Nega Ibounai Iehova Ena Matahakani Abia Dae
“Lohiabada ena matakani . . . oi abia dae.”—AONEGA HEREVADIA 3:11.
1. Dahaka dainai Dirava ena matahakani ita abia dae be namo?
IDAUNEGAI Israela ena King Solomona ese ita ta ta dekenai Dirava ena matahakani ita abia dae ena badina namona ia gwauraia. Ia gwau: “Egu natuna e, Lohiabada ena matakani oi dekenai, be do oi abia dae, bona iena sisiba dekenai do oi hesiku lasi. Badina be Lohiabada ese ia lalokau henia taudia, be ia matakani henidia noho, tamana ta ese iena natuna, ia lalokau henia merona, ia matakani henia bamona.” (Aonega Herevadia 3:11, 12) Oibe, emu guba Tamana ese oi ia matahakani henia, badina oi ia lalokau henia.
2. Matahakani ena anina be dahaka, bona edena dala ai ta be matahakani ia abia diba?
2 Inai hereva “matakani” (o matahakani) ena anina be ta ia kerere neganai idia panisia, hamaoromaoroa, sisiba henia, bona hadibaia. Aposetolo Paulo ia gwau: “Tamana ese metau bona hisihisi [“mata hakani,” BHğ] ita dekenai ia henia neganai, iseda lalona idia hisihisi, bona ita be moale lasi. To gabeai, inai matakani ese idia ia hamaoromaoroa vadaeni taudia ese, kara maoromaoro ena davana namona, mai maino danu do idia davaria.” (Heberu 12:11) Dirava ena matahakani ita abia dae bona ita badinaia karana ese ita do ia durua kara maoromaoro dalana ai ita raka totona, bona unai amo helaga Diravana, Iehova, kahirakahira do ita lao. (Salamo 99:5) Reana tadikaka taihu, Keristani heboudia, Baibel bona “kohu naria tauna mai ena kamonai” ese ia halasia bukadia oi stadilaia karana ese kerere amo oi idia hamaoromaoroa diba. (Luka 12:42-44) Bema ta ese oi ia hadibaia kara ta oi hamaoromaoroa totona, oi moale be namo! To, bema ta be kara dika badana ta ia karaia, edena bamona matahakani do ia abia?
Kongrigeisen amo Haida Idia Atoa Siri Ena Badina
3. Dahaka dainai ta be kongrigeisen amo idia atoa siri?
3 Iehova ena Witnes taudia be Baibel bona edia orea ese ia halasia bukadia idia stadilaia. Edia hebou maragidia bona badadia dekenai, Iehova ena taravatu idia herevalaia. Unai dainai, Keristani taudia be Iehova ena ura idia diba vadaeni. To, bema kongrigeisen tauna ta be kara dika badana ia karaia bona ia helalo-kerehai lasi, ia be kongrigeisen amo idia atoa siri.
4, 5. Baibel ese edena sivarai ia gwauraia, bona dahaka dainai Paulo ese kongrigeisen ia hamaoroa kara dika tauna do idia abia-vareai-lou?
4 Kongrigeisen amo idia atoa siri tauna ta ena sivarai Baibel lalonai mani ita itaia. Korinto kongrigeisen dekenai tau ta be iena tamana ena adavana danu ia heudahanai—unai kara be idau bese taudia ese idia karaia lasi—to kongrigeisen ese unai tau idia matahakani henia lasi. Paulo ese Korinto kongrigeisen taudia ia hadibaia unai tau be Satani dekenai do idia henia, unai amo kongrigeisen ena “lauma” ese mauri do ia davaria. (1 Korinto 5:1-5) Unai tau be kongrigeisen amo idia atoa siri bona Satani dekenai idia henia neganai, ia be Satani ena tanobada tauna ta ai ia lao lou. (1 Ioane 5:19) Kongrigeisen amo kara dika tauna idia atoa siri anina be, idia ese tauanina ena ura dikadia ena siahu be kongrigeisen amo idia kokia, bena kongrigeisen ena “lauma”—o kara namodia—ia hadikaia lasi.—2 Timoteo 4:22; 1 Korinto 5:11-13.
