Dirava Ia Ura Hahine Ita Matauraia

IESU be tanobada ai ia noho neganai, iena guba Tamana ena kara ia hahedinaraia goevagoeva. Iesu ia gwau: “Lau be sibona egu ura dekenai gau ta lau karaia lasi, to Tamana ese lau ia hadibaia hegeregerena, unai gaudia lau herevalaia. . . . Hanaihanai ia hamoalea gaudia lau karaia.” (Ioane 8:28, 29; Kolose 1:15) Iesu ese hahine ia hereva henia bona kara henia dalana ita laloa neganai, Iehova ena lalohadai hahine dekenai bona ia ura hahine ese do idia karaia gaudia do ita lalopararalaia.

Diba bada taudia haida be Evanelia bukadia idia stadilaia neganai, idia davaria Iesu ena lalohadai hahine dekenai be ma haida edia amo ia idau. Edena dala ai? Bona Iesu ena hadibaia karana ese hari inai negai hahine ia durua, a?

Iesu ese Hahine Ia Kara Henia Dalana

Iesu ia gwau lasi hahine edia gaukara be tatau edia ura sibona do idia hagugurua. Iuda tomadiho gunalaia taudia idia laloa, bema tau ta be hahine ta danu ia herevahereva, unai ese tau ena lalona do ia veria bena matabodaga karadia do idia karaia. Unai dainai, pablik ai hahine be tatau idia hereva henia lasi bona edia kwarana be dabua amo idia koua. To, Iesu ese tatau ia sisiba henia edia tauanina ena ura idia biagua namonamo bona hahine do idia matauraia, bona namo lasi hahine idia koua ma haida idia hereva henia totona.​—Mataio 5:28.

Danu Iesu ia gwau: “Bema tau ta be ena headava ia hadokoa bona hahine ma ta ia adavaia, ia be ia heudahanai bona ena hahine dekenai ia kara dika.” (Mareko 10:11, 12) Unai dainai, ia ese Iuda tomadiho ena hahediba herevana ia dadaraia, unai hahediba herevana lalonai, idia gwau tatau be “badina idauidau dainai” edia headava idia hadokoa be maoro. (Mataio 19:3, 9) Iuda taudia momo ese idia abia dae lasi lalohadaina be inai: Bema tau ese “hahine ma ta ia adavaia, ia be ia heudahanai bona ena hahine dekenai ia kara dika.” Edia rabi taudia idia gwau, tau be ia heudahanai diba lasi, unai be hahine sibona ese ia karaia karana. Baibel ia herevalaia bukana ta ia gwau, ‘Iesu ese tau dekenai ia henia sisiba be hahine dekenai ia henia danu, unai ese ia hahedinaraia hahine danu be ladana namona idia abia diba.’

Iena hadibaia hereva ese hari taunimanima ia durua: Iehova ena Witnes taudia edia Keristani kongrigeisen lalonai, tatau bona hahine idia noho. Hahine be tatau huanai idia noho neganai idia gari lasi, badina Keristani tatau ese ‘hahine badadia idia hereva henidia, edia sinana bamona. Kekeni matamatadia idia hereva henia, edia taihudia bamona, mai kudou goevana ida.’​—1 Timoteo 5:2.

Nega ia atoa hahine ia hadibadia totona. Rabi taudia idia laloa hahine ese edia lalohadai idia gwauraia be anina lasi, to Iesu ese hahine ia hadibaia bona hagoadaia edia lalohadai idia gwauraia totona. Iesu ia moale badina Maria ia helai bona ena hereva ia kamonai, unai amo ia hahedinaraia hahine be ruma gaukara sibona do idia karaia lasi. (Luka 10:38-42) Iesu ese Maria dekenai ia hadibaia herevadia ese Mareta ia durua danu, Lasaro ia mase murinai Mareta ese Iesu ia haere henia dalana amo unai ia hedinarai.​—Ioane 11:21-27.

Hahine ese edia lalohadai idia gwauraia neganai Iesu ia kamonai. Iesu ena negai, Iuda hahinedia idia laloa, bema edia natuna be mero bona peroveta tauna ai ia lao, unai be moale gauna. Hahine ta be Iesu dekenai ia gwau: “Oi ia havaraia . . . hahinena be ia moale!” Iesu be unai negai, ia dekenai mai anina bada gauna ta ia hadibaia. (Luka 11:27, 28) Iesu ese unai hahine dekenai ia hahedinaraia Dirava ena hereva kamonai henia karana be mai anina bada.​—Ioane 8:32.

Iena hadibaia hereva ese hari taunimanima ia durua: Keristani kongrigeisen ai hadibaia gaukara idia karaia taudia ese hahine edia haere karana idia moalelaia. Idia ese hahine badadia idia matauraia, badina edia hereva bona kara amo ma haida dekenai “kara namodia idia hadibaia.” (Tito 2:3) Danu, idia diba hahine ese Dirava ena Basileia sivarai namona be taunimanima ibounai dekenai idia harorolaia diba.​—Salamo 68:11, NW; rau 9 ai maua ladana, “Aposetolo Paulo be Hahine Ia Taravatua Do Idia Hereva Lasi, A?” itaia.

Iesu ese hahine ia lalodia bada. Baibel negadiai, natuna memero be idia laloa bada to kekeni be idia laloa bada lasi. Iuda tomadiho edia buka ta (Talmud) ia gwau: “Mai edia natuna memero be idia moale, to mai edia natudia kekeni be idia lalohisihisi.” Tama sina haida idia laloa natuna kekeni be maduna metauna ta bamona​—ena adavana ta do idia tahua, tau ena famili dekenai moni o kohu do idia henia bona idia buruka neganai unai natuna kekeni be idia do ia naria lasi.

