Kara Maoromaoro ese Bese ta Ia Abia Isi
MEDU be dina momo lalodiai ia diho murinai, bema daba ai oi noga neganai guba oi itaia, ori be lasi bona dina ia tara, oi moale, ani? Medu ese tano ia hapariparia, unai dainai tubutubu gaudia do idia tubu namonamo. Nega ta Iehova Dirava ese unai bamona karana ia gwauraia, lohia dalana maoromaorona ena hahenamo hahedinaraia totona. Ia ese King Davida ia hamaoroa, ia gwau: “Taunimanima ia biagua namonamo king tauna, bema ia ese taunimanima ia biagua mai maoromaoro danu, Dirava ena hereva hegeregere neganai, ia be idia dekenai ia diaridiari noho, daba ia rere bamona, o daba ori be lasi neganai, dina ia tara bamona. Ia be idia edia latanai ia namo, medu bamona, medu ese rei ia hatubua bamona.”—2 Samuela 23:3, 4.
Davida ena natuna, King Solomona, be mai maoromaoro ida ia lohia negana lalonai, Dirava ena hereva ena anina ia vara. Baibel ia gwau: “Solomona ena mauri dinadia ibounai lalonai Iuda bona Israela taudia be mai maino danu idia noho. Edia bese ta ta ibounai be mai edia vain audia, bona mai edia fig audia.”—1 King Taudia 4:25.
Idaunegai Israelana be Dirava ese ia abia hidi besena. Ia ese taravatu ia henidia bona ia hamaorodia, bema iena hereva do idia kamonai, idia “do ia abia isi, tanobada bese edia ataiai.” (Deuteronomi 28:1) Israela ena kara maoromaoro ese ia abidia isi lasi, to Iehova ena kara maoromaoro ese. Dirava ese ia henidia taravatudia ese idia badibadinai besedia edia taravatu idia hereaia. Israela taudia idia goevadae lasi, bese oredia hegeregeredia. To, Iehova ena Taravatu be hereadae bona idia badinaia goevagoeva dainai, unai ese ia abidia isi, bese iboudiai ataiai. Iehova ena taravatu idia badinadia negadiai, iena lalo-namo bona ena hahenamo idia abia. King Solomona ese unai ia abia iena lohia negana lalonai. Unai dainai inai bamona ia hereva diba: ‘Kara maoromaoro ese bese ta ia hanamoa, to,’ ia sisiba, ia gwau, ‘kara dika ese bese ta dekenai hemarai ia havaraia.’—Aonega Herevadia 14:34.
Madi, Israela besena be ena gwau-edeede loulou karana ese ia hadihoa. Unai bese be hemarai ia abia. Edia kara dainai, gabeai Dirava ese edia bese ia dadaraia bona lauma besena matamatana ia abia dae.—Mataio 21:43.
Lauma Israelana
Nega ta Keristani hakaua oreana be Ierusalema ai idia hebou neganai, Iamesi, Iuda besena ai ia vara tauna, be Dirava ena lauma ese ia hasiahua bena ia gwau: “Dirava ese Iuda lasi bese taudia ia laloa noho. Bona hari inai nega ginigunana, Dirava ese idau bese taudia ia abia dae, bona iena bese taudia ia halaodia.” (Kara 15:14) Aposetolo Paulo ese unai Keristani besena matamatana be “Dirava ena Israela” ia gwauraia. (Galatia 6:16) Dirava ese ia boiridia ena badina be Petero ese ia gwauraia, ia gwau: “Dirava ese umui ia abia hidi vadaeni, umui be iena bese, umui be King ena hahelagaia taudia, bese helagana, bona Dirava ena orea korikori taudia. Dirava ese umui ia abia hidi, iena hoa kara badadia do umui gwauraia hedinarai. Badina be ia ese dibura dekena amo umui ia boiria, vadaeni iena diari namo bada herea lalonai do umui noho.” (1 Petero 2:9) Idia be Dirava ese ia abia hidi taudia dainai, namona be idia hedinarai, tanobada ena diari bamona. Iehova ena kara maoromaoro ese do ia abidia isi.—Filipi 2:15.
