Iehova ese Hesiku Tauna Ia Hagoadaia

“Lohiabada dekenai idia abidadama henia taudia ese, edia goada do idia hamatamataia lou. Idia be hanina dekena amo, do idia roho daekau, ugava bamona.”​—ISAIA 40:31.

1, 2. Iehova ese ia idia abidadama henia taudia be dahaka ia henidia, bona harihari dahaka do ita herevalaia?

UGAVA be atai manudia goada hereadia. Edia hanidia idia hamarerea lasi neganai danu, idia roho daudau diba. “Manu edia King,” golo ugavana, ena hanina ta ena dorina amo ela bona ena hanina ma ta ena be mita rua. “Ugava iboudiai bogaragidiai ia be herea; ororo bona taora edia ataiai ia roho isi, bena hora momo lalodiai ororo ta ena ataiai ia roho, bena ia roho hegirohegiro, ia dae lao, ela bona ena toana be gau maragimaragi hereana ta bamona guba ai.”​—The Audubon Society Encyclopedia of North American Birds.

² Isaia ese ugava edia roho dalana ia laloa, ia gwau: “Manoka bona hesiku taudia be [Iehova] ese ia hagoadaia noho, bona goada lasi taudia edia goada ia habadaia noho. Uhau taudia idia manoka diba, bona tau matamatadia edia goada do ia ore, do idia moru diba. To [Iehova] dekenai idia abidadama henia taudia ese, edia goada do idia hamatamataia lou. Idia be hanina dekena amo, do idia roho daekau, ugava bamona. Idia be do idia heau, bona do idia manoka lasi. Idia be do idia raka lao, bona do idia moru lasi.” (Isaia 40:​29-31) Iseda lalona hagoadaia gauna be inai: Ita diba Iehova ese ia idia abidadama henia taudia ia hagoadaia, ia roho noho ugavana ena hanina ia henidia bamona! Vadaeni, hesiku tauna ia hagoadaia daladia haida mani oi laloa.

Guriguri Ena Siahu

³ Iesu ese ena hahediba taudia ia hadibaia “nega ibounai do idia guriguri, do idia hesiku lasi totona.” (Luka 18:1) Mauri ena hekwarahi be bada neganai, bema iseda lalona herevadia iboudiai be Iehova dekenai ita gwauraia hedinarai, momokani unai amo iseda goada do ita hamatamataia, bena do ita moru lasi, a? Oibe, to namona be gau haida ita laloatao.

3, 4. (a) Iesu ese ena hahediba taudia ia hadibaia dahaka do idia karaia? (b) Ita diba Iehova be edena bamona do ia kara, iseda guriguri haerelaidia totona?

⁴ Namona be helaro maorona Iehova ese iseda guriguri do ia haerelaidia dalana dekenai do ita abia. Keristani hahinena ta ena lalona ia metau bada murinai, ia gwau: “Gorere idaudia dekenai hegeregerena, hari inai negai Iehova ese hoa karadia ia karaia lasi. To ita ia durua, ita haheauka bona inai nega ena heduru hegeregerena ai do ita namo lou totona.” Ena guriguri ese ia idia durua dalana ia herevalaia, ia gwau: “Dina ta ta iboudiai hora 24 lalodiai Iehova ena lauma helaga lau abia diba.” Unai hegeregerena, Iehova ese mauri ena hekwarahi, iseda lalona idia hametaua diba gaudia, be ita eda amo ia koua lasi, to “Lauma Helaga be idia noinoi taudia dekenai . . . ia henidia.” (Luka 11:13; Salamo 88:​1-3) Unai lauma ese ita ia hagoadaia diba, hahetoho bona hekwarahi iboudiai ita haheaukalaia totona. (1 Korinto 10:13) Ia ese “siahu badana” ita ia henia diba, bena unai dainai do ita haheauka diba, ela bona nega sisina murinai Dirava ena Basileia ese tanobada matamatana ai lalo-hekwarahi gaudia iboudiai do ia haorea.​—2 Korinto 4:7.

