Edena Pata Dekenai Umui Aniani?
“[Iehova] ena pata dekenai noho aniani bona lauma dikadia edia pata dekenai noho aniani ruaosi be nega tamona umui ania diba lasi.”—1 KORINTO 10:21.
1. Ita vairanai dahaka pata idia hedinarai, bona idia dainai aposetolo Paulo ese ita ia henia sisiba be dahaka?
LAUMA helaga ese ia rohea dainai aposetolo Paulo ena hereva ena anina be taunimanima vairadiai pata rua idia hedinarai. Unai pata ruaosi edia idau toana be latanai idia atoa aniani ese idia hahedinaraia, bona ita ibounai be unai pata ta amo ita aniani. To, bema ita ura Dirava ita hamoalea, iena pata sibona amo ita aniani, namo lasi murinai ma lauma dikadia edia pata dekenai aniani sisina ita ania. Aposetolo Paulo ia sisiba, ia gwau: “Iuda lasi taudia edia boubou gaudia be lauma dikadia dekenai idia henia, Dirava dekenai idia henia lasi. Lau ura lasi lauma dikadia danu umui gaukara hebou. [Iehova] ena kapusi bona lauma dikadia edia kapusi ruaosi umui inua diba lasi. [Iehova] ena pata dekenai noho aniani bona lauma dikadia edia pata dekenai noho aniani ruaosi be nega tamona umui ania diba lasi.”—1 Korinto 10:20, 21.
2. (a) Idaunegai Israel dekenai Iehova ena pata be dahaka, bona daidia be herohemaino boubou karana lalonai idia vareai? (b) Hari inai negai, Iehova ena pata amo ita aniani ena anina be dahaka?
2 Paulo ena hereva dainai ita be idaunegai Israel taudia ita lalodia, idia be Iehova ena Taravatu hegeregerena herohemaino boubou idia henia. Dirava dekenai boubou idia henia gabuna ena ladana be pata, bona bouboulaia animal ia mailaia tauna be Iehova bona hahelaga taudia ida idia lalo-tamona. Edena bamona? Gau ginigunana be, Iehova be unai boubou karana lalonai ia vareai badina animal ena rara be iena boubou patana dekenai idia bubua bona boubou patana henunai ia noho lahina ese ena digara ia gabua ore. Gau iharuana be, hahelaga tauna be unai boubou karana lalonai ia vareai badina ia (bona ena ruma bese taudia) be idia gabua animal ena kemena bona aena idibana hidiona idia ania. Bona gau ihatoina be, boubou ia henia tauna ia vareai badina hidio orena ibounai ia ania. (Levitiko 7:11-36) Hari inai negai, Iehova ena pata amo ita aniani ena anina be iena ura hegeregerena ita tomadiho henia, Iesu bona iena aposetolo taudia ese idia hahedinaraia hegeregerena. Unai ita karaia totona, Iehova ese iena Hereva bona iena orea amo ita ia henia lauma anianidia ita ania be gau badana. Israel taudia be Iehova danu idia lalo-tamona bona iena pata dekenai idia aniani, bona taravatu ia henidia lauma dikadia edia pata dekenai boubou idia henia lasi totona. Lauma Israel taudia bona edia turadia, “mamoe idaudia,” be Dirava ese ia henia taravatuna henunai idia do noho.—Ioane 10:16.
3. Hari inai negai, lauma dikadia edia pata amo ita aniani kerere dalana be dahaka?
3 Hari inai negai, edena bamona dala ai ita be lauma dikadia edia pata amo ita aniani kerere diba? Unai ita karaia bema Iehova dadaraia karadia ita habadaia neganai. Lauma dikadia edia pata dekenai demoni edia hereva koikoi iboudiai idia noho, unai hereva amo ita idia hakaua kerere toho, Iehova do ita rakatania totona. Daika ia ura ena kudouna bona lalona be unai mase muramurana amo do ia ubua? Hari inai negai, taunimanima momo be tuari bona kohu diravadia dekenai boubou karana idia karaia, to Keristen momokani taudia be unai boubou karana lalonai idia vareai lasi.—Mataio 6:24.
