Iesu Keriso ese Ita Ia Durua Dalana
IESU Keriso be tanobada dekenai ia noho neganai taunimanima ia durudia namo herea. Unai be momokani dainai, tau ta be Iesu ena mauri lalonai ia karaia gaudia momo ia itaia murinai, ia gwau: “Kara momo herea danu Iesu ese ma ia karaia. Ibounai bema idia torea, lau laloa tanobada ibounai ena bada be do ia hegeregere lasi, unai buka ibounai haboua totona.” (Ioane 21:25) Iesu ese tanobada dekenai gau momo ia karaia dainai, reana do ita henanadai: ‘Edena bamona ia be guba dekena amo ita ia durua diba? Hari, Iesu ena hebogahisi karana amo namo do ita abia, a?’
Haere be kudouna ia hamarerea bona ia hagoadaia momokani. Baibel ese ita ia hamaoroa Keriso be “guba dekenai ia raka vareai. Unuseni Dirava ena vairanai, ita durua totona ia gaukara noho.” (Heberu 9:24) Ita totona dahaka ia karaia? Aposetolo Paulo ia gwau, “[Keriso be] Helaga Herea Gabuna [“guba”] lalonai nega tamona sibona ia raka vareai, ia karaia lou lasi. Bona unai bamona ia karaia neganai, nanigosi bona boromakau edia rarana ia abia vareai lasi boubou karaia totona. Lasi momokani. To ia ese sibona ena rarana ia abia vareai, bona unai dekena amo ia ese mauri hanaihanai ita totona ia abia.”—Heberu 9:12; 1 Ioane 2:2.
Unai be sivarai namona! Iesu be taunimanima totona ena kara namo ia hadokoa lasi, to guba ai ia daekau karana ese ia durua taunimanima dekenai ena heduru ia habadaia totona. Unai be momokani badina Dirava be ena hebogahisi dainai, Iesu ia abia hidi bona ‘hesiai tauna’—hahelaga tauna badana—ai ia halaoa, “Siahu Momokani Diravana ena helai gabuna badana idiba kahanai ia helai noho, guba dekenai.”—Heberu 8:1, 2.
‘Hesiai Tauna’
Guba dekenai, Iesu be taunimanima edia hesiai gaukara ia karaia. Do ia karaia gaukarana be idaunegai Israela ena hahelaga tauna badana ese Dirava idia tomadiho henia taudia totona idia karaia gaukarana. Bona unai gaukara be dahaka? Paulo ia gwau: “Hahelagaia Taudia Badadia ibounai edia gaukara be harihari gaudia bona boubou gaudia Dirava dekenai idia henia. Unai dainai Keriso danu ese boubou gauna ta ia henia.”—Heberu 8:3.
Iesu ia henia diba gauna ese idaunegai hahelaga taudia idia henia boubou gaudia ia hereaia momokani. “Nanigosi bona boromakau tau edia rarana bona boromakau natuna” ese lauma dalanai Israela taudia idia hagoevaia diba. “To Keriso ena rarana ese unai bamona kara ia hereaia momokani, ani? Badina be . . . iena rarana ese iseda lalona do ia hagoevaia anina lasi boubou karadia dekena amo. Vadaeni Mauri Diravana ena hesiai gaukara do ita karaia diba.”—Heberu 9:13, 14.
Danu, Iesu be hesiai tauna hereadaena, badina mase diba lasi maurina ia abia. Idaunegai Israela dekenai, “hahelagaia taudia momo herea idia noho, badina be idia mase bona edia gaukara dekena amo idia doko dainai.” To, Iesu be edena bamona? Paulo ia gwau: “Iena hahelagaia gaukara be ia noho nega ibounai, bona ta ese iena gabu do ia abia diba lasi. Unai dainai Iesu be mai ena siahu, iena ladana dainai Dirava dekenai idia mai taudia do ia hamauridia. Badina be inai: Iesu ia noho hanaihanai, bona ia ese inai taudia totona Dirava ia noia noho hanaihanai.” (Heberu 7:23-25; Roma 6:9) Oibe, guba dekenai ita be mai iseda hesiai tauna Dirava ena idiba kahanai ia helai, bona ‘ita totona hanaihanai Dirava ia noia noho.’ Unai ena anina ita totona mani oi laloa!