5. (a) Iseda guriguri edia anina do idia vara totona, gau badana be dahaka kara rua do ita karaia? (b) Bema iseda tauanidia edia ura kereredia ita koua toho, edena bamona ita guriguri be namo? (c) Bema ita guriguri loulou bona iseda ura ita gwauraia hedinarai goevagoeva, unai ese dahaka do ia hahedinaraia Iehova vairanai?

⁵ To, iseda guriguri edia anina do idia vara totona, namona be do ita guriguri loulou bona iseda ura do ita gwauraia hedinarai goevagoeva. (Roma 12:12) Hegeregere, bema nega haida oi hesiku badina be emu tauanina ena ura kererena ta oi koua toho, daba daba iboudiai Iehova oi noia oi do ia durua, unai dina ai unai ura ese oi do ia halusia lasi totona. Dina ai unai bamona oi guriguri, bona hanuaboi ai danu, oi mahuta gwauraia neganai. Bema oi hekwakwanai, Iehova oi noia emu dika do ia gwauatao, bona emu hekwakwanai dalana ia havaraia gauna oi hamaorolaia, bona nega vairai unai amo do oi raka siri diba dalana danu. Emu ura gauna be unai bamona do oi gurigurilaia loulou negadiai, unai ese guriguri kamonai henia Diravana vairanai do ia hahedinaraia oi ura momokani do oi kwalimu.​—Salamo 65:2; Luka 11:​5-13.

6. Dahaka dainai ita diba, ena be ita laloa ita be hegeregere lasi do ita guriguri, to Iehova ese iseda guriguri do ia kamonai henidia?

⁶ To reana nega haida hesiku taudia idia laloa idia hegeregere lasi do idia guriguri. Guna unai bamona ia laloa Keristani hahinena ta be ia gwau: “Unai lalohadai ese dika ia havaraia diba, badina be unai amo ita be sibona ita hahemaoro henia, bona unai be iseda gaukara lasi.” Momokani, “Dirava . . . sibona be kota biaguna badana.” (Salamo 50:6) Baibel ese ita ia hamaoroa, ena be reana “iseda kudouna ese ita idia kota henia noho . . . [to] Dirava ese gau ibounai ia diba, bona iena diba ese iseda kudouna ena diba ia hereaia momokani.” (1 Ioane 3:​20) Iseda lalona idia goada diba, badina be ita diba ena be reana ita laloa ita hegeregere lasi do ita guriguri, to reana Iehova ese ita unai bamona ia laloa lasi! Ia be “gau ibounai ia diba,” iseda mauri lalonai idia vara gaudia danu, reana idia dainai ita laloa ita be hegeregere lasi. (Salamo 103:​10-14) Ena hebogahisi bona ena lalo-parara dobuna dainai, ia ese ‘ia lalohisihisi momokani bona ia manau momokani’ tauna ena guriguri ia kamonai henidia. (Salamo 51:17) Ia ese ‘ogogami taudia edia taitai ia kamonai henia lasi’ tauna ia gwauraia dika; vadaeni, heduru totona do ita tai henia neganai, iseda noinoi be edena bamona do ia dadaraia diba?​—Aonega Herevadia 21:13.

Tadikaka Edia Lalokau

⁷ Iseda goada do ita hamatamataia lou totona Iehova ese ita ia durulaia gauna ma ta be iseda Keristani oreana. Tanobada hegegemadai ita be tadikaka bona taihu bamona famili tamona lalonai ita noho be hahenamo badana! (1 Petero 2:17) Mauri ena hekwarahi ese ita idia hametaua neganai, iseda tadikaka edia lalokau ese ita ia durua diba, iseda goada ita hamatamataia lou totona. Edena dala amo? Iseda lalona ia hagoadaia gauna be inai: Ita diba, ita siboda mo lasi, to iseda tadikaka bona taihu haida danu ese hekwarahi idia davaria. Ita davaria hekwarahidia o hahetohodia hegeregeredia idia danu ese idia davaridia vadaeni, bona edia mamina be iseda hegeregerena. (1 Petero 5:9) Iseda lalona idia goada diba, badina be ita diba ita hisihisilaia gaudia be idau lasi bona iseda mamina be idau lasi.

⁸ Iseda orea taudia bogaragidiai ita ese ‘tura’ korikoridia ita davaria diba; hisihisi ita davaria neganai ita idia durua bona idia hagoadaia taudia unai. (Aonega Herevadia 17:17) Nega momo, ta ese ena hebogahisi herevadia o karadia amo unai ia karaia diba. Keristani hahinena ta, sibona ena lalo-manoka ia hekwarahilaia hahinena, be ia gwau: “Egu turana haida ese egu kara namodia idia gwauraia lau dekenai, unai amo lau idia durua egu lalo-manoka koua totona.” (Aonega Herevadia 15:23) Taihu ta be ena natuna kekenina ia mase murinai, ia davaria kongregesen heboudia ai Basileia anedia ia abia be auka, bona toreisi lou gwauraia anedia ia abia be auka herea. Ia gwau: “Nega ta ai, taihu ta lau kahirakahira ai ia helai ese lau ia itaia, lau tai noho. Lau dekenai ia mai, lau ia rosia, bena lau ida ane orena ia abia. Unai neganai lau be tadikaka bona taihu lalokau henidia lalokauna ena mamina amo lau honudae, bona ai be hebou ai lao henidia dainai lau moale bada, badina be lau diba heduru ai abia gabuna be unuseniai, Kingdom Hall ai.”

9, 10. (a) Iseda orea ena lalokau be edena bamona ita habadaia diba? (b) Daidia ese hebamo namona idia abia be mai anina bada? (c) Lalo-metau taudia be edena bamona ita durudia diba?

⁹ To, momokani, namona be ita ta ta ibounai ese Keristani oreana ena lalokau do ita habadaia be namo. Namona be iseda kudouna do ita kehoa badabada, bona iseda ‘lalokau do ita habadaia,’ iseda tadikaka bona taihu iboudiai lalokau henidia totona. (2 Korinto 6:13) Madi, namo lasi bema hesiku taudia be mamina idia abia tadikaka edia lalokau idia dekenai be ia keru vadaeni! To, Keristani taudia haida idia gwau, idia lalohisihisi badina be tadikaka ese idia lalodia lasi. Taihu ta, iena adavana ese hereva momokani ia inai henia hahinena, be ia noinoi, ia gwau: “Daika ese hetura namona, hahegoada herevadia, bona lalokau taudia edia hebamo ia ura henia lasi? Mani iseda tadikaka bona taihu oi hamaorodia lou, edia heduru do ai abia be namo!” Oibe, edia mauri idia hekwarahilaia taudia ese hebamo namona idia abia be mai anina bada​—idia haida edia adavadia be Keristani lasi taudia, haida be mai edia natudia to mai edia adavadia lasi, haida be nega daudau idia gorere, bona ma haida idia buruka. Idia ese ita haida be unai do idia hadibaia lou be namo, a?

¹⁰ Edena bamona do ita heduru diba? Namona be iseda lalokau hahedinaraia karana do ita habadaia. Haida be aniani totona do ita boiridia neganai, namona be lalo-metau taudia danu do ita boiridia. (Luka 14:​12-14; Heberu 13:2) Namo lasi emu lalona ai do oi gwau do idia mai diba lasi, to namona be do oi boiridia sibona, ani? Bena idia sibodia be edia lalona do idia hadaia. Ena be reana idia mai diba lasi, to edia lalona do idia goada, badina be idia diba haida ese idia lalodia. Reana unai amo edia goada do idia hamatamataia lou.

11. Reana lalo-metau taudia be edena bamona ita durudia be namo?

¹¹ Reana lalo-metau taudia be dala idaudia amo do ita durudia be namo. Bema sina ta be mai ena adavana lasi, reana lo tadikakana ta ese ena natuna, tamana lasi merona, ena namo do ia tahua be namo. (Iamesi 1:27) Bema tadikaka ta o taihu ta ia gorere bada, reana namona be ta ese ena aniani hoia karana ai o ena ruma gaukarana ai do ia durua. Buruka tauna be reana ia ura haida edia hebamo do ia abia, o do idia durua haroro gaukarana do ia karaia totona. Bema unai bamona heduruna be nega daudau do idia abia be namo, unai ese ‘iseda lalokau ia tohoa, ia momokani o lasi.’ (2 Korinto 8:8) Iseda nega bona iseda goada be dabu taudia dekenai do ita haorea garina idia edia amo do ita raka siri be namo lasi, to namona be do ita hebogahisi henidia bona ita durudia. Iseda Keristani lalokauna be unai bamona do idia tohoa neganai, do idia davaria ia be momokani.

