina
3 Keristen ginigunadia edia nega lalonai, taunimanima idia diba Greek taudia be tauanina hagoadaia karadia idia laloa bada, masolo idia hagoadaia, bona heau helulu karadia idia karaia. Unai dainai, lauma helaga ese aposetolo Paulo ia rohea tauhau Timoteo ia tore henia totona, ia gwau: “Tauanina hagoadaia kara be namo sisina sibona, to lauma hagoadaia kara be namo bada herea, badina be Dirava ena durua be bada inai mauri lalonai, bona iena gwauhamata gaudia be bada herea mauri gabeai dekenai danu.” (1 Timoteo 4:8) Oibe, Paulo ese ia gwauraia herevana be hari inai negai taunimanima idia lalo-pararalaia, unai hereva be inai, ena be medikal eiava tauanina durua gaudia ita abia, to ita gwau diba lasi unai ese gorere momo lasi maurina ita ia henia. To, Paulo ese ita ia hagoadaia, ia gwau gau badana be lauma dalanai ita goada, bona Dirava badinaia karana ita habadaia.
4. Dirava badinaia karana amo dahaka hahenamo idia vara?
4 Unai bamona kara ese “inai mauri lalonai” ita ia durua badina Dirava idia abia dae lasi taudia, eiava “Dirava badinaia kara be toana sibona” idia abia taudia ese sibodia dekenai idia havaraia kara dikadia be ita davaria lasi. (2 Timoteo 3:5; Hereva Lada-isidia 23:29, 30; Luka 15:11-16; 1 Korinto 6:18; 1 Timoteo 6:9, 10) Edia mauri lalonai Dirava idia badinaia taudia be Dirava ena taravatu bona iena ura idia dekenai idia laloa bada, bona unai ese idia ia hasiahua hahediba herevadia maoromaorodia be edia mauri lalonai idia badinadia totona. Unai dala amo lauma dalanai bona tauanina dalanai idia goada, edia lalona ia hegeregere, bona idia moale. Bona idia be “edia kohu korikori do idia haboua hegaegae, edia mauri gabeai do ia durua totona.”—1 Timoteo 6:19.
5. Paulo be ena revareva karoa iharuana ai, Tito dekenai, dahaka sisiba ia henia?
5 Dirava ena hahediba herevadia maoromaorodia be iseda mauri lalonai ita idia hakaua dainai, hahenamo be hari bona gabeai danu do ita davaria, unai dainai ita badinaia diba herevadia ita ura diba, Dirava ena hahediba herevadia maoromaorodia be iseda mauri lalonai ita badinadia dalana ita ura diba. Aposetolo Paulo ena revareva Tito dekenai ese unai dala ia hahedinaraia. Ita ese unai buka ena karoa iharuana do ita tahua namonamo, unuseniai ia ese Tito ia hagania “hadibaia hereva maoromaorona do [ia] gwauraia” totona. Hari inai negai, reana ita iboudiai, matamatadia bona burukadia, tatau bona hahine, be unai “hadibaia hereva maoromaorona” amo namo ita davaria diba.—Tito 1:4, 5; 2:1.
Sisiba Tatau Badadia Totona
6 Paulo ese kongregesen ena tatau badadia dekenai sisiba ia henidia guna. Mani Tito 2:2 oi duahia. Taunimanima ese “tatau badadia” edia orea idia matauradia, bona edia abidadama bona Dirava ena ura idia badinaia dainai edia haheitalai namona idia abia dae. (Levitiko 19:32; Hereva Lada-isidia 16:31) Unai dainai, kerere bada lasi karana idia karaia neganai, reana haida ese idia dekenai sisiba hereva eiava heduru hereva idia henia garina idia gari. (Iobu 32:6, 7; 1 Timoteo 5:1) Unai dainai, Paulo ese tatau badadia ia hereva henidia guna be hebogahisi karana, bona namona be Paulo ena hereva idia abia dae momokani, bena taunimanima be edia kara idia tohotohoa diba, Paulo ena kara idia tohotohoa diba bamona.—1 Korinto 11:1; Filipi 3:17.
7, 8. (a) “Idia kekero lasi” ena anina ma haida be dahaka? (b) Dahaka dainai idia “laloa maoromaoro” to “mai edia hemataurai do idia noho” danu be gau badana?
