Aneru Edia Sivarai Momokanina

Tau ta ita dibaia neganai, vaia iena famili taudia danu do ita dibadia. Iehova Dirava ita dibaia neganai unai hegeregerena ita karaia danu. Iena ladana sibona ita dibaia be hegeregere lasi, gau ma haida ita dibaia be namo. Ita ese iena guba “famili” taudia ita dibadia be namo. (Efeso 3:​14, 15 itaia.) Baibel ese aneru ia gwauraidia Dirava ena ‘natudia.’ (Iobu 1:6) Baibel lalonai edia gaukara be mai anina bada dainai, Dirava ena palani lalonai dahaka do idia karaia ita ura dibaia namonamo.

LALOHADAI matamatana ta idia abia dae taudia be idia momo daekau. Taunimanima momo idia gwau aneru idia abidadama henidia; unai sibona lasi, to momo herea idia gwau edia mauri lalonai aneru ese kara idia karaia. America taudia 500 idia nanadaidia, idia gwau: “Emu mauri lalonai aneru ia noho mamina oi abia, a?” Kahirakahira taunimanima 166 idia gwau, oibe. Hoa gauna be inai: Matamata taudia momo idia gwau idia laloa aneru idia noho​—United States lalonai tahua gaukarana ta amo idia davaria 76 pesen be unai bamona idia laloa! Unai ese ia hahedinaraia, taunimanima ese aneru idia ura henidia bada. To, hari inai negai, taunimanima ese aneru idia laloa bada karana be Baibel ena hereva momokanina ida ia hegeregere, a?

Satani Ena Kara Dika Idia Gwauraia Namo

Aneru ita herevalaidia neganai, namona be aneru dikadia ita laloaboio lasi; Baibel ia gwau idia be Dirava idia gwau-edeede henia guba taudia. Badana be Satani. Momo ese idia duahia bukana ta ladana Ask Your Angels be ia gwau, reana Satani be “Dirava ena kahana ta,” hetoho amo taunimanima ia durudia, edia “lauma masolo” idia hagoadaia totona. Unai Buka torea taudia idia gwau, ena be Satani ese “lalokau ia hahedinaraia gwauraia” to lagani momo lalodiai, idia laloa kerere, idia laloa ia be kara dika tauna. Ma idia gwau: “Ena be Satani bona Iesu edia kara be idauidau, to idia be tamona.” Unai be hoa herevadia, to Baibel be dahaka ia gwau?

Baibel ese ia hahedinaraia goevagoeva, Satani be “Dirava ena kahana ta” lasi to ia be Dirava ena inai tauna. (Luka 10:​18, 19; Roma 16:20) Ia ese Iehova ena lohia siahuna ia dadaraia, bona iena ura taunimanima dekenai be “lalokau” lasi momokani. Mai dagedage bada ida ia ese Dirava ena hesiai taudia tanobada ai ia badu henidia. Dirava ena vairanai, dina bona hanuaboi, ia samanidia noho!a (Apokalupo 12:​10, 12, 15-17) Herevana dahaka do ia vara, Satani ia ura do ia hakereredia. Kara maoromaoro tauna Iobu ia dagedage henia mai hebogahisi lasi ida, unai kara amo ia hahedinaraia ia be taunimanima edia hisihisi ia laloa lasi.​—Iobu 1:​13-19; 2:​7, 8.

Satani bona Iesu be “tamona” lasi, idia ruaosi be ta ta idia inai henia dikadika. Oibe, Satani ese Heroda ena lalona ia ania, mero maragidia ia alaia odana do ia karaia​—unai ia karaia, mero maragina Iesu alaia mase totona! (Mataio 2:​16-18) Bona Satani ese Iesu ia dagedage henia ela bona ia mase. (Luka 4:​1-13; Ioane 13:27) Unai dainai, Iesu bona Satani edia “ura be tamona” lasi, to idia be idau momokani. Baibel ena peroveta herevadia ese idia hahedinaraia edia inai heheni karana be mai ena badina korikorina. (Genese 3:15) Unai dainai, Dirava ese ia abia hidi negana ai, ia toreisi lou vadaeni tauna Iesu ese Satani do ia haorea.​—Apokalupo 1:​18; 20:​1, 10.

Daika Guriguri Henia?

