Ogogami Taudia Dekenai Helaro Ita Henia
1 Iesu be ogogami taudia ia laloa bada. Nega haida ia be hoa dalanai aniani ia henia bona gorere taudia ia hanamoa, to iena ura badana be ogogami taudia dekenai “sivarai namona” ia harorolaia. (Mat. 11:5) Hari inai negai, eda haroro gaukara be ogogami taudia bona ma haida ia durua noho.—Mat. 24:14; 28:19, 20.
2 Helaro Korikorina: Nega momo Kerisendom ena gunalaia taudia ese ogogami taudia idia hamaoroa edia noho dalana do ia namo herea bema dubu dekenai moni eiava kohu momo idia henia. To, Baibel ia gwau Dirava ena Basileia sibona be ogogami bona hekwakwanai ma haida do ia haorea. (Sal. 9:18; 145:16; Isa. 65:21-23) Unai dainai, ogogami taudia ita durua hereva momokani idia dibaia neganai, idia be helaro namona do idia abia sibona lasi, to Dirava do idia diba bona tomadiho henia danu.—Mat. 5:3, NW.
3 Iesu ena negai, Farisea taudia be ogogami taudia idia dadaraia, idia gwauraidia ‘am-ha·’aʹrets o “tano taudia.” To Iesu dekenai, ogogami taudia “edia mauri be gau namo herea.” (Sal. 72:13, 14) Ita be Iesu ita tohotohoa diba, hegeregere ogogami taudia ita hebogahisi henidia bona lalodia bada. (Aon. 14:31) Bema ogogami taudia edia ruma ena toana be namo lasi, idia ita gwauraia dika lasi to idia dekenai sivarai namona ita harorolaia. Ogogami taudia momo be Basileia sivaraina idia abia dae noho.
4 Ogogami Taudia Ita Durua: Danu, bema ogogami taudia dekenai Baibel ena hakaua herevadia ita hadibaia, idia momo be ogogami idia havaraia karadia idia dadaraia. Hegeregere, Baibel be kekero, kasi gadara, lahedo, kuku, bona taunimanima edia moni idia haorea karadia ma haida ia taravatua. (Aon. 6:10, 11; 23:21; 2 Kor. 7:1; Efe. 5:5) Baibel be taunimanima ia hagoadaia, namona be ‘mai edia kudouna ibounai’ ida edia gaukara idia karaia bona idia koikoi lasi—momokani, gaukara biagudia momo be unai bamona taudia idia tahua. (Kol. 3:22, 23; Heb. 13:18) Ripoti ta ia gwau, gaukara biagudia momo idia ura edia kampani dekenai kara maoromaoro taudia idia gaukara.
5 Iehova be ogogami taudia edia hisihisi ia itaia. Kahirakahira Iesu Keriso be “idia boiboi” ogogami taudia do ia hamauria. (Sal. 72:12) Unai nega ita naria noho lalonai, namona be ogogami taudia bona ma haida dekenai Baibel ia gwauraia helaro namona ita henia.