Mai Moale Danu Siahu Taudia Ita Matauraidia
“Mai emui lalona ibounai . . . umui kamonai.”—ROMA 6:17.
1, 2. (a) Hari inai negai, tanobada dekenai dahaka laumana ia hedinarai, bona edeseni amo ia mai bona dahaka ia havaraia? (b) Iehova ena gwauhamata hesiai taudia be edena bamona idia hahedinaraia idia be idau?
“KAMONAI lasi memerodia lalodiai ia gaukara noho laumana” be hari inai negai ia hedinarai goevagoeva. Unai be Satana ena lauma siahuna bona taunimanima ia hasiahudia sibodia edia ura idia badinaia kava totona, ia be “hodahoda ena siahu ena lohia.” Unai lauma, unai “hodahoda,” eiava sibodia edia namo idia tahua bona idia gwau-edeede karadia, be mai ena “siahu,” eiava goada, taunimanima momo dekenai. Unai dainai taunimanima momo be siahu taudia edia taravatu idia ura lasi badinaia.—Efeso 2:2, NW.
2 To moale gauna be inai, hari inai negai, lauma dalana dekenai, Iehova ena gwauhamata hesiai taudia be “hodahoda” dikana eiava gwau-edeede karana amo edia baragi idia hahonua lasi bamona. Idia diba “Dirava ena badu do ia ginidae momokani, idia kamonai henia lasi” taudia dekenai. Aposetolo Paulo ma ia gwau: “Unai dainai unai bamona idia karaia taudia danu do umui turana karaia lasi.” (Efeso 5:6, 7) To, namona be Keristen momokani taudia be idia goada karaia “[Iehova ena] Lauma Helaga dekena amo do [idia] honu” totona, bona “Dirava dekena amo aonega” karadia idia inua bamona, unai kara be ‘goevagoeva, maino, laloa manada, gado namo, bona kamonai.’—Efeso 5:17, 18; Iakobo 3:17.
Mai Iseda Ura Danu Iehova Ena Lohia Siahuna Henunai Ita Noho
3 Mai ena gwaumaoro lohia siahuna idia abia dae neganai, taunimanima be mai edia ura danu unai siahu henunai idia noho. Taunimanima edia idaunegai sivarai ese ia hahedinaraia bema taunimanima be Iehova ena lohia siahuna idia dadaraia neganai, idia moale lasi. Adam bona Eva ese Dirava idia dadaraia neganai idia moale lasi, bona edia gwau-edeede ia havaraia tauna, Satana Diabolo, be ia moale lasi. (Genese 3:16-19) Satana be ena dagi amo ia moru, bona ia “badu dikadika” badina ia diba ena nega be ia kwadogi. (Apokalupo 12:12) Oibe, taunimanima iboudiai, guba mauri gaudia danu, be maino bona moale idia davaria totona, gau badana be Iehova ena kara maoromaoro lohia siahuna idia abia dae.—Salamo 103:19-22.
4. (a) Iehova ia ura iena hesiai taudia be iena siahu henunai idia noho, bona ia ura edia kamonai dalana be edena bamona? (b) Dahaka ita diba momokani be namo, bona salamo tauna be edena bamona unai ia herevalaia?
4 To, iena kara iboudiai idia namo momokani dainai, Iehova ia ura lasi ita kamonai kava. Oibe, iena siahu be bada herea momokani! To ia be metau karana henia tauna lasi. Ia be lalokau Diravana, bona ia ura ia havaraia aonega taudia be mai edia ura danu ia idia kamonai henia, ia ura ia idia lalokau henia. Ia ura idia be iena lohia siahuna idia abia dae badina mai edia lalona ibounai ida idia diba ia be kara maoromaoro bona mai ena gwaumaoro lohia siahuna, bona idia ura unai siahu henunai idia noho; idia diba ia idia kamonai henia ela bona hanaihanai karana be kara iboudiai ia hereaia. Iehova ia ura tanobada bona guba dekenai idia noho taudia iboudiai edia lalohadai be salamo torea tauna ena lalohadai hegeregerena, ia toretore, ia gwau: “Iehova ena taravatu be goevadae, souli ia hamauria lou. Iehova ena hadibaia hereva ita abia dae diba, aonega lasi taudia dekenai aonega do ia henidia. Iehova ena hahegani herevadia be maoromaoro, kudouna idia hamoalea; Iehova ena taravatu ia goeva, ia ese taunimanima edia matana ia hadiaridia. Iehova gari henia karana be goeva, ia noho hanaihanai. Iehova ena hahemaoro herevadia idia momokani; idia be maoromaoro.” (Salamo 19:7-9) Iehova ena lohia siahuna be mai ena maoro bona ia be mai ena kara maoromaoro ita abia dae momokani—unai be gau badana bema ita ura Iehova ena tanobada matamatana lalonai ita noho.
