Ogogami Taudia Do Idia Naria ela Bona Edena Negai?

“Bema ura kwalimu besena ta ese ogogami taudia momo ia durua diba lasi, taga taudia momo lasi be ia hamauria diba lasi.”​—John F. Kennedy.

“LAU ura nega vairai taunimanima iboudiai edia noho do ia namo​—ogogami be lasi, iboudiai be mai edia ruma, bona paradaiso do ia vara!” Ena lagani be 12 merona ta São Paulo, Brazil, amo be unai bamona ia hereva. Ogogami haorea dalana ia noho, a? Ogogami taudia do idia naria ela bona edena negai?

Taunimanima haida be idia ura henia gaudia idia hoia diba lasi dainai, idia gwau idia ogogami. To, idia ogogami momokani taudia edia noho dikana mani oi laloa. Edia hekwarahi bada bona edia lalohisihisi oi laloa diba, a? Haida be momoru negea gabudia dekenai kanage manudia bona bita ida aniani idia tahua helulu! Unai bamona ogogamina ese taunimanima do ia hadikaia ela bona edena negai? UNESCO (United Nations Educational, Scientific, and Cultural Organization) ena dairekta-general, Federico Mayor, ena noinoi be mai anina; ia gwau: “Mai eda koikoi ida ita laloa momo lasi gaudia dika rohorohodia​—taunimanima milioni milioni edia ogogami, hitolo, bona hisihisi​—do ita laloa momo matamaia be namo.”

Taunimanima ese idia ura henia bada gauna, tanobada hegegemadai taunimanima iboudiai do idia noho namo, be do ia vara, a? Ogogami taudia ese idia abia diba helarona be dahaka?

Edena Dala Idia Kehoa, Ogogami Taudia Edia?

Tanobada gunalaia taudia mai edia ura namona idia gwau, edia palani be moni gaukaradia ma haida do idia havaraia, gaukara taudia edia pei do idia habadaia, gaukara lasi taudia durua daladia do idia hanamoa, bona idia birulaia diba tanona do idia haria namonamo. Reana idia ese U.S. presiden gunana, John F. Kennedy, ena hereva idia hamomokania; ia gwau: “Bema ura kwalimu besena ta ese ogogami taudia momo ia durua diba lasi, taga taudia momo lasi be ia hamauria diba lasi.” To lalohadai namodia sibodia be hegeregere lasi ogogami do idia haorea vaitani. Hegeregere, bema bisinesi idia habadaia, unai ese ogogami taudia momo do ia durua, a? Reana lasi. India gunalaia tauna gunana ta, Jawaharlal Nehru, ia gwau: “Sibodia edia ura hegeregerena bisinesi idia karaia taudia bema ta ese ia biagudia lasi, kohu momo taudia edia kohu ia momo ia lao bona ogogami taudia edia ogogami ia bada ia lao.” To, hekwarahi bona ogogami sibona lasi, to idia laloa idia be anina lasi lalohadaina danu ese ogogami taudia ia hametaua. Ogogami taudia idia laloa heduru do idia abia dalana be lasi bona idia be helaro lasi; tanobada gunalaia taudia ese idia durua diba unai lalohadai do idia negea totona, a?

Kohu bona aniani edia davana ia bada daekau bona moni gaukarana idia davaria diba lasi dainai, ogogami taudia ese edia noho idia hemarailaia, to idia ogogami herea taudia momo ese edia hemarai idia negea vadaeni bona edia ogogami idia haheaukalaia noho. Bona danu, hitolo, ruma lasi nohona, bona lalohisihisi be momokani do idia ore vaitani. Inai hereva oi hoalaia, a? Ai ura oi ese hereva gabena do oi duahia; ena sinado be “Nega Daudau Lasi, Ta Do Ia Ogogami Lasi!”