“Lauma Dikadia Edia Pata” Dadaraia
4 Ita ibounai vairanai ia noho henanadai be inai, Lau be edena pata amo lau aniani? Momokani, ita diba pata be rua bona ita ibounai be idia ta amo ita aniani. (Mataio 12:30 itaia danu.) Namo lasi ita be mai iseda ura ida lauma dikadia edia pata amo ita aniani. Bema unai bamona ita karaia, ia mauri noho Dirava momokanina, Iehova, ena lalo-namo ita dekenai do ia doko. To, bema Iehova ena pata sibona amo ita aniani, mai moale danu noho hanaihanai maurina do ita davaria diba! (Ioane 17:3) Aonega hereva ta ia gwau, tau ta ia aniani hegeregerena ena toana ia hedinarai. Vadaeni, bema ta ia ura ena tauanina bona ena lalona idia goada, dahaka ia ania ia naria namonamo. Ena be muramura idauidau idia atoa bona ena mamina be namo herea, to mai ena digara anianina ese iseda tauanina ia durua lasi, unai hegeregerena, inai tanobada ena koikoi herevadia lalonai lauma dikadia edia hereva koikoi idia noho, bona unai be aniani dikana bamona, iseda lalona do idia hadikaia diba.
5. Hari inai negai, lauma dikadia edia hahediba hereva ita abidia dae garina, dahaka ita karaia be namo?
5 Aposetolo Paulo ese ia perovetalaia hegeregerena, dina dokodia lalodiai, “lauma dikadia edia hadibaia hereva” be taunimanima do idia hakaua kerere. (1 Timoteo 4:1) Unai lauma dikadia edia hadibaia herevadia be tomadiho koikoi edia hahediba sibona amo idia mai lasi, to dala ma haida amo idia harorolaia. Unai dainai, namona be ita bona iseda natudia ita laloa namonamo bona iseda lalona ita hadaia, dahaka buka bona magasin do ita duahia, o dahaka televisen program do ita raraia, bona dahaka drama bona muvini piksa do ita itaia. (Hereva Lada-isidia 14:15) Ita laga-ani neganai, ita duahia buka ena sivarai lalonai dagedage, sihari kava, eiava meamea karadia ia kikilaia, a? Bema buka ita duahia diba ita tahua totona, unai buka be taunimanima edia aonega herevana ta eiava ma mauri dalana ta ia sivarailaia, to unai hereva be “Keriso dekena amo lasi,” a? (Kolose 2:8) Taunimanima edia anina lasi herevadia ia gwauraidia, eiava ia gwau tanobada ena orea namodia lalodiai ita vareai be namo, a? Emu lalona ia veria do oi taga totona, a? (1 Timoteo 6:9) Unai buka be hehuni dalanai, Keristen lasi dala amo, taunimanima hapararaia hahediba herevadia ia hahedinaraia, a? Bema ita duahia bukana be unai bamona, to ita duahia noho eiava unai piksa ita raraia noho, ita be lauma dikadia edia pata dekenai ita aniani unai. Hari inai negai, buka bona magasin idauidau tausen momo be taunimanima edia aonega herevadia idia abia isi, bona momo ese unai hereva idia moalelaia bona idia laloa unai be diba mai anina bada herea bona diba matamata hereadia. (Kohelete 12:12) To unai bamona koikoi herevadia be harihari sibona idia vara lasi; bona taunimanima ia durudia lasi bona ia hanamodia lasi, unai be gunaguna neganai, Satana ena aonega hereva ese Eva ia durua lasi bamona.—2 Korinto 11:3.
6. Satana ese ita ia boiria, iena lauma dikadia edia aniani digarana ita ania neganai, dahaka do ita karaia be namo?
6 Unai dainai, Satana ese ita ia boiria neganai iena lauma dikadia edia digara aniani ita ania totona, dahaka do ita karaia be namo? Namona be Iesu bamona ita karaia, Satana ese ia dibagania, ia gwau nadi be paraoa ai do ia halaoa neganai. Iesu ese ia haere henia, ia gwau: “Buka Helaga lalonai ia torea vadaeni, ‘Aniani sibona dekena amo taunimanima do idia mauri lasi, to [Iehova] ena uduna dekena amo idia mai hereva ibounai ese mauri ia henia.’ ” Bona Diabolo be Iesu dekenai “tanobada edia basileia ibounai mai edia hairaina danu” ia henia diba bema Satana vairanai nega tamona ia tomadiho henia, to Iesu ia gwau: “[Satana] e, idau gabu dekenai oi lao, badina be Buka Helaga lalonai ia torea, ia gwau, ‘[Iehova] oiemu Dirava do oi tomadiho henia, ia sibona dekenai hesiai gaukara do oi karaia.’ ”—Mataio 4:3, 4, 8-10.