Mai Moale Danu Iseda Pavapava Ena Siahu Henunai Ita Noho
5 Keriso Iesu ena kara be haheitalai namona badina iena guba Tamana ena siahu henunai ia noho. Ita duahia hereva ia gwau, “ia manau momokani. Bona ia ese Dirava ia kamonai henia ela bona ia mase, oibe, satauro dekenai ia mase.” Bena Paulo ma ia gwau: “Unai dainai Dirava ese Keriso ia abia isi, gabu bada herea momokani ia henia. Bona ladana ta ia henia, inai ladana ese ladana ibounai ia hanaia. Bona Iesu ena ladana hanamoa totona ibounai do idia tui diho, guba taudia, tanobada taudia, bona tanobada henunai noho taudia danu. Bona taunimanima ibounai ese Iesu Keriso do idia gwauraia hedinarai ‘Lohiabada,’ badina be unai dekena amo Tamana Dirava ena ladana do idia abia isi momokani.” (Filipi 2:8-11) Oibe, iseda Hakaua Tauna, ia lohia noho Pavapavana, Keriso Iesu vairanai mai iseda moale danu ita tui diho.—Mataio 23:10.
6. Bese idauidau dekenai, edena dala amo Iesu be haroro bona hakaua tauna, bona hisihisi bada herea negana murinai, edena bamona do ia “lohia” noho?
6 Keriso be iseda Hakaua Tauna, bona peroveta hereva amo Iehova ia gwau: “Itaia! Lau ese hereva hamomokania tauna ai lau halaoa, bese idauidau dekenai, bona bese idauidau hakaua tauna ai, bona edia lohia ai danu.” (Isaia 55:4) Tanobada dekenai ia haroro neganai, bona ia mase bona ia toreisi lou murinai, guba dekena amo haroro gaukara ia hakaua neganai, bese idauidau dekenai ia hahedinaraia ia be ena Tamana ena ‘hereva momokani gwauraia maoromaoro tauna.’ (Apokalupo 3:14; Mataio 28:18-20) Hari inai negai, unai bese idauidau taudia be idia momo idia lao noho “hutuma bada herea” taudia, bona Keriso ena hakaua dalana dainai idia be ‘hisihisi bada herea’ negana amo do idia roho mauri. (Apokalupo 7:9, 14) To Iesu ena hakaua dalana be unai neganai do ia ore lasi. Iena “lohia” negana ena daudau be lagani 1,000. Iena ladana be “Sisiba Henia Tauna Namona, Siahu Bada Diravana, Noho Hanaihanai Tamana, Maino Lohiana,” bona mai edia kamonai taudia dekenai, unai ladadia edia maoro do ia hamomokania.—Isaia 9:6, 7; Apokalupo 20:6.
7. Bema ita ura Keriso be “mauri ranuna, ia lohilohi gauna” dekenai ita ia hakaua, karaharaga dahaka do ita karaia be namo, bona dahaka dainai Iesu bona Iehova ese ita do idia lalokau henia?
7 Mamoe Natuna, Keriso Iesu, be “mauri ranuna, ia lohilohi gauna” dekenai kudou-maoro taudia ia hakaudia hegeregerena, ita ura ita ia hakaua, vadaeni, karaharaga iseda kara amo do ita hahedinaraia ita be mai moale danu ita ura iena Pavapava siahuna henunai ita noho. (Apokalupo 7:17; 22:1, 2; Salamo 2:12 itaia danu.) Iesu ia gwau: “Bema lau dekenai umui lalokau henia, be lauegu taravatu do umui badinaia. Lauegu taravatu ia abia dae bona ia badinaia tauna, inai tau ese lau ia lalokau henia. Lau ia lalokau henia tauna be lauegu Tamana ese ia do ia lalokau henia, lau danu do lau lalokau henia, bona ia dekenai do lau hedinarai.” (Ioane 14:15, 21) Oi ura Iesu bona iena Tamana be oi idia lalokau henia, a? Vadaeni, mai emu manau ida edia siahu henunai oi noho.