7 Keristen tatau badadia edia kara ginigunana be “idia kekero lasi.” Ena be gado gunana ai unai hereva be kekero lasi karana ia gwauraia diba (“sober,” Kingdom Interlinear), to ena anina ta be gima noho, lalona diari, eiava laloa maoromaoro. (2 Timoteo 4:5; 1 Petero 1:13) Unai dainai, idia inuinu eiava kara ma ta idia karaia neganai, tatau badadia edia kara idia namo be gau badana, namo lasi kara ta idia karaia bada eiava idia habadaia kerere.
8 Danu, edia kara ma haida be idia “laloa maoromaoro” bona “mai edia hemataurai do idia noho.” Lagani bada idia davaria taudia momo be anina bada gaudia idia laloa maoromaoro, eiava lo taudia karadia toana namona, bona taunimanima idia matauraia diba karadia idia hahedinaraia. To, idia haida be reana idia laloa maoromaoro lasi, idia be memero kekeni edia goada karadia dainai idia badu. (Hereva Lada-isidia 20:29) Unai dainai “laloa maoromaoro” bona “mai edia hemataurai do idia noho” herevadia idia hahegeregeredia. Tatau badadia edia lagani idia bada dainai namona be anina bada gaudia idia laloa maoromaoro, to danu idia laloa namonamo, bona edia lalona ena hemami bona ura idia biagua.
9. Dahaka dainai tatau badadia edia abidadama bona lalokau ia goada, bona edia haheauka ia goada herea be gau badana?
9 Ma danu, tatau badadia edia kara be “abidadama dekena amo, lalokau dekena amo bona haheauka dekena amo do idia gini goada.” Ena toretore dekenai, nega momo Paulo ese abidadama bona lalokau ia torea neganai, helaro ia torea danu. (1 Korinto 13:13; 1 Tesalonika 1:3; 5:8) Unai siri lalonai ‘helaro’ ia torea lasi, to “haheauka” ia torea. Reana unai bamona ia torea badina taunimanima edia lagani idia momo neganai, hesiku dainai lalona manoka ena mamina do ia vara diba. (Kohelete 12:1) To, Iesu ia gwau, “ena lalona do ia goada noho ela bona dokona, unai tauna be do ia mauri.” (Mataio 24:13) Ma danu, ita gwau diba lasi tatau badadia edia lagani idia momo dainai eiava edia aonega be bada dainai, edia kara be haheitalai namodia sibona, to namona be lauma dalanai inai kara dekenai idia goada danu—abidadama, lalokau, bona haheauka.
Hahine Badadia Totona
10 Murinai, Paulo ese kongregesen ena hahine badadia ia hereva henidia. Mani Tito 2:3 oi duahia. “Hahine badadia” be kongregesen ena lagani bada hahinedia, idia haida be “tatau badadia” edia adavadia bona haida be sinana bona ma haida be tubudia hahinedia. Unai dainai, reana edia siahu be bada, bona namo eiava dika do idia havaraia diba. Unai dainai Paulo be ena hamatamaia herevana lalonai ia gwau “inai bamona danu,” unai ena anina be “hahine badadia” ese kongregesen lalonai edia gaukara do idia hagugurua totona, edia maduna do idia huaia danu.
11. Helaga karana be dahaka?
11 Paulo ia gwau gau ginigunana be hahine “do idia noho namonamo, hahine helagadia [idia karaia] bamona.” “Karaia” ena anina be ta ena lalona ena ura bona ena lalohadai toana ia hahedinaraia. (Mataio 12:34, 35) Vadaeni, namona be Keristen hahine badana ena lalona eiava ena kara bona lalohadai toana be edena bamona? Hereva tamona, namona be ia ‘helaga.’ Unai hereva be Greek gado amo idia hahanaia, bona ena anina be “taunimanima idia karaia be namo gaudia, kara eiava gau haida Dirava dekenai idia hahelagaia.” Unai be sisiba namona badina unai hahine badadia be mai edia siahu ma haida dekenai, hegeregere kongregesen ena hahine matamatadia dekenai edia siahu be bada.—1 Timoteo 2:9, 10.