Unai lauma Israela taudia abia hidi karana be daimon nadidia tano amo abia karana hegeregerena. Tano mai daimon nadidia be maini amo idia kokia murinai, reana ton toi toi amo idia kokia daimon nadidia edia metau be miligaram 200 200. Idia kokidia dalana gunana be inai: Tano be ranu ida idia mikisia bena unai kopukopu ranuna be pata mai edia girisi latanai idia ha-arua hanai. Ranu be daimon nadidia dekenai ia kamokau diba lasi, unai dainai unai nadi be girisi dekenai idia kamokau bena ranu ese kopukopu orena sibona ia ha-arua oho. Unai neganai daimon nadidia idia manadamanada lasi. To idia utudia bena idia dahua murinai, idia diaridiari.
Ranu be daimon nadidia dekenai ia kamokau diba lasi dainai, kopukopu amo idia idau. Unai hegeregerena, Iehova ese ena orea taudia be tanobada amo ia abidia siri. (Ioane 17:16) Diari dekenai idia mai matamata neganai, reana idia diaridiari lasi. To Iehova ena Hereva bona iena lauma ese idia lalonai mauri matamatana ia havaraia, bena idia hedinarai, tanobada ena diari bamona. Sibodia edia kara maoromaoro dainai lasi, to Iehova ena kara maoromaoro dainai ia abidia isi bona gabu iboudiai dekenai Basileia ena hereva momokani ena diari idia hahedinaraia.
To, lagani 100 C.E. be kahirakahira neganai, hereva momokani negea karana be kongregesen lalodiai ia vareai bona taunimanima momo ia hadikaia. Sibodia idia gwauraia Keristani taudia be tanobada besedia edia kara ai idia vareai, unai dainai edia toana be idau lasi, to tanobada taudia edia toana hegeregerena.
Hari inai negai lauma Israela taudia oredia mai edia kamonai be Iehova ese ia lalo-namo henidia lou. Idia be tanobada amo idia siri bona ‘tauanina bona lauma hamiroa karadia ibounai idia hadokoa, bona edia mauri idia hagoevaia.’ (2 Korinto 7:1) Iehova vairanai idia goeva bona idia maoromaoro dainai, iena kara maoromaoro idia badinaia. Unai dainai Dirava ese ia lalo-namo henidia bona tanobada besedia ataiai ia abidia isi. Basileia ena sivarai namona harorolaia gaukarana idia goadalaia karana amo, taunimanima hutuma bese iboudiai amo idia veridia mai Iehova dekenai, bona idia be iena orea taudia ai idia lao.—Apokalupo 7:9, 10.
Tanobada ese Edia Idau Ia Itaia Diba
Nega haida gavamani taudia ese Dirava ena hesiai taudia idia hanamoa, edia kara dainai. Lagani haida idia lao vadaeni, Pretoria Show Grounds, South Africa ai, ena sekuriti tauna badana ese Iehova ena Witness taudia, bese idauidau amo, edia kara ia herevalaia. Lagani ta ta iboudiai hebouhebou badana be unai gabu ai idia karaia. Ia gwauraia gauna ta be inai: “Idia hanai dinadia haida lalonai, taunimanima iboudiai idia kara mai edia hemataurai ida, idia gado namo heheni—unai ibounai ese ia hamomokania emui orea taudia be kara maoromaoro taudia, bona famili tamona bamona idia noho hebou mai edia moale ida.”
Iehova ena orea taudia be unai bamona hebouheboudia amo bona sibodia edia mauri dalana amo iena bese ena kara maoromaoro idia hahedinaraia diba. Hegeregere, Watch Tower Society ena brens opesi South Africa ai ese revareva ta ia abia; Johannesburg ai ia noho hahinena ta ese unai revareva ia siaia, ia gwau: “Pura gunana ai, lauegu moni paosina be egu motuka ena guhi ai lau atoa bena motuka lau taria. Paosi be Jan Smuts Avenue ai ia moru bena emui orea tauna ta, Mr. R—, ese paosi mai ena anina ibounai ia abia. Lau ia rini henia bena ia haloua lau dekenai. . . . Ena kara maoromaoro lau moalelaia. Hari inai negai unai bamona karana be bada lasi. Emui orea lau hanamoa badina be ia ese taravatu ia atodia bona emui orea taudia ese idia badinadia.”
