Duahia Taudia Edia Henanadai

Hahelaga tauna badana Keriso Iesu ese ena gaukara, Heberu 4:15, 16 ese ia gwauraia gaukarana, amo, “mamoe idaudia” be edena bamona ia durua, hari inai nega lalonai?

Ena be Hahelaga Tauna Badana, Iesu, be ena hahelaga dagina ai ia karaia gaukarana be mai anina bada, ia ida guba lalonai do idia noho hebou taudia dekenai, to tanobada helarona idia abia Keristani taudia ese Iesu ena hahelaga gaukarana amo hahenamo idia abia diba hari inai negai.

Adamu ena nega amo, kara dika ese taunimanima ia hametaudia. Adamu dainai ita goevadae lasi, Israela taudia idia goevadae lasi hegeregerena. Idia ese hahelaga taudia badadia bona hahelaga taudia ma haida dekenai idia lao, bena unai hahelaga taudia ese boubou idia karaia, sibodia edia kara dika bona taunimanima edia dainai. Gabeai, Dirava ese Iesu ia horoa, hahelaga tauna ai ia halaoa, “Melekisedeka hegeregerena.” Mase amo ia toreisi lou murinai, Iesu be Iehova vairanai ia hedinarai, ena boubou gauna, ia sibona ena tauanina goevadaena, ena davana henia totona.​—Salamo 110:​1, 4.

Hari inai nega lalonai unai ena anina ita dekenai be dahaka? Paulo ese Heberu taudia ia tore henia; ena revareva lalonai ia ese Hahelaga Tauna Badana, Iesu, ena gaukara ia herevalaia. Heberu 5:1 dekenai inai hereva ita duahia: “Hahelagaia Tauna Badana idia abia hidi dalana be inai bamona: Taunimanima edia huanai dekena amo Dirava ese ia abia hidi, ia be Dirava ena hesiai tauna, taunimanima durua totona. Iena gaukara danu be, kara dika kokia totona boubou gaudia ia karaia, bona harihari gaudia ia henia.” Bena, Heb 5 siri 5 bona 6 ai, Paulo ese ia hahedinaraia Iesu be hahelaga tauna badana ai ia lao dainai, hahenamo ita davaridia diba.

Edena bamona? Paulo ese inai hereva ia torea: “Iesu be Dirava ena Natuna, to ia ese hisihisi ia abia, bona unai hisihisi ese Dirava kamonai henia dalana ia hadibaia. Ela bona ia be namo momokani vadaeni, iena namo ese ibounai edia namo ia hereaia. Unai dainai ia be hegeregere vadaeni, ia dekenai idia kamonai henia taudia ibounai dekenai, be mauri hanaihanai do ia henidia. Dirava ese inai dala ia havaraia.” (Heberu 5:​8, 9) Matamanai, unai siri dainai reana tanobada matamatana lalonai do ita abia hahenamodia ita laloa; Dirava bona Iesu idia badinaia taudia be unai nega lalonai Dirava ese edia dika do ia kokia bona mauri hanaihanai do idia abia. Unai be helaro korikorina mai ena badina; ena badina be Iesu ena boubou, taunimanima davalaia boubouna, bona iena heduru, Hahelaga Tauna Badana dagina ai ia henidia heduruna unai.

To, momokani, hari inai negai ita ese ena hahelaga dagina ai ia karaia gaukarana amo heduru ita abia diba. Mani Heberu 4:​15, 16 ena hereva oi laloa: “Ita be manoka dainai karadika ese nega momo ita ia hamorua. To iseda Hahelagaia Tauna Badana ese ita ia bogahisihisi henia diba. Badina be ia danu ese dibagani ena mamina ia abia, ita ese ena mamina ita abia hegeregerena. To Iesu ese kara dika ta ia karaia lasi. Unai dainai mai gari lasi danu, Dirava ena bogahisihisi ia noho helai gabuna dekenai ita raka kahirakahira lao, be namo. Vadaeni ia ese ita do ia bogahisihisi henia, bona ia ese hariharibada bona durua ita dekenai do ia henia, iseda metau hegeregerena.” Edena negai “hariharibada bona durua ita dekenai do ia henia” be namo? Namona be ita ibounai ita diba, ita goevadae lasi dainai hari inai negai do ia henia be namo.

Heberu 4:​15, 16 ese ia hahedinaraia, Iesu​—hari ia be hahelaga tauna guba lalonai​—be guna taunimanima ta tanobada ai, unai dainai ia be mai ena hebogahisi. Daidia ia hebogahisi henidia? Ita. Edena negai? Hari. Tanobada ai ia noho neganai, taunimanima ese idia davaria hekwarahidia be ia danu ese ia davaria. Nega ta ta ia hitolo bona ia ranu mase. Bona ena be ia goevadae, to ena tauanina ia hesiku danu. Unai ese iseda lalona ia hagoadaia. Badina be dahaka? Badina be tauanina ena hesiku ena mamina ia abia dainai, iseda hemami ia diba. Inai danu mani oi laloa: Iesu ese ena aposetolo edia heai ia lalo-hekwarahilaia. (Mareko 9:​33-37; Luka 22:24) Oibe, nega haida ena lalona ia hisihisi. Unai dainai, eda lalona idia hisihisi bona idia manoka negadiai, namona be ita laloa Iesu ese eda hemami ia lalo-pararalaia diba, ani?

