Aneru ese Taunimanima Idia Durua Dalana
“Inai murinai, aneru ma ta lau itaia, guba dekena amo ia diho mai. Ia be mai ena siahu bada herea, . . . Ia boiboi badabada, ia gwau, ‘Babulonia badana be ia moru vadaeni.’ ”—APOKALUPO 18:1, 2.
1, 2. Dahaka ese ia hahedinaraia, Iehova ese aneru ia gaukaralaia ena ura ia hagugurua totona?
APOSETOLO tauna burukana Ioane be Patamo motumotuna dekenai ia noho neganai, peroveta matahanaina ta ia itaia. Lauma helaga ena heduru amo, “Lohiabada ena Dina” lalonai do idia vara gaudia ia itaia. Unai dina be lagani 1914 ai Iesu be terona dekenai ia helai neganai ia matamaia, bona iena lagani 1,000 Lohia Negana ena dokona ai do ia ore.—Apokalupo 1:10.
2 Iehova Dirava ese dala ta ia gaukaralaia Ioane dekenai unai matahanai ia hahedinaraia totona. Apokalupo 1:1 ia gwau: “Inai buka ena hereva be Iesu Keriso ese ia hedinaraia gauna. Dirava ese Iesu dekenai ia hedinaraia, badina ia ura Iesu ese kahirakahira do idia vara gaudia be iena hesiai taudia dekenai do ia hedinaraia. Vadaeni Keriso ese iena aneru iena hesiai tauna Ioane dekenai ia siaia, inai gaudia do ia hamaoroa totona.” Iehova be Iesu amo aneru ta ia gaukaralaia, Ioane dekenai “Lohiabada ena Dina” lalonai idia vara gaudia ia hahedinaraia totona. Bona nega ta Ioane be ‘aneru ma ta ia itaia, guba dekena amo ia diho mai, ia be mai ena siahu bada herea.’ Unai aneru ena gaukara be dahaka? “Ia boiboi badabada, ia gwau, ‘Babulonia badana be ia moru vadaeni. Io, unai hanua badana be ia dika vadaeni.’ ” (Apokalupo 18:1, 2) Unai siahu bada aneruna ese Babulonia Badana—tanobada ena tomadiho koikoi ibounai—ia moru ena hadibaia herevana ia gwauraia. Unai dainai ita daradara lasi, Iehova ese aneru ia gaukaralaia iena ura hagugurua totona. Dirava ena palani lalonai aneru edia gaukara bona ita idia durua dalana ita do herevalaia lasi neganai, namona be aneru idia vara dalana ita laloa.
Aneru Idia Vara Dalana
3. Aneru edia vara dalana dekenai, taunimanima be dahaka lalohadai kererena idia abia?
3 Taunimanima milioni momo idia abia dae aneru idia noho. To edia vara dalana dekenai, taunimanima be lalohadai kererena idia abia. Hegeregere, tomadiho taudia momo idia laloa bema edia lalokau tauna ta ia mase, Dirava ese unai tauna ia boiria aneru ta ai ia lao totona. To, Baibel ese aneru edia vara dalana bona gaukara be unai bamona ia herevalaia, a?
4. Baibel be dahaka ia gwau aneru edia vara dalana dekenai?
4 Siahu bada ia dogoatao aneru badana be Mikaela. (Iuda 9) Ia be Iesu Keriso. (1 Tesalonika 4:16) Lagani tausen momo gunanai Iehova be Havaraia Tauna ai ia lao neganai, Ia havaraia aneru ginigunana be ena Natuna. (Apokalupo 3:14, 19:11; BHğ) Gabeai, unai vara guna Natuna amo Iehova ese lauma taudia ibounai ia karaia. (Kolose 1:15-17) Iehova be bese kwarana tauna Iobu ia hereva henia neganai, ia gwau unai aneru be ena natudia, Ia ese Iobu ia nanadaia: “Lau ese tanobada lau karaia neganai oi be edeseni? Bema oi diba, lau dekenai do oi hamaoroa. . . . Daika ese tanobada ena kona nadi ia atoa? Unai dina ena daba neganai, daba ena hisiu be idia ane abia hebou, bona guba ena aneru ibounai, be mai moale danu idia boiboi.” (Iobu 38:4, 6, 7) Oibe, Dirava ese taunimanima ia do havaradia lasi neganai, aneru ia havaraia.