5 Daudau lasi murinai, Paulo ese Korinto Keristani taudia ia hamaoroa kara dika tauna do idia abia-vareai-lou. Dahaka dainai? Paulo ia gwau unai bamona idia karaia be namo, badina ‘Satani be idia dekenai ia kwalimu garina.’ Ia kara dika tauna be iena kara dika amo ia helalo-kerehai bona ena mauri ia hagoevaia vadaeni. (2 Korinto 2:8-11) Bema, Korinto kongrigeisen idia ura lasi unai helalo-kerehai tauna idia abia-vareai-lou, Satani be idia dekenai do ia kwalimu, badina ia ura kongrigeisen ese unai tauna do idia hebogahisi henia lasi bona ena dika idia gwauatao lasi. To, Korinto kongrigeisen ese unai helalo-kerehai tauna ena ‘dika idia gwauatao bona iena lalona idia hagoadaia.’—2 Korinto 2:5-7.
6. Kongrigeisen amo ta idia atoa siri karana ena namo be dahaka?
6 Kongrigeisen amo ta idia atoa siri karana ena namo be dahaka? Unai kara amo Iehova ena ladana helagana be ia goeva bona Iena taunimanima edia ladana namona ia dika lasi. (1 Petero 1:14-16) Ia helalo-kerehai lasi tauna be kongrigeisen amo idia atoa siri neganai, unai be Dirava ena taravatu ita badinaia bona kongrigeisen be do ia goeva noho. Danu, unai kara amo helalo-kerehai lasi tauna do ia laloparara ia karaia karana be dika momokani.
Helalo-Kerehai Karana be mai Anina Bada
7. Davida be ena kara dika ia hunia neganai, ena hemami be edena bamona?
7 Kara dika idia karaia taudia momo be idia helalo-kerehai momokani neganai, kongrigeisen amo idia atoa siri lasi. To, haida ese helalo-kerehai momokani karana idia hahedinaraia be auka. Israela ena King Davida, Salamo 32 ia torea tauna mani oi laloa. Unai karoa ese ia hahedinaraia Davida be Bataseba ida ia kerere neganai, unai ia gwauraia hedinarai haraga lasi. Unai dainai, ia lalohisihisi bona ena tauanina ena goada ia ore, hegeregere dina ena siahu lalonai au ta ia kakoro bamona. Davida ia lalohisihisi bada bona ena tauanina ia manoka, to ‘Lohiabada vairanai ena kara dika ia gwauraia hedinarai, vadaeni ena kara dika ia gwauatao.’ (Salamo 32:3-5) Bena, Davida be inai ane ia abia: “Bema Lohiabada ese tau ta kerere totona ia samania lasi, . . . unai tau be mai moale danu.” (Salamo 32:1, 2) Oibe, Iehova ena hebogahisi ia abia dainai ia moale bada!
8, 9. Helalo-kerehai karana ena toana be edena bamona? Dahaka dainai helalo-kerehai be mai anina bada bema ta ia ura kongrigeisen lalonai ia idia abia-vareai-lou?
8 Ia hedinarai goevagoeva, Iehova ese kara dika tauna dekenai hebogahisi ia hahedinaraia totona, unai tauna ia helalo-kerehai be gau badana. To, bema haida ese iena kara dika do idia diba dainai ia hemarai eiava ia gari, unai be helalo-kerehai ena toana lasi. “Helalo-kerehai” ena anina be “ta ese iena lalona ia haidaua” bona ia karaia kara dikadia dainai ia sori. Ia helalo-kerehai tauna be “ia lalohisihisi momokani” bona ia ura bema mai dalana, ‘unai kerere ia hamaoromaoroa.’—Salamo 51:17; 2 Korinto 7:11.
9 Keristani kongrigeisen lalonai ta idia abia-vareai-lou totona, ia helalo-kerehai be mai anina bada. Kongrigeisen amo idia atoa siri tauna be idia abia-vareai-lou haraga lasi. Ia do abia-vareai-lou lasi neganai, mai ena kudouna ibounai ida ena kara ia haidaua be gau badana. Namona be ia laloparara iena kara dika ese Iehova bona kongrigeisen ena ladana ia hamiroa. Unai dainai, do ia helalo-kerehai, ia guriguri Iehova ese ena dika ia gwauatao totona, bona Dirava ena kara maoromaoro taravatudia do ia badinaia. Idia atoa siri tauna be ia ura ia idia abia-vareai-lou neganai, namona be ‘iena lalona giroa hamomokania’ karadia haida ia hahedinaraia.—Kara 26:20.
Kara Dika Oi Gwauraia Hedinarai Ena Namo
10, 11. Dahaka dainai kara dika ita hunia be aonega karana lasi?