Naria Taudia be Mai Moale Danu Idia Kamonai
8 “Ekalesia ese Keriso ia kamonai henia.” Ia be ena Naria Tauna dainai, ia ese ‘taunimanima be harihari gaudia bamona’ ia henia kongregesen do “ia gini goada totona.” (Efeso 4:8, 11, 12; 5:24) Lauma dalanai unai tau badadia be hahegani idia abia ‘Dirava ese idia ia henia mamoe oreana do idia naridia namonamo’ totona, namo lasi ‘lohia bamona edia orea do idia gunalaia, to edia kara namodia do idia hedinaraia, vadaeni edia kara namona do idia karaia.’ (1 Petero 5:1-3) Mamoe orea be Iehova ena, bona Keriso be ena “mamoe naria tauna namona.” (Ioane 10:14) Iehova bona Keriso ese mamoe taudia be naria taudia edia imana dekenai idia atoa idia naridia totona, bona unai naria taudia be mai edia maoro danu, idia ura unai mamoe taudia be mai edia moale danu idia ida do idia gaukara hebou, to namona be naria taudia edia kara idia namo, idia hahedinaraia idia ura mai manau ida Keriso ena siahu henunai idia noho.—Kara 20:28.
8, 9. (a) Kongregesen ia gini goada totona, Keriso be dahaka ia henia, bona mamoe orea vairanai namona be unai tatau edia kara be edena bamona? (b) Apokalupo bukana lalonai, Keristen naria taudia edia manau karana be edena bamona ia laulaulaia, bona hahemaoro gaukara idia karaia neganai, “lalo-parara kudouna” idia tahua dalana be dahaka?
9 Keristen ginigunadia edia nega lalonai, laulau dalanai, horoa naria taudia be Keriso ena imana idibana ‘lalonai’ eiava “dekenai” idia noho, unai ese ia hahedinaraia ia be kongregesen ena Kwarana dainai, mai edia manau ida iena siahu henunai idia noho. (Apokalupo 1:16, 20; 2:1) Hari inai negai danu, Iehova ena Witness taudia edia kongregesen lalodiai, naria taudia be Keriso ena hakaua dalana idia badinaia bona ‘Dirava ena imana goadana henunai idia manau’ be gau badana. (1 Petero 5:6) Hahemaoro gaukara idia karaia neganai, namona be lagani momo lalodiai mai ena kamonai tauna Solomon ena kara hegeregerena idia karaia, Iehova do idia guriguri henia, idia gwau: “Emu hesiai tauna dekenai lalo-parara kudouna oi henia, emu orea taudia do lau biagua bona namo bona dika do lau diba totona.” (1 Hanua Pavapavadia 3:9) Lalo-parara kudouna ia abia neganai, elda tauna ia ura Iehova bona Keriso Iesu edia lalohadai hegeregerena ia abia, unai neganai tanobada dekenai ia karaia gauna be guba dekenai idia karaia vadaeni gauna bamona.—Mataio 18:18-20.
10. Naria taudia iboudiai be mamoe taudia idia kara henidia neganai, edena bamona Iesu ena kara idia tohotohoa diba?
10 Loaloa naria taudia bona kongregesen elda taudia danu be idia goada karaia Keriso ese mamoe taudia ia kara henidia dalana idia tohotohoa totona. Iesu be Farisea taudia bamona lasi, taunimanima idia badinaia diba lasi taravatu momo ia henidia lasi. (Mataio 23:2-11) Mamoe bamona taudia dekenai ia gwau: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai. Egu huaia auna be emui pagana dekenai do umui atoa, lau dekenai diba do umui tahua, badina be lau be dagedage lasi bona manau tauna. Vadaeni emui laumana be do idia laga-ani. Badina be lauegu huaia auna be ia metau lasi, bona huaia neganai danu hekwarahi lasi.” (Mataio 11:28-30) Momokani, Keristen ta ta iboudiai be “sibona ena metau, ena metau do idia huaia” be gau badana, to naria taudia be inai idia laloatao, namona be Iesu ena kara idia tohotohoa bona edia tadikaka idia durudia, bena do idia diba edia Keristen maduna be ia “metau lasi,” bona mai ena “hekwarahi lasi,” to mai moale danu idia huaia diba.—Galatia 6:5.
Tiokratik Siahuna Henunai Ita Noho
11. (a) Ena be tau ta be kwarana dagina ia matauraia toana ia hahedinaraia, to edena bamona ia be tiokratik dalana ia badinaia momokani lasi? Haheitalai gwauraia. (b) Tiokratik dalana ita badinaia momokani ena anina be dahaka?
