Matamata Taudia E, Iehova Hanamoa!
“Tanobada dekenai noho gaudia ese Lohiabada do idia hanamoa. . . . Ulato bona uhau . . . danu.”—SALAMO 148:7, 12.
1, 2. (a) Matamata taudia momo idia diba dahaka taravatu haida idia noho? (b) Dahaka dainai matamata taudia be edia tama sina idia atoa taravatudia dainai idia badu lasi?
NEGA momo matamata taudia be idia diba dahaka kara dekenai idia be do hegeregere lasi. Momo ese oi do idia hamaoroa diba edena negai idia sibona be dala dekenai idia raka diba, eiava edena hora ai idia mahuta diba, eiava edena negai motuka idia taria diba. Nega haida, reana mero eiava kekeni ia laloa ena be gau momo do ia noia, to tama sina edia haere be inai sibona: “Oi naria ela bona oi bada guna.”
2 Namona be umui matamata taudia umui diba, emui tama sina idia laloa unai bamona taravatu idia atoa be aonega karana, reana umui idia gimaia totona. Danu, umui diba momokani emui tama sina edia hereva umui badinaia neganai, Iehova be ia moale. (Kolose 3:20) To, nega haida oi laloa emu mauri korikori be ia do matamaia lasi, a? Mai anina bada gaudia danu be do taravatu ela bona oi bada guna, a? Lasi vaitani! Hari inai negai, mai anina bada gaukarana ta ia noho, bona ia ese oi do karaia lasi hahenamo ma haida ia hereaia. Umui matamata taudia be maoro idia henia unai gaukara umui karaia totona, a? Gau badana be: Ataiai Momokani Diravana ese oi ia boiria unai gaukara oi karaia totona!
3. Iehova ese matamata taudia ia boiria dahaka gaukara badana idia karaia totona, bona dahaka henanadai be hari do ita laloa?
3 Dahaka gaukara ita kikilaia? Inai stadi ena siri badana ena hereva mani ita laloa: “Tanobada dekenai noho gaudia ese Lohiabada do idia hanamoa. . . . Ulato bona uhau, buruka taudia, bona natuna maragidia danu.” (Salamo 148:7, 12) Oi abia hahenamo badana be: Iehova oi hanamoa diba. Oi be matamata tauna dainai, mai moale ida unai gaukara oi durua, a? Momo be unai bamona idia karaia noho. Mai moale ida unai gaukara ita karaia ena badina ita itaia totona, henanadai toi mani ita laloa. Ginigunana be, dahaka dainai Iehova oi hanamoa be namo? Iharuana be, edena dala ai Iehova oi hanamoa diba? Ihatoina be, edena negai Iehova oi hanamoa matamaia be namo?
Dahaka Dainai Iehova Ita Hanamoa?
4, 5. (a) Salamo 148 hegeregerena, ita be dahaka kara namo hereana ta ita karaia diba? (b) Edena bamona idia hereva diba lasi eiava lalohadai diba lasi gaudia be Iehova idia hanamoa diba?
4 Iehova ita hanamoa ena badina badana be inai: Iehova be Havaraia Tauna. Salamo 148 be ita ia durua unai hereva momokani ita laloa bada totona. Mani oi laloa: Bema grup badana ta kahirakahira oi lao bona idia be ane namona ta idia abia, emu hemami be edena bamona? To bema oi diba unai ane ena hereva be momokani, mai anina bada, moale ia havaraia, bona lalona ia hagoadaia be edena bamona? Oi ura unai ane ena hereva oi dibaia bona anelaia, a? Ita momo be unai bamona do ita karaia. Momokani, Salamo 148 ese ia hahedinaraia oi be unai bamona kara ta oi karaia diba, bona ia be kara hereadaena. Unai salamo be orea ta ia gwauraia, idia ibounai be Iehova idia hanamoa hebou. To, unai salamo oi duahia neganai, gau idauna ta oi itaia. Unai be dahaka?