7. Bema ita laloa ita be Iehova ena pata amo bona lauma dikadia edia pata amo ita aniani diba, dahaka dainai ita sibona ita koia unai?
7 Iehova ena pata bona ia idia inai henia lauma dikadia edia pata idia haboua tamona diba lasi! Oibe, gunaguna, nega haida unai idia karaia toho. Namona be idaunegai Israel taudia, peroveta tauna Elia ena nega lalonai, oi lalodia. Taunimanima idia gwau Iehova idia tomadiho henia, to idia laloa dirava ma haida, hegeregere Baal, amo taga do idia davaria diba. Elia be taunimanima dekenai ia raka lao, ia hereva henidia, ia gwau: “Lalona rua dekenai do umui kara gageva ela bona edena negai? Bema Iehova be Dirava [momokanina], ia murinai umui raka; to bema Baal, ia murinai umui raka.” Momokani, Israel taudia be idia raka namonamo lasi badina “guna idia raka aena tamona dekenai bena murinai aena iharuana dekenai ma idia raka.” (1 Hanua Pavapavadia 18:21; The Jerusalem Bible) Elia be Baal ena hahelaga taudia dekenai ia boiboi, ia gwau idia tomadiho henia diravana ena siahu do idia hamomokania. Ia gwau guba amo lahi do ia hadihoa bona boubou gauna do ia gabua diravana be Dirava momokanina. Ena be idia hekwarahi bada herea, to Baal ena hahelaga taudia idia kwalimu lasi. Bena Elia ia guriguri, ia gwau: “Lau oi haere henia, Iehova e, lau oi haere henia; bena inai bese taudia do idia diba oi, Iehova, be Dirava momokanina.” Bena Iehova ena lahi be guba amo ia moru diho bona ranu amo idia hapariparia animal boubouna ia araia ore. Iehova ese mai siahu ida ia hahedinaraia ia be Dirava, bona ena kara idia itaia dainai, taunimanima be Elia ena hereva idia kamonai bena Baal ena peroveta taudia iboudiai 450 idia hamasedia. (1 Hanua Pavapavadia 18:24-40) Vadaeni, hari inai negai danu, bema ita do karaia lasi, namona be ita abia dae Iehova be Dirava momokanina bona iseda lalona ita hadaia, ia sibona ena pata amo do ita aniani.
‘Kamonai Hesiai Tauna’ be Iehova Ena Pata ai Ia Hesiai
8 Lohiabada Iesu Keriso ese ena giroa mai negana lalonai “hesiai tauna mai ena kamonai bona mai ena kara maoromaoro” be iena hahediba taudia dekenai lauma aniani do ia henidia, ia perovetalaia. Ia gwau: “Ena biaguna do ia mai neganai do ia davaria, unai bamona ia karaia noho tauna be ia namo. Umui lau hamaoroa momokani, ena kohu ibounai naria tauna do ia halaoa.” (Mataio 24:45-47) Unai hesiai tauna be taunimanima tamona lasi, to ia be idia gwauhamata bona horoa Keristen taudia oreana. Unai orea taudia ese Iehova ena pata dekenai lauma aniani namodia idia atoa, horoa taudia bona “hutuma bada herea” taudia ese do idia ania totona. Hari, hutuma bada herea taudia edia namba be milion hani ia hanaia, bona idia be horoa orena taudia ida idia gini hebou, bona idia abia dae Iehova Dirava be guba bona tanobada edia lohia bona iena Basileia ese iena helaga ladana do ia hahelagaia.—Apokalupo 7:9-17.
9. Hesiai oreana ese Iehova ena Witness taudia dekenai lauma aniani ia henidia totona dahaka ia gaukaralaia, bona peroveta hereva lalonai edia lauma aniani ariana be edena bamona ia herevalaia?