11 Tiokratik dalana be Dirava ena lohia dalana. Kwarana dagina ia gaukara dalana be 1 Korinto 11:3 ese ia gwauraia hegeregerena. To ena anina be unai sibona lasi. Ena be reana tau ta ese toana ia hahedinaraia kwarana dagina ia matauraia, to ia be tiokratik dalana ia badinaia momokani lasi. Edena bamona unai ia vara diba? Inai bamona ita haheitalaia, democracy ena anina be taunimanima ese gavamani idia abia hidi, bona democrat tauna be “democracy ena gaukara ia abia dae tauna.” Reana tau ta ia gwau ia be democrat tauna, eleksen totona ia vouti, bona reana ia be politik gaukara tauna. To, bema ena kara amo ia hahedinaraia democracy ena kara bona taravatu ia dadaraia, do ita gwau diba lasi ia be democrat tauna, ani? Unai hegeregerena, tiokratik dalana badinaia momokani totona, tau ta be kwarana dagina sibona ia matauraia be hegeregere lasi. Namona be Iehova ena dala bona kara ia tohotohodia. Namona be gau ibounai dekenai Iehova ese unai tau ia biagua. Bona Iehova ese iena Natuna dekenai siahu bada ia henia dainai, tiokratik ena anina be Iesu ena kara ita tohotohoa danu.
12, 13. (a) Tiokratik dalana ita badinaia neganai, dahaka ita karaia danu? (b) Tiokratik dalana ita badinaia ena anina be taravatu momo ita badinadia, a? Haheitalai gwauraia.
12 Laloaboio lasi, Iehova ia ura mai manau ida ena siahu henunai ita noho badina ita lalokau henia dainai. Unai dala amo ia ese guba bona tanobada ia lohiadia. Ia be lalokau. (1 Ioane 4:8) Keriso Iesu be “Dirava ena hairaina ena diari, bona iena [kara] toana be Dirava ena [kara] toana hegeregerena.” (Heberu 1:3) Iena hahediba taudia ia haganidia idia lalokau heheni totona. (Ioane 15:17) Unai dainai, tiokratik dalana oi badinaia ena anina be mai emu manau ida ena siahu henunai oi noho bona lalokau oi hahedinaraia. Ena anina be inai: Tiokratik dalana be Dirava ena lohia dalana; Dirava be lalokau; unai dainai, tiokratik dalana be mai lalokau danu ia lohia dalana.
13 Reana elda tauna do ia laloa tadikaka ese tiokratik dalana do idia badinaia totona, taravatu idauidau idia badinadia be namo. “Hesiai tauna mai ena kamonai bona mai ena kara maoromaoro” oreana be heduru herevadia idia henia, to nega haida elda taudia ese unai hereva idia gwauraidia taravatu bamona. (Mataio 24:45) Hegeregere, nega ta idia gwau kongregesen lalonai tadikaka idauidau do ita diba namonamo totona, Kingdom Hall dekenai helai gabuna tamona lasi, to helai gabu idauidau dekenai do ita helai be namo. Unai be heduru herevana, ia be taravatu lasi. To reana elda taudia haida be unai heduru herevadia be taravatu ai idia halaoa, bona idia laloa bema tadikaka ese unai hereva idia badinaia lasi, idia be tiokratik dalana idia badinaia lasi. To, reana tadikaka eiava taihu haida be gabu tamona dekenai idia ura helai be mai edia badina namodia idauidau. Bema elda tauna be unai ia laloa lasi bona lalokau ia hahedinaraia lasi, ia be tiokratik dalana ia badinaia momokani lasi, ani? Tiokratik dalana ita badinaia totona, namona be ‘iseda gaukara ibounai lalonai, lalokau dekenai do ita karaia.’—1 Korinto 16:14.