12. Malana gaukaralaia kerere garina ita ibounai be dahaka do ita dadaraia be namo?
12 Murinai, karaia lasi kara rua ia gwauraidia: “haida edia ladana do idia hadikaia lasi, bona inuinu kekero ese idia do ia biagua lasi.” Unai be mai anina badina unai kara rua idia hakapua tamona. Profesa E. F. Scott ia gwau: ‘Idaunegai, uaina sibona ia noho idia inua totona, bona unai uaina pati maragidia dekenai hahine badadia be edia dekena taudia edia ladana idia hadikaia.’ Nega momo tatau lasi, to hahine ese taunimanima edia namo idia laloa momo, bona unai be kara namona. Ena be taunimanima edia namo idia laloa guna, to reana gabeai idia udu mauri henidia bona edia ladana idia hadikaia, unai be ia momokani bema uaina idia inua bona edia malana idia biagua lasi. (Hereva Lada-isidia 23:33) Oibe, mauri namona badinaia dalana idia tahua tatau bona hahine iboudiai be do idia naria namonamo, unai hekwakwanai dekenai do idia moru garina.
13. Hahine badadia be edena dala haida ai idia be hadibaia taudia?
13 Dala namona ai nega idia gaukaralaia namonamo totona, hahine badadia ia hagoadadia “kara namo do idia hadibaia” totona. Siri ma haida dekenai, Paulo ese ia hahedinaraia goevagoeva hahine be kongregesen lalonai hadibaia gaukara do idia karaia lasi. (1 Korinto 14:34; 1 Timoteo 2:12) To, unai ese ia koudia lasi, edia ruma bese taudia bona taunimanima ma haida dekenai mai anina bada herevana Dirava ena sivarai dekenai idia do hadibadia diba. (2 Timoteo 1:5; 3:14, 15) Kongregesen lalonai, hahine badadia edia Keristen haheitalai namona amo hahine matamatadia idia durua bada diba, murinai siridia ese idia hahedinaraia hegeregerena.
Hahine Matamatadia Totona
14 Paulo ese hahine badadia ia hagoadadia neganai “kara namo do idia hadibaia” totona, ia ese hahine matamatadia ia herevalaidia danu. Mani Tito 2:4, 5 oi duahia. Ena be iena sisiba hereva momo be edia ruma gaukarana dekenai, to namona be Keristen hahine matamatadia be idia laloa namonamo, namo lasi unai gaukara ese edia mauri ia biagua. To, namona be idia ‘laloa maoromaoro, do idia noho namonamo mai laloa goevagoeva danu, . . . idia hebogahisi,’ bona gau badana be idia ura Keristen kwara dagidia idia badinaia, “unai dekena amo tau ta ese Dirava ena Sivarai Namona do ia hadikaia diba lasi.”
15. Kongregesen lalonai, dahaka dainai hahine matamatadia momo ita hanamodia be namo?
15 Hari inai negai, ruma bese edia noho hebou dalana be idau, ia be Paulo ena negai hegeregerena lasi. Ruma bese momo herea lalodiai edia tomadiho idia idau, bona momo herea lalodiai tamana eiava sinana sibona ia noho. Tama, sina, bona natudia idia noho ruma besedia lalonai, nega momo hahine eiava sinana taudia be ruma gaukarana sibona lasi, to ma gaukara ta idia karaia danu. Unai dainai, Keristen hahine matamatadia dekenai metau bada ia noho idia huaia totona, to namo lasi idia laloa Baibel ia gwauraia gaukarana idia reaia diba. Ai moale bada badina mai edia abidadama hahine matamatadia momo be idia goada karaia edia gaukara idauidau idia karaia namonamo totona, bona edia mauri lalonai Basileia gaukara idia atoa guna, idia haida be ful-taim heduru pioneer eiava regular pioneer hesiai gaukara idia karaia. (Mataio 6:33) Idia ita hanamoa bada be namo!
Uhau Taudia Totona
16 Murinai, Paulo ese uhau taudia, Tito danu, ia hereva henidia. Mani Tito 2:6-8 oi duahia. Hari inai negai, uhau taudia momo be taravatu idia badinaia lasi bona dika idauidau idia karaia—kuku idia ania, drag idia ania bona kekero muramura idia inua bada, idia sihari kava, bona tanobada ena kara ma haida, hegeregere spot gadara dikadia bona miusik bona moale karadia dikadia—unai dainai bema Keristen uhau taudia idia ura edia mauri lalonai hahediba herevadia maoromaorodia idia badinaia, unai sisiba hari idia abia be mai anina bada.
