Dirava Ena Hereva Badinaia Taudia ese Moale Idia Davaria
“Ita diba inai hebouhebou be Iehova ena heduru dalana ma ta ita ia hegaegaelaia Basileia gaukara ma haida totona.” Unai hereva be vanegai Iehova ena Witnes taudia edia “Dirava Ena Hereva Badinaia Taudia” Distrik Hebouhebou ena matamana kahanai hereva henia tauna ta ese ia gwauraia. Ma ia gwau: “Ita hegaegae vadaeni inai hebouhebou dekenai ruma bese lalonai moale abia dalana be ita dekenai idia hadibaia totona, ita do idia hagoadaia Iehova ena orea kahirakahira ai ita noho totona, ita idia doria Basileia gaukarana ita ura henia noho totona, bona ita idia hadibaia ita gima noho be namo.”
MAY 2000 ena dokona kahana amo, Dirava ena Hereva idia badinaia taudia milioni momo bona edia turadia be tanobada hegegemadai gabu tausen momo lalodiai idia hebou Baibel ena hadibaia hereva namona idia abia totona. Unai dina toi hebouhebouna lalonai dahaka idia dibaia?
Dina Ginigunana—Iehova Ia Karaia Gaudia Laloaboio Lasi
Hereva ginigunana lalonai, seamani ese helai taudia ia noidia namona be hebouhebou dekenai mai lalo-tamona ida Iehova idia tomadiho henia karana amo idia vara hahenamo do idia mamia. Idia helai taudia ibounai ia hagoadaia edia abidadama be do ia bada bona edia hetura karana Iehova ida be do ia goada.
“Moale Diravana” ia diba dahaka ita abia be namo ita moale totona. (1 Timoteo 1:11, NW ) Unai dainai hereva ta, “Dirava Ena Ura Ita Karaia ese Moale Ia Mailaia,” ese ia hahedinaraia Iehova ena Hereva, Baibel, be noho dalana namo hereana ia hahedinaraia. (Ioane 13:17) Lagani momo Iehova ena hesiai gaukara idia karaia taudia haida idia henanadai henia, bona idia hahedinaraia edena bamona noho daladia idauidau lalonai Dirava ena ura ita karaia ese iseda mauri dekenai anina namona ia havaraia. Murina herevana, ladana “Iehova Ena Namo Dainai Umui Diaridiari,” ese ia hahedinaraia Keristani taudia be “Dirava ena kara bamona [idia] karaia” dainai, idia ura edia mauri lalonai “kara namodia” idia karaia. (Efeso 5:1, 9) Idia karaia dalana hereadaena ta be sivarai namona idia harorolaia bona taunimanima be hahediba taudia ai idia halaoa.—Salamo 145:7.
Inai hereva, “Ita Itaia Diba Lasi Diravana be Matana Dekenai Ita Itaia Dainai Ita Gini Goada Noho,” ia hahedinaraia edena bamona abidadama goadana ese ita ia durua ita itaia diba lasi Diravana ita “itaia” totona. Hereva henia tauna ese lauma gaudia idia laloa bada taudia be Dirava ena kara idia diba dalana, ita laloa gaudia Ia diba danu, ia herevalaia. (Aonega Herevadia 5:21) Idia henanadai henia taudia ese abidadama goadana idia abia totona bona edia mauri lalonai lauma gaudia idia atoa guna totona idia karaia gaudia idia gwauraia.
Daba ena program be hebouhebou ena hereva badana, “Iehova Hanamoa—Ia be Gau Namo Hereadia Karaia Tauna,” amo idia hadokoa. Unai ese helai taudia ia durua bena idia abia dae diba, Iehova dekenai iseda diba ia bada noho neganai, badina momo ita davaria ita hanamoa totona, ia be gau namo hereadia Karaia Tauna dainai. Hereva henia tauna ia gwau: “Dirava ese ia havaraia gau namodia ibounai bona hari ita totona ia karaia gau namodia ita laloa neganai, mai kudouna ibounai ida ita laloa bada karana ese ita ia doria ia ita hanamoa totona. Ena taunimanima totona guna ia karaia hoa kara namodia ita laloa dobu neganai, ita ura ia ita hanamoa. Iehova ese gabeai do ia karaia gau namo hereadia ena gwauhamata ita laloa neganai, ita be dala haida ita tahua iseda tanikiu karana hahedinaraia totona.”
