Dirava Hanamoa mai Moale ida Taudia Idia Hebou
IEHOVA DIRAVA ese ena taunimanima ia oda henia ia idia tomadiho henia totona idia hebou neganai, “mai moale bada danu” do idia karaia. (Deuteronomi 16:15) Lagani 1995/96 “Dirava Hanamoa mai Moale Ida” Distrik Hebouhebou ese Iehova ena Witness taudia dekenai badina namona ia henia idia moale totona.
Unai hebouhebou ese abidadama idia habadaia. Edena bamona moale lasi tanobadana lalonai moale ita davaria diba idia hahedinaraia. Namona be hebouhebou ena dina ta ta ita laloa.
‘Iehova Do Umui Hanamoa . . . Umui Moale!’
Hebouhebou ena dina ginigunana ena sinado be ataiai bona ia be Salamo 149:1, 2 amo. Hereva ta, “Mai Eda Moale ida Ita Boiboi be mai Badina,” ese Isaia karoa 35 ena peroveta herevana ena anina ia kikilaia. Idaunegai Israela dekenai ia guguru bona hari iseda nega ai Iehova tomadiho henia taudia be lauma dalanai paradaiso lalonai idia noho namo lou bona idia goada, be ena hagugurua dalana ma ta. Unai dainai, idia hebou taudia be Dirava ese ena taunimanima totona ia palani vadaeni gaudia, inai lauma paradaisona bona kahirakahira do ia mai tanobada paradaisona dainai idia moale bada herea.
Hebouhebou ena sinado herevana, “Dirava ese Ita Ia Abia Hidi, Tanobada Hegegemadai Ia Do Ita Hanamoa mai Eda Moale ida Totona,” ese inai henanadai ia haerelaia: Dahaka dainai ita be inai moale lasi tanobadana amo ita idau? Iehova ita tomadiho henia mai eda lalo-tamona ida dainai ita idau. Herevana edeseniai Iehova ena Witness taudia idia noho tanobada ai, to idia hereva bona idia hadibaia mai edia lalo-tamona ida. Idia moale ena badina ma ta be, Iehova ese iena ladana helagana bona ena lohia siahuna, be ena Basileia amo do ia hahelagaia. Edena bamona Iehova ese ita ia durua iena palani lalonai iseda gaukara ita karaia diba totona? Iena Hereva helagana amo ia mai hereva momokanina be ita ia henia. Dirava ese ena lauma helaga be ita ia henia. Tanobada hegegemadai tadikaka oreana bona tomadiho goevana karaia dalana ia henia. Iseda tanobada hegegemadai ruma besena ese ita idia durua mai moale ida Iehova ita tomadiho henia totona.
“Tanobada Bona Ena Kara Mirodia Dekena amo Ita Raka Siri” herevana ese ita ia hagoadaia miro karadia, bese haida abia isi o dagi taudia sibona ura henia karadia, ita dadaraia. (Iamesi 2:5-9) Haida ese edia gabu tamona taudia eiava edia pei hegeregerena idia abia taudia idia bamoa sibona, bona edia ogogami Keristani tadikaka idia laloa lasi. Haida be kongregesen lalonai maduna idia abia taudia sibona idia laloa bada. Idia laloaboio edia hahenamo badana be dagi ta abia lasi, to ta be Iehova ena Witness tauna neganai, unai be hahenamo hereadaena. Unai dainai, namona be inai tanobada ena lalohadai ese ita idia hamiroa lasi bona kongregesen ena maino idia hadikaia lasi.—2 Petero 3:14.
Hereva ta “Lau Hegeregere Do Lau Headava Totona?” ia hahedinaraia haida idia headava haraga. Haida idia headava badina idia ura lasi edia ruma bese taudia danu idia noho o badina edia turadia idia headava. To headava ena badina namodia haida be rua idia ura tiokratik gaukara idauidau idia karaia hebou, lalokau korikorina, hetura namonamo bona noho namo dainai, bona natudia havaraia bona naria totona. Lauma dalanai oi goada guna be headava hegaegaelaia karana badana. Ma gau ta be, Keristani mauri matamatana oi atoa. Aonega karana be oi ura adavaia mero o kekeni be Iehova tura henia karana ia karaia vadaeni bona ma haida ia matauraia, oi tahua guna. Lo Keristani taudia edia sisiba oi tahua be aonega karana ma ta.—Aonega Herevadia 11:14.
Unai hereva namona murinai, hereva ta ena ladana “Natuna Idia Moalelaia Tama Bona Sina” idia kamonai. Natuna ta ia vara neganai, unai be moale bada negana. To, natuna havaraia ese maduna badana ta ia mailaia danu. (Salamo 127:3) Unai dainai, gau badana be natudia idia hadibaia Iehova idia lalokau henia totona. Tama sina ese idia karaia dalana be edia natudia dekenai hanaihanai Iehova idia herevalaia bona Iena Hereva idia gaukaralaia edia famili lalonai.
Hebouhebou ena dina ginigunana ia ore gwauraia neganai ita hoa—buklet matamata ladana Jehovah’s Witnesses and Education idia halasia. Ia hahedinaraia goevagoeva dahaka dainai Witness taudia be “edia natudia idia hagoadaia idia gaukara goadagoada bona edia sikuli gaukara idia laloa bada totona.” Unai buklet ese Iehova ena Witness taudia edia duahiduahi bona toretore sikuli be Nigeria, Mexico, bona gabu ma haida dekenai lagani momo idia karaia edia anina namona ia herevalaia. Unai buklet amo tisa taudia do idia itaia ita be edukeisini laloa bada taudia.
“Nega Ibounai Hahenamo Herevadia Boubouna be Dirava Do Ita Henia”
Dina iharuana ena sinado be Heberu 13:15 (NW) amo. Daba ena program ai hereva toi, edia kwarana be “Iehova Hanamoa Boiboina Ita Haerelaia.” Unai boiboi idia haerelaia taudia edia mauri lagani be herevana. Salamo 148:12, 13 ese ulato, uhau, buruka taudia, bona natuna maragidia danu ia hagoadaia Iehova do idia hanamoa. Iehova hanamoa mai moale ida taudia momo ese unai kara idia habadaia. Tanobada hegegemadai, tadikaka 600,000 mai kahana be ful-taim haroro, eiava painia gaukara idia karaia. Tadikaka bona taihu 15,000 mai kahana be spesel painia gaukara idia karaia, bona 15,000 mai kahana be Betele hesiai gaukara idia karaia.
“Mai Ena Badinaia Karana ida Hesiai Gaukara Ita Karaia Iehova Ena Orea Danu” herevana ia hahedinaraia Dirava ena hesiai taudia be badinaia karana idia hahedinaraia be gau badana. Iehova badinaia karana ena anina be ia dekenai oi tabekau momokani, glu goadana ia noho bamona. Herevana ta ese iseda kara ia itaia eiava lasi, to badinaia karana dainai, ita be mai iseda ura ida Baibel ena taravatu do ita makohia lasi. Watch Tower Society ese ia halasia lauma aniani, hegeregere Gima Kohorona bona Noga! lalonai idia printaia Baibel taravatudia, do ita badinaia momokani. Unai hereva murinai, bapatiso herevana idia henia. Unai taudia be edia gwauhamata Iehova dekenai idia hahedinaraia bapatiso amo neganai unai be moale bada herea gauna!
Hosea 4:1-3 ena hereva amo adorahi herevana ta “Kara Namo o Kara Dika—Edena Oi Tahua?” idia henia. Ena be tanobada taudia edia kara ia dika ia lao noho, to Keristani taudia idia hekwarahi kara namona idia “karaia” momokani totona. (2 Petero 1:5) Kara namo karaia hamatamaia dalana be ta ena lalohadai amo. Bema ta ena laloa dalana ia goeva, iena hereva be do idia goeva, idia namo, ma haida do idia hagoadaia, bona mai kara maoromaoro ida ma haida do ia kara henia. Kara namo tahua karana ena anina ma ta be ia lalohisihisi o ia lalo-metau Keristani tauna ena hemami ia lalo-pararalaia bona mai hebogahisi ida do ia kara henia.—1 Tesalonika 5:14.
Hereva ma ta, “Diabolo Ena Tarapu Dainai Oi Gima,” ese Keristani taudia ia hamaoroa namona be demoni edia koikoi gaudia dainai idia naria namonamo. Keristani taudia be gorere hanamoa daladia, hegeregere hypnotism, meamea siahuna idia gaukaralaia gaudia dainai, idia naria namonamo. To, edena medikal heduruna idia ura idia gaukaralaia, meamea lasi gaudia unai, be ta ta ena maduna.
