Iehova Do Oi Hanamoa A?

“DIRAVA e, tanobada kahana ibounai dekenai noho taunimanima ese, oiemu ladana idia hanamoa noho.” (Salamo 48:10) Inai hereva be Kora ena natuna edia peroveta anena ta amo. Hari inai negai, Iehova ena Witness taudia milioni haida ese Basileia ena sivarai namona harorolaia gaukarana amo Dirava idia hanamoa bona ena ladana be taunimanima idia hadibaia. Tano bona motumotu 232 lalonai bona gado 300 mai kahana lalonai idia karaia; anina be “tanobada kahana ibounai dekenai” idia lao.

Dahaka ese bese idauidau taudia mai edia noho idauidau bona gado idauidau ia hasiahudia dainai, Iehova idia hanamoa? Dirava ena Hereva, Baibel unai, idia diba maoromaoro dainai, idia ura Dirava idia tanikiu henia. Tomadiho herevadia momokanidia ese gari kava bona taunimanima idia guia tomadiho herevadia amo ia ruhaia nege; unai hereva ta be hisihisi ania hanaihanai herevana. (Ioane 8:32) Hereva momokani ese danu ia durudia, Dirava ena kara hereadaedia idia lalo-pararalaia totona; gaudia be, ena lalokau, ena siahu, ena aonega, bona ena hahemaoro maoromaoro mai hebogahisina. Kara maoromaoro taudia ese Dirava ena kara, taunimanima davalaidia totona ena Natuna tamona be boubou gauna bamona ia henia karana, idia lalo-pararalaia neganai, unai ese ia ha-uradia, Iehova do idia hanamoa bona iena hesiai do idia lao henia totona.

Baibel bukana Apokalupo ese ia hahedinaraia guba lalonai haida idia hereva hebou, idia gwau: “Aiemai Lohiabada, aiemai Dirava e, oi be hegeregere momokani vadaeni, taunimanima ibounai ese hairai bona mataurai, be oi dekenai do idia henia, bona oiemu siahu henunai do idia noho. Badina gau ibounai be oi ese oi havaraia. Oiemu ura dainai oi karadia, bona oiemu ura dainai idia noho.” (Apokalupo 4:11) Unai bamona idia hanamoa, hahegani ena mamina sibona dainai lasi, to Iehova idia matauraia dainai.

Sivarai Namona Harorolaia Gaukarana amo Dirava Oi Hanamoa

Taunimanima ta ese Iehova ia hanamoa neganai, Dirava ia hanamoa tauna hereadaena, Iesu Keriso, ena kara ia tohotohoa unai. Iesu ena aena gabudia dekenai ia raka, ena anina ta be Dirava ena Basileia ena sivarai namona ia harorolaia. (Mataio 4:​17, 23; 24:14) Inai haroro gaukarana be tanobada hegegemadai Iehova hanamoa dalana badana ai ia lao vadaeni.

Inai haroro gaukarana be mai anina bada, unai dainai Baibel ia gwau hahemauri be ia dainai do ia vara. Roma 10:​13-15 ena hereva be inai: “ ‘Dirava ena ladana idia noinoi henia taudia ibounai, be mauri do idia davaria.’ To idia abidadama henia lasi taudia be edena bamona Lohiabada do idia noinoi henia diba? Bona iena Sivarai idia kamonai lasi taudia be edena bamona do idia abidadama diba? Bona bema haroro tauna be lasi neganai, edena bamona do idia kamonai? Bona haida bema idia siaidia lasi, haroro taudia be edena bamona do idia haroro? Buka Helaga dekenai ia torea hegeregerena, ia gwau: ‘Sivarai Namona ena moale idia mailaia taudia edia aena, be namo herea momokani, ani.’ ”

Lagani gunana lalonai, Iehova ena Witness taudia be hora bilioni ta mai kahana lalonai idia haroro. Dirava hanamoa karana unai bamona ese anina namona ia havaraia! Taunimanima 314,000 bamona ese ranu lalonai bapatiso idia abia, Iehova idia gwauhamata henia vadaeni karana ena toana; unai amo Dirava hanamoa oreana ai idia vareai.