Oibe, Iehova ena orea taudia ese iena taravatu maoromaorodia idia badinaia dainai, edia toana be idau, inai tanobada taudia edia toana hegeregerena lasi. Iehova ena kara maoromaoro idia hahedinaraia dainai, unai ese lalo-momokani taudia be Keristani oreana dekenai ia veridia mai. Taunimanima edia kara korikori be ia goeva gauna idia ura henia. Hegeregere, Zurich, Switzerland ai, idau tauna ta be Iehova ena Witness taudia edia hebou ta dekenai ia lao, bona ia gwau ia ura unai kongregesen ena memba tauna ta ai do ia lao. Ia gwau iena taihuna ia sihari kava dainai orea murimurinai idia atoa, ma ia gwau ia ura unai bamona oreana, “kara dika ia haheaukalaia lasi” oreana, lalonai do ia vareai. New Catholic Encyclopedia ia gwau, taunimanima ese Iehova ena Witness taudia idia gwauraia “tanobada ai idia noho kara namo oreadia ta.”
Ta ena kara maoromaoro ese ena ladana namona ia abia isi, to ena kara dika ese ia hadikaia diba, bona unai ia momokani bema taunimanima ese ena kara dika rohorohona idia diba. Nega haida Keristani oreana taudia idia kara dika rohoroho neganai, unai ese orea ena ladana namona ia hadikaia bona orea taudia ese unai hemarai idia huaia. Unai dainai, orea ena ladana namona naria totona, orea taudia mai edia kamonai ese taunimanima idia hamaorodia, Baibel ena taravatu hegeregeredia orea naria taudia ese kerere tauna idia matahakani henia mai edia hebogahisi ida. Bema ta ia kara dika loulou bona ia helalo-kerehai lasi, orea murimurinai do idia atoa.—1 Korinto 5:9-13.
Haida be Orea Murimurinai Idia Atoa Ena Badina
Lagani ta ta iboudiai taunimanima tausen haida be Keristani oreana murimurinai idia atoa, to tanobada hegegemadai idia noho Witness taudia milioni ima bamona edia orea amo unai be kahana maragina mo. Badina be dahaka Keristani oreana tauna be unai bamona idia kara auka henia? Badina ta be ena kara dika ena bada dainai. To unai ia hanaia gauna be kerere tauna ese iena kara dika rohorohona amo ia helalo-kerehai momokani eiava lasi. Bema ena kara dainai ia lalohisihisi momokani, bona Iehova ena ladana ia hadikaia dainai mai ena momokani ida ia guriguri henia, ia noia ena kara dika do ia gwauatao, bona kongregesen ena lo taudia edia heduru ia tahua vadaeni, unai neganai idia durua diba, Dirava ena lalo-namo do ia abia lou bona kongregesen lalonai do ia noho totona.—Aonega Herevadia 28:13; Iamesi 5:14, 15.
Bema mero ta, ena tamana ida ia hetura namonamo merona, ese ena tamana ena lalona hahisia karana ta ia karaia neganai, namona be idia ruaosi ese edia hetura karana do idia hanamoa haraga. Unai hegeregerena, iseda mauri be Iehova dekenai ita gwauhamatalaia neganai, ita be iena turana ai ita lao. Unai dainai, bema iena lalona hahisia karana ta ita karaia neganai, namona be iseda hetura karana eda Guba Tamana ida do ita hanamoa lou toho haraga.
Moale gauna be inai: Orea murimurinai idia atoa taudia haida ese raka boio merona parabolena idia laloa namonamo. Unai parabole lalonai Iehova be Tamana mai ena lalokau bamona; bema kerere tauna ia helalo-kerehai bona ia giroa bona Dirava ia noia ena kerere do ia gwauatao, vadaeni ia noho hegaegae do ia abia dae lou totona. (Luka 15:11-24) Mai ena momokani ida ia helalo-kerehai bona ena kara dika ia rakatania tauna ese Iehova ena lalo-namo ia abia lou diba, bona Keristani oreana ena danu. Edia kerere idia lalohisihisilaia bada taudia haida idia helalo-kerehai, bona kara idia karaia, Keristani oreana mai lalokauna lalonai do idia vareai lou totona. Unai dainai, Iehova ena hereva Isaia 57:15 ai idia laloa bada.