17. Tauhau ta be edena bamona ia “laloa maoromaoro” diba bona “kara namodia ia hedinaraia” diba?
17 Keristen tauhauna be tanobada uhau taudia momo bamona lasi, iena kara be ia “laloa maoromaoro” bona “kara namodia do [ia] hedinaraia.” Paulo ia gwau ta ia laloa maoromaoro bona lalo-parara lalona abia dalana be stadi amo sibona lasi, to abia dalana be “edia lalona idia hadibaia lou, hadibaia lou, ela bona idia manada vadaeni. Unai neganai idia be maoro bona kerere edia toana idia diba namonamo.” (Heberu 5:14) Ita moale badina ita itaia uhau taudia momo ese edia nega bona goada idia henia Keristen kongregesen ena gaukara idauidau idia karaia totona, bona edia uhau ena goada idia negea kava lasi sibodia edia ura idia karaia totona! Unai neganai, idia be Tito bamona, Keristen kongregesen lalonai edia “kara namodia” amo idia be haheitalai namona ai idia lao diba.—1 Timoteo 4:12.
18. Mai momokani ida hahediba idia karaia, idia laloa maoromaoro bona idia hereva maoromaoro, ena anina be dahaka?
18 Uhau taudia dekenai ia gwau lou, namona be “mai momokani bona laloa maoromaoro danu hereva momokani idia dekenai do [idia] hadibaia. Vadaeni [edia] hereva be maoromaoro dainai tau ta ese [idia] do ia gwauraia kerere diba lasi.” Hahediba herevadia be “mai momokani” danu idia hadibaia totona, gau badana be Dirava ena Hereva amo idia hadibaia; unai dainai, uhau taudia be Baibel idia stadilaia goadagoada be gau badana. Tatau badadia hegeregeredia, namona be uhau taudia be idia laloa maoromaoro. Namona be idia lalo-parara idia be Dirava ena Hereva idia harorolaia taudia, bona unai be mai anina bada maduna, unai dainai, “Sivarai Namona ena dala hegeregerena do [idia] mauri noho” be gau badana. (Filipi 1:27) Danu, namona be idia hereva “maoromaoro” bena ta ese idia “ia gwauraia kerere diba lasi,” bona badu taudia ese edia gaukara do idia gwauraia dika diba lasi.—2 Korinto 6:3; 1 Petero 2:12, 15.
Igui Hesiai Taudia Totona
19 Ena hereva dokona dekenai, Paulo ese biaguna henunai idia gaukara taudia ia hereva henidia. Mani Tito 2:9, 10 oi duahia. Hari inai negai, ita momo lasi be igui hesiai taudia, to momo be moni gaukara idia karaia bona idia gaukara taunimanima ma haida idia hesiai henia totona. Unai dainai, hari inai negai, Paulo ia gwauraia sisiba herevadia be mai anina bada danu.
19, 20. Biaguna henunai idia gaukara taudia be edia kara ibounai dekenai “hairai bona mataurai Sivarai Namona be iseda Hahemauri Tauna Dirava ena” be edena bamona idia hahedinaraia?
20 To “edia biaguna do idia kamonai henia. Gaukara namona do idia karaia nega ibounai” ena anina be moni gaukara idia karaia Keristen taudia be edia biaguna bona edia naria taudia idia matauraidia be gau badana. (Kolose 3:22) Danu, namona be taunimanima idia diba idia be gaukara namonamo taudia, bona dina ibounai idia gaukara, biaguna ia ura hegeregerena. Bona edia gaukara gabudia dekenai Keristen ena kara goeva idia badinaia noho be gau badana, herevana haida ese unai bamona idia karaia lasi. Unai idia karaia “hairai bona mataurai Sivarai Namona dekenai do idia havaraia. Inai ita hadibaia Sivarai Namona be iseda Hahemauri Tauna Dirava ena,” bona edia kara ibounai dekenai idia ura hahedinaraia. Nega momo ita kamonai taunimanima ese Witness taudia edia kara namodia idia itaia dainai, idia ida idia gaukara hebou turadia eiava gaukara taudia haida ese hereva momokani idia kamonai henia, bona unai be moale gauna! Hadibaia herevadia maoromaorodia be edia gaukara gabunai danu idia badinaia neganai, Iehova ese idia dekenai unai hahenamo ia henia.—Efeso 6:7, 8.