10 Reana idia kara dika taudia haida idia laloa: ‘Bema lau karaia kerere be elda tauna dekenai do lau gwauraia hedinarai, reana hemarai idia havaraia henanadai haida do idia henia bona reana kongrigeisen amo lau do idia atoa siri. To, bema tau ta lau hamaoroa lasi, kongrigeisen lalonai ta do ia diba lasi bona do lau hemarai lasi.’ To, unai bamona idia laloa taudia ese mai anina bada gaudia haida idia laloaboio. Idia be dahaka?
11 Iehova be ‘bogahisihisi bona hariharibada Diravana. Ia be badu dekenai ia haraga lasi, to bogahisihisi bona lalokau dekenai ia haraga. Taunimanima momo herea dekenai ia bogahisihisi henia noho, bona kara dika, bona kara kerere idauidau ia gwauatao noho.’ (Esodo 34:6, 7; Ieremia 30:11) Bema oi be kara dika badana oi karaia bona oi hunia, edena bamona Dirava ena hebogahisi oi abia diba? Iehova be emu kara dika ia itaia, bona kara ta do ia karaia.—Aonega Herevadia 15:3; Habakuku 1:13.
12, 13. Bema ta be ena kara dika ia hunia toho, dahaka ia vara diba?
12 Bema kara dika badana ta oi karaia bona oi gwauraia hedinarai, emu lalomamina do ia goeva. (1 Timoteo 1:18-20) To, bema oi hunia, emu lalomamina be do ia hamiroa bona reana unai kara dika do oi karaia lou lou. Namona be oi laloatao, oi be tau ta eiava kongrigeisen sibona dekenai oi kara dika lasi, to Dirava oi kara dika henia danu. Salamo torea tauna, ia gwau: “Lohiabada be iena Dubu Helaga lalonai ia noho. Lohiabada ena terona be guba dekenai ia noho. Gabu ibounai dekenai idia noho taunimanima, be Lohiabada ese ia itaia noho, bona edia kara ibounai ia diba. Taunimanima namodia bona dikadia edia kara, be Dirava ese ia tahua, maka tamona dekenai.”—Salamo 11:4, 5.
13 Bema kara dika badana ia karaia tauna be ena kara ia hunia bona kongrigeisen lalonai ia noho, Iehova ese do ia hanamoa lasi. (Iamesi 4:6) Unai dainai, bema oi be kara dika ta oi karaia bona oi ura oi hamaoromaoroa, elda taudia dekenai oi gwauraia hedinarai be gau badana. Bema unai oi karaia lasi, gabeai unai kara dika be hebou dekenai idia kikilaia eiava eda buka ai oi duahia neganai, emu lalomamina do ia dika. Bema Iehova be King Saulo dekenai ia karaia hegeregerena, oi amo Iena lauma helaga ia kokia be edena bamona? (1 Samuela 16:14) Dirava ena lauma helaga be oi ia rakatania dainai, kara dika badadia dekenai do oi moru diba.
Emu Keristani Tadikaka Oi Abidadama Henia
14. Dahaka dainai kara dika tauna ese Iamesi 5:14, 15 ena sisiba ia badinaia be namo?
14 Vadaeni, ia helalo-kerehai tauna ese dahaka ia karaia be namo? “Ia ese ekalesia gunalaia taudia do ia boiria be namo. Idia ese ia dainai do idia guriguri, bona ia dekenai dehoro do idia atoa, Lohiabada ena ladana dekenai. Inai guriguri mai abidadama danu ese gorere tauna do ia hanamoa. Lohiabada ese iena mauri do ia hanamoa.” (Iamesi 5:14, 15) Kara dika tauna be elda taudia ia lao henidia neganai, unai ese ia hahedinaraia ‘ena lalona ia giroa.’ (Mataio 3:8) Unai abidadama bona hebogahisi tadikaka ese “ia dainai do idia guriguri, bona ia dekenai dehoro do idia atoa, Lohiabada ena ladana dekenai.” Dehoro namona hegeregerena, elda edia Baibel sisiba herevadia ese ia helalo-kerehai momokani tauna do ia hagoadaia.—Ieremia 8:22.
15, 16. Esekiela 34:15, 16 ena hereva hegeregerena, edena dala ai Keristani elda taudia ese Dirava ena kara idia tohotohoa?
15 Iseda Mamoe Naria Tauna Iehova ese ena lalokau ia hahedinaraia dalana be inai: Lagani 537 B.C.E. ai, Israela besena be Babulonia amo ia ruhaia, bona lagani 1919 C.E. ai, lauma Israela be “Babulonia Badana” amo ia ruhaia. (Apokalupo 17:3-5; Galatia 6:16) Iehova ia gwau: “Lau sibona be mamoe naria tauna do lau lao, bona lau ese edia laga-ani gabuna ta do lau davaria. . . . Idia boio vadaeni mamoedia be do lau tahua, bona loaloa kava gaudia be do lau hakaua lou. Bero mamoedia edia bero do lau kumia, bona mai edia gorere gaudia be do lau hanamoa.”—Esekiela 34:15, 16.