Mai Moale Ida Hesiai Gaukara Ita Karaia
14 Tiokratik dalana ita badinaia ena anina danu be mai moale danu Iehova ena hesiai gaukara ita karaia. Iehova be “moale Diravana.” (1 Timoteo 1:11, NW) Ia ura ia idia tomadiho henia taudia be mai moale ida ia idia hesiai henia. Taravatu momo idia ura badinaia taudia be inai idia laloatao, Israel taudia be hahegani idia abia taravatu idia “badinadia namonamo” totona, to danu inai hahegani idia abia: “Iehova, [emu] Dirava, vairanai . . . emu gaukara iboudiai lalodiai do oi moale.” (Deuteronomi 12:1, 18) Herevana Iehova ena hesiai gaukara be dahaka, to namona be mai moale danu ita karaia, ia be metau gauna lasi bamona. Naria taudia be kara idauidau amo tadikaka idia durudia diba mai moale danu Iehova ena hesiai gaukara lalonai idia karaia diba gaudia idia karaia totona. Danu, bema elda taudia idia naria namonamo lasi, tadikaka haida edia moale idia kokia diba. Hegeregere, bema tadikaka haida edia gaukara be ma tadikaka haida edia gaukara danu idia hahegeregerea, bona haroro gaukara lalonai kongregesen ena haroro hora ena averes idia hanaia taudia idia hanamodia neganai, hora idia davaria lasi taudia be idia gwau henidia bamona, ani? Reana badina namona dainai unai hora idia davaria lasi, unai dainai edia mamina be edena bamona unai hereva idia kamonai neganai? Reana elda ena hereva dainai do idia hemarai bona edia moale do ia ore diba, ani?
14, 15. (a) Elda ta be edena bamona tadikaka eiava taihu ena moale Iehova ena hesiai gaukara dekenai ia kokia diba, bona dahaka dainai unai be tiokratik dalana lasi? (b) Iesu be edena bamona ia hahedinaraia iseda gaukara ena bada sibona ia laloa lasi, to ia ura lalokau amo hesiai gaukara ita karaia? (c) Elda taudia be dahaka idia laloatao be namo?
15 Haida be reana idia hekwarahi bada herea hora haida sibona idia haroro totona, to ma haida be hora momo idia haroro diba bona unai be hekwarahi lasi idia dekenai, badina idia buruka lasi, idia gorere lasi, bona ma gau haida dainai. Unai dainai, namo lasi elda taudia ese hora momo idia davaria lasi taudia idia hahemaoro henidia, badina Tamana ese Iesu dekenai ‘siahu ia henia kota henia gaukara do ia karaia totona.’ (Ioane 5:27) Ogogami vabuna be haida bamona lasi, to harihari moni maragi sibona ia henia dainai Iesu ese ia gwau henia, a? Lasi, ia diba vabu ia henia moni maragi rua be gau badana ia dekenai . Unai be “iena moni ibounai ia henia vadaeni, iena aniani hoia moni danu.” Unai moni ia henia ese ia hahedinaraia Iehova ia lalokau henia bada! (Mareko 12:41-44) Namona be elda taudia idia laloa namonamo, bona mai edia lalokau danu idia hekwarahi to haroro hora ena “averes” idia davaria lasi taudia idia gwau henidia lasi, ani? Edia lalokau Iehova dekenai be bada, bona reana edia hekwarahi ena namo be hora ena averes idia davaria taudia edia hekwarahi ena namo ia hanaia!
16. (a) Bema naria taudia edia hereva lalonai haroro ena averes idia gwauraia, dahaka dainai lalo-parara bona laloa namonamo karana idia gaukaralaia be gau badana? (b) Tadikaka be edia haroro gaukara do idia habadaia totona, heduru dalana namona be dahaka?
16 Ita kikilaia vadaeni herevadia be “taravatu” matamatana ta ai idia halaoa be namo, a? Hegeregere idia gwau namba—averes danu—do idia gwauraia lasi, a? Lasi! Hereva ena anina be inai, namona be naria taudia idia laloa namonamo, tadikaka edia goada hegeregerena do idia hagoadadia mai moale danu edia haroro gaukara do idia habadaia totona. (Galatia 6:4) Iesu ia gwauraia moni parabolena lalonai, biaguna ese iena kohu be hesiai taudia dekenai ia henia “ta ta edia diba hegeregerena.” (Mataio 25:14, 15) Unai hegeregerena, namona be elda taudia be Basileia pablisa ta ta iboudiai idia karaia diba gaukarana do idia laloa. Unai idia karaia totona idia lalo-parara be gau badana. Reana haida ese edia haroro gaukara do idia habadaia totona hagoadaia hereva idia abia be namo. Reana haida idia ura heduru idia abia edia haroro negana idia hegaegaelaia namonamo totona. To, bema idia durudia edia goada hegeregerena bona mai moale danu idia haroro totona, reana unai moale karana ese idia ia hagoadaia, bona dala ia kehoa hegeregerena edia Keristen gaukara do idia habadaia diba.—Nehemia 8:10; Salamo 59:16; Ieremia 20:9.