To, lagani 1994 lalonai Keriso ena mase laloatao totona, Memorial heboudia dekenai idia hebou taudia 12,288,917 be edena bamona? Idia 7,000,000 mai kahana be sivarai namona harorolaia gaukarana amo Iehova idia do hanamoa lasi. To unai mai anina bada negana ai idia hebou dainai, reana idia milioni haida be Dirava hanamoa oreana ai do idia vareai. Unai kamonai taudia be edena bamona ita durudia diba, Iehova hanamoa taudia ai do idia lao totona?

Heduru Idia Abia Diba

Reana kamonai taudia momo idia ura Iehova do idia hanamoa, to idia laloa idia hegeregere lasi. Salamo torea tauna ena hereva idia laloa be namo, ia gwau: “Lau ese ororo dekenai egu matana do lau negea, to lau do ia durua tauna be edeseni do lau davaria? Lohiabada be egu durua Tauna. Ia ese guba bona tanobada ia karaia.” (Salamo 121:​1, 2) Salamo torea tauna ese ena matana ia negea Ierusalema ena ororo dekenai, Iehova ena dubu helaga bona ena gavamani ena hedikwota tanobada ai idia noho gabuna unai. Unai dainai ita diba, Dirava do idia hanamoa bona Basileia sivaraina do idia harorolaia totona, Iehova bona ena orea sibodia amo heduru idia abia diba.​—Salamo 3:4; Daniela 6:10.

Hari inai negai, idia ura Iehova do idia hanamoa taudia be iena tanobada oreana ese do ia durudia mai ena lalokau ida. Hegeregere, Iehova ena Witness taudia ese kamonai taudia idia hamaorodia do idia durudia; idia gwau edia ruma lalonai Baibel amo do idia stadi henidia, davana lasi. Inai hadibaia gaukarana amo Baibel ena hahediba herevadia be diba tahua tauna idia hadibalaia sibona lasi, to idia durua danu, ia dibaia herevadia bona Iehova ese ia gaukaralaia oreana do ia laloa bada totona.

Unai hegeregerena, Baibel stadi ia naria Witness tauna ese inai ia tahua namonamo: Diba tahua tauna ese ia dibaia matamata herevadia momokanidia be ena darana sibona ai lasi, to ena lalona ai danu, do ia abia dae. Bona Iehova ese ena ura be tanobada ai do ia hagugurua totona, ena orea ia gaukaralaia dalana be hadibaia tauna ese diba tahua tauna ia hadibalaia be namo. Momo idia davaria, buklet ta ladana Iehova ena Witness Taudia be Lalo-Tamona ai Dirava ena Ura Idia Karaia Tanobada Ibounai Dekenai bona vidio teipi ladana Jehovah’s Witnesses​—The Organization Behind the Name ese idia durudia, unai bamona idia karaia totona.

Keristani heboudia danu ese nega vairai Iehova do idia hanamoa taudia idia durua bada. Hadibaia tauna ese Baibel stadi ia abia matamata tauna ia boiria diba, Keristani heboudia do ia lao henia. Gabeai, diba tahua tauna do ia diba, kongregesen heboudia iboudiai lalonai do ia vareai loulou bona idia lalonai do ia haere be mai anina bada. (Heberu 10:​24, 25) Elda taudia ese orea taudia bona nega vairai Iehova do idia hanamoa taudia idia durudia bada diba dalana be inai: Hebou namodia idia hegaegaelaia; idia amo lauma dalanai idia hagoadadia bona haroro daladia idia hadibalaidia.