5. Iehova ese aneru be edena orea toi dekenai ia atodia?
5 Korinto Ginigunana 14:33 ia gwau: “Dirava be ia ura lasi hereva kava bona heai, ia be maino Diravana.” Unai dainai Iehova ese iena lauma natudia be orea toi dekenai ia atodia: (1) serapi, idia be Dirava ena terona badinai hesiai gaukara idia karaia, iena helaga karana idia gwauraia, bona ena taunimanima idia durua lauma dalanai idia goeva totona; (2) kerubi, idia ese Iehova ena lohia siahuna idia abia isi; bona (3) aneru ma haida be iena ura idia karaia. (Salamo 103:20; Isaia 6:1-3; Esekiela 10:3-5; Daniela 7:10) Unai aneru be edena dala ma haida ai taunimanima idia durua?—Apokalupo 5:11.
Aneru Edia Gaukara be Dahaka?
6. Iehova ese edena dala ai Eden umana lalonai kerubi ia gaukaralaia?
6 Baibel ese aneru ia gwauraia nega ginigunana be Genese 3:24 ai, ia gwau: “Dirava ese tau bona hahine ia lulua lao, bona Eden uma gabu ena dina ia daekau kahana dekenai kerubi aneru ia haginidia, uma gabu gimaia totona. Bona lahi kaia danu ia atoa. Unai kaia be ia giroagiroa kahana ibounai dekenai. Inai aneru bona kaia ese mauri auna dekenai lao dalana ia koua momokani.” Unai dainai Adamu bona Heva be dala lasi uma lalonai idia vareai lou totona. To unai nega amo ema bona hari aneru edia gaukara be dahaka?
7. Heberu bona Greek gado ai, “aneru” totona idia gaukaralaia herevana ena anina ese edena bamona aneru edia gaukara ia hahedinaraia?
7 Baibel ese aneru be nega 400 bamona ia gwauraia. Heberu bona Greek gado ai aneru totona idia gaukaralaia herevana ena anina be “hereva gwauraia tauna.” Dirava ese aneru ia gaukaralaia taunimanima dekenai ena hereva ia gwauraia totona. Paragraf 1 bona 2 dekenai ita herevalaia bamona, Iehova ese aneru ta ia gaukaralaia ena hereva be aposetolo Ioane dekenai ia gwauraia totona.
8, 9. (a) Aneru ta ese edena bamona Manoa bona ena adavana ia hagoadaia? (b) Dirava ena aneru ese Manoa ia vadivadi henia sivaraina amo, tama sina be dahaka idia dibaia?
8 Danu, Dirava ese aneru ia gaukaralaia tanobada dekenai ena hesiai taudia idia durua bona hagoadaia totona. Hegeregere Israela ai, hahemaoro taudia edia negai, Manoa ena adavana be gabani dainai idia ura bada natuna ta idia abia. Iehova ese aneru ta amo Manoa ena adavana ia hadibaia, natuna ta do ia abia. Unai sivarai Baibel ai be ia gwau: “Do oi rogorogo, mero ta do oi abia. Iena kwarana huina do oi utua lasi, badina be unai mero be iena vara dinana dekena amo do ia helaga, Dirava ena, ia be Nasiri orea tauna. Ia ese Israela do ia hamauria hamatamaia Pilistia taudia edia siahu dekena amo.”—Gunalaia Taudia 13:1-5.