5 Salamo 148 lalonai, Dirava idia hanamoa gaudia momo be idia hereva diba lasi eiava lalohadai diba lasi. Hegeregere dina, hua, hisiu, ororo badadia bona maragidia be Iehova idia hanamoa. Edena bamona unai mauri lasi gaudia be Iehova idia hanamoa diba? (Siri 3, 8, 9) Momokani, au, davara gaudia, bona animal idauidau be unai bamona idia karaia danu. (Siri 7, 9, 10) Nega ta oi be dina ia diho ena hairai oi itaia, eiava hua kuboruna be hisiu momo ia hanaia lao oi itaia, eiava animal idia gadara neganai oi kiri, eiava gabu mai hairaina ta oi moalelaia, a? Vadaeni, oi be unai gaudia amo Dirava hanamoa anena oi “kamonai.” Iehova ia havaraia gaudia ibounai ese ita idia hadibaia Iehova be Siahu Ibounai Diravana bona Havaraia Tauna; iunives lalonai siahu bada, aonega bada, eiava lalokau bada tauna ma ta be Iehova bamona lasi.—Roma 1:20; Apokalupo 4:11.
6, 7. (a) Salamo 148 ia gwau daidia ese Iehova idia hanamoa? (b) Dahaka dainai ita ura Iehova ita hanamoa? Haheitalai ta gwauraia.
6 Danu, Salamo 148 ia hahedinaraia taunimanima bona aneru be Iehova idia hanamoa. Siri 2 ia gwau, Iehova ena guba “tuari oreana,” aneru unai, be Dirava idia hanamoa. Siri 11 (BHğ ) ia gwau, siahu bona goada bada taudia, hegeregere king bona hahemaoro taudia danu be Dirava idia hanamoa. Bema aneru goadadia be Iehova idia hanamoa karana amo moale idia abia, vadaeni tanobada tauna ta ia gwau diba lasi ia be bada dainai Iehova do ia hanamoa lasi, ani? Bena siri 12 bona 13 ese umui matamata taudia danu ia boiria, Iehova umui hanamoa totona. Oi ura unai bamona oi karaia, a?
7 Mani haheitalai ta oi laloa. Bema emu turana be mai ena diba bada—reana spot gadara, laulau torea bona penia karana, eiava miusiki dekenai—ena sivarai be emu ruma bese bona turadia ma haida dekenai do oi gwauraia, a? Oibe. Iehova ia karaia gaudia ibounai ita dibaia neganai, ita ura unai bamona do ita karaia danu. Hegeregere, Salamo 19:1, 2 ia gwau guba hisiudia be ‘Dirava idia herevalaia noho.’ To ita be Iehova ia havaraia hoa gaudia ita laloa neganai, ita ura bada ma haida dekenai eda Dirava ita herevalaia.
8, 9. Dahaka dainai Iehova ia ura Ia ita hanamoa?
8 Iehova ita hanamoa ena badina badana ma ta be: Iehova ia ura unai bamona ita karaia. Dahaka dainai? Badina ia ura taunimanima amo hanamoa ia abia, a? Lasi. Nega haida ita ura haida amo hanamoa ita abia, to Iehova be ita ibounai ia hereaia. (Isaia 55:8) Ia sibona bona ena kara dekenai ia daradara lasi. (Isaia 45:5) To, Ia ura ia ita hanamoa bona unai bamona ita karaia neganai Ia moale. Dahaka dainai? Unai ena badina rua mani ita laloa. Badina ginigunana be, Iehova ia diba ia ita hanamoa be namo. Ia ese ita ia karaia neganai, eda lalona ai lauma gaudia tahua urana, Ia ita tomadiho henia urana unai, ia atoa. (Mataio 5:3, NW ) Iehova ia itaia ita be unai bamona ita karaia neganai ia moale; emu tama sina idia itaia idia diba aniani namona ta oi ania neganai idia moale hegeregerena.—Ioane 4:34.