Mai Moale Danu Siahu Henunai Ita Noho Neganai Maino Ita Davaria
17 Mai moale danu Iehova ena lohia dalana maorona ena siahu henunai ita noho neganai, maino bada ita davaria. Guriguri amo Salamo torea tauna be Iehova dekenai ia gwau: “Oiemu taravatu idia ura henia taudia be maino badana idia abia, gau ta ese do ia hahekwakwanaidia diba lasi.” (Salamo 119:165) Dirava ena taravatu ita badinaia neganai, namo ita davaria. Iehova be Israel dekenai ia gwau: “Oi ia Hoia tauna, Israel ena Hahelaga Tauna, Iehova, ia gwau: ‘Lau inai Iehova, emu Dirava; oi be sibomu do oi hanamoa dalana be oi lau hadibaia, emu raka dalana namona ai oi lau hakaua. Egu oda bema oi kamonai henidia be namo! Bena emu maino be sinavai ida do ia hegeregere, bona emu kara maoromaoro be davara ena hurehure ida do ia hegeregere.’ ”—Isaia 48:17, 18.
17, 18. (a) Mai moale danu siahu henunai ita ura noho neganai, edena bamona unai ese ita dekenai maino bona kara maoromaoro ia henia? (b) Dirava ena taravatu ita badinadia neganai, dahaka ita davaria diba?
18 Keriso ena mauri ia bouboulaia karana dainai ita be Dirava danu maino ita abia diba. (2 Korinto 5:18, 19) Keriso ena rara amo ita ia hoia, bema mai iseda abidadama danu unai hereva ita abia dae, bona ita goada karaia iseda manoka gaudia ita hanaidia totona bona Dirava ena ura ita karaia, hemarai mamina do ita davaria lasi. (1 Ioane 3:19-23) Unai abidadama, mai ena kara dainai, mai iseda kara maoromaoro ida Iehova vairanai ita gini diba, bona ‘hisihisi bada herea’ amo do ita roho mauri bona Iehova ena tanobada matamatana lalonai do ita mauri hanaihanai ena helaro ita abia. (Apokalupo 7:14-17; Ioane 3:36; Iakobo 2:22, 23) Unai ibounai ita davaria diba ‘bema iena taravatu ita badinaia noho.’
19. Harihari ita moale totona bona gabeai mauri hanaihanai do ita abia ena helaro ita davaria totona, dahaka ita karaia be gau badana, bona David be edena bamona iseda kudouna ena mamina ia herevalaia?
19 Oibe, hari ita moale totona bona gabeai tanobada paradaiso matamatana lalonai do ita mauri hanaihanai ena helaro ita davaria totona, gau badana be ita ura mai moale danu, Iehova, guba bona tanobada edia Lohia Badana ena siahu henunai ita noho. Namona be hanaihanai iseda mamina be David bamona, ia gwau: “Iehova e, goada bona siahu bona hairai bona kwalimu bona hereadae be oiemu; badina be gau iboudiai guba dekenai bona tanobada dekenai be oiemu. Iehova e, basileia be oiemu, oi be sibona oi abia isi, gau iboudiai habadaia bona hagoadaia siahuna ia noho. Vadaeni, emai Dirava e, harihari oi ai hanamoa, bona oiemu ladana mai hairaina ai hanamoa.”—1 Sisiga 29:11, 13.
Oi Laloatao Totona Herevadia
◻ Iehova ia ura iena hesiai taudia be iena siahu henunai idia noho bona idia kamonai dalana be edena bamona?
◻ Iesu ena kamonai karana dainai dahaka hahenamo ia davaria, bona iseda kara amo dahaka ita hamomokania be gau badana?
◻ Naria taudia iboudiai be mamoe taudia idia kara henidia neganai, edena bamona Iesu ena kara idia tohotohoa diba?
◻ Tiokratik dalana badinaia ena anina be dahaka?
◻ Mai moale danu siahu henunai ita noho neganai, dahaka hahenamo ita davaria?
3. Dahaka ese taunimanima ia doria mai edia ura danu siahu henunai idia noho totona, bona taunimanima edia idaunegai sivaraidia ese ita dekenai dahaka idia hadibaia?
5. Iesu ena kamonai karana dainai dahaka hahenamo ia davaria, bona mai iseda ura danu dahaka ita karaia?
[Picture on page24]
Elda taudia ese mamoe orea taudia idia hagoadadia edia goada hegeregerena idia karaia gaukara idia moalelaia totona
[Picture on page26]
Iehova ia moale taunimanima be mai edia kudouna ibounai danu ia idia kamonai henia neganai