Memero Kekeni Oi Durua Iehova Do Idia Hanamoa Totona

Nega daudau lasi memero kekeni momo be sivarai namona harorolaia taudia ai do idia lao diba. Baibel ena hereva hegeregerena, tama edia maduna be Iehova ‘ena hadibaia hereva be edia natudia dekenai do idia hadibaia.’ (Efeso 6:4) Tama sina, Dirava idia badinaia taudia, ese edia natudia bema idia hadibaia namonamo neganai, herevana idia maragi, to Iehova hanamoa urana idia habadaia diba.

Kekeni maragina ta Argentina ai ese hua momo lalonai kongregesen ena elda taudia ia noia loulou, do idia durua bena do ia hegeregere Basileia harorolaia kekenina ai do ia lao. Gabeai, ena tamana sinana bona elda taudia ese idia gwaumaoro henia, bapatiso lasi pablisa ta ai do ia lao. Ruma ta ruma ta dekenai Basileia sivaraina ia gwauraia namonamo diba vadaeni. Ena be hari kekeni ena lagani be 5 sibona bona ia duahiduahi diba lasi, to siri haida edia gabu Baibel lalonai ia tahua loulou ela bona ia laloatao. Haroro negadiai, siri ta ia davaria murinai, ruma tauna ia noia do ia duahia, bena ena anina ia gwauraia hedinarai.

Ia hedinarai goevagoeva, elda taudia bona tama sina ese Iehova hanamoa taudia ai idia lao gwauraia taudia hagoadaia bona durua karadia amo namo bada idia havaraia diba.​—Aonega Herevadia 3:27.

Iehova Tura Henia Hanaihanai

To, bema oi be nega daudau sisina lalonai Iehova ena Witness taudia ida umui hebou loulou, to haroro gaukarana be idia ida oi karaia lasi, namona be sibomu oi henanadai inai bamona: ‘Lau abia dae vadaeni hereva momokani lau davaria vadaeni bona Iehova mo sibona be Dirava momokani, a? Lau hamomokania vadaeni, Dirava ena Basileia sibona ese taunimanima edia hekwakwanai ia haoredia diba, a? Tomadiho koikoi bona tanobada ena kastom bona ena kara, Iehova idia habadua karadia, iboudiai be lau rakatania vadaeni, a? Dirava bona ena taravatu maorodia lau ura henia bada, a?’ (Salamo 97:10) Unai henanadai oi haerelaidia neganai, bema mai emu momokani ida oi gwau, oibe, dahaka ese oi ia koua dainai Iehova oi hanamoa lasi?​—Kara 8:36 itaia.

Iehova hanamoa dalana be sivarai namona harorolaia karana sibona lasi. Bema diba maorona oi abia vadaeni, bema oi be mai emu abidadama momokani, bona bema Dirava ena taravatu oi badinadia, namona be Dirava oi tura henia momokani. Edena dala amo? Dalana be inai: Guriguri amo emu mauri be ia dekenai oi gwauhamatalaia bena bapatiso oi abia, emu gwauhamata ena toana. Bema lasi, mauri hanaihanai do oi abia diba lasi. Unai dainai, harihari Iesu ena sisiba hegeregerena oi kara: “Iduara maragina dekenai do umui raka vareai. Badina be [hadikaia ore gabuna] ia lao dalana ena iduara ia bada, bona ena dala danu lababa herea. Bona ia auka lasi dainai, taunimanima momo herea be unai dala dekenai idia raka vareai. To mauri gabuna ia lao dalana ena iduara ia maragimaragi, bona ena dala be ia auka. Unai dala idia davaria taudia be momo lasi.”​—Mataio 7:​13, 14.

Hari inai nega ena dokona dika hereana be kahirakahira dainai, hari do oi naria lasi be namo. Karaharaga Dirava tura henia hanaihanai dalana oi tahua. Momokani, namona be hari oi ese inai henanadai​—Iehova do oi hanamoa a?​—be do oi haerelaia, do oi gwau, oibe.