9 Badina iharuana be, Iehova ia diba taunimanima ma haida be idia ura Ia ita hanamoa herevana idia kamonai. Aposetolo Paulo be matamata tauna Timoteo dekenai inai hereva ia gwauraia: “Oi sibona oiemu kara do oi naria namonamo, oiemu hadibaia hereva danu. Inai kara namodia do oi karaia noho, badina unai dekena amo, oi sibona ese mauri do oi davaria, bona oi dekenai idia kamonai taudia danu ese mauri do idia davaria.” (1 Timoteo 4:16) Oibe, taunimanima ma haida dekenai Iehova Dirava ena sivarai oi hadibaia, o Ia oi hanamoa neganai, idia danu be Iehova do idia diba. Unai diba ese hahemauri hanaihanai ia havaraia diba!—Ioane 17:3.
10. Dahaka dainai ita ura iseda Dirava ita hanamoa?
10 Iehova ita hanamoa ena badina ma ta ia noho. Emu turana mai ena diba bada ena haheitalai mani oi laloa lou. Bema oi kamonai ma haida be emu turana idia samania koikoi bona ena ladana namona idia hadikaia, oi ura bada emu turana ena ladana do oi hanamoa, ani? Oibe, inai tanobada taudia momo be Iehova ena ladana namona idia hadikaia. (Ioane 8:44; Apokalupo 12:9) Unai dainai, Iehova idia lalokau henia taudia idia ura Iehova ena sivarai momokanina idia gwauraia, eiava hereva koikoina idia hamaoromaoroa. Oi ura oi danu be Iehova oi lalokau bona tanikiu henia, bona oi hahedinaraia Ia be emu Lohia Tauna bona ena inai tauna badana Satani oi dadaraia, a? Iehova oi hanamoa neganai, unai ibounai oi karaia diba. Vadaeni, henanadai ma ta be, edena dala ai Iehova oi hanamoa diba?
Matamata Taudia Haida ese Iehova Idia Hanamoa Dalana
11. Edena Baibel haheitalai ese idia hahedinaraia matamata taudia be Iehova idia hanamoa diba?
11 Baibel ese ia hahedinaraia, nega momo matamata taudia be Iehova idia hanamoa diba. Hegeregere, Israela kekeni ta be Suria dekenai idia abia lao. Ia be mai gari lasi ida ena biaguna hahinena dekenai Iehova ena peroveta tauna Elisaia ena sivarai ia harorolaia. Iena hereva dainai hoa karana ta ia vara, bona haroro goadana ta ia henia. (2 King Taudia 5:1-17) Iesu ia maragi neganai, ia be mai gari lasi ida ia haroro danu. Ena be Iesu ia matamata neganai ia karaia gaudia ena sivarai be momo bona Baibel ai idia torea diba, to Iehova ia abia hidi sivarai tamona be inai: Iesu ena mauri lagani be 12 neganai, mai gari lasi ida Ierusalema ena dubu gunalaia taudia ia nanadaia, bona idia be Iesu ese Iehova ena dala ia lalopararalaia karana idia hoalaia.—Luka 2:46-49.
12, 13. (a) Iesu be ena mase negana ia kahirakahira neganai dubu lalonai dahaka ia karaia, bona taunimanima be dahaka idia karaia? (b) Iesu be memero bona kekeni edia hanamoa karana be edena bamona ia laloa?