Adorahi ena program ia hamatamaia herevana be “Kara Namona Karaia Totona Oi Hesiku Lasi,” bona helai taudia ia hadibaia, inai tanobada dekenai idia vara metau idauidau ese idia hamomokania dokona be ia kahirakahira. (2 Timoteo 3:1) To, ita hesiku lasi karana amo ita hamomokania “ita be abidadama taudia dainai, mauri do ita abia.”—Heberu 10:39.
Ruma bese maurina totona, idia henia Baibel sisibana be dahaka? Hebouhebou ena hereva toi amo, kahana ginigunana—“Dirava Ena Hereva Oi Kamonai”—ia hamatamaia herevana be “Adavana Abia Hidi Karana Dekenai.” Adavana abia hidi karana be mauri lalonai abia hidi karana badana ta. Unai dainai, Keristani taudia idia ura idia naria ela bona idia hegeregere idia headava totona, bona ‘Keristani tauna sibona idia adavaia.’ (1 Korinto 7:39) Unai hereva toi ena kahana iharuana ese ia herevalaia gauna be Iehova ia ura ruma bese iboudiai be lauma dalanai bese goadadia ai idia lao, bona ia ese heduru daladia namodia ia kikilaia. Hereva dokona ese tama sina ia hadibaia, edia natudia dekenai Dirava lalokau henia karana idia hadibaia neganai, gau ginigunana be tama sina ese ia idia lalokau henia guna.
Inai hereva, “Gwauraia Loaloa Sivaraidia Bona Udu Mauri Dainai Oi Naria Namonamo” ena hereva badadia ese hebou taudia ibounai ia durua bena idia lalo-parara ena be hoa gaudia idia vara, to sivarai ta idia kamonai neganai, namona be mai aonega ida idia kara, namo lasi hereva ibounai ita abia dae kava. Keristani taudia be idia diba momokani gauna—Basileia ena sivarai namona—idia herevalaia ena namo be bada. Hereva gabena, “Kopina Dekenai ‘Ginigini ta’ Haheaukalaia,” ese momo edia lalona ia durua bona hagoadaia. Ia durudia dainai idia diba ena be hekwakwanai ita davaria noho, to Iehova ese ena lauma helaga, ena Hereva, bona iseda Keristani tadikaka oreana amo ita ia hagoadaia diba. Hagoadaia herevadia momo be aposetolo Paulo ena mauri lalonai ia davaria gaudia amo idia gwauraia hedinarai.—2 Korinto 12:7-10; Filipi 4:11, 13.
Dina ginigunana ena hereva dokona be “Iehova Ena Orea ida Raka Hebou.” Dirava ena orea ia heau lao noho daladia toi ia herevalaia: (1) Iehova ese ia henia lauma diarina lalo-pararalaia karana ia bada ia lao, (2) ita dekenai Dirava ia henia hesiai gaukarana, bona (3) nega korikori ai orea ena heau daladia idia haidaua. Bena hereva henia tauna ia gwau: “Vairai do idia vara gau namodia dainai ita moale.” Bena ia gwau: “Ita daradara diba lasi ita dekenai badina momo herea idia noho guna ita abia abidadama ita dogoatao auka ela bona dokona, ani?” (Heberu 3:14) Unai ita daradaralaia lasi. Unai murinai, buklet matamatana ta idia halasia, ena ladana be Dirava Ena Turana ai Oi Lao Diba! Ia be hadibaia gauna namona dainai, ia ese sikuli namona idia abia lasi taudia eiava duahiduahi idia diba namonamo lasi taudia do ia durua Iehova idia diba totona.