Dirava Ena Hereva Ena Siahu

¹² Aniani ia dadaraia tauna ena goada o siahu be do ia ore haraga. Do ita haheauka totona Iehova ese siahu ita ia henia dalana ma ta be, lauma dalana ai ita do idia ubua namonamo dalana ia lailaia. (Isaia 65:​13, 14) Dahaka lauma aniani be ita ia henia? Gau hereadaena be iena Hereva, Baibel. (Mataio 4:4; ma Heberu 4:12 itaia danu.) Baibel ese ita edena bamona ia durua, iseda goada ita hamatamataia lou totona? Iseda lalo-hekwarahi bona iseda hekwakwanai ese iseda goada idia haorea matamaia neganai, bema ita ese kamonai tataudia bona hahinedia, Baibel negadiai idia noho taudia, edia mamidia bona edia hekwarahi sivaraidia ita duahia, unai amo goada ita abia diba. Ena be kara maoromaoro idia badinaia goevagoeva, to idia be taunimanima “ita bamona.” (Iamesi 5:17; Kara 14:15) Ita davaria hahetohodia bona hekwarahidia hegeregeredia idia danu ese idia davaria. Idia haida mani oi laloa.

13. Baibel lalonai, edena tatau bona hahine mai edia kamonai edia sivarai ese idia hahedinaraia edia mamidia bona edia hekwarahi be iseda hegeregeredia?

¹³ Ena be sene tauna Aberahamo ese toreisi lou herevana ia abia dae, to ena adavana ena mase ia lalohisihisilaia bada. (Genese 23:2; ma Heberu 11:​8-10, 17-19 itaia danu.) Davida ia helalo-kerehai murinai, ia laloa ena kara dikadia dainai ia be hegeregere lasi Iehova ena hesiai do ia lao henia. (Salamo 51:11) Mose ia laloa ia be hegeregere lasi. (Esodo 4:10) Epafrodito ena lalona ia metau, badina be idia kamonai ia gorere bada dainai, “Keriso ena gaukara” ia goadalaia diba lasi. (Filipi 2:​25-30) Paulo ese ena tauanina ena dika ia hekwarahilaia. (Roma 7:​21-25) Toana be Euodia bona Sunutuke, horoa taihudia rua Filipi ena kongregesen lalonai, be idia lalo-tamona lasi. (Filipi 1:1; 4:​2, 3) Iseda lalona ia hagoadaia momokani gauna be inai: Ita diba ena be unai taunimanima mai edia kamonai edia mamidia be iseda hegeregeredia, bona ita dekenai idia vara gaudia hegeregeredia idia dekenai danu idia vara, to idia hesiku lasi! Bona Iehova ese ia hesikulaidia lasi.

14. (a) Iehova ese dahaka ena amo ita ia durua, Iena Hereva amo goada do ita abia totona? (b) Dahaka dainai lalo-hekwarahi gaudia idauidau herevadia be Gima Kohorona bona Noga! lalodiai idia torea?

¹⁴ Iehova ese hesiai tauna mai ena kamonai bona mai ena kara maoromaoro oreana ia gaukaralaia, ‘aniani negadiai iseda aniani be ita do ia henia’ totona; unai amo ita ia durua, ena Hereva amo goada ita abia totona. (Mataio 24:45) Hesiai tauna mai ena kamonai ese nega daudau Gima Kohorona bona Noga! amo Baibel ena hereva momokani ia abia isi bona Dirava ena Basileia ia gwauraia hedinaraia, taunimanima do ia hanamodia diba gauna tamona. Idia hanai laganidia 30 bamona lalodiai, inai magasin ruaosi lalodiai lalo-hekwarahi gaudia idauidau be Baibel amo ia sisibalaia; unai gau, taunimanima padadiai bona famili lalodiai idia vara gaudia, be Dirava ena orea taudia danu ese idia lalo-hekwarahilaia. Dahaka dainai unai hereva ia halasia? Momokani, unai be unai gau idia lalo-hekwarahilaidia taudia durudia totona, Dirava ena Hereva ena amo goada do idia abia totona. To unai bamona herevadia ese danu ita ibounai idia durua, iseda tadikaka bona taihu edia lalo-hekwarahi ita lalo-pararalaia totona. Unai amo ita hegeregere Paulo ena hereva do ita badinaia; ia gwau: “Gari taudia do umui hagoadaia, bona manoka taudia do umui durua. Bona taunimanima ibounai dekenai do umui lalo namo henidia.”​—1 Tesalonika 5:14.

