Mamoe Bona Naridia Taudia Dirava Ena Lohia Siahuna Henunai

“Iehova be eda Hahemaoro Tauna, Iehova be eda Taravatu Henia Tauna, Iehova be eda Pavapava; ia ese ita do ia hamauria.”​—ISAIA 33:22.

1. Dahaka dainai ita gwau idaunegai Keristen taudia bona hari inai negai Keristen taudia be Dirava ese ia biagua oreana?

DIRAVA ia lohiadia taudia ese ena lohia siahuna idia abia dae bona ena sisiba bona ena hahegani be edia lalohadai iboudiai lalodiai idia badinadia. Aposetolo edia negai ia noho ekalesiana be momokani Dirava ena siahu henunai. Unai neganai Keristen taudia be mai edia momokani ida idia gwau diba: “Iehova be eda Hahemaoro Tauna, Iehova be eda Taravatu Henia Tauna, Iehova be eda Pavapava.” (Isaia 33:22) Unai hegeregerena, hari inai negai, Iehova Dirava ena orea, horoa orena ese ia gunalaia oreana, be ia ese ia biagua.

Edena Dala Idauidau ai Dirava Ita Kamonai Henia?

² Iehova ena orea tanobada ai be ia ese ia biagua, bona orea taudia ese iena lohia siahuna idia abia dae. Bona Iesu Keriso, Pavapava ai ia halaoa tauna, ena kara idia tohotohoa. Siahu Ibounai Diravana ena hahegani be aneru ta ese Iesu ia hamaoroa, ia gwau: “Oiemu kaia badana harihari do oi gaukaralaia, badina be anina utua negana be ia ginidae vadaeni, tanobada ena anina ia mage vadaeni.” (Apokalupo 14:15) Unai oda hegeregerena Iesu ese tanobada ena anina ia utua. Inai gaukara badana lalonai Keristen taudia ese edia Pavapava idia durua; sivarai namona idia harorolaia bona taunimanima be hahediba taudia ai idia halaodia. (Mataio 28:19; Mareko 13:10; Kara 1:8) Unai gaukara lalodiai idia be Iehova, Siahu Ibounai Pavapavana, ida idia gaukara hebou.​—1 Korinto 3:9.

3. Edia kara ai, Keristen taudia ese Dirava ena ura edena bamona idia badinaia?

³ Edia kara ai danu, Keristen taudia ese Dirava ena lohia siahuna idia abia dae. Iesu ia gwau: “Kara momokani idia badinaia taudia ese diari dekenai idia lao henia, vadaeni diari ese ia hedinaraia idia be kara namodia idia karaia, Dirava idia kamonai henia dainai.” (Ioane 3:21) Hari inai negai, dahaka be maoro bona dahaka be kerere be haida ese idia hepapahuahulaia, to Keristen taudia be edia lalodia ai idia gwau Iehova ese ia gwauraidia dika karadia be dika, bona unai kara idia dadaraidia vaitani! Edia famili idia naridia, edia tamadia sinadia idia kamonai henidia, bona gavamani idia matauraidia. (Efeso 5:​3-5, 22-33; 6:​1-4; 1 Timoteo 5:8; Tito 3:1) Unai amo Dirava ena ura idia karaia.

4. Adam bona Eva bona Saulo ese dahaka lalohadai kereredia idia hahedinaraidia, bona Keristen taudia ese lalohadai idauna edena bamona idia hahedinaraia?