Idia Goeva Taudia
21 Paulo ese ia gwauraia hahediba herevadia maoromaorodia be iseda ura hegeregerena do ita badinadia taravatu bamona lasi eiava mauri ena kara goeva lalohadaidia mo sibona lasi. Paulo ese unai hereva ena anina ia gwauraia. Mani Tito 2:11, 12 oi duahia. Iehova Dirava ese ita ia lalokau henia bona ita ia hebogahisi henia dainai, hahediba herevadia maoromaorodia ita ia henia, bona hari inai metau momo bona gari bada negana lalonai, mauri namona mai moalena ita abia diba dalana ita ia hadibaia. Oi ura hahediba herevadia maoromaorodia oi abidia dae bona oiemu mauri lalonai oi badinadia, a? Unai oi karaia neganai hahemauri do oi davaria.
22, 23. Hahediba herevadia maoromaordia be iseda mauri lalonai ita badinaia neganai, dahaka hahenamo ita davaria?
22 Unai mo sibona lasi, to hahediba herevadia maoromaorodia be iseda mauri lalonai ita badinadia neganai, unai be maduna namona hari inai negai, bona dina vaira totona moale helarona ita ia henia. Mani Tito 2:13, 14 oi duahia. Oibe, hahediba herevadia maoromaorodia be iseda mauri lalonai ita badinadia neganai, unai ese ita ia hagoevaia bona inai kara dika bona ia ore gwauraia tanobadana amo ita be idau. Paulo ena hereva bona Sinai dekenai Mose ese Israel natudia ia hereva henidia herevana be idia hegeregere, ia gwau: “Iehova ia gwau, . . . ia ese umui do ia abia isi, ia karaia besedia iboudiai atai ai, hahenamo bona ladana bada bona hairai do idia vara; Iehova, emui Dirava, ena bese helagana ai do umui lao, iena gwauhamata hegeregerena.”—Deuteronomi 26:18, 19.
23 Iehova ese ita ia hagoevaia bona ita be iena bese taudia dainai, namona be hanaihanai hahediba herevadia maoromaorodia badinaia karana amo ita hahedinaraia unai ita laloa bada! Namona be hanaihanai ita gima noho Dirava negea karana bona tanobada ena lebulebu karadia ita rakatania totona, unai amo ita goeva noho diba bona ita hegeregere dainai, hari inai negai, Iehova ese iena gaukara badana karaia totona ita ia gaukaralaia diba.—Kolose 1:10.
Inai Oi Laloatao, A?
◻ Gau ibounai dekenai, dahaka dainai Dirava badinaia kara ese namo ia havaraia?
◻ Tatau bona hahine badadia be edena bamona hahediba herevadia maoromaorodia be edia mauri lalonai idia badinadia diba?
◻ Kongregesen lalonai, uhau taudia bona hahine matamatadia dekenai Paulo ese dahaka hahediba herevadia maoromaorodia ia henidia?
◻ Bema hahediba herevadia maoromaorodia be iseda mauri lalonai ita badinadia, dahaka gaukara maduna bona hahenamo ita abia diba?
1, 2. Idia gorere momo lasi totona taunimanima be dahaka idia karaia, to dahaka ia vara?
3. Idaunegai Greek taudia edia kara dainai, Paulo ese dahaka sisiba ia henia?
6. “Tatau badadia” dekenai Paulo ese dahaka sisiba ia henidia, bona dahaka dainai unai ia karaia be hebogahisi karana?
10. Kongregesen lalonai, “hahine badadia” totona, Paulo be dahaka sisiba ia henia?
14. Keristen hahine matamatadia be edena bamona idia hahedinaraia diba edia ruma gaukara dekenai idia laloa namonamo?
16. Paulo ese uhau taudia dekenai dahaka sisiba ia henidia, bona dahaka dainai ita gwau hari inai negai unai sisiba idia abia be mai anina bada?
21. Dahaka dainai Iehova ese hahediba herevadia maoromaorodia ita ia henia, bona dahaka ita karaia be namo?
[Picture on page 18]
Hari inai negai taunimanima momo be Tito 2:2-4 ena sisiba idia badinaia