Dina Iharuana —Dirava Ena Hoa Karadia Gwauraia Noho
Hebouhebou ena dina iharuana ai, dina sirina idia herevalaia murinai hereva ta mai ena kahana toi, ladana “Dirava Ena Hereva Harorolaia Taudia,” idia henia. Kahana ginigunana ese hari iseda tanobada ibounai haroro gaukarana ese ia havaraia anina namona ia herevalaia. To, Basileia ena sivarai idia dadaraia taudia be momo bona unai gaukara dekenai iseda haheauka idia tohoa. Nega daudau pablisa gaukara idia karaia taudia ese haroro gaukara dekenai idia moale noho totona edia lalona bona kudouna idia hagoadaia dainai taunimanima edia ura lasi eiava dagedage karadia idia hanaia daladia idia herevalaia. Kahana iharuana ese hebouhebou idia mai taudia ia hadibaia, Iehova ena Witnes taudia be idia gaukara goada taunimanima ibounai, gabu ibounai dekenai, ruma ta ruma ta ai bona nega bona gabu idauidau dekenai, idia davaria totona. Bona kahana ihatoina ia hahedinaraia Keristani taudia iboudiai ese gau momo idia karaia diba sibona edia haroro gaukara idia habadaia totona. Hereva henia tauna ia gwau unai ita karaia totona namona be Dirava ena Basileia be gau ginigunana ai ita halaoa, herevana unai ena anina be do ita hekwarahi bona iseda ura ita dadaraia.—Mataio 6:19-21.
Ita noholaia tanobadana be kohu momo ura henia karana amo ia honu dainai, inai hereva “Dirava Badinaia Bona Tauanina Dalanai Ita Laloa Ita Hegeregere Karana Ita Goadalaia” be nega korikori ai idia gwauraia. Hereva henia tauna ena hereva haida be Timoteo Ginigunana 6:6-10, 18, 19 amo ia abia, ia hahedinaraia edena bamona Dirava badinaia karana ese Keristani taudia ia durudia moni ura henia karana idia dadaraia totona, unai moni ura henia karana ese idia ia hakaua kerere bona hisihisi momo idia davaria diba. Ia gwau herevana iseda noho, moni dalanai be edena bamona, moale ita davaria totona iseda hetura karana Iehova ida bona iseda lauma goadana be mai anina bada. Momo be hereva ladana, “Dirava Dekenai Hemarai Havaraia Lasi,” ena hereva badadia ese edia lalona ia hamarerea bada. Iehova ese iena abidadama Witnes taudia ia laloaboio diba lasi dalana ia gwauraia. Iesu Keriso—‘varani bona hari ia idau lasi bona do ia idau lasi ela bona hanaihanai’—ena haheitalai be idau momokani, bona unai ese momo ia durua mai edia haheauka danu idia heau goada totona.—Heberu 13:8.
Daba kahana ena hereva orena be bapatiso herevana—Iehova ena Witnes taudia edia hebou badadia dekenai ia be mai anina bada gauna ta. Idia gwauhamata matamata taudia be Iesu ena aena gabuna idia badinaia bona ranu lalonai idia bapatiso be moale gauna! (Mataio 3:13-17) Unai bamona idia karaia taudia ibounai be Dirava ena hereva idia badinaia dainai, kara momo idia karaia vadaeni. Danu, bapatiso idia abia neganai, idia be sivarai namona harorolaia taudia ai idia lao, bona Iehova ena ladana idia hahelagaia karana idia dibaia dainai, moale bada idia abia.—Aonega Herevadia 27:11.
Hereva ladana “Lo Tauna ai Ita Lao be mai Anina ‘Maoro Bona Kerere Edia Toana Ita Diba’ Totona” amo mai anina bada sisibana idia henia. Tanobada ena dala ai maoro bona kerere gwauraia be hegeregere lasi. Unai dainai, Iehova ena taravatu dekenai ita tabekau be gau badana. (Roma 12:2) Ibounai ia hagoadaia namona be idia gaukara goada lalo-parara maorona Dirava ena dala dekenai idia abia totona bona lo taudia ai idia lao totona. Bena, iseda lalona ita hadibaia loulou neganai, iseda lalona ese “maoro bona kerere edia idau” do ia diba.—Heberu 5:11-14.
