Petero Ena Gara Gabuna Vatican Lalonai?

“APOSETOLO edia Lohia ena gara gabuna idia davaria vadaeni.” Vatican ena reidio dekena amo, Pope Pius Namba 12 be mai moale danu unai hereva ia harorolaia. Unai be lagani 1950 ena dokona ai, bona St. Peter’s Basilica ena henunai geigei gaukara haida idia haorea vaitani. Haida idia gwau, unai akioleji tahua karana ese ia hamomokania Petero be momokani Vatican lalonai idia guria. To haida be unai hereva idia abia dae lasi.

Katolik taudia idia laloa St. Peter’s Church Vatican lalonai be mai anina badana. “Taunimanima momo be tomadiho dainai Rome dekenai idia lao ena badina be Petero ena dagi ia abia tauna idia davaria toho,” be unai gabu ena toana ia herevalaia Katolik bukana ta ena hereva, “badina Petero be Rome dekenai ia mai bona unuseniai idia guria.” To momokani Petero be Rome dekenai idia guria, a? Iena gara gabuna be Vatican lalonai, a? Iena turiadia idia davaria, a?

Akioleji Dekenai Daradara Gauna Ta

Unai geigei gaukaradia be lagani 1940 ai idia matamaia bona idia karaia ela bona lagani 10 bamona, to unai gaukara be hepapahuahu momo gauna. Pope be akioleji taudia dekenai unai gaukara ia henidia. Dahaka idia davaria? Idia davaria gauna ta be Dirava momokani idia diba lasi taudia edia gara gabuna mai ena guri gabudia momo. Idia bogaragidiai, hari inai negai pope ena boubou patana henunai, aedicula ta idia davaria. Aedicula be haba dekenai idia kakasia kohua gabuna ta, bona unuseniai kaivakuku eiava laulau ta idia atoa, tau ta idia laloatao totona; ena vairana be semenisi kakakakana amo idia koua bona ena kahana kahana dekenai haba rua idia noho. Danu, idia hoa badina taunimanima turiadia haida idia davaria, bona idia gwau, unai kahana kahana dekenai idia noho haba rua amo idia abia.

Vadaeni, unai gaudia edia anina gwauraia karadia idia matamaia. Katolik ena diba taudia momo idia gwau unai gaudia idia davaria dainai unai ese ia hamomokania, Katolik edia idaunega amo herevana hegeregerena, Nero ena lohia negana ai Petero be Roma dekenai ia noho bona ena abidadama dainai idia hamasea; reana unai be lagani 64 C.E. ena dagedage negana ai. Danu, haida idia gwau unai turiadia be unai aposetolo ena bona toretore ta amo unai idia diba, idia hahanaia herevana ta ia gwau, “Petero be iniseniai.” Pope Paul Namba 6 be unai lalohadai ia abia dae, badina lagani 1968 neganai ia gwau idia davaria gaudia be “St. Peter ena turiadia, ita lalodia bada bona ita matauraidia be namo.”

Anina gwauraia herevadia sibodia lasi to hereva ma haida idia noho danu. Katolik akioleji tauna Antonio Ferrua, Jesuit tauna ta, Vatican dekenai geigei gaukara tauna ta, be nega momo ia gwau gau haida ia diba to ‘idia koua dainai ia printaia diba lasi.’ Ia diba gaudia be reana Petero ena turiadia idia davaria herevana idia hakoikoia. Danu, Katolik Kadinal Poupard ese ia hegaegaelaia bona lagani 1991 ai idia printaia Rome toana ia herevalaia bukana ta lalonai ia gwau, “saiens taudia be Red Wall henunai idia geigei gaukarana dekenai idia davaria turiadia idia sekedia neganai, unai be sedira aposetolo Petero ena turiadia lasi.” Ita hoa badina unai buka idia printaia lou neganai (lagani 1991 lalonai hua ma haida murinai), unai hereva idia kokia, bona karoa matamatana ta, ladana “Momokani: Petero be St. Peter’s dekenai,” idia torea.

Idia Davaria Gaudia Edia Anina

Ia hedinarai idia davaria gaudia edia anina idauidau idia gwauraidia diba bona taunimanima idauidau dekenai edia anina be idauidau. Momokani, Katolik dubu ena histori idia torea taudia idia diba inai hereva “Petero be ena tomadiho dainai Roma dekenai idia hamasea, bona unuseniai iena guri gabuna ia noho, be histori dekenai idia torea neganai hekwakwanai ia vara, bona taunimanima be unai hereva idia daradaralaia.” Idia davaria gaudia ese dahaka idia hahedinaraia?