9 Unai kamonai hesiai oreana be Watch Tower Bible and Tract Society ia gaukaralaia Iehova ena Witness taudia iboudiai dekenai lauma aniani ia henidia totona. Kerisendom bona inai nega dikana lalonai taunimanima momo be mauri ia henia lauma anianina idia ania lasi dainai idia hitolo mase, to Iehova ena taunimanina be aria idia abia. (Amos 8:11) Unai ese Isaia 25:6 ena peroveta herevana ia hagugurua. Ia gwau: “Inai ororo ai tuari oreadia edia Dirava, Iehova, ese aria namo herea do ia karaia, bese iboudiai edia; aniani mai digarana, uaina negarina.” Is 25 Siri 7 bona 8 idia hahedinaraia hegeregerena, unai aria be do ia noho ela bona hanaihanai. Hari inai negai, Iehova ena tanobada oreana lalonai idia noho taudia iboudiai be hahenamo idia davaria, bona vaira neganai danu hahenamo do idia davaria noho!
Lauma Dikadia Edia Pata ai Mase Havaraia Muramurana Garina Oi Gari
10 Lauma dikadia edia pata dekenai ia noho aniani be mase muramurana. Hegeregere, hesiai tauna dikana oreana bona hereva momokani idia dadaraia taudia idia henia aniani ita laloa. Unai aniani be tauanina ia durua lasi bona ia hagoadaia lasi; ia be aniani namona lasi. Hereva momokani idia dadaraia taudia be hari Iehova ena pata amo idia aniani lasi, unai dainai idia henia aniani be ia namo diba lasi. Momokani, ena be guna mauri matamatana idia atoa, to hari unai ia boio vadaeni. Lauma helaga ese idia ia haduaia lasi, to mai edia lalo-dika danu idia hereva. Edia ura be tamona—idia ura edia hesiai turadia gunadia idia botadia, Iesu ia perovetalaia hegeregerena.—Mataio 24:48, 49.
11 Hegeregere, gunaguna, lagani 1909 ai, unai nega ena Watch Tower Society ena presiden, C. T. Russell, be ena toretore lalonai, Iehova ena pata idia rakatania bona ena hesiai taudia idia botadia taudia edia sivarai ia kikilaia. Gima Kohorona, October 1, 1909 gauna, ia gwau: “Bema taunimanima be Society bona ena gaukara idia rakatania, sibodia idia hanamoa lasi bona abidadama dekenai ma haida idia hagoadaia lasi lauma huahua idia habadaia totona, edia kara be idau—guna idia be Hereva Momokani ena hesiai gaukara idia karaia, to hari idia ura unai gaukara idia hadikaia, bona mai edia boiboi bada ida, sisina sisina idia boio bamona, idia sibodia dekenai dika idia mailaia, bona idia hegeregeredia, gwau-edeede laumana idia abia taudia danu ese dika idia davaria. . . . Bema haida idia laloa pata ma haida dekenai aniani namodia do idia abia, eiava idia laloa unai aniani hegeregerena eiava ia hereaia gaudia idia henidia diba—vadaeni unai bamona do idia karaia be namo. . . . Ena be taunimanima ita koudia lasi, idia be gabu idauidau dekenai aniani bona diari idia tahua diba edia ura hegeregerena, to ita idia inai henia taudia edia kara be idau. Tanobada ena goada taudia bamona idia hereva lasi, idia gwau lasi, ‘Lau ura henia orea ta lau davaria vadaeni; bamahuta!’ to idia ese badu, hereva dika, inai karana, hepapahuahu, ‘tauanina bona diabolo ena ura dikadia’ idia karaia badabada, bona tanobada taudia ese unai bamona idia karaia ai itaia lasi. Kavakava ese edia lalona ia hahonua, bona Satana amo sisia ia kavakava [rabies] gorerena idia abia bamona. Idia haida be ita idia kwadia bena murinai idia gwau ita ese idia ita kwadia. Idia hegaegae noho edia hereva amo bona edia toretore amo koikoi dikadia bona kara dikadia ita dekenai idia karaia totona.”
12. (a) Hereva momokani idia dadaraia taudia be guna idia ida idia hesiai hebou taudia idia botadia dalana be dahaka? (b) Dahaka dainai, ita ura ita diba dainai, hereva momokani idia dadaraia taudia edia toretore ita duahia be maoro lasi?