⁴ Adam bona Eva ese Paradaiso idia haboioa, badina be idia ura sibodia edia lalodia do idia hadaidia dahaka be maoro bona dahaka be kerere. Iesu be idau vaitani. Ia gwau: “Lau sibona egu ura lau karaia lasi, to Dirava ena ura sibona lau karaia.” Keristen taudia danu be unai bamona. (Ioane 5:30; Luka 22:42; Roma 12:2; Heberu 10:7) Saulo, Israel pavapavana ginigunana, ese Iehova ia badinaia vaitani lasi dainai, Iehova ese ia dadaraia. Samuel ese ia hamaoroa, ia gwau: “Kamonai ese boubou ia hereaia.” (1 Samuel 15:22) Bema Iehova ena ura ena kahana mo ita karaia, bema haroro gaukarana ita karaia loulou o hebou ita lao henidia loulou, to bema kara dika ita karaia danu, unai be Dirava ena lohia siahuna matauraia dalana a? Lasi, ani? ‘Dirava ena ura ita karaia toho mai eda lalona ibounai ida.’ (Efeso 6:6; 1 Petero 4:​1, 2) Ita be Saulo hegeregerena lasi; Dirava ita kamonai henia vaitani.

Dirava ese Ia Biagua Oreana Hari Inai Nega Lalonai

⁵ Gunaguna, Iehova ia lohia bona ia ese peroveta taudia, pavapava, bona aposetolo edia amo hereva momokani ia hahedinaraia. To hari inai negai, peroveta taudia bona aposetolo, Dirava ena lauma ese ia rohedia taudia, be lasi. To, Iesu ia gwau pavapava siahuna ai do ia lou mai neganai, ia ese “hesiai tauna mai ena kamonai bona mai ena kara maoromaoro” oreana do ia abia hidi, ena kohu ibounai naria oreana ai do ia halaoa. (Mataio 24:​45-47; Isaia 43:10) Lagani 1919 ai ia hahedinaraia unai hesiai tauna be horoa Keristen taudia oredia edia orea. Unai nega amo, Iehova ena Witness taudia edia Hakaua Oreana amo ia be Dirava ena gavamani ena hedikwota tanobada ai. Tanobada hegegemadai, Brens Komitidia, distrik bona sekit naridia taudia, bona kongregesen edia elda taudia be ena ladanai idia gaukara.

5, 6. Hari inai negai Iehova ese taunimanima edena bamona ia kara henidia, bona ena orea ida gaukara hebou karana ese dahaka ia havaraia?

⁶ Dirava kamonai henia totona, ena orea ida ita gaukara hebou be gau badana. Tanobada hegegemadai unai ese lalo-tamona bona gaukara maoromaoro dalana ia havaraia, orea ibounai lalonai. (1 Petero 2:17) Unai ese Iehova ia hamoalea; “ia ura lasi . . . heai, ia be maino Diravana.”​—1 Korinto 14:33.

Elda Taudia, Dirava Henunai

⁷ Elda taudia iboudiai, herevana edia dagi be dahaka, be Baibel ena hahegani elda dagina dekenai idia badinadia dainai idia hegeregere. (1 Timoteo 3:​1-7; Tito 1:​5-9) Inai danu, Paulo ese Efeso ena elda taudia ia tore henidia herevadia be mai anina elda taudia iboudiai dekediai: “Umui sibona umui naria namonamo, bona mamoe orea ibounai danu. Inai orea naria taudia Lauma Helaga ese umui ia halaoa vadaeni.” (Kara 20:28) Oibe, lauma helaga, Iehova Dirava ena amo ia mai laumana, ese elda taudia ia duanaidia. (Ioane 14:26) Idia naria oreana be Iehova ena, idia edia lasi. Ia ese ia biagua.

8. Hari inai negai elda taudia edia maduna be dahaka dahaka?

⁸ Aposetolo Paulo ese elda taudia edia gaukara ia gwauraidia, ia gwau: “Keriso ese . . . haida dekenai be aposetolo dagi ia henia, haida dekenai be peroveta dagi ia henia, haida be evanelia gaukara taudia, haida be haroro taudia, haida be hadibaia taudia. . . . Ia henia, be Dirava ena taudia ibounai do ia durua . . . bona Keriso ena tauanina do ia gini goada totona.” (Efeso 4:​11, 12) “Keriso ena tauanina” ena beibi negana ia ore neganai, aposetolo bona peroveta taudia be lasi. (1 Korinto 13:8 itaia.) To hari inai negai elda taudia be evanelia gaukarana bona mamoe naridia bona hadibadia gaukaradia idia do goadalaidia noho.​—2 Timoteo 4:2; Tito 1:9.

9. Elda taudia be edena bamona do idia hegaegae be namo, Dirava ena ura be kongregesen lalonai do idia hahedinaraia totona?

⁹ Elda taudia be Dirava ena siahu henunai idia gaukara dainai, iena ura idia diba herea be namo. Ia ese Iosua ia hagania Taravatu be dina iboudiai do ia duahia. Namona be elda taudia danu ese Baibel ena hereva do idia tahudia loulou, bona ena hereva gwauraidia bukadia, hesiai tauna mai ena kamonai bona mai ena kara maoromaoro ese ia halasidia gaudia, edia hereva do idia manadalaidia be namo. (2 Timoteo 3:​14, 15) Gaudia be Gima Kohorona bona Noga! bona Baibel ena hahegani badinadia daladia idia gwauraidia bukadia ma haida.a Unai sibona lasi, to namona be elda tauna ese danu unai sisiba herevadia edia badina Baibel lalonai be do ia manadalaidia momokani. Bena do ia hegeregere, Baibel ena sisiba herevadia do ia gwauraidia mai ena lalo-parara bona mai ena hebogahisi ida.​—Mika 6:​8 itaia.

Keristen Laumana ida Idia Gaukara

¹⁰ Lagani 55 C.E. bamona ai, aposetolo Paulo ese Korinto ena kongregesen taudia ia tore henidia. Idia haida edia kara ia sisibalai henidia, badina be idia ura ladana bada do idia abia kongregesen lalonai. Ia gwau: “Harihari umui be bogakunu vadaeni, harihari umui be kohu momo taudia. Umui ese ai umui hanaia vadaeni, bona king hegeregere umui lao, ani? Bema umui be king momokani be namo, vadaeni ai danu king taudia do ai lao umui danu.” (1 Korinto 4:8) Unai neganai, Keristen taudia iboudiai edia helaro be guba ai pavapava bona hahelaga taudia ai do idia lao bona Iesu ida do idia lohia hebou. (Apokalupo 20:​4, 6) To Korinto taudia haida idia laloaboio Keristen oreana lalonai pavapava be lasi. Keristen oreana naria taudia be tanobada ena pavapava hegeregeredia idia karaia lasi, to manau idia manadalaia toho, Iehova hamoalea karana unai.​—Salamo 138:6; Luka 22:​25-27.

11. (a) Daika daika be idia manau momokani? (b) Elda taudia bona Keristen taudia oredia iboudiai be sibodia edena bamona do idia laloa be namo?

¹¹ Manau be manoka ta a? Lasi vaitani! Iehova danu ia manau. (Salamo 18:35) Israel pavapavadia ese edia tuari oreadia idia gunalaidia bona Iehova henunai edia bese idia lohiaia. To, namona be idia ta ta do idia naria namonamo, ta ‘ena lalona do ia hekokoroku’ garina. (Deuteronomi 17:20) Hari, Iesu be guba Pavapavana ta, to tanobada ai ia noho neganai, ena hahediba taudia edia aedia ia huridia. Ia manau momokani! Ia ura idia danu be unai bamona do idia manau; ia hamaorodia, ia gwau: “Unai dainai, lau inai umui emui Lohiabada bona hadibaia tauna, to emui aena lau huria, umui danu ta ta emui aena do umui huria be namo.” (Ioane 13:14; Filipi 2:​5-8) Namona be Iehova mo sibona do ita hanamoa, taunimanima ta lasi. (Apokalupo 4:11) Herevana idia be elda taudia eiava lasi, namona be Keristen taudia iboudiai be Iesu ena hereva hegeregerena do idia laloa: “Ai be hesiai taudia namodia lasi, badina be ai dekenai idia hereva karadia sibona ai karaia vadaeni.” (Luka 17:10) Lalohadai idaudia iboudiai be kerere.

12. Dahaka dainai elda taudia ese lalokau idia goadalaia be namo?

¹² Namona be Keristen elda taudia ese lalokau danu do idia goadalaia. Aposetolo Ioane ia hahedinaraia lalokau be mai anina bada, ia gwau: “Mai ena lalokau lasi tauna be Dirava ia diba lasi, badina Dirava be lalokau.” (1 Ioane 4:8) Lalokau lasi taudia ese Iehova ena ura idia karaia lasi bona ia idia diba lasi. Baibel ia gwau Dirava ena Natuna ese “sibona ena lalokau taudia dekenai ia lalokau henidia ia lao bona dokona.” (Ioane 13:1) Ia ese ena aposetolo 11, Keristen ekalesiana ena hakaua oreana ena kahana ai do idia lao taudia, ia hereva henidia, ia gwau: “Lauegu taravatu be inai, umui ta ta umui lalokau henia, lau ese umui lau lalokau henia hegeregerena.” (Ioane 15:12) Lalokau be Keristen dalana momokanina ena toana. Ia ese lalohisihisi taudia bona lauma diburana amo roho mauri urana idia ura taudia ia veridia. (Isaia 61:​1, 2; Ioane 13:35) Namona be elda taudia ese do idia hahedinaraia badabada.

13. Ena be hekwakwanai haida be auka herea, to idia iboudiai lalodiai elda ta ese namo edena bamona ia havaraia diba?

¹³ Hari inai negai, nega momo elda taudia idia noidia hekwakwanai aukadia do idia hamaoromaorodia toho. Headava taudia haida edia hekwakwanai be auka herea. Taunimanima badadia ese memero kekeni edia hekwakwanai idia lalo-pararalaidia be auka. Nega momo lalo-metau ena badina davaria be auka. Reana elda ta be unai bamona gaudia ia daradaralaidia. To, bema Iehova ena aonega dekenai ia tabekau bona ia noia, bema sisiba be Baibel lalonai bona hesiai tauna mai ena kamonai bona mai ena kara maoromaoro ese ia karadia bukadia lalodiai ia tahua, bona bema mamoe ia kara henidia mai ena manau bona mai ena lalokau ida, hekwakwanai iboudiai lalodiai namo do ia havaraia diba.

14, 15. Haida ese edia revareva ai edena bamona idia hahedinaraia Iehova ese elda taudia namodia momo edia amo ena orea ia hanamoa?

¹⁴ Iehova ese harihari gaudia momo, “taunimanima” unai, be ena orea ia henia. (Efeso 4:8) Nega haida, Watch Tower Society ese revareva ia davaridia, toredia taudia ese elda taudia mai manaudia, Dirava ena mamoe idia naridia mai edia hebogahisi ida taudia, idia gwauraidia. Elda ta ia gwau: “Sekit naria tauna ena vadivadi ese egu lalona ia hamarerea bada, bona kongregesen taudia ese idia do herevalaia noho. Iena hereva dainai, lau diba namona be tadikaka do lau kara henidia mai egu lalo-namo ida, bona edia kara namo dainai do lau hanamodia be namo.”

¹⁵ Taihu ta, hospital daudauna ia lao hahinena, be ena revareva ai ia gwau: “Unai hospital daudau hereana ai, hanuaboi ginigunana ai egu lalona ia hekwarahi, to elda ta ese ia vadivadi henigu neganai egu lalona ia namo lou! Ia bona ma tadikaka haida be hora momo idia haoredia lau dekenai. Murimuri taudia, egu hekwarahi idia diba taudia, idia laloa bema unai tadikaka mai edia lalokau edia hahegoada, henari bona guriguri be lasi, lau mauri noho diba lasi.” Taihu ma ta ia gwau: “Hari lau mauri noho, badina be elda oreana ese lau idia hakaua mai edia haheauka ida, egu lalo-metau lau hekwarahilaia neganai. . . . Tadikaka ta bona ena adavana idia diba lasi dahaka do idia hamaorogu be namo. . . . Lau laloa bada gauna be inai: Ena be egu lalo-metau idia lalo-pararalaia momokani lasi, to egu namo idia tahua mai edia lalokau ida.”

16. Petero ese elda taudia edena bamona ia sisiba henidia?

¹⁶ Oibe, elda taudia momo ese aposetolo Petero ena sisiba idia badinaia: “Dirava ese umui ia henia mamoe orea do umui naridia namonamo. Do umui gunalaia, Dirava ena ura hegeregerena. Do umui maumau lasi, to mai emui ura namona inai dagi do umui karaia. . . . Lohia bamona emui orea do umui gunalaia lasi, to emui kara namodia do umui hedinaraia, vadaeni emui kara bamona do idia karaia.” (1 Petero 5:​1-3) Unai bamona elda taudia be hahenamo badana!

Mamoe, Dirava Ena Siahu Henunai

¹⁷ Elda taudia mo sibodia lasi, to mamoe danu be Dirava henunai idia noho, bona idia danu do idia kamonai henia be namo. Sisiba herevadia mamoe naridia taudia ia henidia be mamoe danu ese do idia badinadia be namo. Elda taudia mo lasi, to Keristen taudia iboudiai do idia manau be namo, Dirava ese do ia hanamodia totona. (Iakobo 4:6) Namona be ita ibounai ese lalokau do ita goadalaia, badina be, bema ita be mai eda lalokau lasi, Iehova ese eda boubou karadia ia moalelaidia lasi. (1 Korinto 13:​1-3) Bona ita ibounai, elda taudia mo lasi, be Iehova ‘ena ura do ita diba vaitani mai eda aonega ida’ be namo.​—Kolose 1:9, NW.

18. (a) Dahaka dainai ta be hereva momokani ia diba sisina mo be hegeregere lasi? (b) Ita ibounai be edena bamona do ita diba vaitani?

¹⁸ Matamatadia bona burukadia danu edia lalodia be idia hekwarahi loulou, badina be, ena be Satana ena tanobada ai idia noho, to Dirava idia badinaia noho toho. Tanobada ena dabua sitailodia, ena miusik, ena vidio, bona ena bukabuka ese haida edia kamonai idia tohoa. Hereva momokani bema ita diba sisina sibona, do ita raka namonamo noho diba lasi. Do ita gini auka noho totona, do ita diba vaitani be namo. Lalo-parara bona aonega, Baibel mo sibona ese ita ia henia diba gaudia, do ita abidia be namo. (Hereva Lada-isidia 2:​1-5) Anina be stadi karadia namodia do ita manadalaidia, ita dibadia gaudia do ita lalodia namonamo, bona karadia do ita karaia. (Salamo 1:​1-3; Apokalupo 1:3) Elda taudia mo sibodia lasi, to Keristen taudia iboudiai be Paulo ese ia tore henidia, ia gwau: “Aniani korikori be tau badadia idia ania diba. Idia sibona ese edia lalona idia hadibaia lou, hadibaia lou, ela bona idia manada vadaeni. Unai neganai idia be maoro bona kerere edia toana idia diba namonamo.”​—Heberu 5:14.

Mamoe Bona Naridia Taudia Idia Gaukara Hebou

¹⁹ Elda taudia ida idia gaukara hebou taudia idia hahedinaraia Dirava ena lohia siahuna idia matauraia momokani. Paulo ia gwau: “Ekalesia be dala namona ai idia gunalaia taudia be do umui matauraidia bada. Inai be mai anina bada, haroro bona hahediba idia goadalaidia taudia dekediai.” (1 Timoteo 5:​17, NW; 1 Petero 5:​5, 6) Elda dagina be dagi namo hereana, to elda taudia momo be mai edia famili; dina iboudiai moni gaukara idia karaia, bona edia adavadia bona edia natudia idia naridia danu. Kongregesen taudia edia hesiai idia lao henia mai edia moale ida, to bema idia durudia bona idia hametaudia lasi bona idia maumauraidia lasi, edia hesiai gaukarana idia haharagaia, bena idia moalelaia bada.​—Heberu 13:17.