12 Danu, Iesu ia bada neganai natudia ia hadibaia Iehova idia hanamoa totona. Hegeregere, idia do hamasea lasi ena dina gabedia ai, nega haida Iesu be Ierusalema ena dubu dekenai ia lao. Baibel ia gwau, unuseniai ia be “hoa karadia” ia karaia. Dubu helagana be henao taudia edia ruma ai idia halaoa taudia ia lulua. Danu, matakepulu taudia bona aena dika taudia ia hanamodia. Unuseniai idia noho taudia ibounai, to namona be dubu gunalaia taudia, ese Iehova bona ena Natuna Mesia idia hanamoa be namo. Madi, unai negai idia noho taudia momo be unai hanamoa herevadia idia gwauraia lasi. Idia diba Iesu be Dirava ese ia siaia to dubu gunalaia taudia dekenai idia gari. To, orea ta be mai gari lasi ida idia hereva. Idia oi diba, a? Baibel ia gwau: “Dubu biagudia bona taravatu hadibaia taudia ese Iesu ena hoa karadia idia itaia, memero bona kekeni danu edia hereva idia kamonai, Dubu Helaga lalonai idia boiboi, idia gwau, ‘Hosana, Davida ena natuna ita hanamoa!’ Vadaeni idia be badu dikadika. Idia nanadaia Iesu dekenai, idia gwau, ‘Inai maragidia edia hereva oi kamonai, a?’ ”—Mataio 21:15, 16; Ioane 12:42.
13 Unai dubu biagudia idia ura Iesu be ia idia hanamoa memero bona kekeni ia koudia. Iesu be unai bamona ia karaia, a? Lasi vaitani! Iesu be dubu biagudia dekenai ia gwau: “Oibe. Umui be nega ta Buka Helaga umui duahia lasi, a? ‘Natudia maragidia, rata idia inua memero, edia uduna dekenai Dirava idia hanamoa namonamo.’ ” Ia hedinarai goevagoeva, Iesu bona ena Tamana be natudia maragidia edia hanamoa karana idia moalelaia. Unuseniai idia noho taunimanima badadia ibounai ese unai bamona idia karaia be namo, to lasi, unai natudia sibona be unai idia karaia. Unai matamata taudia idia laloparara dahaka idia karaia be namo. Idia itaia unai tau be hoa karadia ia karaia, mai gari lasi bona abidadama ida ia hereva, bona ia hahedinaraia ia be Dirava bona ena taunimanima ia lalokau henidia bada. Ia gwau ia be “Davida ena natuna,” gwauhamata Mesiana—iena hereva be momokani. Unai natudia maragidia edia abidadama karana dainai, idia ese peroveta herevana idia hagugurua.—Salamo 8:2.
14. Edena dala ai matamata taudia be idia abia gaudia amo Dirava idia hanamoa?
14 Unai haheitalai amo dahaka ita dibaia diba? Matamata taudia be Iehova idia hanamoa diba. Nega momo hereva momokanina idia lalopararalaia namonamo, bena mai edia ura bada ida edia abidadama idia herevalaia namonamo. Danu, idia be Aonega Herevadia 20:29 ia gwauraia gauna idia abia: “Eregabe taudia edia hairaina be edia goada.” Oibe, matamata taudia be goada bada idia abia—unai amo Iehova idia hanamoa diba. To, unai goada be edena bamona oi gaukaralaia diba?
Edena Dala ai Iehova Oi Hanamoa Diba?
15. Iehova oi hanamoa momokani totona, dahaka be mai anina bada?
15 Dirava hanamoa karana be kudouna amo ia matamaia be namo. Oi be Iehova do oi hanamoa momokani lasi bema ma haida edia ura dainai unai oi karaia. Laloaboio lasi, taravatu hereadaena be inai: “Lohiabada oiemu Dirava dekenai do oi lalokau henia mai emu lalona ibounai, mai emu lauma ibounai, mai emu kudouna ibounai.” (Mataio 22:37) Iehova ena Hereva stadilaia karana amo Ia oi diba, a? Unai diba dainai, Iehova do oi lalokau henia. Ia oi hanamoa neganai, unai lalokau ia hedinarai. Emu lalohadai ia goeva bona goada neganai, oi ura Iehova oi hanamoa.
16, 17. Dahaka dainai iseda kara be mai anina bada Iehova hanamoa karana dekenai? Haheitalai ta gwauraia.