Emu lalona ia manoka neganai, dahaka oi karaia diba? Paulo ia gwau namona be oi naria ela bona emu Hahelaga Tauna Badana, Iesu, ese tanobada matamatana lalonai oi do ia durua, emu darana bona emu tauanina do idia goevadae totona, a? Lasi. Paulo ia gwau, Iesu ese “ita do ia bogahisihisi henia, bona ia ese hariharibada bona durua ita dekenai do ia henia, iseda metau hegeregerena”; anina be hari inai negai danu ita do ia durua. Inai danu, Iesu be tanobada ai ia noho neganai, hisihisi ia ania bona hekwarahi ia davaridia; “ia danu ese dibagani ena mamina ia abia, ita ese ena mamina ita abia hegeregerena.” Unai dainai, unai hekwarahi ita davaridia negadiai, ia hegaegae ita do ia durua, badina be iseda hekwarahi ia lalo-pararalaia. Unai ese oi ia veria lao ia kahirakahira dekenai, ani?

Mani Heb 4 siri 16 oi laloa. Paulo ia gwau ita​—anina be horoa taudia bona mamoe idaudia danu​—be Dirava dekenai ita raka kahirakahira lao diba, mai eda gari lasi ida. (Ioane 10:16) Aposetolo ena hereva ena anina be inai lasi: Guriguri lalonai ita ese iseda ura herevadia iboudiai, badu herevadia o hemataurai lasi herevadia danu, do ita gwauraia diba. Lasi, to, anina be inai: Ena be ita be kara dika taudia, to Iesu ena boubou dainai, bona ia be Hahelaga Tauna Badana dagina lalonai ia karaia gaukarana dainai, Dirava dekenai ita raka kahirakahira lao diba.

Hari inai nega lalonai iseda Hahelaga Tauna Badana, Iesu Keriso, ena amo heduru ita abia dalana ma ta be mai anina, iseda kara dika eiava iseda kerere dekenai. Ita laloa lasi hari inai negai Iesu ese ena boubou ena namo ibounai amo ita do ia durua. Ena be unai bamona bema ia karaia, to mauri hanaihanai ita do abia lasi. Luka 5:​18-26 ena sivarai oi laloatao, a? Haida ese raka diba lasi tauna ta be ruma ena guhi matuna amo idia atoa diho Iesu vairanai. Iesu ese ia hamaoroa, ia gwau: “Tau e, oiemu dika lau gwauatao vadaeni.” Ena tauanina ena manoka idia havaraia kara dikadia sibodia mo lasi, to ena kara dikadia iboudiai ia gwauraia unai. Reana unai ena anina be Adamu ena amo ia abia hanai dikana ta danu; unai dika ese hisihisi ia havaradia.

Do ia henia boubouna dainai, Iesu ese taunimanima edia kara dikadia ia abia oho diba, Kara Dika ena Davana Karaia Dinana ai Asasele ena nani ese Israela taudia edia kara dikadia ia abia oho hegeregerena. (Levitiko 16:​7-10) To, ia raka diba lasi tauna be do taunimanima ta. Do ia kara dika lou, bena gabeai do ia mase, kara dika taudia ibounai hegeregeredia. (Roma 5:12; 6:23) Iesu ena hereva dainai, hari tau be maoromaoro mauri hanaihanai ia abia lasi. To unai neganai Iesu ese ena dika ia gwauatao dainai, hahenamo ta ia abia.

Vadaeni, ita siboda eda noho mani oi laloa. Ita be goevadae lasi dainai, dina dina iboudiai ita kara kerere. (Iamesi 3:2) Unai dainai dahaka ita karaia diba? Ita be mai eda Hahelaga Tauna Badana mai ena hebogahisi guba ai; ia ena amo Iehova ita guriguri henia diba. Oibe, Paulo ese ia torea herevana hegeregerena, ita ibounai be “mai gari lasi danu, Dirava ena bogahisihisi ia noho helai gabuna dekenai ita raka kahirakahira lao, be namo. Vadaeni ia ese ita do ia bogahisihisi henia, bona ia ese hariharibada bona durua ita dekenai do ia henia, iseda metau hegeregerena.” Unai dainai, hari inai negai ita mamoe idaudia iboudiai ese Keriso ena gaukara, Hahelaga Tauna Badana ena dagi gaukaradia, amo hahenamo ita abidia; unai hahenamo ta be lalo-goeva.

Tanobada helarona idia abia Keristani taudia iboudiai ese hahenamo badadia idia naria diba mai edia moale ida; kahirakahira do ia vara tanobadana matamatana lalonai do idia vara. Unai neganai iseda Hahelaga Tauna Badana guba lalonai ese ena boubou ena namo ibounai amo ita do ia durua, bena unai dainai Dirava ese iseda dika do ia gwauatao guguru. Iesu ese tauanina dalanai bona lauma dalanai taunimanima do ia durua, bena do idia goada. Dirava ena orea taudia tanobada dekenai hadibaia gaukarana be Iesu ese do ia habadaia, badina be Taravatu hadibaia gaukarana be hahelaga taudia edia gaukara badana ta Israela lalonai. (Levitiko 10:​8-11; Deuteronomi 24:8; 33:​8, 10) Vadaeni, Iesu ena hahelaga gaukarana amo hari inai negai hahenamo ita abidia, to gabeai, unai idia hereaia hahenamodia do ita abia!