Aneru idia abidadama henidia taudia haida idia gwau namona be lalohadai dobu karana bona ma kara haida idia karaia, aneru ida idia herevahereva totona. Buka ta ia gwau: “Bema oi ura dikadika guba famili tauna ta ida oi herevahereva, oi do idia dadaraia lasi.” Ma ia gwau: “Oi noinoi bena oi do idia haere henia.” Unai buka ia gwau, aneru ladadia Michael, Gabriel, Uriel, bona Raphael do oi hereva henidia diba be namo.b

To, Iesu ese iena hahediba taudia ia hadibadia Dirava dekenai do idia guriguri, aneru dekenai lasi. (Mataio 6:​9, 10) Unai hegeregerena, Paulo ia gwau: “Umui dekenai hegeregere lasi gaudia do umui abia totona, Dirava do umui noia. Bona umui noia negadia ibounai, mai tanikiu danu do umui guriguri henia.” (Filipi 4:6) Unai dainai, edia guriguri lalonai, Keristani taudia ese Iehova sibona idia guriguri henia, bona unai be Keriso ena ladana ai.c​—Ioane 14:​6, 13, 14.

Aneru be Tomadiho Dalana ta Idia Badinaia Lasi, A?

AngelWatch Network oreana ia gunalaia hahinena, Eileen Elias Freeman, ia gwau: “Aneru ese tomadiho daladia ibounai, tanobada ena aonega ibounai, hahediba herevadia ibounai idia hereaia. Momokani, aneru ese tomadiho dalana ta, ita diba gauna, idia badinaia lasi.”

To, Baibel ese ia hahedinaraia, kara maoromaoro anerudia be mai edia tomadiho; idia ese Dirava momokanina, Iehova, idia tomadiho henia; ia ura lasi iena aneru ese ma dirava ta idia tomadiho henia. (Deuteronomi 5:​6, 7; Apokalupo 7:11) Unai hegeregerena, unai bamona aneruna ta ese sibona ia gwauraia Ioane dekenai ia gwau ia be Dirava ena hahegani idia badinaia taudia edia “hesiai tauna.” (Apokalupo 19:10) Baibel lalonai gabu ta dekenai ia gwau lasi, aneru mai edia kamonai ese tomadiho dalana idauna ta idia badinaia. Idia ese Iehova sibona mo idia tomadiho henia.​—Esodo 20:​4, 5.

“Koikoi Ibounai Edia Tamana”

Kara momo, aneru ida hedavari karadia idia gwauraia karadia unai, be mase taudia ida herevahereva karadia. Hahine ta ladana Elise ia laloa toa ta ia itaia bena unai murinai ia gwau: “Lau laloa egu vavana be dala ta ia davaria bona lau ia hadibaia hari ia moale bada.” Unai hegeregerena, Terri danu ese iena mase turana ta ia laloatao. Ia gwau: “Ai guria, bena pura ta murinai lau laloa nihi ai lau dekenai ia mai. Lau ia hamaoroa, ia mase dainai do lau taitai lasi, badina ia moale bona maino ai ia noho.”

To, Baibel ia gwau mase taudia be “gau ta idia diba lasi.” (Hadibaia Tauna 9:5) Ia gwau danu bema tauna ta ia mase, “unai dina ai ena lalohadai idia ore.” (Salamo 146:4, NW) To, Satani be “koikoi ibounai edia tamana.” (Ioane 8:44) Ia ese koikoi herevana, taunimanima edia lauma be idia mase diba lasi herevana unai, ia hamatamaia. (Esekiela 18:4, NW itaia.) Taunimanima momo be unai idia abia dae, bona unai ese Satani ena palani ia durua, badina unai ese toreisi lou herevana​—Keristani tomadiho ena hahediba hereva badana ta, abidadama henia karana ena badina ia hakoikoia. (Ioane 5:​28, 29) Unai dainai, aneru idia abidadama henia taudia ese mase taudia hereva henidia eiava edia hereva idia kamonai karana be Dirava ese ia moalelaia lasi.

Aneru o Demoni Idia Hereva Henidia?

Hari inai negai aneru idia abidadama henia karadia momo lalonai, meamea bona babalau karadia idia karaia. Mani Marcia ena sivarai oi laloa. Ia gwau: “September ia lao December, 1986 lalonai, ‘lauma gabuna amo’ sivarai haida lau abia. Lauma lau itadia bona ‘guna maurina’ nihi idaudia momokani lau abia. Egu mase turadia lau hereva henidia, bona hari sibona lau hedavari henia taudia edia kara ibounai lau diba karadia momo idia vara. Lau abia hahenamo ta be, lau diba lasi neganai lauma edia siahu amo lau toretore bona lauma taudia edia hereva lau gwauraia edia varavara dekenai. Haida, tanobada dekenai idia do mauri noho neganai lau diba lasi taudia ese edia hereva be lau dekena amo ma haida dekenai idia siaia.”

Nega momo meamea karana amo aneru ida idia “herevahereva.” Buka ta ese iena duahia taudia ia hagoadadia, rune nadi, tarot kasi, koins, I Ching, palmistry, bona hisiu edia toadia do idia tahua totona. Unai bukadia torea taudia idia gwau: “Oiemu lalona ese oi do ia hakaua lao meamea tauna maorona dekenai, bona momokani, aneru ta do oi davaria unuseniai.”