Elda Taudia be “Lai Koua Gabuna Hegeregere”

¹⁵ Iehova ese ma gau ta ita ia henia, ita hesiku neganai ita ia durua totona​—kongregesen edia elda taudia unai. Peroveta tauna Isaia ese inai bamona ia gwauraidia: “Idia ta ta ibounai be lai koua gabuna hegeregere do idia lao. Idia be guba bada ia toa neganai hunia gabudia namodia hegeregere. Idia be tano kaukau gabudia lalonai sinavai maragidia hegeregere. Idia be nadi badana ena ikerukeru bamona, tano kaukau dekenai.” (Isaia 32:​1, 2) Unai dainai, elda taudia edia maduna be Iehova ena peroveta herevana hegeregerena do idia kara. Namona be idia ese haida edia lalona do idia hagoadaia, bona mai edia ura ida ‘do idia durudia, edia metau do idia huaia totona.’ (Galatia 6:​2) Unai be edena bamona idia karaia diba?

¹⁶ Ai hereva vadaeni hegeregerena, nega haida lalo-hesiku tauna ia laloa ia be hegeregere lasi do ia guriguri. Elda taudia be edena bamona idia kara diba? Idia be ia ida bona ia dainai idia guriguri diba. (Iamesi 5:14) Bema ia vairanai Iehova idia noia ena lalona do ia hapararaia, Iehova bona ma haida edia lalokau ia dekenai ena bada do ia diba totona, momokani unai ese ena lalona do ia hagoadaia. Elda tauna ta be mai ena lalona ibounai ida do ia guriguri neganai, bema lalohisihisi tauna ese unai do ia kamonai, reana unai ese ena abidadama do ia hagoadaia diba. Reana do ia laloa bema elda taudia idia laloa Iehova ese edia guriguri, ia dainai idia gwauraidia gaudia, do ia haerelaidia, vadaeni ia danu ese unai bamona do ia abidadama henia diba.

17. Dahaka dainai namona be elda taudia idia kamonai mai edia hebogahisi ida?

¹⁷ Iamesi 1:19 ia gwau: “Hereva dekenai do umui kamonai haraga, to hereva do umui gwauraia haraga lasi.” Namona be elda taudia ese hesiku taudia edia hereva do idia kamonaia mai edia hebogahisi ida; unai amo do idia durudia, edia goada do idia hamatamataia lou totona. Reana kongregesen taudia haida ese hekwakwanai idia hekwarahilaidia, bona hari inai negai unai hekwakwanai haoredia dalana be lasi. Unai dainai, reana namona be elda taudia ese edia hekwakwanai “haorea” daladia do idia sisibalaia lasi, to edia hereva do idia kamonai henia namonamo be namo. Anina be, edia lalohadai hamaoromaoroa dalana do idia hamaorolaidia lasi bona edia lalona ai do idia gwauraidia kerere lasi, to edia hereva do idia kamonaia namonamo mo.​—Luka 6:37; Roma 14:13.

18, 19. (a) Bema elda tauna ta ia kamonai haraga, unai ese edena bamona ia durua, hesiku tauna ena maduna do ia hametaua lasi totona? (b) Elda taudia idia “bogahisihisi” neganai, dahaka ia vara?

¹⁸ Elda taudia e, bema umui kamonai haraga, hesiku tauna ena maduna do umui hametaua kava lasi. Hegeregere, bema tadikaka ta o taihu ta ese hebou haida ia reaia o haroro gaukarana ai ia manoka ia lao, ena haroro bona hebou karadia do ia goadalaia daladia be ia dekenai do umui sisibalaia be namo, a? Sedira. To iena noho dalana ibounai be umui diba, a? Ia gorere a? Iena famili madunadia be vanegai idia senisi, a? Hekwarahi ma haida ese ena lalona idia hametaua, a? Mani umui laloa, reana ia sibona ia laloa ia kerere bada, ena gaukara ia habadaia diba lasi dainai.