9 Gabeai Manoa ena adavana be natuna mero ta ia abia, ena ladana be Samson, bona Baibel negadiai ia be ladana bada tauna. (Gunalaia Taudia 13:24) Unai natuna ia do vara lasi neganai, Manoa ese aneru ia noia idia dekenai ia giroa lou, bona do ia hadibadia unai natuna ia vara neganai, dahaka do idia karaia. Manoa ia henanadai: “Inai mero be edena bamona do ia noho, bona dahaka do ia karaia?” Iehova ena aneru ese Manoa ena adavana dekenai ia gwauraia herevana ma ia gwauraia lou. (Gunalaia Taudia 13:6-14) Unai ese Manoa ia hagoadaia momokani! Hari inai negai, aneru be unai dala ai taunimanima idia vadivadi henia lasi, to Manoa bamona, tama sina ese edia natudia hadibaia karana dekenai, Iehova ena lalohadai idia tahua be namo.—Efeso 6:4.
10, 11. (a) Suria ena tuari oreana ese hanua idia hagegea neganai, Elisaia bona ena hesiai taudia edia kara be edena bamona? (b) Unai sivarai ita laloa karana ese edena bamona ita do ia durua?
10 Peroveta tauna Elisaia ena negai, aneru ese heduru idia henia ena haheitalai hereadaena ita itaia. Elisaia be Israela ena hanua ta ladana Dotana dekenai ia noho. Elisaia ena hesiai tauna be daba ta ai ia toreisi neganai ia itaia, hosi bona tuari kariota ese hanua idia koua hagegea. Suria ena king ese tuari orea goadana ta ia siaia Elisaia idia dogoatao totona. Elisaia ena hesiai tauna be edena bamona ia kara? Ia gari dikadika, ia gwau: “Lohia e, madi ita be dika! Edena bamona do ita karaia?” Ia laloa gau ta idia karaia diba lasi. To Elisaia ia gwau: “Oi gari lasi, badina be ita idia durua taudia be momo, to unai orea idia durua taudia be momo lasi.” Ena hereva ena anina be dahaka?—2 King Taudia 6:11-16.
11 Elisaia ia diba aneru idia noho ia idia durua totona. To, iena hesiai tauna be gau ta ia itaia lasi. Unai dainai “Elisaia ia guriguri, ia gwau: ‘Lohiabada e, oi dekenai lau noinoi, iena matana do oi kehoa, ia itaia diba totona.’ Unai dainai Lohiabada ese unai hesiai tauna ena matana ia kehoa, ia itaia, ororo be lahi kariota dekenai idia honu, idia ese Elisaia ia noho gabuna idia hagegea noho.” (2 King Taudia 6:17) Vadaeni, unai neganai hesiai tauna ese aneru momo herea ia itaia. Dirava ena hereva ita lalopararalaia dainai, ita danu ita diba aneru be Iehova bona Keriso edia hakaua henunai idia noho, bona idia ese Iehova ena taunimanima idia durua bona gimaia.
Aneru Edia Heduru—Keriso Ena Negai
12. Maria be aneru Gabriela amo dahaka heduru ia abia?
12 Aneru ta ese Iuda rami-hebou kekenina Maria ia durua sivaraina mani ita laloa. Aneru ese ia hamaoroa: “Oi be do oi rogorogo, mero ta do oi abia, iena ladana do oi atoa Iesu.” Dirava ese aneru Gabriela be Maria dekenai ia siaia, to Gabriela be unai sivarai ia do gwauraia lasi neganai, ia gwau: “Maria e, oi gari lasi, badina be oi dekenai Dirava ia moale vadaeni.” (Luka 1:26, 27, 30, 31) Unai hereva ese Maria ia hagoadaia bada!