Idaunega amo Katolik herevana idia abia dae taudia idia gwau, aedicula laulauna be “laloatao gauna,” lagani 200 ia lao 299 C.E. neganai ia noho pris tauna ta, Gaius, ese ia herevalaia gauna. Kaisarea tauna Eusebius, lagani 300 ia lao 399 C.E. ai dubu ena histori torea tauna ta, ia gwau Gaius ia gwau ‘Vatican Hill dekenai Petero ena laloatao gauna ena noho gabuna’ ia hahedinaraia diba. Idaunega amo herevadia idia abia dae taudia idia gwau unai aposetolo be unuseniai idia guria, gabeai taunimanima ese idia gwauraia “Gaius ena laloatao gauna” gabuna henunai. To ma haida idia gwau geigei amo idia davaria gaudia ena anina be idau, idia hahedinaraia Keristen taudia ginigunadia be edia mase taudia guria dalana idia laloa momo lasi bona Petero bema unuseniai idia hamasea neganai, reana iena tauanina idia abia lou lasi. (Maua itaia, rau 29.)

Haida idia gwau “Gaius ena laloatao gauna” (bema unai be idia davaria gauna) be gara gabuna ta lasi. Idia gwau unai be lagani 300 C.E. kahirakahira negana ai idia haginia gauna ta Petero idia matauraia totona, bona gabeai taunimanima “idia laloa unai be gara gabuna gauna ta.” To, tomadiho stadilaia tauna Oscar Cullmann ia gwau, “Vatican geigei gaukarana amo idia hamomokania lasi unai be Petero ena gara gabuna.”

Unai turiadia be edena bamona? Namona be ita gwau turiadia be edeseni amo idia mai be idia do daradaralaia gauna. Lagani 1 ia lao 100 C.E. neganai, hari idia gwauraia Vatican Hill dekenai, Dirava idia diba lasi taudia edia gara gabuna ia noho, bona mase tauanidia momo be unai gabu ai idia guridia, bona idia momo idia kokidia vadaeni. Haida idia gwau unai aposetolo tauna ena gara gabuna ia hahedinaraia toretore herevadia haida (reana lagani 400 C.E. negana ai bamona idia torea) be “Petero ena turia reana idia noho gabuna” idia makaia. Danu, toretore idia karaia taudia momo idia laloa unai toretore ena anina be reana “Petero be iniseniai lasi.”

‘Idaunega amo Hereva Kererena’ Ta

Histori torea tauna D. W. O’Connor ia gwau: “Gunaguna hereva maorodia be tomadiho dainai [Petero] ia mase gabuna idia herevalaia lasi, to gabeai idia gwauraia hereva kereredia kahirakahira iboudiai idia gwau unai be Vatican gabuna.” Vatican dekenai Petero ena gara gabuna tahua karana be idaunega amo hereva kereredia dainai idia karaia. O’Connor ia gwau, ‘Taunimanima edia turiadia be anina bada gaudia ai idia halaodia neganai, Keristen taudia idia laloa, momokani Petero ena [laloatao gauna] be iena gara gabuna ena gabu korikorina ia hahedinaraia.’

Unai idaunega amo herevadia bona Baibel ese ia hahedibalaia lasi turiadia hahelagaia karana be nega tamona idia bada idia lao. Lagani 200 C.E. negana amo, tomadiho gabudia idauidau ese turiadia idia gaukaralaidia, momokani gaudia bona koikoi gaudia​—bona edia moni habadaia totona idia karaia danu​—“lauma” dalana ai idia kwalimu bona sibodia edia siahu idia habadaia totona. Unai dainai, idia laloa Petero ena turiadia amo hoa karadia idia vara diba, bona tomadiho dainai idia mai taudia be idia gwauraia iena gara gabuna dekenai idia lao. Lagani 700 C.E. kahirakahira neganai, unai hereva idia abia dae taudia be “gara gabuna” latanai edia metau idia duahia namonamo dabuadia idia negedia. Unai negana ena sivarai ta ia gwau, ‘Hoa gauna be inai: bema noinoi tauna ena abidadama ia goada, dabua be unai gara gabuna amo idia abia lou neganai, Dirava ena namo ese ia hahonua bona ena metau be guna ena metau ia hanaia.’ Unai ese ia hahedinaraia unai neganai taunimanima momo be hereva idia abia dae haraga.

Lagani handred momo lalodiai, unai bamona gori herevadia bona idaunega amo idia haginia kava sene herevadia be Vatican Basilica ena dagi habadaia karana idia durua momo. To, hereva idaudia idia vara. Lagani 1100 ia lao 1299 C.E. neganai, Waldens taudia be unai idau momokani herevadia idia gwauraidia koikoi karana bona, Baibel amo idia hahedinaraia Petero be nega ta lasi Roma dekenai ia lao. Lagani handred momo muridiai, Protestan Reformation idia gwauraia taudia be unai bamona idia hereva danu. Lagani 1700 ia lao 1799 C.E. neganai, ladana bada aonega taudia idia laloa unai idaunega amo herevadia be mai edia badina lasi histori ena sivarai bona Baibel dekenai. Ema bona hari, diba momo sikuli taudia, Katolik taudia bona ma haida, be unai bamona idia laloa.