Unai murinai be mai ena kahana toi herevana ladana, “Ita Gaukara Goada Lauma Dalanai Ita Goada Totona.” Keristani taudia momokanidia idia diba lauma dalanai idia tubu bona idia goada noho be mai anina bada. Unai ena anina be idia gaukara goada—duahiduahi, stadi, bona laloa dobu karana. (Mataio 7:13, 14; Luka 13:24) Danu, lauma gaudia idia laloa bada taudia be idia “guriguri bona noinoi” loulou. (Efeso 6:18) Ita diba iseda guriguri ese iseda abidadama ena dobu ia hahedinaraia bona tomadiho karana ena goada, lauma dalanai ita goada ena toana, bona ita dekenai “mai anina bada gaudia” be dahaka ia hahedinaraia. (Filipi 1:10, NW ) Gau badana be Iehova ida hetura karana namona mai lalokauna ita abia, kamonai natuna ese iena kara namo tamana ida ia moalelaia hetura karana bamona be idia gwauraia hedinarai danu. Ita be mai eda tomadiho—ena be ia be tomadiho momokanina—sibona be hegeregere lasi, to ita ura gau badana be iseda abidadama Dirava dekenai ita hagoadaia, ia ita “itaia bamona.”—Heberu 11:6, 27.
Lauma dalanai ita goada ita lao noho karana be hereva ladana “Oi Hahedinaraia Oiemu Goada Ia Bada Ia Lao” ai idia herevalaia badabada. Unai bamona ita goada ita lao noho daladia toi idia kikilaia: (1) iseda diba, lalo-parara, bona aonega ita habadaia, (2) Dirava ena lauma ena huahua ita havaraia, (3) iseda maduna ruma bese lalonai ita hagugurua.
Dina ena hereva ginigabena ladana “Dirava Ena Hereva Ena Diari Ia Bada Ia Lao” murinai, hebou idia lao taudia be mai moale ida buka matamata ladana Isaiah’s Prophecy—Light for All Mankind I idia abia. Baibel ena buka Isaia ena karoa ta ta ia herevalaia bukadia rua amo inai be ginigunana. Hereva henia tauna ia gwau: “Isaia bukana be mai ena anina ita totona hari.” Ma ia gwau: “Oibe, ena peroveta herevadia momo be Isaia ena nega lalonai idia guguru. . . . To, Isaia ena peroveta herevadia momo be hari inai negai idia guguru noho, bona ma haida be Dirava ese ia gwauhamatalaia tanobada matamatana lalonai do idia guguru.”
Dina Ihatoina—Iehova Ena Hereva Badinaia Noho
Hebouhebou ena dina dokona be dina ena siri herevalaia karana amo ia kehoa. Bena murinai mai ena kahana toi herevana idia henia, ladana be “Sepanaia Ena Anina Bada Peroveta Herevana Dirava Ena Ura Idia Karaia Taudia Dekenai.” Unai hereva toi ese idia hahedinaraia gwau-edeede Iuda besena ena nega ai ia karaia hegeregerena, Iehova ese hari iena sisiba idia dadaraia taudia do ia hahisia. Dirava dekenai idia kara dika dainai, matakepulu taudia bamona do idia raka, bona hamauria dalana idia davaria diba lasi. To, Keristani taudia momokanidia be mai abidadama ida Iehova idia tahua noho, bona idia be Dirava ena badu dinana ai do ia hunidia. Unai sibona lasi, to hari idia ese hahenamo momo idia moalelaia. Idia ese hahenamo bada idia abia, Baibel ena hereva momokani ena “gado goevadaena” ai idia hereva. (Sepanaia 3:9, NW ) Hereva henia tauna ia gwau: “Unai dainai gado goevadaena herevalaia ena anina be hereva momokani ita abia dae bona ma haida dekenai ita hadibaia sibona lasi, to namona be iseda kara be Dirava ena taravatu bona hakaua herevadia hegeregerena.”