16 Laulau dalanai Iehova be iena mamoe ia ubudia, laga-ani gabuna ai ia abidia lao, bona idia boio neganai ia tahua. Unai hegeregerena, Keristani elda taudia ese Dirava ena mamoe be lauma aniani amo idia ubua bona naria namonamo. Elda taudia ese kongrigeisen amo idia boio mamoe idia tahua. Dirava ese ‘bero mamoedia edia bero ia kumia’ hegeregerena, sibodia edia kara dika eiava haida ese idia hereva dika henidia dainai idia lalohisihisi Keristani mamoe taudia be elda taudia ese edia bero idia “kumia.” Bona Dirava ese idia gorere mamoe “ia hanamoa” hegeregerena, elda taudia ese kara dika dainai idia lalohisihisi taudia idia durua.
Elda Taudia Edia Heduru Dalana
17. Dahaka dainai elda taudia edia heduru ita tahua be namo?
17 Elda taudia be mai moale ida inai sisiba idia badinaia: “Ma haida do umui bogahisihisi henia, to mai emui gari danu.” (Iuda 23) Keristani taudia haida be matabodaga karana dekenai idia moru. To, bema idia helalo-kerehai momokani vadaeni, elda taudia ese do idia hebogahisi henia bona mai lalokau ida idia durudia, edia hetura karana Iehova ida idia hanamoa lou totona. Paulo ese ia sibona bona elda taudia ma haida ia herevalaia neganai, ia gwau: “Ai ese umui emui abidadama ai biagua lasi. Ai diba umui emui abidadama lalonai umui gini goada noho. Unai dainai ai be umui danu ita gaukara hebou, emui moale do ai havaraia totona.” (2 Korinto 1:24) Unai dainai, ita gari lasi, to elda taudia edia heduru ita tahua be namo.
18. Elda taudia ese edena dala ai kerere idia karaia tadikaka bona taihu idia kara henidia be namo?
18 Bema oi be kara dika badana ta oi karaia, dahaka dainai elda taudia oi abidadama henidia diba? Badina idia be Dirava ena mamoe naria taudia bona unai be edia gaukara badana. (1 Petero 5:1-4) Mai ena lalokau mamoe naria tauna be bero ia abia bona ia taitai mamoena do ia botaia lasi. Unai dainai, elda taudia be ia kerere tadikaka ta idia hahemaoro henia neganai, idia panisia lasi to idia ura idia durua ena hetura karana Iehova ida ia hanamoa lou totona. (Iamesi 5:13-20) Namona be elda taudia be mai kara maoromaoro ida mamoe do idia hahemaoro henidia bona idia ‘naridia namonamo.’ (Kara 20:28; Isaia 32:1, 2) Keristani taudia ibounai hegeregeredia, elda taudia be ‘kara maoromaoro do idia karaia, taunimanima ibounai do idia lalokau henia nega ibounai, bona mai manau danu Dirava danu do idia raka hebou.’ (Mika 6:8) Unai kara idia hahedinaraia be gau badana, badina elda taudia ese idia karaia abia hidi be mai anina bada Iehova ena mamoe edia mauri bona hesiai gaukara dekenai.—Salamo 100:3.
19. Elda taudia ese kerere tauna idia hamaoromaoroa neganai, edena kara idia hahedinaraia be namo?
19 Keristani mamoe naria taudia be lauma helaga ese ia abidia hidi dainai, idia ura iena hakaua dalana idia badinaia. “Bema Keristani tauna ta ia kerere”—hedibagani dekenai ia moru—elda taudia ‘ese unai tau do idia hakaua lou, mai manau danu.’ (Galatia 6:1; Kara 20:28) Elda taudia be Dirava ena taravatu idia badinaia goada, to mai hebogahisi ida idia ese unai tadikaka ena lalohadai do idia hamaoromaoroa, hegeregere doketa ta ese ta ena turia ia hamaoromaoroa, unai amo do ia hisihisi lasi bona ia namo lou diba. (Kolose 3:12) Elda taudia be Baibel ena hereva idia badinaia bona idia gurigurilaia murinai hebogahisi idia hahedinaraia, unai dainai edia abia hidi ese Dirava ena lalohadai ia hahedinaraia.—Mataio 18:18.