To, Baibel ese ia hahedinaraia goevagoeva, ‘do oi hedavari henia gauna’ be Dirava ena aneru ta lasi. Dahaka dainai? Badina Dirava ese meamea bona babalau karadia ia inai henia momokani, bona tomadiho momokani taudia​—guba bona tanobada ai​—be unai kara idia karaia lasi. Io, Israela dekenai meamea karadia idia karaia taudia idia aladia mase! Taravatu ia gwau: “Dirava ese unai bamona kara bodaga idia karaia taudia ia badu henia noho.”​—Deuteronomi 13:​1-5; 18:​10-12.

“Diari Aneruna”

Diabolo ese meamea karadia edia toana ia haidaua diba, namo havaraia karadia bona aneru edia kara hegeregeredia ai ia halaodia diba; unai ita hoalaia lasi be namo. Baibel ia gwau Satani be “iena kara ia senisia diba, bona ia ese diari aneruna ena kopina ia atoa diba.” (2 Korinto 11:14) Ia ese gabeai do idia vara gaudia edia toadia ia hahedinaraia diba bena ia hamomokanidia diba; idia itaia taudia ia koidia bena idia laloa unai toa be Dirava ena amo. (Mataio 7:​21-23 itaia; 2 Tesalonika 2:​9-12.) To Satani ena kara iboudiai​—herevana edia toana be ia namo eiava ia dika​—edia badina be inai: Iehova amo taunimanima ia veridia oho toho eiava edia lalona ia hadiburaia toho, ‘Keriso ena hairai bona iena sivarai namona ena diari do idia itaia lasi’ totona. (2 Korinto 4:​3, 4) Nega momo taunimanima edia lalona hadiburaia karana ai ia kwalimu.

Keristani ginigunadia edia nega lalonai ia noho hesiai kekenina ta ena sivarai, Baibel lalonai mani oi laloa. Gabeai do idia vara gaudia ia herevalaia karana amo iena biaguna ese moni momo idia abia. Dina momo lalonai hahediba taudia murinai ia loaloa, ia gwau: “Inai taudia be Ataiai Momokani Dirava ena hesiai taudia. Umui hamauria totona dalana idia gwauraia noho umui dekenai.” Iena hereva be momokani. To, unai sivarai ia gwau lasi aneru ta ese unai kekeni ia abia, ia gwau “meamea lauma” ese. Vadaeni, Paulo “ia giroa, bona inai lauma dekenai ia gwau, ‘Iesu Keriso ena ladana dekenai lau hamaoroa oi, inai kekeni oi rakatania.’ Vadaeni, nega tamona lauma ese ia rakatania.”​—Kara 16:​16-18.

Dahaka dainai Paulo ese unai lauma ia lulua? Unai demoni ese ia abia kekenina ena biaguna totona moni momo ia mailaia. Unai hesiai kekeni be unai lauma ena siahu ia abia dainai, reana ia ese biru taudia ia hamaorodia edena negai edia uhe do idia hadoa be namo, bona ia hamaorodia edena negai do idia headava be namo, bona golo tahua taudia ia hamaorodia edena gabu dekenai do idia tahua be namo. Io, unai lauma ese kekeni ia hasiahua dainai, hereva momokanidia haida ia gwauraia, hahediba taudia ia hanamodia!

To herevana, ia be “meamea lauma.” Unai dainai, Iehova bona iena hamauria dalana ia harorolaia be maoro lasi. Reana, unai hereva namodia ia gwauraia, unai hesiai kekenina ena hereva do ia hamomokania bena unai idia itaia taudia ese ia do idia laloa bada bona Keriso ena hahediba taudia momokanidia edia hereva do idia kamonai henia lasi. Badina namona dainai, Paulo ese Korinto taudia ia hamaorodia, ia gwau: “Lohiabada ena pata dekenai noho aniani, bona lauma dikadia edia pata dekenai noho aniani ruaosi be nega tamona umui anina diba lasi.” (1 Korinto 10:21) Unai hegeregerena, Keristani taudia ginigunadia ese edia meamea bukadia ibounai idia gabua ore.​—Kara 19:19.

‘Aneru ta Guba Ena Ataiai Ia Roho Lao’

Ita herevalaia vadaeni bamona, Baibel ese ia hahedinaraia hari inai negai aneru idia abidadama henidia karadia momo be Dirava ena Inai Tauna, Satani Diabolo ena koikoi karadia. Unai anina be aneru helagadia be taunimanima edia mauri lalonai idia gaukara lasi, a? Lasi, mai siahu bada gaukarana ta be tanobada dekenai idia karaia noho. Unai be dahaka? Unai haerelaia totona, namona be Baibel ena Apokalupo bukana ita itaia. Unai buka lalonai aneru ia herevalaidia momo, Baibel ena buka ma ta lalonai unai bamona idia karaia lasi.