Petero be Roma Lalonai Ia Mase, A?

Manau Galilea haoda tauna ta, Petero, ia laloa lasi ia be Keristen ginigunadia edia nega lalonai kongregesen elda taudia iboudiai ia hanaidia. Lasi, sibona ia gwauraia ia be “elda tadikakana ta.” (1 Petero 5:​1-6; Revised Standard Version) Manau tauna Petero ena kara be idau, bona taunimanima ese idia gwauraia iena gara gabuna heagilaia karana be idau, Vatican Basilica idia vadivadi henia taudia be unai idia itaia diba.

Ma Keristen tomadiho haida ia hanaidia toho totona, Katolik Dubuna be ‘idaunegai idia gwauraia hereva kereredia’ idia hamomokania toho, unai hereva be Petero be nega sisina lalonai Roma dekenai ia noho. To, idaunega amo hereva ma haida idia gwau iena gara gabuna be Vatican dekenai lasi, to ma gabu ta ai Roma lalonai. To Baibel dekenai idia torea hereva korikoridia idia dogoatao noho be namo, ani? Unai buka lalonai sibona Petero be sibona ena hereva ia gwauraia. Dirava ena Hereva lalonai ia hedinarai momokani, Ierusalem lalonai Keristen kongregesen ena hakaua oreana ese ia hadibaia herevadia ia kamonai henia dainai, Petero be idaunegai tanobadana ena ist kahana dekenai ia gaukara momo, unai be Babulono ai danu.​—Galatia 2:​1-9; 1 Petero 5:13; Kara 8:14 itaia danu.

Lagani 56 C.E. bamona ai, Roma dekenai Keristen taudia ia tore henidia neganai, aposetolo Paulo ese unai kongregesen ena memba taudia 30 edia ladadia ia gwauraidia, to nega ta lasi Petero ena ladana ia gwauraia. (Roma 1:​1, 7; 16:​3-23) Bena lagani 60 bona 65 C.E. edia huanai, Paulo be Roma amo revareva 6 ia toredia, to Petero ia gwauraia lasi​—unai be hamomokania hereva badana Petero be unuseniai ia noho lasi.a (Timoteo Iharuana 1:​15-17; 4:11 itaia danu.) Paulo ena gaukara Roma lalonai be Kara bukana ena dokona ai ia gwauraia, to unai neganai danu, Petero be nega ta lasi ia gwauraia. (Kara 28:​16, 30, 31) Vadaeni, Baibel ena hamomokania herevadia ita tahua namonamo neganai, bona taunimanima edia lalohadai kava ita laloa lasi, ita diba Petero be Roma dekenai ia haroro lasi.b

Pope dagi “badana” lalohadaina ia vara idaunega amo hereva kereredia dainai bona revareva helagadia edia anina idia gageva herevadia dainai. Petero lasi, to Keristen tomadihona ia haginia tauna be Iesu. Paulo ia gwau, “Keriso be ekalesia ena kwarana.” (Efeso 2:​20-22; 5:23) Iehova ese Iesu Keriso ia siaia abidadama taudia iboudiai ia hanamodia bona ia hamauridia totona.​—Ioane 3:16; Kara 4:12; Roma 15:29; 1 Petero 2:​4-8 itaia danu.

Vadaeni, idia laloa Petero ena gara gabuna ai idia lao taudia iboudiai, be idia ura ‘iena gabu ia abia tauna idia davaria,’ to edia hekwakwanai be, ‘idaunega amo hereva kereredia’ do idia abia dae eiava Dirava ena Hereva maorona do idia abia dae. Keristen taudia idia ura Dirava ese edia tomadiho do ia abia dae, unai dainai namona be ‘Iesu, edia abidadama do ia durua ela bona dokona Tauna,’ bona ia ese ia karaia haheitalai goevadaena ita badinaia totona, ‘ia dekenai iseda matana ita negea lao.’​—Heberu 12:2; 1 Petero 2:21.

[Footnotes]

[Box on page 29]

“Geigei gaukarana ese gara gabuna ta be Aedicula henunai ia hahedinaraia lasi; danu, idia diba lasi Keristen taudia be guria totona St. Peter ena tauanina be idia alaia taudia amo idia abia eiava lasi. Vaia edia kara hegeregerena, idau bese tauna (peregrinus), bona gavamani ese idia laloa taravatu utua tauna, ena mase tauanina be reana Tiber sinavai lalonai idia negea. . . . Danu, unai neganai taunimanima turiadia naridia noho karana idia laloa bada lasi ela bona gabeai, tanobada ena dokona ia kahirakahira lalohadaina idia laloaboio sisina neganai, bona tomadiho dainai idia mase taudia tomadiho henidia oreana ia hedinarai matama neganai. Unai dainai, reana St. Peter ena tauanina idia tahua lasi idia guria totona.”​—The Shrine of St. Peter and the Vatican Excavations, Jocelyn Toynbee bona John Ward Perkins ese idia torea.