Dirava ese Oi Ia Laloa

MARY be Keristani hahinena ta. Ena mauri laganidia be kahirakahira 50, bona ena mauri laganidia momo lalodiai hisihisi ia ania. Ena adavana ia heudahanai dainai, lagani 10 bamona gunanai ia negea. Unai nega amo, Mary ese ena natuna hani ia naridia mai ena hekwarahi ida. Ia do headava lou lasi, bona nega haida unai dainai ena daradoko ia haheaukalaia be auka. Mary ia laloa, ‘Unai ena anina be Dirava ese lau bona egu natuna, tamana lasi taudia, ia laloa lasi a?’

Ena be oi ese unai bamona hisihisina ta oi davaria eiava lasi, to Mary oi hebogahisi henia diba. Ita ibounai ese hetoho aukadia ita haheaukalaia vadaeni, bona reana ita laloa edena negai bona edena dala amo Iehova do ia kara, ita do ia durua totona. Unai hetoho haida be Dirava ena taravatu ita badinadia dainai ita davaria. (Mataio 10:16-​18; Kara 5:​29) Ma haida be ita goevadae lasi bona Satani ese ia lohiaia tanobadana ai ita noho dainai ita davaria. (1 Ioane 5:​19) Aposetolo Paulo ia gwau: “Dirava ese ia karadia gaudia ibounai be idia hisihisi noho . . . , idia tai noho.”​—Roma 8:​22.

To, ena be hetoho aukana oi davaria, to unai ena anina be inai lasi: Iehova ese oi ia rakatania eiava oiemu namo ia laloa lasi. Unai be edena bamona oi hamomokania diba? Dahaka ese ia hahedinaraia Dirava ese oi ia laloa?

Idaunegai Haheitalaina

Baibel ese ia hahedinaraia goevagoeva Iehova ese taunimanima ta ta ena namo ena namo ia laloa. Davida sivaraina mani oi laloa. Ia be mamoe naria tauna, bona ia be tau matamatana neganai Iehova ese “ia ura henia.” (1 Samuela 13:⁠14) Gabeai, Davida ia pavapava neganai, Iehova ese ia gwauhamata henia, ia gwau: “Oi dekenai lau noho, oiemu loaloa gabudia ibounai.”​—2 Samuela 7:9.

Unai ena anina be Davida ena mauri lalonai hekwakwanai ia davaria lasi, a? Lasi. Davida be pavapava ai ia do lao lasi neganai bona ena pavapava negana lalonai, hetoho aukadia ia davaria. Pavapava ai ia do lao lasi neganai, lagani momo lalodiai King Saulo ese ia gavaia loulou, do ia hamasea totona. Unai nega lalonai Davida ia gwau: “Dagedage taudia ese lau idia hagegea noho. Idia be taunimanima idia ania noho, laiona bamona. Edia isena be io bona diba bamona.”​—⁠Salamo 57:4.

To, unai nega dikana ibounai lalonai, Davida ia diba momokani Iehova ese ia laloa. Iehova ia guriguri henia, ia gwau: “Lohiabada e, egu laloa hekwarahi oi diba.” Oibe, Davida ia laloa Iehova ese ena lalo-hekwarahi ibounai ia diba. Bena Davida ia gwau: “Egu matana ena ranu be oiemu kavabu dekenai do oi udaia. Oiemu buka lalonai idia torea vadaeni, ani?”a (Salamo 56:⁠8) Unai hereva hegeregerena amo, Davida ese ia hahedinaraia ia diba goevagoeva Iehova ese ena noho ia diba bona unai noho ese ia havaraia lalo-hekwarahina danu.

Davida dekenai idia vara gaudia dainai, ena mauri laganidia edia dokona kahanai inai bamona ia hereva diba: “Tau namona ena raka dalana, be Lohiabada ese ia hakaua noho, bona unai tau ena kara ia ura henia dainai, Lohiabada ese do ia naria noho. Unai tau be do ia moru, to do ia diho momokani lasi, badina be Lohiabada ese, iena imana dekena amo do ia haginia lou.” (Salamo 37:23, 24) Oi danu be inai oi abia dae diba: Ena be hedibagani oi davaridia loulou bona idia doko lasi, to Iehova ese unai ia itaia bona emu haheauka ia laloa bada. Paulo ia gwau: “Dirava ena kara be gagevagageva lasi, ia be maoromaoro momokani. Unai dainai ia ese emui kara namodia do ia laloaboio lasi. Umui ese Dirava umui lalokau henia. Inai lalokau ese laloa namodia umui dekenai ia havaraia, vadaeni umui ese Dirava ena taudia umui durua vadaeni, bona do umui durua noho danu.”​—Heberu 6:​10.

Inai danu, Iehova be oi dainai ia kara diba; ia ese goada be oi ia henia diba, oi vairanai ia noho hekwakwanaina do oi haheaukalaia totona. