“Lauegu Abidadama Lau Karaia Haorea Vadaeni”

BRUNELLA INCONDITI ENA TURADIA ESE IDIA SIVARAILAIA

“UNAI Saturday, lau sibona lau noho bona nega be metairametaira momokani ia heau. Daiutu lalonai sibogu lau noho, bona lau laloa egu mauri be anina lasi. Egu mamina be hegeregere ruma ta lalonai lau raka lao noho. Gau iboudiai idia namo, bena haraga momokani tau ta ese lauegu vairana dekenai iduara ia koua. Lau hekwarahi bada lau raka lasi totona, to lau hegeregere lasi.”

Lagani 15 kekenina, Brunella Inconditi, ena kudouna ia metau badina ia lalohisihisi bada herea. Ia be matamata sibona bona ena mauri lalonai anina bada dinana ia ore noho. Unai lagani ia matamaia neganai, Iehova bona Baibel ia lalokau henia bada dainai, ena mauri ia gwauhamatalaia Iehova dekenai. July 1990 ai, Iehova ena Witness taudia edia “Gado Goevadaena” Distrik Hebouhebou, Montreal, Canada dekenai, do ia bapatiso. Madi, unai ia vara lasi, to ela bona mase neganai Brunella ena abidadama do ia tohoa gauna ta ia vara.

Dina rua sibona idia do noho ia bapatiso ena gwauhamata toana hahedinaraia totona, bena ia davaria ia be leukemia gorere ia abia. Unai gabu ena natudia edia hospital edia doketa idia ura Brunella do idia durua haraga, unai dainai, Brunella be hospital dekenai ia noho.

Ena Hereva Dainai Doketa Idia Hebogahisi

Brunella ia diba rara be helaga gauna Iehova Dirava dekenai. (Levitiko 17:11) Iena tamana bona sinana, Edmondo bona Nicoletta, idia gwaubou vadaeni rara do idia gaukaralaia lasi edia natuna kekeni be medikal dalanai idia durua lalonai. Ena tamana ia gwau: ‘Ena be ia be kekeni maragi sibona, to Brunella ia ura doketa taudia be ia amo unai hereva idia kamonai danu. Mai goada ida ia hamaorodia ia ura lasi Baibel ena hahegani, “rara umui rakatania” haheganina, ia utua medikal heduruna ia abia neganai.’​—Kara 15:20.

July 10, 1990 ai, doketa toi bona taunimanima ia durua hahinena ta be Brunella ena tama sina bona Iehova ena Witness edia kongregesen edia haroro taudia rua ida idia hebou. Gorere idia tahua neganai idia davaria Brunella be lymphoblastic leukemia gorere ia abia. Doketa ese edia heduru palani idia gwauraia hedinaraia. Mai hereva manau ida idia hahedinaraia inai gorere hanamoa dalana do ia auka. Kongregesen elda ta ia gwau: “Brunella ena kara bona ena ura bada Dirava badinaia totona dainai doketa taudia bona heduru hahinena idia hebogahisi. Ena tama sina edia lalokau bona ena turadia Keristen kongregesen amo edia heduru dainai idia hoa bada. Edia lalohadai ai lalo-pararalaia bona ai matauraidia dainai idia moale.”

Doketa taudia idia ura lasi rara do idia gaukaralaia. Idia gwau Brunella dekenai chemotherapy heduru do idia henia nega daudau lalonai, to hanaihanai taunimanima idia henidia dala siahuna hegeregerena do idia henia lasi. Unai amo, unai medikal dalanai ia vara diba karana ese ena rara do ia hadikaia lasi. Nicoletta ia gwau, ‘Doketa taudia ese Brunella ena tauanina, ena lalona mamina, bona ena ura lauma dalanai idia laloa danu. Doketa ai noidia bema hegeregere, leukemia gorere idia abia natudia ia durua diba bona rara ia gaukaralaia lasi doketa ma ta idia tahua neganai, idia gwau ia namo.’ Brunella bona hospital dekenai idia gaukara taudia idia hetura namo herea.

Lauma Dalanai Ia Ura Hagugurudia Gaudia

Idia durua matamaia neganai, ia namo sisina to unai be Brunella ena hekwakwanai ena matamana sibona. November 1990 ai, gorere ia namo sisina dainai, bapatiso ia abia haraga. Idia hanaia hua lalodiai idia vara gaudia ia lalodia neganai, Brunella ia gwau: “Ia auka momokani. Oi goada, bona gau namodia sibodia oi laloa be namo. . . . Hetoho bada lau davaria egu abidadama dekenai, to lau gini auka, bona lau ura regular pioneer [ful-taim hesiai tauna] gaukara lau karaia totona lau hegaegae noho.”