Iesu be tanobada dekenai ia noho neganai, taunimanima be ia dekenai heduru idia abia totona idia mai, bona nega haida gabu daudau idia raka, idia ia durua totona. (Mataio 4:24, 25) Guba ai, Iesu be ia gini hegaegae bese ibounai taudia durua totona. Guba dekenai ia noho dainai nega ibounai ia hegeregere hesiai tauna bamona ia gaukara.
Iesu be Edena Bamona Hahelaga Tauna Badana?
Evanelia bukadia dekenai Iesu Keriso ena kara sivaraidia idia torea, unai dainai ena heduru bona hebogahisi karadia dekenai ita daradara lasi. Ia be sibona ena namo ia tahua lasi! Nega momo, ia bona iena hahediba taudia idia ura idia laga-ani neganai, taunimanima idia mai. Iena laga-ani negana namona idia hadikaia dainai ia badu lasi, to ia dekenai heduru idia tahua taudia “ia bogahisihisi” henia. Herevana Iesu ia hesiku, hitolo, bona ranu mase, to taunimanima “ia abia dae” bona mai ena ura ida lalo-momokani kara dika taudia ia durua totona aniani ia reaia.—Mareko 6:31-34; Luka 9:11-17; Ioane 4:4-6, 31-34.
Iesu be hebogahisi tauna dainai, dala ia tahua taunimanima be tauanina, lalona, bona lauma dalanai ia durua totona. (Mataio 9:35-38; Mareko 6:35-44) Danu, idia ese heduru bona goada idia davaria diba dalana ia hadibaia. (Ioane 4:7-30, 39-42) Hegeregere, ia ese ita ia boiria herevana ese ita ia veria, ia gwau: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai. Egu huaia auna be emui pagana dekenai do umui atoa, lau dekenai diba do umui tahua, badina lau be dagedage lasi bona manau tauna. Vadaeni emui laumana be do idia laga-ani.”—Mataio 11:28, 29.
Iesu be taunimanima ia lalokau henidia momokani dainai, kara dika taudia totona ena mauri ia henia. (Roma 5:6-8) Unai dainai aposetolo Paulo ia gwau: “[Iehova] Dirava ese iena Natuna tamona sibona ia vara ia dogoatao lasi, to ita ibounai totona ia henia, boubou gauna bamona. Oibe, iena Natuna ita dekenai ia henia vadaeni. Unai dainai ita diba, gau ibounai ita dekenai do ia henia momokani, ani? . . . Keriso Iesu ia mase, to ma ia toreisi lou. Ia be Dirava ena imana idiba kahana dekenai ia noho, bona ita totona Dirava dekenai ia noinoi noho!”—Roma 8:32-34.
Hahelaga Tauna Badana mai Ena Hebogahisi
Iesu be taunimanima bamona ia noho neganai, hitolo, ranu mase, hesiku, lalo-metau, hisihisi, bona mase ena mamina ia abia. Ia haheaukalaia lalo-hekwarahi bona lalona veria gaudia ese dala idauna ai ia idia durua hisihisi idia ania taudia edia Hahelaga Tauna Badana ena gaukara ia karaia diba totona. Paulo ia gwau: “Iesu be kara ibounai dekenai, iena tadina taudia hegeregerena momokani ia lao. Badina unai dala dekena amo Iesu be Hahelagaia Tauna Badana do ia lao, bona Dirava ena hesiai gaukara, mai momokani bona mai bogahisihisi danu do ia karaia. Bona unai dala dekena amo danu, taunimanima edia kara dika be Dirava ese ia gwauatao diba. Iesu ese dibagani bona hisihisi ena mamina ia abia dainai, ia ese taunimanima ia durua diba, edia dibagani neganai. Iesu Keriso be varani bona hari ia idau lasi. Bona do ia idau lasi, ela bona hanaihanai.”—Heberu 2:17, 18; 13:8.