13. Aneru ese edena bamona Iesu idia durua?
13 Iesu ena negai aneru ese heduru idia henia danu. Hegeregere taunimanima noho lasi gabuna ai, Iesu ese nega toi Satani ena hahetoho ia dadaraia murinai, ‘aneru haida be Iesu dekenai idia lao bona ia idia durua.’ (Mataio 4:1-11) Iesu do ia mase hanuaboina ai unai bamona gauna ta ia vara danu. Iesu be ia tui diho bona ia guriguri, ia gwau: “Egu Tamana e, oiemu lalona bema ia hegeregere, inai kapusi be lau dekena amo do oi kokia, to lauegu ura lasi, oiemu ura sibona. Vadaeni aneru ta guba dekena amo ia dekenai ia ginidae, ia dekenai goada henia totona.” (Luka 22:42, 43) Hari, aneru ese edena bamona ita idia durua?
Aneru Edia Heduru—Hari Inai Negai
14. Hari Iehova ena Witnes taudia be edena bamona dagedage idia haheaukalaia, bona dahaka anina namona ia vara?
14 Hari inai negai, Iehova ena Witnes taudia edia haroro gaukara amo ita itaia, aneru ese idia ia durua. Hegeregere, Tanobada Tuarina Iharuana (1939-45) vairanai bona lalonai, Germany bona Western Europe ai, Nazi taudia ese Iehova ena taunimanima idia dagedage henia bada. Bona Italy, Spain, bona Portugal ena dagedage gavamanidia dainai, tadikaka ese nega daudau lalonai dagedage idia abia. Bona guna Soviet Union bona ena kahirakahira besedia ai, Witnes taudia be lagani momo lalodiai dagedage idia haheaukalaia. Ma danu, Africa ena tano haida lalonai, Witnes taudia ese dagedage bada idia davaria.a Bona vanegai laganidia lalonai, Iehova ena hesiai taudia Georgia ai be dagedage bada idia abia. Satani ia gaukara goadagoada Iehova ena Witnes taudia edia gaukara ia koua totona. To, orea ta bamona idia gaukara hebou dainai, unai dagedage karadia idia haheaukalaia bona idia goada noho. Unai ia vara ena badina ta be, aneru ese ita idia gimaia.—Salamo 34:7; Daniela 3:28; 6:22.
15, 16. Iehova ena Witnes taudia ese tanobada hegegemadai idia karaia gaukarana dekenai, aneru ese edena bamona idia durua?
15 Iehova ena Witnes taudia be Basileia harorolaia bona Baibel amo taunimanima be hahediba taudia ai idia halaoa gaukarana idia laloa bada. (Mataio 28:19, 20) To idia diba momokani, aneru edia heduru dainai unai gaukara idia hagugurua diba. Unai dainai Apokalupo 14:6, 7 ena hereva ese idia ia hagoadaia. Unai siri ia gwau: “Vadaeni aneru ma ta lau [aposetolo Ioane] itaia, guba ena ataiai ia roho lao. Iena gaukara be, noho hanaihanai Sivarai Namona do ia gwauraia hedinarai. Taunimanima ibounai dekenai ia gwauraia, bese ibounai, iduhu ibounai, gado ibounai bona kopina idauidau ibounai taudia. Ia boiboi goadagoada, ia gwau, ‘Dirava do umui gari henia, ia do umui hanamoa bada, badina be Dirava ese taunimanima ibounai do ia kota henia ena nega ia ginidae vadaeni. Guba bona tanobada, bona davara, bona ranu guridia ibounai ia karaia Diravana do umui tomadiho henia.’ ”
16 Unai siri ena hereva ese ia hamomokania, Iehova ena Witnes taudia be tanobada ibounai dekenai idia karaia evanelia gaukarana lalonai, aneru ese idia durua. Iehova ese ena aneru amo kudou maoro taudia be Witnes taudia dekenai ia hakaudia lao. Ma danu aneru edia heduru dainai Witnes taudia ese kudou maoro taudia idia davaria. Unai dainai, nega momo tau ta be ia lalohekwarahi eiava heduru ia ura abia neganai, Iehova ena Witnes taudia ese ia idia vadivadi henia.