Iesu ia hahedinaraia memero bona kekeni edia mauri be mai anina bada. Unai dainai, Nain hanua ai vabu ta ena natuna mero ia hatorea isi lou hegeregerena, ia ese Iairo ena natuna kekeni ia hatorea isi lou danu. (Mareko 5:35, 41, 42; Luka 7:11-15) Hahine ta be “lagani 18 lalonai demoni ena siahu dainai ia gorere,” to Iesu ese ia hanamoa lou murinai, unai hahine ia gwauraia “Aberahamo ena bese,” unai hereva be Iuda toretoredia ai ia noho lasi. (Luka 13:10-16) Iesu ena hereva amo ia hahedinaraia unai hahine be taunimanima ibounai hegeregerena bona mai ena abidadama.​—Luka 19:9; Galatia 3:7.

Iena hadibaia hereva ese hari taunimanima ia durua: Asia taudia edia aonega herevana ta ia gwau: “Natuna kekeni naria karana be emu neiba ena uma oi naria bamona.” Anina be natuna kekeni ese famili do ia durua lasi. Namo lasi lalokau Keristani tama sina be unai lalohadai ese ia biagudia, to namona be edia natudia memero bona kekeni idia naria namonamo. Namona be edia natudia ese edukeisen namona idia abia bona edia helt ia namo.

Hahine edia hereva ia abia dae danu. Iuda taudia edia kota lalonai, bema hahine ta ia hereva, idia laloa iena hereva be igui hesiai tauna ta ena bamona. Histori torea tauna Josephus ia gwau: “Hahine edia hereva umui abia dae lasi, badina edia hereva be anina lasi.”

To Iesu be idau, ia ese hahine ia hadibadia iena toreisi lou sivaraina idia gwauraia hedinarai totona. (Mataio 28:1, 8-10) Ena be unai hahine idia itaia edia Lohiabada be taunimanima ese idia hamasea bona guria, to aposetolo taudia ese edia hereva idia abia dae lasi. (Mataio 27:55, 56, 61; Luka 24:10, 11) To Iesu ia toreisi lou neganai, hahine haida dekenai ia hedinarai guna, unai ese ia hahedinaraia hahine danu be ia idia gwauraia hedinarai diba, iena hahediba taudia bamona.​—Kara 1:8, 14.

Iena hadibaia hereva ese hari taunimanima ia durua: Iehova ena Witnes taudia edia kongrigeisen lalonai, maduna idia huaia tatau ese hahine edia hereva idia kamonai danu, unai amo idia hahedinaraia hahine idia laloa bada. Keristani tatau ese edia adavadia edia hereva idia kamonai namonamo, unai amo “hemataurai” karana idia hahedinaraia.​—1 Petero 3:7; Genese 21:12.

Baibel Ena Hakaua Herevadia ese Hahine Ia Durua Idia Moale

Tatau ese Keriso idia tohotohoa neganai, hahine idia matauraia bona edia ura kwalimu idia koua lasi, matamanai Dirava ena ura be unai bamona. (Genese 1:27, 28) Keristani tatau idia laloa lasi idia ese hahine idia hereaia, to Baibel ena hakaua herevadia idia badinaia dainai edia adavana idia moale.​—Efeso 5:28, 29.

Yelena be Baibel ia stadilaia matamaia neganai, ena adavana ese ia dagedage henia. Ena adavana ia tubu daekau gabuna ai, tatau be idia ura adavaia hahine idia henaoa bona hahine idia dadabaia momo. Yelena ia gwau: “Baibel amo lau dibaia gaudia ese lau ia hagoadaia. Lau laloparara ta be lau ia lalokau henia bona laloa bada, danu lau diba bema egu adavana be Baibel ia stadilaia ena kara do ia haidaua.” Ena adavana be Baibel ia stadilaia matamaia, gabeai bapatiso ia abia bona Iehova ena Witnes tauna ai ia lao neganai, ena kara ia haidaua. Yelena ia gwau: “Hari egu adavana be iena kara ia biagua namonamo, bona dika gwauatao heheni karana ai dibaia.” Yelena ma ia gwau: “Baibel ena hakaua herevadia ese lau idia durua dainai lau mamia egu adavana be lau ia ura henia, bona lau ia naria namonamo.”​—Kolose 3:13, 18, 19.

Yelena dekenai ia vara gaudia be ma haida dekenai ia vara danu. Keristani hahine milioni idia moale badina edia adavadia ida idia gaukara goada edia headava lalonai Baibel ena hakaua herevadia idia badinaia totona. Edia Keristani turadia idia bamoa neganai, idia mamia hemataurai ia noho, idia hagoadaia heheni, bona gau idauidau idia karaia diba.​—Ioane 13:34, 35.

Keristani tatau bona hahine idia laloparara idia be goevadae lasi taudia dainai “anina lasi maurina idia abia.” To bema Iehova, edia lalokau Diravana bona Tamana unai, kahirakahira idia lao, Dirava ese idia be “dika ena igui amo do ia ruhadia, bona Dirava ena natudia edia ura kwalimu hereadaena do idia abia.” Dirava ena henari henunai, unai hahenamo be tatau bona hahine ese do idia moalelaia!​—Roma 8:20, 21.