Iesu ese ia hahedinaraia ia be hegeregere bona ia ura taunimanima ia durudia Dirava kahirakahira idia lao totona. To, unai ena anina be ia ura lasi dika ia gwauatao bona mai ena dagedage bona hebogahisi lasi Diravana ena lalona ia haidaua toho, a? Lasi vaitani, badina Baibel be ita ia hamaoroa ‘Iehova be mai ena bogahisihisi, bona kara dika ia gwauatao noho.’ Ma ia gwau: “Bema iseda kara dika Dirava dekenai ita gwauraia hedinarai, ia ese ita do ia negea lasi. Lasi momokani. Ia be kara maoromaoro dainai, iena gwauhamata do ia badinaia, bona iseda dika do ia gwauatao. Bona iseda kerere ibounai be do ia huria ore momokani.” (Salamo 86:5; 1 Ioane 1:9) Momokani, Iesu ena hebogahisi herevadia bona karadia ese iena Tamana ena hebogahisi bona lalokau idia hahedinaraia.—Ioane 5:19; 8:28; 14:9, 10.
Iesu be kara dika amo idia helalo-kerehai taudia be edena bamona ia durua? Mai momokani ida Dirava idia hamoalea karadia dekenai ia durudia idia ese moale bona hemami namona idia davaria totona. Paulo ese ena horoa Keristani tadikaka ia tore henidia, ia gwau: “Ita be mai iseda Hahelagaia Tauna Badana, bona ia be Dirava ena vairanai, guba dekenai ia noho. Ia be Iesu, Dirava ena Natuna. Unai dainai namona be iseda abidadama ita dogoatao goada noho. Ita gwauraia noho abidadama be unai. Ita be manoka dainai kara dika ese nega momo ita ia hamorua. To iseda Hahelagaia Tauna Badana ese ita ia bogahisihisi henia diba. Badina be ia danu ese dibagani ena mamina ia abia, ita ese ena mamina ita abia hegeregerena. To Iesu ese kara dika ta ia karaia lasi. Unai dainai mai gari lasi danu, Dirava ena bogahisihisi ia noho helai gabuna dekenai ita raka kahirakahira lao, be namo. Vadaeni ia ese ita do ia bogahisihisi henia, bona ia ese hariharibada bona durua ita dekenai do ia henia, iseda metau hegeregerena.”—Heberu 4:14-16.
“Durua Ita Dekenai Do Ia Henia, Iseda Metau Hegeregerena”
To, bema ita laloa ita hanaia diba lasi hekwakwanai badadia—gorere badana, ita kerere dainai ia vara lalohisihisi badana, lalo-metau badana, bona dara doko—idia vara neganai, dahaka ita karaia diba? Iesu ese hanaihanai ia badinaia dalana ita badinaia diba—unai hahenamo hereadaena be guriguri. Hegeregere, iena mauri be ita totona ia do henia lasi hanuaboina ai, “ia guriguri goadagoada, ela bona iena kopina ia siahu ranuna be rara bamona ia moru tano dekenai.” (Luka 22:44) Oibe, Iesu be Dirava guriguri henia goadagoada ena mamina ia abia. Ia “ese Dirava ia guriguri henia, mai taitai bona mai matana ranu danu. Ia noinoi, badina ia diba Dirava ese mase dekena amo ia hamauria lou diba. Bona Dirava ese Iesu ena noinoi ia abia dae, badina Iesu be sibona ena ura gauna ia noia lasi, bona ia be Dirava henunai ia manau noho dainai.”—Heberu 5:7.
Iesu ia lalo-parara Dirava ese taunimanima edia “noinoi ia abia dae” bona ia hagoadadia be gau badana idia dekenai. (Luka 22:43) Unai sibona lasi, ia gwauhamata, ia gwau: “Bema gau ta do umui noinoi egu Tamana dekenai, ia ese do ia henia, bema egu ladana umui gwauraia neganai. . . . Umui noinoi, bona do umui abia, vadaeni emui moale do ia momokani.” (Ioane 16:23, 24) Unai dainai, Dirava ita noia diba, bona ita diba momokani ena natuna dekenai maoro ia henia ena siahu bona ena boubou gauna ena davana be ita totona do ia gaukaralaia.—Mataio 28:18.