20. Bema ta be hahemaoro sisibana ia abia, dahaka dainai elda taudia ese kongrigeisen idia hadibaia be maoro?
20 Bema momo be tadikaka ena kerere idia diba, eiava gabeai ena sivarai do idia diba, elda taudia ese hadibaia herevana be kongrigeisen dekenai idia halasia be namo, kongrigeisen ena ladana ia goeva noho totona. Eiava, bema elda taudia idia laloa badina ma ta dainai kongrigeisen idia hadibaia be namo, vadaeni unai bamona do idia karaia. Hahemaoro sisibana ia abia tauna be ia goada ia lao noho lalonai, ia be hegeregere tau ta ena bero be metairametaira ia namo ia lao dainai, nega sisina lalonai ia dekenai taravatu haida do idia atoa. Reana ia helalo-kerehai tauna be hebou dekenai haere do ia henia lasi. Elda taudia ese ma ta idia abia hidi diba unai tauna ia stadi henia totona, do ia durua ia manoka gauna do ia hanaia, unai amo Keristani kara namodia do ia goadalaia bona ‘abidadama dekenai do ia gini goada.’ (Tito 2:2) Elda taudia idia ura lasi kerere tauna idia panisia, to mai lalokau ida idia durua.
21. Elda taudia ese idia kerere taudia haida be edena bamona idia durua diba?
21 Dala idauidau ai elda taudia ese ta idia durua diba ena hetura karana Dirava ida ia hanamoa totona. Hegeregere, reana guna ia kekero momo tadikaka be ruma dekenai sibona ia noho neganai, nega tamona eiava nega rua ia inuinu kekero. Eiava, guna kuku ia rakatania tadikaka be sibona ia noho neganai, ia manoka bona nega tamona eiava rua kuku ia ania. Ena be Dirava dekenai ia guriguri bona ia abia dae Dirava ese ena kerere ia gwauatao vadaeni, to namona be ia ese elda taudia edia heduru ia tahua, unai amo unai kara dika do ia karaia lou lou lasi. Reana, elda tamona eiava rua ese idia durua diba. To, bema hekwakwanai haida danu ia karaia, vadaeni elda taudia ese hakaua naria tauna idia hadibaia be namo.
Dirava Ena Matahakani Abia Dae Noho
22, 23. Dahaka dainai hanaihanai Dirava ena matahakani oi abia dae be namo?
22 Iehova ese ita ia lalonamo henia totona, Keristani taudia ta ta be Iehova ena matahakani idia badinaia be namo. (1 Timoteo 5:20) Unai dainai, sibona emu Baibel stadi oi karaia eiava Iehova ena Witnes taudia edia buka oi duahia eiava edia hebou maragidia bona badadia dekenai sisiba oi kamonai neganai, oi badinaia be namo. Mai emu lalona ibounai ida Iehova ena ura oi karaia. Bena Dirava ena matahakani be kohoro aukana ta bamona oi do ia durua, kara dika do oi koua totona.
23 Dirava ena matahakani oi abia dae karana ese oi do ia durua Dirava ena lalokau lalonai oi noho totona. Momokani, ena be haida be Keristani kongrigeisen amo idia atoa siri vadaeni, to oi dekenai unai do ia vara lasi bema ‘oiemu kudouna oi naria namonamo’ bona ‘aonega taudia bamona oi noho.’ (Aonega Herevadia 4:23; Efeso 5:15) To, bema oi be kongrigeisen amo idia atoa siri tauna ta, namona be dala oi karaia oi idia abia-vareai-lou totona. Dirava ia ura ia dekenai gwauhamata idia karaia taudia ibounai be mai abidadama bona “mai moale danu” Ia do idia tomadiho henia. (Deuteronomi 28:47) Unai oi karaia hanaihanai diba bema nega ibounai Dirava ena matahakani oi abia dae.—Salamo 100:2.
Edena Bamona Do Oi Haere?
• Dahaka dainai haida be Keristani kongrigeisen amo idia atoa siri?
• Helalo-kerehai momokani karana ena toana be edena bamona?
• Dahaka dainai kara dika badadia ita gwauraia hedinarai be namo?
• Keristani elda taudia ese edena dala ai helalo-kerehai taudia idia durua?
[Picture on page 12]
Dahaka dainai Paulo ese Korinto taudia ia hamaoroa kongrigeisen amo tau ta do idia atoa siri?
[Picture on page 15]
Mamoe naria taudia gunadia hegeregerena, Keristani elda taudia ese Dirava ena mamoe edia bero idia “kumia”