Apokalupo 14:​6, 7 dekenai, aposetolo Ioane ena peroveta mata hanai herevana ita duahia: “Aneru ma ta lau itaia, guba ena ataiai ia roho lao. Iena gaukara be, noho hanaihanai Sivarai Namona do ia gwauraia hedinarai. Taunimanima ibounai dekenai ia gwauraia, bese ibounai, iduhu ibounai, gado ibounai bona kopina idauidau ibounai taudia. Ia boiboi goadagoada, ia gwau, ‘Dirava do umui gari henia, ia do umui hanamoa bada, badina be Dirava ese taunimanima ibounai do ia kota henia ena nega ia ginidae vadaeni. Guba bona tanobada, bona davara, bona ranu guridia ibounai ia karaia Diravana do umui tomadiho henia.’ ”

Inai siri ese aneru edia gaukara badana, hari inai nega lalonai idia karaia kara ia herevalaia. Idia be mai anina bada gaukarana ta lalonai idia gaukara​—Dirava ena Basileia ena sivarai namona harorolaia gaukarana unai. Iesu be unai gaukara ia herevalaia, iena hahediba taudia dekenai ia gwauhamata henidia neganai, ia gwau: “Lau be hanaihanai umui danu ita noho ela bona tanobada dokona.” (Mataio 28:​18-20) Edena dala ai Iesu be iena hahediba taudia ida idia noho? Dala ta be ia ese aneru edia amo ia durudia, inai gaukara badana idia karaia haorea totona.

Lagani ta ta lalodiai, Iehova ena Witness taudia ese hora bilioni ta mai kahana lalonai, Dirava ena Basileia ena sivarai namona idia harorolaia. Unai gaukara idia karaia lalonai, idia be aneru edia hahekau dalana idia itaia. Edia ruma-ta-ruma-ta haroro gaukara lalonai, nega momo idia ese taunimanima idia davaria, unai nega korikori ai Dirava idia guriguri henia vadaeni, idia noia ta ese do idia durudia iena palani do idia lalo-pararalaia totona. Aneru edia heduru dainai, bona Witness taudia sibodia edia goada dainai, lagani ta ta lalonai, taunimanima handred tausen momo ese Iehova idia dibaia noho!

Guba ataiai ia roho lao aneruna oi kamonai henia noho, a? Iehova ena Witness taudia be emu ruma dekenai do idia lou mai neganai, idia ida unai aneru ena hereva do umui kikilaia namonamo be namo, ani?

[Footnotes]

[Box on page 8]

ANERU BE DAIDIA?

ANERU be mase taudia edia lauma lasi, taunimanima momo ese idia abia dae bamona. Baibel ese ia hahedinaraia goevagoeva, mase taudia be “gau ta idia diba lasi.” (Hadibaia Tauna 9:5) Vadaeni, aneru be edeseni amo idia mai? Baibel ia hahedinaraia Dirava ese aneru ta ta ibounai ia karaia, tanobada ia do karaia lasi neganai. (Iobu 38:​4-7) Dirava ena guba famili ena bada be reana handred milioni, eiava bilioni haida eiava reana edia momo ese unai ia hanaia! Aneru haida be Satani ena gwau-edeede karana lalonai idia vareai.​—Daniela 7:10; Apokalupo 5:11; 12:​7-9.

Iehova be gau ibounai ia haheaua namonamo Diravana dainai, iena aneru famili badana be edia orea ta ta dekenai ia atodia namonamo.​—1 Korinto 14:33.

• Aneru badana, momokani iena goada bona ena siahu be herea aneruna, be Iesu Keriso, iena ladana ma ta be Mikaela. (1 Tesalonika 4:16; Iuda 9) Iena siahu henunai be serapi, kerubi, bona aneru.

• Serapi be Dirava ena terona badinai idia gini. Edia gaukara be Dirava ena helaga idia gwauraia bona iena taunimanima idia naria idia goeva noho totona.​—Isaia 6:​1-3, 6, 7.

• Kerubi danu be Iehova ena vairanai idia noho. Dirava ena terona idia huaia eiava idia naria, anina be Iehova ena lohia siahuna ena hairai idia abia isi.​—Salamo 80:1; 99:1; Esekiela 10:​1, 2.

• Aneru (anina be “hereva abia lao taudia”) be Dirava ena gwaukau bona ena ura karaia taudia. Idia ese Dirava ena ura idia karaia​—Dirava ena taunimanima idia hamauridia eiava kara dika taudia idia hamasedia.​—Genese 19:​1-26.

[Pictures on page 7]

Guba ataiai ia roho lao aneruna oi kamonai henia noho, a?