Lagani 1991 ia matamaia lalonai, Brunella ena gorere ia bada lou. Chemotherapy heduru ia abia noho lalonai, kahirakahira ia mase to ia namo lou, bona taunimanima ibounai idia hoa bona idia moale. August hua lalonai, ia goada dainai heduru pioneer gaukara ia karaia diba. To ena gorere ia bada lou, bona November 1991 ai ena tauanina kahana haida dekenai kensa idia vara. Hospital ma ta ena doketa taudia ese radiation amo idia durua matamaia.

Ena be unai nega be auka momokani, Brunella ena lalona ia goada bona lauma dalana ai ia ura hagugurudia gaudia ia lalodia. Nega ginigunana ai ia diba leukemia gorere ia abia neganai, idia hamaoroa ia be hua 6 sibona lalonai do ia mauri. Lagani tamona mai kahana idia hanaia vadaeni, bona Brunella be nega vairai do ia karaia gaudia ia do lalohadailaidia noho. Kongregesen elda ta ia gwau: ‘Ia be nega ia haorea kava lasi, karaharaga ena tahua gaudia ia hagugurudia toho. Brunella ese Dirava ena Paradaiso gwauhamatana ia abidadama henia dainai, unai ese ia hagoadaia ena hekwakwanai lalonai. Ena be ia be kekeni maragi sibona, to lauma dalanai ia tubu bona ia goada. Ena kara bona lalohadai namodia ese kongregesen ia durua bada bona ia idia diba taudia bona hospital dekenai idia gaukara taudia ese idia lalokau henia bada.’ Ena sinana ia gwau: “Ia maumau lasi. Bema ta ese ia nanadaia ena mamina be edena bamona, ia haere, ia gwau, “Namo” eiava, “Namo sisina, ma oi be edena bamona?” ’

Nega Vaira Ena Noho Namona

Brunella ese palani ia karaia, July 1992 ai, Iehova ena Witness taudia edia “Diari Loalaia Taudia” Distrik Hebouhebou dekenai do ia lao. To hebouhebou dinana ia ginidae neganai, madi, Brunella be hospital dekenai idia abia vareai, bona idia laloa do ia mase. To, ena be ena gorere ia bada, ia ura Dirava Vairanai Ita Kara Maoromaoro drama ia itaia dainai, hebouhebou dekenai ia mai bona uilisea dekenai ia helai.

Ena mauri dinadia gabedia lalodiai, ia giroa lou ena ruma bese taudia dekenai. Nicoletta ia gwau: ‘Ena mauri dokona dinadia ai, sibona ia laloa lasi to haida ia lalodia bada. Ia hagoadadia Baibel do idia stadilaia noho totona, bona ia hamaorodia, “Paradaiso ai do ita noho hebou.” ’

July 27, 1992 ai, Brunella ia mase, mai ena abidadama ida ia diba Paradaiso tanobadana ai do ia toreisi lou. Lauma dalana ai ia ura ia hagugurudia gaudia ia karaia matamaia sibona, to ia ura ia toreisi lou murinai ena gwauhamata gaudia do ia hagugurudia. Dina haida ia do mase lasi lalonai, Brunella ese revareva ta ia torea, bona inai revareva be ena memorial hebouhebou dekenai idia duahia.

“Egu Turadia, e:

“Umui mai dainai lau tanikiu bada. Umui mai dainai, lauegu ruma bese taudia umui hagoadadia.

“Lau kahirakahira dekenai idia noho taudia dekenai lauegu hereva be, ita ibounai ita hekwarahi bada nega tamona. Nega momo ita lalohisihisi, to nega haida ita moale danu. Egu gorere dainai nega daudau lalonai ita hekwarahi bada, to egu mamina be lau lusi lasi. Revareva Helagadia ia hereva hegeregerena, ‘Tuari namona lau tuarilaia vadaeni, lauegu heau helulu be ia ore vadaeni, bona lauegu abidadama lau karaia haorea vadaeni.’​—2 Timoteo 4:7.

“Gau momo lau dibadia, bona lau tubu danu, bona lau badinai idia noho turadia ese unai idia itaia. Lau ura lau idia durua taudia iboudiai dekenai lau tanikiu henia bada.

“Nega matamata bona Iehova umui abidadama henia taudia, be umui diba toreisi lou do ia vara, Ioane 5:​28, 29 ena hereva hegeregerena. Unai dainai hereva momokani lalonai do umui goada noho, bena do ita hedavari lou.

“Lau ura egu gorere lalonai lau dekenai idia vara gaudia ibounai idia diba taudia lau tanikiu henia bada. Umui lau rosia nega daudau bona lau kisi henia. Umui ibounai lau lalokau henia bada.”

Brunella be matamata sibona bona ia gorere, to unai ese ia koua lasi Dirava ia gwauhamata henia totona. Abidadama bona goada ia haheitalaia namonamo dainai, unai ese matamatadia bona burukadia ia hagoadadia mauri ena heau helulu dekenai idia ia koua diba gaudia iboudiai idia negedia totona.​—Heberu 12:1.