Ita diba momokani, guba dekena amo Iesu be nega korikori ai heduru maorona do ia henia. Hegeregere, bema kara dika ita karaia bona ita helalo-kerehai momokani, ita do ia hagoadaia gauna be “ita be mai iseda durua tauna, iseda Tamana ena vairanai. Ia be Iesu Keriso, kara maoromaoro tauna.” (1 Ioane 2:1, 2) Iseda Durua Tauna bona Hagoadaia Tauna guba dekenai be ita totona do ia noinoi, bona unai dainai iena ladana bona Baibel ena hereva hegeregerena ita guriguri neganai, haere do ita abia.—Ioane 14:13, 14; 1 Ioane 5:14, 15.
Ita Hahedinaraia Keriso Ena Heduru Ita Laloa Bada
To namo lasi Dirava ena Natuna amo ita noinoi sibona. Keriso ese ena boubou gauna ena davana amo “ita ia hoia lou,” unai dainai ia be tanobada besena “ia hamauria” bona idia be ia ena. (Galatia 3:13; 4:5; 2 Petero 2:1) Keriso be ita totona ia karaia gaudia dainai ia ita tanikiu henia ita hahedinaraia bema ita abia dae ita be ia ena bona mai iseda moale ida iena boiboi hegeregerena ita karaia, ia gwau: “Tau ta bema ia ura lauegu murina dekenai do ia mai, ia ese sibona dekenai do ia laloa lasi, dina ibounai iena satauro do ia abia isi, lauegu murina dekenai do ia raka.” (Luka 9:23) ‘Sibona dekenai do ita laloa lasi’ herevana be hereva kava sibona lasi. “Oibe, Keriso ese taunimanima ibounai dainai ia mase. Unai dainai ia dekena amo mauri ita davaria taudia, be ita sibona iseda mauri bona iseda ura do ita laloa lasi, to ita dainai ia mase” tauna ena. (2 Korinto 5:14, 15) Unai dainai, mauri davana ita laloa bada karana be mai anina bada iseda lalohadai, tahua gaudia, bona mauri dalana dekenai. Iseda abitorehai be bada herea, badina “Keriso ese iena mauri ia henia ita dainai,” bona namona be unai ese ita ia doria Iesu bona ena lalokau Tamana, Iehova Dirava, ita diba totona. Danu, namona be abidadama dekenai ita tubu daekau, Dirava ena taravatu ita badinaia, bona ‘kara namodia ita karaia.’—Tito 2:13, 14; Ioane 17:3.
Keristani kongregesen lalonai nega korikori ai lauma aniani ita dekenai idia henia, idia hagoadaia, bona idia hakaua. (Mataio 24:45-47; Heberu 10:21-25) Hegeregere, tau ta be lauma dalanai ia gorere neganai, namona be “ekalesia gunalaia taudia [elda taudia] do ia boiria.” Iamesi be ma ia gwau: “Inai guriguri mai abidadama danu ese gorere tauna do ia hanamoa. Lohiabada ese iena mauri do ia hanamoa, bona iena kara dika do ia gwauatao.”—Iamesi 5:13-15.
Haheitalai be inai: South Africa dekenai dibura ruma ai ia noho tauna ta ese kongregesen elda ta ia tore henia, ia gwau “Iesu ese ia hamatamaia gaukara namona, Dirava ena Basileia idia davaria totona taunimanima idia durua gaukarana, idia karaia Iehova ena Witnes taudia ibounai” ia laloa bada. Bena ma ia gwau: “Emu revareva lau abia neganai, lau moale bada herea. Lauma dalanai do lau namo lou oi laloa momo karana ese lau ia hagoadaia bada. Lau ese Iehova Dirava ena boiboi, lau helalo-kerehai totona, be lau kamonai henia ena badina ia habadaia. Lagani 27 lalodiai, lau be hisihisi lau abia bona kara dika ena dibura lalonai lau raka, koikoi, heudahanai, bona matabodaga karadia lau karaia, bona namo lasi tomadiho orea idauidau lau bamoa. Iehova ena Witnes taudia lau davaria murinai, lau mamia lau ese dala lau davaria vadaeni—dala maoromaorona unai! To, lau badinaia be namo.”