19, 20. Edena bamona ita idia sisiba henia elda taudia ida do ita gaukara hebou be namo, bona dahaka dainai?

²⁰ Aposetolo Paulo ia gwau: “Umui idia hakaua taudia, Dirava ena hereva umui idia hadibalaia vadaeni taudia, be umui lalodia; edia kara ena anina umui laloa, bena edia abidadama umui tohotohoa.” (Heberu 13:7, NW) Paulo ese tadikaka ia hamaorodia lasi elda taudia edia hahediba taudia ai do idia lao be namo. (1 Korinto 1:12) Unai be Dirava ena siahu matauraia karana lasi. To, momokani, elda ta, Dirava henunai ia noho, haroro gaukara ia karaia, hebou ia lao henidia loulou bona kongregesen ia kara henia mai ena manau bona mai ena lalokau ida tauna, ena kara do ita tohotohodia be aonega dalana.

Abidadama Ia Hahedinaraia

²¹ Momokani, Dirava ese ia biagua oreana be hari inai nega dika rohorohona ai ia noho ese iena siahu bada ia hahedinaraia. (Isaia 2:​2-5) Unai ese danu Keristen tataudia, hahinedia, bona natudia milion ima bamona edia abidadama ia hahedinaraia; ena be dina iboudiai hekwarahi idauidau idia hekwarahilaidia, to nega ta idia laloaboio lasi Iehova be edia Lohia. Kamonai tauna Mose ese ‘ita itaia diba lasi Diravana be matana dekenai ia itaia bamona’; ia hegeregerena Keristen taudia hari inai negai be mai edia abidadama goadana. (Heberu 11:27) Dirava ese ia lohiaia oreana lalonai idia noho be hahenamo ta idia dekediai, bona dina iboudiai idia tanikiu henia. (Salamo 100:​4, 5) Iehova ese ena siahu amo ia hamauridia noho lalonai, mai edia moale ida idia gwau: “Iehova be eda Hahemaoro Tauna, Iehova be eda Taravatu Henia Tauna, Iehova be eda Pavapava; ia ese ita do ia hamauria.”​—Isaia 33:22.

[Footnotes]

Baibel ese Dahaka Ia Hahedinaraia?

◻ Edena dala ai Keristen taudia be Dirava ena lohia siahuna idia abia dae?

◻ Hari inai negai Dirava ese ena orea edena bamona ia naria?

◻ Elda taudia be edena bamona idia hegaegae be namo, edia maduna do idia huadia namonamo totona?

◻ Elda taudia ese dahaka Keristen karadia idia hahedinaraidia be gau badana?

◻ Dirava ena siahu henunai, mamoe bona naridia taudia be edena bamona idia kara heheni be namo?

2. Iehova ena Witness taudia ese Iehova ena lohia siahuna idia abia dae dalana ta be dahaka?

7. Edena dala ai elda taudia be Dirava ena siahu henunai idia abidia hidi?

10. Namona be elda taudia do idia naria namonamo, dahaka lalohadai dikana do idia abia garina?

17. Kongregesen taudia iboudiai ese dahaka kara do idia goadalaidia be namo?

21. Keristen taudia ese abidadama goadana, Mose ena hegeregerena, edena bamona idia hahedinaraia?

[Picture on page 16]

Adam bona Eva ese Paradaiso idia haboioa, badina be idia ura idia sibodia ese maoro bona kerere do idia lalohadailaidia

[Picture on page 18]

Bema elda ta ese mamoe ia kara henidia mai ena manau bona mai ena lalokau ida, nega ibounai namo do ia havaraia