16 Vadaeni, do oi herevalaia gauna oi do laloa lasi neganai, edena bamona do oi kara mani oi laloa. Bema Elisaia ena negai ia noho Israela kekenina be mai badu, hemataurai lasi, eiava koikoi ida ia hereva, oi laloa Suria taudia be kekeni ese ia gwauraia Iehova ena peroveta tauna ena sivarai do idia kamonai, a? Reana lasi. Unai hegeregerena, taunimanima do idia kamonai bema idia itaia oi hemataurai, koikoi lasi, bona kara namo. (Roma 2:21) Inai haheitalai oi laloa.
17 Portugal ai, mauri lagani 11 kekeni ta be sikuli ai tisa ese ia doria holide karadia ia moalelaia totona, to unai ese ena lalomamina, Baibel amo ia hadibaia gauna ia hadikaia diba. Mai hemataurai ida iena tisa dekenai ia hahedinaraia dahaka dainai unai kara lalonai do ia vareai lasi, to tisa ese ia kirikirilaia. Gabeai, tisa ia ura kekeni ia hahemaraia loulou toho, kekeni ena tomadiho ia hevasehalaia. To, unai kekeni matamata be mai hemataurai ida ia gini goada. Lagani haida murinai, unai taihu matamata be regula painia eiava ful-taim hesiai kekenina ta ai ia lao. Hebouhebou ta ai, ia be bapatiso taudia ia raraia bona idia ta be ia diba. Unai be iena tisa gunana! Mai tai danu idia rosia heheni murinai, unai taihu badana ese taihu matamata ia hamaoroa ia be ena stiuden ena hemataurai karana ia laloaboio lasi. Witnes taihu ta be tisa ia vadivadi henia, bona tisa ese ena stiuden gunana ena kara ia herevalaia. Unai dainai, Baibel stadi ia hamatamaia, bona unai tisa be Baibel ena hereva momokani ia abia dae. Oibe, oiemu kara be mai ena siahu bada Iehova hanamoa karana dekenai!
18. Bema matamata tauna ese Baibel bona Iehova Dirava ia herevalaia be ia auka, vadaeni dahaka ia karaia diba?
18 Nega haida oi davaria sikuli ai herevahereva oi hamatamaia eiava emu abidadama oi herevalaia totona be ia auka, a? Oi sibona be unai bamona oi laloa lasi. To, dala oi kehoa diba ma haida ese emu abidadama idia henanadailaia totona. Hegeregere, bema Baibel idia herevalaia bukadia oi abia lao be taravatu lasi, vadaeni laga-ani negana eiava nega maorona ma ta ai oi duahia, a? Reana oi duahia noho bukana dainai emu turadia do idia henanadai. Buka ai oi duahia eiava laloa bada herevana oi gwauraia neganai, unai ese herevahereva dalana do ia kehoa. Henanadai oi henia, emu turana ia abia dae gaudia oi diba totona. Mai hemataurai ida oi kamonai, Baibel amo oi dibaia gauna be ia dekenai oi harorolaia. Matamata taudia momo be sikuli ai Dirava idia hanamoa. Unai dainai idia moale bada, bona momo idia durua Iehova idia diba totona.
19. Edena dala ai matamata taudia ese ruma-ta-ruma-ta haroro gaukara idia karaia namonamo diba?
19 Ruma-ta-ruma-ta haroro gaukarana be Iehova ita hanamoa dalana hereadaena. Bema unai gaukara oi do karaia lasi, reana tahua gauna ai oi halaoa be namo, ani? Bema unai gaukara oi karaia noho, vadaeni oi sibona totona tahua gaudia ma haida oi atoa, a? Hegeregere, namo lasi ruma-ta-ruma-ta dekenai haroro hereva tamona sibona oi gaukaralaia, to haroro karana oi hanamoa daladia oi tahua, emu tama sina eiava lo taudia ma haida amo heduru oi abia. Namona be Baibel gaukaralaia momo dalana, lou henia namodia karaia dalana, bona Baibel stadi hamatamaia daladia oi dibaia. (1 Timoteo 4:15) Unai dala idauidau amo Iehova oi hanamoa neganai, emu diba do ia bada ia lao, bona emu haroro gaukara do oi moalelaia bada.