Hebou idia lao taudia ese mai edia ura bada ida idia naria drama ena ladana be “Haida Edia Kerere Sivaraidia ese Hari Inai Negai Ita Idia Durua.” Unai drama ese ia hahedinaraia Israela taudia momo ese edia mauri be Gwauhamata Tanona hetoana dekenai idia haboioa badina Iehova idia laloaboio bona Dirava koikoi tomadiho henia hahinedia ese edia lalona idia veria idia sihari kava bona tomadiho koikoi idia badinaia. Drama lalonai ia hedinarai momo tauna ta—Iamina—ia daradara, Moaba taudia edia lalona veria karadia do ia badinaia eiava Iehova do ia badinaia. Dirava ia badinaia lasi tauna Simiri ena lalohadai koikoi bona kereredia idia hedinarai, bona Pineha ena abidadama bona Dirava ia badinaia karana ia hedinarai danu. Iehova idia lalokau henia lasi taudia bamoa karana ena dika ia hahedinaraia goevagoeva.
Unai drama ese helai taudia edia lalona ia hegaegaelaia hereva gabena ladana “Kamonai Kava Taudia ai Ita Lao Lasi” totona. Korinto Ginigunana 10:1-10 idia herevalaia neganai, ia hahedinaraia Iehova ese iseda kamonai karana ia tohoa, ita be hegeregere tanobada matamatana dekenai ahuna ita abia eiava lasi. Hari inai negai danu, ena be kahirakahira tanobada matamatana ai do ita vareai, to haida be tauanina ena ura ese lauma dalanai edia tahua gaudia ia koua. Ibounai ia hagoadaia ‘Iehova ena laga-ani dekenai idia vareai’ dalana idia koua lasi be namo.—Heberu 4:1.
Pablik tok ena sinado be “Dahaka Dainai Dirava Ena Hoa Karadia Oi Laloa Bada.” Iehova ena “hoa karadia” ese iena aonega bona ia karaia gaudia ibounai dekenai iena siahu ia hahedinaraia. (Iobu 37:14) Iehova ese lalona tahua henanadaidia haida ia henia bona unai be hegeregere Iobu dekenai siahu ibounai Diravana ena siahu ia hahedinaraia totona. Danu Iehova be ena abidadama hesiai taudia dainai, vaira negana ai “hoa karadia” do ia karaia. Hereva henia tauna be ena hereva dokona ai ia gwau: “Badina namodia momo dainai Dirava ena hoa karadia—guna ia karaia gaudia, ia havaraia gaudia amo hari inai negai ia karaia gaudia, bona kahirakahira vaira neganai ia gwauhamata do ia karaia gaudia—ita lalodia namonamo be gau badana.”
Unai pura ena Gima Kohorona stadi idia karaia murinai, hebouhebou ena hereva gabena idia henia. Inai lalona veria herevana ladana “Dirava Ena Hereva Badinaia Tauna Emu Hahenamo Oi Laloa Bada” ia hahedinaraia, Dirava ena hereva badinaia taudia ai ita lao be hahenamo ta. (Iamesi 1:22) Helai taudia ia hadibaia iseda hahenamo, ita be Dirava ena hereva badinaia taudia, be idau momokani, bona bema lagani momo lalonai ita gaukaralaia, do ita laloa bada momokani. Hebou dekenai idia mai taudia ibounai idia hagoadaia, inai distrik hebouhebou ese edia lalona ia veria dainai, namona be edia ura be nega ibounai idia be Dirava ena hereva badinaia taudia momokani. Unai be moale bada do ia mailaia dalana tamona sibona.
[Box/Picture on page 25]
Dirava Ena Turana Ai Oi Lao Diba!
Friday adorahi ai, buklet matamatana ta idia halasia, ladana be Dirava Ena Turana Ai Oi Lao Diba! Tanobada ena kahana momo dekenai, Baibel hadibaia dalana haragana idia abia be namo, bona unai buklet ese unai heduru do ia henia. Unai buklet ese edukeisen sisina sibona idia abia taudia eiava duahiduahi namonamo lasi taudia dekenai hahenamo badana do ia havaraia.
[Box/Pictures on page 26]
Isaiah’s Prophecy—Light for All Mankind
Hebouhebou lao henia taudia be mai edia moale bada ida Isaiah’s Prophecy—Light for All Mankind bukana, volium rua gauna, ena Volume I idia abia. Unai buka lalonai, ia hahedinaraia Isaia ena peroveta herevadia be mai anina bada hari iseda nega totona.