Vaira Negana ai Heduru Bada Do Ita Abia
Tanobada ena hekwakwanai idauidau be idia bada daekau ese ia hahedinaraia goevagoeva ita be nega ena dokona lalonai ita noho bena murinai “hisihisi badana” do ia vara. Hari, hutuma bada herea, bese idauidau, iduhu idauidau, kopina idauidau, bona gado idauidau amo ese “edia dabua be Mamoe Natuna ena rara ai idia huria bona idia hakurokuroa” noho. (Apokalupo 7:9, 13, 14, NW; 2 Timoteo 3:1-5) Iesu ena mauri davalaia boubouna idia abidadama henia dainai, Dirava ese edia kara dika ia gwauatao bona heduru idia abia ia kahirakahira dekenai idia lao totona—momokani, iena turana ai idia lao.—Iamesi 2:23.
Mamoe ena Natuna, Iesu Keriso, “ese [hisihisi badana amo idia roho mauri taudia] do ia naria. Ia ese mauri ranuna, ia lohilohi gauna, dekenai do ia hakaudia lao. Bona Dirava ese edia taitai ena ranu ibounai edia matana dekena amo do ia dahua ore.” (Apokalupo 7: 17) Bena, Keriso be ena Hahelaga Tauna Badana dagina ai ia karaia gaukarana do ia karaia guguru. Ia ese Dirava ena turana ibounai do ia durudia, “mauri ranuna, ia lohilohi gauna” dainai namo do idia abia momokani totona—lauma dalanai bona tauanina dalanai, bona edia lalohadai bona hemami ia hanamoa danu. Lagani 33 C.E. ai, Iesu ese ia matamaia bona guba dekena amo ia karaia noho gaukarana ia karaia noho ela bona taunimanima do idia goevadae.
Unai dainai, namona be Dirava bona Keriso ese ita totona idia karaia—bona idia karaia noho—gaudia ita laloa bada karana ita hahedinaraia noho. Aposetolo Paulo be ita ia hagoadaia, ia gwau: “Nega ibounai do umui moale, Lohiabada lalonai umui noho dainai. . . . Gau ta totona do umui laloa hekwarahi lasi. To umui dekenai hegeregere lasi gaudia do umui abia totona, Dirava do umui noia. Bona umui noia negadia ibounai, mai tanikiu danu do umui guriguri henia. Dirava ena maino ese taunimanima edia diba ia hanaia momokani. Keriso Iesu umui danu ia hakapua tamona dainai, inai maino ese emui laloa gaudia, bona emui kudouna idia mamia gaudia ibounai do ia gimaia namonamo.”—Filipi 4:4, 6, 7.
Dala badana ai, iseda Durua Tauna guba ai, Iesu Keriso, oi laloa bada karana oi hahedinaraia diba. Wednesday, April 19, 2000 ai, dina ia diho murinai, tanobada hegegemadai, Iehova ena Witnes taudia be Keriso ena mase ena Memorial do idia karaia. (Luka 22:19) Unai be nega namona Keriso ena mauri davalaia boubouna oi laloa bada karana oi habadaia totona. Ai moale bema oi mai bona do oi kamonai edena bamona Dirava ese Keriso amo ia karaia ena hahemauri dalana hereadaena ese namo bada oi dekenai ia havaraia diba ela bona hanaihanai. Mani emu kara emu gabu dekenai idia noho Iehova ena Witnes taudia amo unuseniai do idia hebou negana bona gabuna korikori oi nanadaia.
[Picture on page 7]
Iesu be Dirava guriguri henia goadagoada ena mamina ia diba
[Pictures on page 8]
Keriso ese ita do ia durua, ita sibona ese ita hanaia diba lasi hekwakwanai ita hanaia totona
[Picture on page 9]
Keriso ese mai lalokau elda taudia amo ita ia durua