Mauri Namona be Kahirakahira!

MEDU do ia diho negadia ia gwauraia guna diba tauna ta, ena hereva be nega momo idia momokani tauna, be mani oi laloa. Bema adorahi ai reidio dekenai sivarai oi kamonai unai tau ia gwau medu be kerukeru do ia diho, vadaeni kerukeru dabai, ruma do oi rakatania neganai, tamaru do oi abia lao, ani? Iena kara sivaraina dainai oi abidadama henia. Iena hereva hegeregerena oi kara.

Vadaeni, Iehova ena gwauhamata, mauri namona paradaiso tanobadana lalonai gwauhamatana, be ita abidadama henia diba, a? Iena kara sivaraina ese dahaka ia hahedinaraia? Baibel ena peroveta herevadia edia anina idia vara ese ia hamomokania vaitani Iehova be hereva momokani Diravana, ena gwauhamata ta ia moru diba lasi. (Iosua 23:14; Isaia 55:11) Iehova Dirava ena gwauhamata be idia momokani vaitani dainai, nega haida ia ese ia gwauhamatalaia gaudia, nega vairai do idia vara gaudia unai, be idia vara vadaeni bamona ia gwauraidia. Hegeregere, tanobada matamatana, ia lalonai mase bona lalohisihisi do idia vara lasi gauna, ia gwauhamatalaia, bena ia gwau: “[Ia gwauhamatalaia hahenamodia] idia vara vadaeni!” Anina be, “Idia be momokani!”​—Apokalupo 21:​5, 6, futnout, NW.

Oibe, Iehova ena gwauhamata nega gunadia totona ia hamomokania vadaeni, unai dainai ita diba iena gwauhamata, taunimanima ese mauri namona do idia abia gwauhamatana, do ia hamomokania danu. To unai mauri namona be edena negai do idia abia?

Mauri Namona​—Edena Negai?

Mauri namona be kahirakahira do idia abia! Unai ita diba, badina be Baibel ia gwau gau dikadia momo be tanobada ai do idia vara guna, bena nega daudau lasi Paradaiso lalonai mauri namona do idia davaria. Unai gau dikadia be hari idia vara noho.

Hegeregere, Iesu Keriso ia gwau tuari badadia do idia vara. Ia gwau: “Bese ta ese do ia toreisi, bese ta do ia tuari henia. Bona basileia ta ese do ia toreisi, basileia ta do ia tuari henia.” (Mataio 24:7) Unai peroveta herevana ena anina ia vara vadaeni. Lagani 1914 bona 1945 padadiai, tanobada ibounai tuaridia rua idia vara, bena idia murinai ma tuari momo danu idia vara, idia lalodiai bese idauidau idia tuari heheni. “[Tanobada Ibounai Tuarina Iharuana negana amo,] lagani ta ta ai tuari dainai idia mase taudia edia momo ena averes ese lagani 1800 ela bona 1899 lalonai idia mase taudia edia momo ena averes be nega rua ia hanaia, bona lagani 1700 ela bona 1799 lalonai idia mase taudia edia momo ena averes be nega 7 ia hanaia.”​—World Military and Social Expenditures 1993.

Gorere be gabu idauidau ai idia vara badabada ese ia hamomokania mauri namona Paradaiso lalonai be kahirakahira. Iesu ia peroveta ‘gabu ibounai dekenai ta ta dekenai do ia hanaia gorerena do idia vara.’ (Luka 21:11) Unai peroveta herevana ena anina ia vara vadaeni, a? Oibe. Tanobada ibounai tuarina ginigunana murinai, Spanish flu ese taunimanima milioni 20 bamona ia hamasedia. Unai nega amo ema bona hari, kensa, kudou goreredia, maleria, AIDS, bona ma gorere haida ese taunimanima milioni milioni idia hamasedia vadaeni. Ogogami tanodia ai, ranu mirona dainai idia vara goreredia ese lagani ta ta ai taunimanima milioni milioni idia hamasedia; unai gorere ta be kukuri ranu bona ma ta be gaigai maragidia be boga lalonai idia havaraia gorerena.

Iesu be ma ia gwau: “Hitolo bada do ia vara.” (Mataio 24:7) Inai magasin ena hereva ginigunana ese ia hahedinaraia hegeregerena, ogogami taudia be aniani ai idia dabu. Unai danu ese ia hamomokania mauri namona Paradaiso lalonai be kahirakahira do ia vara.

Iesu ia gwau: “Tano do idia mareremarere.” (Luka 21:11) Unai danu be iseda nega lalonai ia vara. Lagani 1914 amo ema bona hari, tano mareremarere ese taunimanima tausen momo herea idia hamasedia.

Baibel be ma ia gwau “nega ena dokona” ai taunimanima edia kara do ia idau. Idia ese “idia edia ura sibona do idia tahua” bona “moni do idia mataganigani henia,” bona natu ese “edia tamana bona sinana do idia kamonai henia lasi.” Taunimanima momo ese “lebulebu karadia idauidau do idia ura henia bada, to Dirava do idia ura henia maragi.” (2 Timoteo 3:​1-5) Taunimanima momo edia kara be unai bamona, ani?

Kara dikadia idia karaia taudia edia momo ia daekau lalonai, kara dikadia idia vara rohoroho. Unai danu ia perovetalaia. Mataio 24:12 ena hereva hegeregerena, Iesu ia gwau: “Kara dikadia danu do idia vara gabu idauidau dekenai.” Inai hereva, hari inai negai kara dika be ia bada, to gunaguna ia maragi herevana, be reana oi abia dae. Gabu iboudiai taunimanima idia gari, ta ese edia kohu o edia moni do ia henaoa, o do ia koidia, o dala idauna ta amo do ia hadikadia garina.

Tuari, gabu idauidau ai idia vara goreredia, hitolo, tano mareremarere, bona kara dikadia idia momo idia lao, bona taunimanima idia kara heheni karadia idia dika idia lao​—unai iboudiai be hari inai negai idia vara, Baibel ia peroveta hegeregerena. Reana do oi gwau, ‘To unai gau iboudiai be matamana negana amo idia vara, ani? Iseda nega ena idau be dahaka?’

Hari inai negai idia vara gaudia be mai anina bada. Baibel ia gwau lasi gau tamona sibona, hegeregere hitolo, ese do ia hamomokania ita be dokona negana ai ita noho bona mauri namona be kahirakahira. Baibel ese ia hahedinaraia ena peroveta herevadia, dokona negana herevadia, edia anina be Dirava ia dadaraia vaitani uruna latanai do ia vara.​—Mataio 24:​34-39; Luka 17:​26, 27.

Inai danu, Iesu ese ena peroveta herevana lalonai ia gwauraia gaudia haida​—hegeregere hitolo bona gorere gabu idauidau ai​—be hari inai negai idia vara be hoa gauna. Badina be dahaka? Badina be hari inai negai saiens taudia be gau momo dekenai idia kwalimu, bona gabu momo ai doketa taudia edia diba be bada momokani, to guna be inai bamona lasi. Dirava mo sibona be ena Hereva, Baibel, lalonai ia peroveta diba, inai bamona negana lalonai, gorere bona hitolo be do idia maragi idia lao lasi to do idia bada idia lao.

Baibel ena peroveta herevadia, “nega ena dokona” herevadia, iboudiai, edia anina be hari inai negai ia vara dainai, dahaka ita diba? Gauna be, mauri namona be kahirakahira! To edena dala amo do ia vara?

Mauri Namona​—Edena Dala Amo?

Oi laloa taunimanima ese Paradaiso idia havaraia diba, a? Gunaguna amo ema bona hari, taunimanima ese gavamani idauidau idia haginidia. Idia haida idia gaukara goada taunimanima durudia totona. To, hekwakwanai momo be idia bada idia lao. Taga tanodia ai bona ogogami tanodia ai, gavamani ese drag ania kava karana, ruma dikadia, ogogami, taravatu utua karana, gaukara lasi, bona tuari idia hekwarahilaia.

Ena be reana gavamani ese unai hekwakwanai haida do idia kokia diba, to idia be dala lasi gorere do idia haorea vaitani; bona buruka bona mase do idia haorea diba lasi danu. Ia hedinarai goevagoeva taunimanima ese Paradaiso be tanobada ai do idia havaraia lasi, lasi vaitani.

Baibel ena aonega herevana ta be inai: “King taudia do umui abidadama henia lasi, badina taunimanima ese umui do idia hamauria diba lasi.” Unai dainai, daika ita abidadama henia be namo? Baibel ia gwau: “Dirava ese ia durua noho taudia, be idia moale noho.” (Salamo 146:​3, 5) Bema Iehova Dirava ita helaro henia, iseda helaro ena anina do ita reaia lasi.

Momokani, ia be mai ena aonega bona mai ena siahu dainai tanobada, dina, bona hisiu ia havaraia Diravana, ese tanobada be paradaiso ai ia halaoa diba danu. Ia ese taunimanima ia durudia diba, mauri namona do idia abia totona. Iehova Dirava ese ia karaia gwauraia karadia iboudiai ia karaia diba, bona do ia karaia. Ena Hereva ia gwau: “Dirava ese gau ibounai ia karaia diba.” (Luka 1:37) To Dirava ese mauri namona be edena bamona do ia havaraia?

Iehova ese ena Basileia amo mauri namona be taunimanima do ia henidia. Vadaeni, Dirava ena Basileia be dahaka? Ia be gavamani korikorina mai ena King, Dirava ese ia abia hidi tauna, Iesu Keriso unai. Dirava ena Basileia be guba ai, to kahirakahira ia ese hahenamo badadia bona mauri namona be tanobada Paradaisona do idia noholaia taudia do ia henidia.​—Isaia 9:​6, 7.

Reana oi be Iesu ena guriguri, guriguri dalana ia hahedibalaia neganai ia gwauraia gauna, oi manadalaia vadaeni. Baibel lalonai, Mataio 6:​9-13 dekenai ita davaria. Unai guriguri Dirava dekenai ena hereva haida be inai: “Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.” Unai guriguri hegeregerena, Dirava ena Basileia do ia “mai,” Iehova Dirava ena palani tanobada totona do ia hagugurua totona. Iena palani be tanobada be paradaiso ai do ia lao.

Henanadai dokona be inai: Dahaka do oi karaia be namo, do ia vara Paradaisona lalonai mauri namona do oi abia totona?

Inai Do Oi Karaia be Namo

Iehova Dirava ena gwauhamata be, iena ura idia karaia taudia iboudiai ese mauri namona Paradaiso lalonai do idia abia. Baibel ia gwau: “Kara maoromaoro taudia ese, Dirava ia henidia tano dekenai do idia noho ela bona hanaihanai.” (Salamo 37:29) To ta be edena bamona ia kara dainai, Dirava ena matana ai ia be kara maoromaoro tauna?

Iehova hamoalea totona, namona be iena ura ita dekenai ita diba momo. Bema Dirava ita dibaia bona unai diba hegeregerena ita kara, do ita mauri diba ela bona hanaihanai. Iesu ese Dirava ia guriguri henia negana ta ai, ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.”​—Ioane 17:3.

Iehova Dirava bona Iesu Keriso sivaraidia be ita ia hadibalaia bukana be Dirava ena Hereva, Baibel unai. Ia be Iehova ena harihari gaudia namo hereadia ta. Baibel be revareva ta bamona, tama ta mai ena lalokau ese ena natuna ia tore henidia revarevana. Ia ese Dirava ena gwauhamata gauna, mauri namona taunimanima totona, be ia gwauraia, bona do ita abia diba dalana be ita ia hadibaia. Dirava ese gunaguna ia karaia karadia bona nega vairai do ia karaia karadia be Baibel ese ita ia hadibaia. Bona sisiba herevadia be ita ia henia danu, iseda hekwakwanai be hari do ita hanaidia totona. Momokani, Dirava ena Hereva ese inai tanobada dikana lalonai moale do ita davaria dalana be ita ia hadibaia.​—2 Timoteo 3:​16, 17.

Bema oi ura, Iehova ena Witness taudia ese dala do idia karaia mai edia moale ida, davana lasi Baibel stadina be emu ruma dekenai do oi abia totona. Hari inai negai moale do oi davaria diba dalana bona nega sisina murinai mauri namona do oi davaria diba dalana be do oi dibaia.

[Picture on page 5]

Baibel ena peroveta herevadia ese idia hahedinaraia mauri namona be kahirakahira

[Picture on page 7]

Dirava ena Basileia ese mauri namona taunimanima totona do ia havaraia