Aneru Edia Gaukara Badana—Vaira Negai
17. Aneru tamona be Asuria taudia ia tuari henidia neganai, dahaka ia vara?
17 Aneru ese Iehova ena hesiai taudia idia durua bona hagoadaia sibona lasi, to gaukara ma ta idia karaia danu. Idaunegai, Dirava ese idia ia gaukaralaia Iena hahemaoro idia karaia totona. Hegeregere lagani 800 B.C.E. ai, Asuria ena tuari taudia momo be Ierusalema hanua lalonai idia vareai. Iehova be dahaka ia karaia? Ia gwau: “Ierusalema be do lau naria namonamo, lauegu ladana dainai, bona lauegu hesiai tauna Davida ena ladana dainai.” Ia vara gauna be Baibel ese ia gwauraia: “Unai hanuaboi, Lohiabada ena aneru be Asuria edia kamepa dekenai ia lao, tuari taudia 185,000 ia alaia mase. Daba rere neganai taunimanima haida idia toreisi, idia ese mase taudia momo herea idia itaia, kamepa dekenai idia hekure noho.” (2 King Taudia 19:34, 35) Oibe, aneru tamona ena goada ese taunimanima edia tuari oreana ena goada ia hereaia momokani!
18, 19. Kahirakahira aneru be dahaka gaukara badana do idia karaia, bona unai ena anina be dahaka taunimanima dekenai?
18 Kahirakahira Dirava ese ena aneru do ia gaukaralaia kara dika tanobadana idia hadikaia totona. Iesu bona “iena aneru mai siahu bada danu guba dekena amo do idia mai.” Edia gaukara be ‘Dirava idia ura lasi taudia, bona Lohiabada Iesu ena Sivarai Namona idia abia dae lasi taudia dekenai davana metau do idia henia.’ (2 Tesalonika 1:7, 8) Unai ena anina be dahaka tanobada taudia dekenai? Hari tanobada hegegemadai, idia harorolaia Basileia sivarai namona idia abia dae lasi taudia be do idia mase ore. To Iehova, iena kara maoromaoro, bona manau karana idia tahua taudia be Iehova ese ‘ena badu dinana dekenai do ia naria.’—Sepanaia 2:3.
19 Iehova ita tanikiu henia be namo, badina iena aneru ia gaukaralaia ena hesiai taudia tanobada ai ia durua bona hagoadaia totona. Aneru edia gaukara Dirava ena palani lalonai ita lalopararalaia ese ita ia hagoadaia, badina aneru haida be Iehova idia gwau-edeede henia bona Satani ena siahu henunai idia noho. Stadi gabena ese do ia hahedinaraia, Keristani taudia momokanidia be dahaka idia karaia be namo, Satani Diabolo bona ena demoni amo idia sibodia idia gimaia totona.
[Footnote]
a Unai dagedage karadia edia sivarai ma haida dibaia totona, lagani 1983 (Angola), 1972 (Czechoslovakia), 2000 (Czech Republic), 1992 (Ethiopia), 1974 bona 1999 (Germany), 1982 (Italy), 1999 (Malawi), 2004 (Moldova), 1996 (Mozambique), 1994 (Poland), 1983 (Portugal), 1978 (Spain), 2002 (Ukraine), bona lagani 2006 (Zambia) Yearbook of Jehovah’s Witnesses itaia.
Dahaka Oi Dibaia?
• Aneru be edena bamona idia vara?
• Baibel negadiai, Dirava ese aneru be edena bamona ia gaukaralaidia?
• Apokalupo 14:6, 7 ese aneru edia gaukara be edena bamona ia herevalaia?
• Kahirakahira aneru be dahaka gaukara badana do idia karaia?
[Picture on page 4]
Aneru ta ese Manoa bona ena adavana ia hagoadaia
[Picture on page 5]
“Ita idia durua taudia be momo, to unai orea idia durua taudia be momo lasi”