Satani ia ura lasi taunimanima be Iehova dekenai do idia lou lao, do ia naridia mai ena lalokau ida totona, unai dainai ia ura taunimanima idia laloa Dirava ese edia kara dika ia gwaudia tao lasi. To Keriso Iesu ena boubou, mauri davalaia boubouna, be hegeregere idia helalo-kerehai taudia edia dika do ia kokia—oibe, “taunimanima ibounai” ese Adamu ena amo idia abia dikana danu. (1 Ioane 2:1, 2) To Iesu ena boubou ese ia kokia lasi dikana tamona be lauma helaga ia hereva dika henia tauna ena dika. Unai tau ese Dirava ena lauma ena gaukara ia gwau-edeede henia mai ena ura ida, Iuda Iskariote bona taravatu hadibaia taudia bona Farisea taudia momo ese idia karaia hegeregerena.—Mataio 12:24, 31, 32; 23:13, 33; Ioane 17:12.
Iehova Ena Kara Maoromaoro Badinaia
Lagani 1919 ai lauma Israela taudia oredia ese Iehova ena lalo-namo idia abia lou; unai nega amo Iehova ese idia be tanobada taudia ataiai ia abia isi momokani. Unai be sibodia edia kara namo dainai lasi, to Iehova ena taravatu idia badinaia mai edia ura ida dainai. Unai ese Keriso ena “mamoe idaudia” milioni milioni ia veridia mai, bena lauma Israela taudia ida idia hebou bona idia bamodia mai edia kamonai ida. (Ioane 10:16) Dirava ena taravatu maoromaorodia amo ia noho daudau tanobadana lalonai, unai taunimanima ese Iehova idia hanamoa bona idia matauraia. Nega ta South Africa ena magasin ta ladana Personality ia gwau: “Toana be Iehova ena Witness taudia be kara namo amo idia honudae bona edia kara dika be sisina mo.”
Dirava ia badinaia lasi tanobadana ataiai idia noho totona, namona be Keristani oreana taudia ta ta iboudiai be Iehova vairanai idia goeva bona idia kara maoromaoro. Baibel ese Iehova ena orea guba lalonai be gau goevadia amo ia laulaulaia. Ia gwau ia be hahine mai hairaina bamona, iena dabua be dina, bona hua be ena aena henunai. (Apokalupo 12:1) Ierusalema Matamatana be hanua helagana mai hairaina ia gwauraia. (Apokalupo 21:2) Keriso ena headava matamata hahinena ena orea taudia mai edia kamonai be ‘dabua goevagoeva bona diaridiari’ idia abia. (Apokalupo 19:8) Hutuma bada herea taudia “edia dabua be kurokuro.” (Apokalupo 7:9) Kara maoromaoro idia ura henia taudia ese orea goevana idia ura henia. To Satani ena orea ia goeva lasi. Baibel ia gwau iena tomadiho oreana be ariara hahinena bamona, bona hanua helagana murimurinai idia noho taudia idia miro, idia goeva lasi.—Apokalupo 17:1; 22:15.
Dirava ese mauri hanaihanai ia gwauhamatalaia kara maoromaoro taudia dekenai. Iehova ena kara maoromaoro idia badinaia taudia edia helaro be inai tanobada dikana ena dokona amo do idia roho mauri. Aonega Herevadia 1:33 ai, Dirava ena gwauhamata be inai: “Lau dekenai do ia kamonai tauna, be do ia noho mai mauri danu. Ia be do ia noho namonamo, gari ta lasi.”
Solomona ia hereaia tauna, Keriso Iesu, ese mai kara maoromaorona ida bona Iehova gari henia karana ai tanobada matamatana do ia lohiaia neganai, moale bada do ia vara! (2 Petero 3:13) Unai be daba rere ai dina ia tara bona ori be lasi negana bamona. Tanobada idia noholaia taudia iboudiai do idia noho namonamo, idia ta ta ena vain auna ena vain auna bona ena fig auna ena fig auna henudiai do idia helai bamona. Kara maoromaoro taudia ese tanobada do idia hahairaia bona edia gabu korikorina ai do idia noho, iseda Dirava, Iehova, do idia hanamoa hanaihanai totona.—Mika 4:3, 4; ma danu Isaia 65:17-19, 25 itaia.
[Picture Credit Line on page 26]
Garo Nalbandian