¹⁹ Vadaeni, oi ese unai tadikaka o taihu edena bamona do oi durua diba? Oi do lalohadailaia lasi bona oi do sisiba henia lasi neganai, oi kamonai! (Aonega Herevadia 18:13) Henanadai namodia amo ena lalona ena mamina oi tahua. (Aonega Herevadia 20:5) Ena lalona ena mamina oi laloa maragi lasi. Reana namona be hesiku tauna do oi hamaoroa Iehova ese ita ia naria bona ia diba ita dekenai idia vara gaudia ese nega haida ita idia koua reana. (1 Petero 5:7) Elda taudia be unai bamona idia “bogahisihisi” neganai, hesiku taudia ‘edia laumana idia laga-ani.’ (1 Petero 3:8; Mataio 11:​28-30) Edia goada be unai bamona idia hamatamataia lou neganai, edia lalona ese idia doridia, edia goada hegeregerena Iehova ena hesiai do idia lao henia totona; elda taudia ese unai do idia hamaorolaidia be badina lasi.​—2 Korinto 8:12; 9:7 itaia.

20. Inai uru dikana ena dokona be kahirakahira momokani dainai, namona be iseda lalona ita hadaia edena bamona do ita kara?

²⁰ Momokani, ita be hekwarahi momo negana lalonai ita noho. Dokona be kahirakahira momokani dainai, Satani ena tanobada lalonai ita abia hekwarahidia be idia momo daekau. Mani oi laloatao, ena vamu ia tahua laionana ta bamona, Diabolo ia naria ela bona do ita hesiku bona do ita manoka, bena ita do ia abia haraga. Iehova ita tanikiu henia bada, badina be ia ese hesiku tauna ia hagoadaia! Ita ia hagoadaia totona ita ia henia gaudia be do ita gaukaralaia guguru be namo; unai amo ita ia hagoadaia, hegeregere ia roho noho ugavana ena hanina goadadia be ita ia henia bamona, bena do ita haheauka noho diba. Inai uru dikana ena dokona be kahirakahira momokani dainai, namona be iseda heau helulu do ita hadokoa lasi, to kwalimu ahuna​—mauri hanaihanai​—abia totona do ita heau noho.​—Heberu 12:1.

Emu Haere be Dahaka?

◻ Ita diba Iehova ese iseda guriguri be edena bamona do ia haerelaidia?

◻ Edena dala amo iseda Keristani oreana ena amo goada ita abia diba?

◻ Dirava ena Hereva ese ita edena bamona ia durua, iseda goada ita hamatamataia lou totona?

◻ Elda taudia ese hesiku taudia edena bamona idia durudia diba, edia goada idia hamatamataia lou totona?

7. (a) Iseda goada do ita hamatamataia lou totona Iehova ese ita ia durulaia gauna ma ta be dahaka? (b) Iseda orea taudia dekenai dahaka ita diba neganai, goada ita davaria diba?

8. (a) Dahaka haheitalai ese idia hahedinaraia, ita lalo-manoka neganai iseda orea taudia ese ita idia durua bona idia hagoadaia diba? (b) Edena dala amo ‘tura’ korikorina ta ese oi ia durua o ia hagoadaia vadaeni?

12. Dirava ena Hereva ese ita edena bamona ia durua, iseda goada ita hamatamataia lou totona?

15. Isaia ese elda taudia edena bamona ia perovetalaia, bona unai dainai edia maduna be dahaka?

16. Bema ta ia laloa ia hegeregere lasi do ia guriguri, elda taudia ese edena bamona idia durua diba?

[Picture on page 17]

Haida be aniani totona do ita boiridia neganai, namona be lalo-metau taudia danu do ita boiridia

[Picture on page 18]

Elda taudia ese Iehova idia noia diba, hesiku taudia do ia durudia, iena lalokau idia dekenai ena bada do idia lalo-pararalaia totona