12 Oibe, hereva momokani idia dadaraia taudia ese buka bona magasin idia halasidia, bona idia lalodiai hereva gageva, hereva kahana sibona, bona koikoi herevadia idia toredia. Witness taudia edia hebouhebou badadia dekenai idia vareai heiriheiri havaraia totona, bona gima lasi taudia edia lalona idia veria toho. Unai dainai, edia toretore ita ura duahidia eiava edia hereva dikadia ita ura kamonai henidia be mai garina! Reana ita laloa ita dekenai dika do ia havaraia diba lasi, to do ita kerere diba. Dahaka dainai? Gau tamona be inai, hereva momokani idia dadaraia taudia haida edia buka lalonai, hereva koikoi be “hereva manau koikoi” bona “hereva namo koikoi” amo idia hahedinaraia. (Roma 16:17, 18; 2 Petero 2:3) Lauma dikadia edia pata amo unai bamona hereva idia mai be hoa gauna lasi, ani? Ena be hereva momokani idia dadaraia taudia edia hereva haida be idia momokani, to unai hereva idia hagagevadia badina korikori be idia ura Iehova ena pata amo taunimanima idia veridia siri. Edia toretore iboudiai be maumau bona hagoadaia lasi herevadia! Edia hereva ta ese taunimanima ia hagoadaia lasi.
13, 14. Hereva momokani idia dadaraia taudia bona edia hereva koikoi amo dahaka huahua idia havaraia?
13 Iesu ia gwau: “Edia kara toana dekena amo do umui diba.” (Mataio 7:16) Vadaeni, hereva momokani idia dadaraia taudia, bona edia buka, be dahaka huahua idia havaraia? Kara hani ese edia hereva koikoi karadia idia hahedinaraidia. (1) Aonega kara. Efeso 4:14 ia gwau: Idia be ‘koikoi taudia edia hadibaia hereva amo haida idia hakaua kerere.’ (2) Diba mai ena heagi. (3) Lalokau lasi. (4) Koikoi karadia idauidau. Unai kara be aniani bamona lauma dikadia edia pata dekenai idia noho, unai kara ibounai ese Iehova ena taunimanima edia abidadama ia hamanokaia diba.
14 Bona kara ma ta be inai. Hereva momokani idia dadaraia taudia be dahaka dekenai idia giroa? Idia momo be Kerisendom ena dibura dekenai idia vareai lou, bona ena hahediba, hegeregere, Keristen taudia iboudiai be guba dekenai do idia lao ena hahediba herevana, idia abia dae lou. Ma danu, idia momo be Baibel ena taravatu, rara henia hanai lasi karana, tanobada amo gini siri karana, bona Dirava ena Basileia harorolaia gaukarana, idia badinaia lasi. To ita be idau, ita be Babulono Badana ena dibura amo ita heau siri, bona ita ura lasi ia dekenai ita giroa lou. (Apokalupo 18:2, 4) Ita be Iehova ena abidadama hesiai taudia dainai, ita ura lasi Iehova ena pata amo idia raka oho taudia idia halasia hereva koikoi ita kamonai, badina idia ese ‘hereva momokani ita dekenai idia hadibaia’ taudia be hereva amo idia botadia, ani?—2 Timoteo 1:13.
15. Hereva momokani idia dadaraia taudia edia samani hereva ita kamonai neganai, dahaka Baibel taravatuna ta be ita ia durua bena aonega dalana ita badinaia diba?
15 Hereva momokani idia dadaraia taudia edia samani herevadia dainai, reana Witness haida idia ura unai hereva ena badina idia tahua. To namona be Deuteronomi 12:30, 31 ia gwauraia taravatu herevana be iseda lalona momokani dekenai ita abia dae. Unuseniai, Mose amo Iehova ese Israel taudia ia haganidia, kaivakuku tomadiho henia taudia be Gwauhamata Tanona amo idia luludia murinai, dahaka gau totona do idia naria namonamo be gau badana. Ia gwau: “Oi naria namonamo, idia oi hadareredia murinai edia dala ai do oi raka garina, bona edia dirava do oi herevalaia, oi gwau: ‘Inai bese taudia be edia dirava be edena bamona idia toma diho henidia? Bona lau, oibe lau, be unai bamona do lau karaia’ garina. Iehova, emu Dirava, be unai bamona do oi kara henia lasi.” Oibe, taunimanima be gau iboudiai idia ura diba, bona Iehova Dirava be unai ia lalo-pararalaia. Eva bona Lot adavana danu edia kara umui lalodia! (Luka 17:32; 1 Timoteo 2:14) Namo lasi hereva momokani idia dadaraia taudia edia hereva ita kamonai eiava edia kara ita tahua. To, namona be ita goada karaia taunimanima ita hagoadadia totona, bona mai abidadama ida Iehova ena pata amo ita aniani!