Unai dina iharuana ia doko neganai, moale ia havaraia gauna idia abia—buka matamata maragina ta. Kudou namo taudia edia diba bona goada do ia habadaia haraga bena idia gwauhamata bona bapatiso do idia abia. Unai rau 192 bukana matamatana ena ladana be Diba ese Mauri Dekenai Ita Ia Hakaua Lao. Unai Diba bukana ese hereva momokani ia hahedinaraia dalana amo, goada do ia henia. Tomadiho hereva koikoidia ia kikilaia bada lasi. Auka lasi herevadia bona hahedinaraia namonamo daladia ia gaukaralaia dainai Baibel stadi karaia totona neganai, taunimanima do ia durua Dirava ena diba do idia abia.
“Umui Moale Bada ela Bona Hanaihanai”
Unai Isaia 65:18 amo idia abia herevadia be hebouhebou ena dina ihatoina ena sinado. Baibel ena peroveta herevadia idia hahedinaraia lagani 1914 ai inai tanobada ena nega dokona ia matamaia. Unai dainai, idia mai taudia ese kahana rua herevana ta, “Dirava Hanamoa mai Moale ida Taudia Hari Inai Nega Dokona Ai,” idia hakala henia namonamo. Hereva idia henia tadikaka idia hahedinaraia taunimanima bilioni haida ese inai tanobada ena mataganigani bona dagedage laumana idia tohotohoa. Gabeai, idia be Satani ia lohiaia tanobadana ena kahana ta dainai, hahemaoro do idia abia. Unai dainai, hari ita abia hidi be namo. Daika ena kahana ai do ita gini. Iehova do ita tomadiho henia bona iena lohia siahuna do ita abia isi, eiava Satani be iseda lohia ai do ita halaoa ia idia hamoalea karadia ita karaia dainai? Namona be ita ibounai be Iehova ena kahana dekenai ita gini goada.
Hebouhebou ena pablik tok, “Noho Hanaihanai King Umui Hanamoa!” ese idia kamonai taudia be lauma aniani namona ia henidia. Ena be taunimanima edia darana idia hegeregere lasi, noho hanaihanai ena anina do idia lalo-pararalaia totona, to Iehova ese ia lalo-pararalaia vaitani. Salamo torea tauna ese ane ia abia, ia gwau: “[Iehova] be do ia King ela bona hanaihanai.” (Salamo 10:16) Unai noho hanaihanai King be iena Natuna, Iesu Keriso, amo taunimanima totona mauri hanaihanai dalana ia kehoa. (Ioane 17:3) Hereva ia henia tauna ia gwau: “Oibe, Dirava ena hahediba amo bona Iesu ena boubou, mauri davalaia boubouna, abidadama henia karana amo, ita goevadae lasi taudia ese mauri hanaihanai do ita abia diba.”
Hebouhebou ia ore gwauraia neganai, idia mai taudia ese hagoadaia herevana dokona idia kamonaia, ena ladana be “Dina Ta Ta Iboudiai Iehova Hanamoa mai Moale Ida.” Tanobada hegegemadai amo idia mai haroro ripoti idia kamonai henia neganai, idia mai taudia ia ha-uraia dina ibounai Iehova idia “hanamoa ela bona hanaihanai.”—Salamo 145:2.
Taunimanima edia kara dika rohoroho ma haida ese tanobada taudia edia moale ia hadikaia. To herevana, Iehova idia abidadama henia taudia ese Dirava ia henia moalena idia abia diba. Iehova ena Witness taudia, tanobada hegegemadai tadikaka oreana lalonai, ese Salamo 35:27, 28 ena hereva idia gwauraia diba: “To lau idia gwauraia maoro. . . taudia, be mani emu kara, mai moale bada danu do idia boiboi, do idia gwauraia lou, gwauraia lou, ‘Lohiabada be namo bada herea momokani, ia ese iena hesiai tauna ia hanamoa noho, mai ena moale bada danu!’ Unai neganai lau ese oiemu kara maoromaoro, be do lau gwauraia hedinarai. Dina ena hora ibounai lau ese oi do lau hanamoa noho.”
[Pictures on page 7]
“Jehovah’s Witnesses and Education” buklet ese famili momo do ia durua
[Pictures on page 8, 9]
Inai buka matamata, “Diba ese Mauri Dekenai Ita Ia Hakaua Lao,” ese hereva momokani ia hahedinaraia dalana amo, goada do ia henia
[Picture on page 9]
Momo be bapatiso amo edia gwauhamata Iehova dekenai idia hamomokania
[Picture on page 9]
Idia hebou taudia ese “Kara Namo Buruka Taudia Ita Matauraia” drama idia moalelaia momokani