Edena Negai Iehova Oi Hanamoa Matamaia be Namo?
20. Dahaka dainai matamata taudia idia gwau lasi Iehova hanamoa totona idia do hegeregere lasi?
20 Inai stadi ena henanadai toi amo, henanadai ginigabena ena haere be auka lasi. Baibel ena haere mani oi laloa: “Oi be eregabe neganai, ia ese oi ia karaia Dirava do oi laloa.” (Hadibaia Tauna 12:1) Oibe, Iehova hanamoa matamaia negana be hari. Reana oi gwau diba: “Lau do matamata momokani dainai, Iehova hanamoa totona lau do hegeregere lasi. Egu diba be bada lasi. Namona be lau naria ela bona lau bada guna.” Oi sibona be unai bamona oi laloa lasi. Hegeregere, matamata tauna Ieremia be Iehova dekenai ia gwau: “Lohiabada Dirava e, lau be hereva dalana lau diba lasi, lau be mero sibona.” Iehova ese Ieremia ia hagoadaia ia gari be namo lasi. (Ieremia 1:6, 7) Unai hegeregerena, Iehova ita hanamoa neganai, ita gari lasi be namo. Iehova be dika idauidau amo ita ia durua diba.—Salamo 118:6.
21, 22. Dahaka dainai Iehova hanamoa matamata taudia be paripari bamona, bona dahaka dainai unai be hagoadaia gauna?
21 Unai dainai, umui matamata taudia ai hagoadaia: Namona be Iehova umui hanamoa noho! Bema hari oi be matamata, ia be nega namona hari tanobada ai idia karaia gaukara badana oi karaia totona. Unai bamona oi karaia neganai, oi be gau hereadaena ta—Iehova idia hanamoa ruma bese badana—ena kahana ai oi lao. Unai ruma bese lalonai oi noho neganai, Iehova ia moale. Salamo torea tauna ese Iehova ia hereva henia neganai, ia gwauraia hereva helagadia mani oi laloa: “Oi ese oi dekenai idia dagedage taudia, be do oi tuari henidia dinana dekenai, oiemu orea taudia ese oi dekenai do idia haboua, bona mai edia ura kwalimu danu oi do idia durua. Daba maragi neganai paripari ia hedinarai bamona, oiemu durua taudia [“matamata taudia,” NW ] be oi dekenai do idia haboua, ororo helagana dekenai.”—Salamo 110:3.
22 Dabai dina ia diari dainai hanuaboi ena paripari ia diaridiari neganai, ena toana be namo herea, ani? Unai gau ese goada matamata idia henia, idia diari, bona idia be momo herea momokani. Matamata taudia e, bema inai nega aukadia lalonai Iehova umui kamonai henia bona hanamoa, vadaeni iena matanai umui be unai paripari bamona. Ia hedinarai goevagoeva, Iehova ena kudouna ia moale bema Ia hanamoa karana oi abia hidi. (Aonega Herevadia 27:11) Unai dainai, namona be umui matamata taudia ese Iehova umui hanamoa!
Edena Bamona Do Oi Haere?
• Iehova ita hanamoa ena badina badadia haida be dahaka?
• Edena Baibel haheitalaidia ese idia hahedinaraia matamata taudia ese Iehova idia hanamoa momokani diba?
• Hari inai negai matamata taudia ese Iehova be edena bamona idia hanamoa diba?
• Edena negai matamata taudia ese Iehova idia hanamoa matamaia diba, bona dahaka dainai?
[Pictures on page 17]
Bema emu turana be mai ena diba bada, ma haida dekenai ena sivarai do oi herevalaia, a?
[Picture on page 19]
Emu sikuli turadia be reana emu tomadiho idia laloa bada
[Picture on page 20]
Bema oi ura emu haroro gaukara oi hanamoa, namona be lo Witnes taudia amo heduru oi tahua