Iehova Ena Pata Sibona Do Ia Noho
16 Kahirakahira, hisihisi bada herea negana do ia matamaia, bona karaharaga do ia ore bena “Siahu Ibounai Diravana ena Dina Badana neganai do idia tuari” negana do ia ginidae. (Apokalupo 16:14, 16) Unai neganai, inai nega dikana bona tanobada besedia idia aniani patana, be Iehova ese do ia haoredia. Danu, Satana Diabolo ena guba oreana mai ena demoni momo ibounai be Iehova ese do ia haoredia. Lauma dalanai, Satana ena pata, lauma dikadia edia pata unai, amo idia aniani noho taudia do idia doridia ma aniani korikori ta dekenai idia mai totona, do idia aniani totona lasi, to, haida ese idia do idia anidia—do idia mase unai!—Esekiel 39:4; Apokalupo 19:17, 18 itaia danu.
17. Iehova ena pata sibona amo idia aniani taudia ese dahaka hahenamo do idia davaria?
17 Iehova ena pata sibona do ia noho. Mai edia moale danu unai pata dekenai idia aniani taudia be do idia roho mauri, bona unai be edia aniani gabuna ela bona hanaihanai. Doe do ia vara lou lasi idia ia hagaridia totona. (Salamo 67:6; 72:16) Mai edia tauanina goevadaedia ida Paradaiso dekenai Iehova Dirava ena hesiai gaukara do idia karaia! Unai neganai Apokalupo 21:4 ena kudou hamarerea herevadia do idia guguru momokani, ia gwau: “Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.” Dagedage karana do ia ore dainai, Iehova Dirava be guba bona tanobada ibounai edia lohia badana dainai, bona taunimanima ia hoidia lou dainai, Paradaiso lalonai do idia noho taudia iboudiai ese Dirava ena lalo-namo do idia davaria ela bona hanaihanai. Unai hahenamo do ita davaria totona, namona be ita ibounai ese iseda lalona ita hadaia Iehova ena pata sibona amo ita aniani totona, unuseniai lauma aniani hereadaedia momo idia noho!
Edena Bamona Do Oi Haere?
◻ Lauma dikadia ese ita idia hakaua kerere garina dahaka ita karaia diba?
◻ Dahaka dainai Iehova ena pata amo bona lauma dikadia edia pata amo ita aniani diba lasi?
◻ Hereva momokani idia dadaraia taudia ese idia henia aniani be edena bamona?
◻ Dahaka dainai hereva momokani idia dadaraia taudia edia samani herevadia ita tahua be mai garina?
◻ Hereva momokani idia dadaraia taudia ese dahaka huahua idia havaraia?
4. Ita ibounai vairanai dahaka henanadai ia noho, bona dahaka dainai ita ura lasi mai iseda ura ida lauma dikadia edia pata amo ita aniani?
8. Iesu ia gwau ia giroa mai negana lalonai, hesiai tauna be lauma aniani iena hahediba taudia dekenai do ia henia; ia gaukaralaia hesiai tauna be daika?
10. (a) Hesiai tauna dikana oreana be dahaka aniani idia henia, bona edia ura korikori be dahaka? (b) Hesiai tauna dikana oreana be guna idia ida idia hesiai hebou taudia dekenai dahaka idia karaia?
11. Ena toretore lalonai, C. T. Russell ia gwau lauma aniani abia hidi karana dekenai taunimanima be dahaka idia karaia diba, bona Iehova ena pata idia rakatania taudia edia kara be edena bamona ia herevalaia?
16. (a) Kahirakahira, Satana, iena lauma dikadia, bona tanobada besedia edia aniani patana dekenai, dahaka do ia vara? (b) Lauma dikadia edia pata dekenai idia aniani noho taudia iboudiai dekenai dahaka do ia vara?
[Picture on page 10]
Iehova ena pata dekenai lauma aniani namo hereadia momo idia noho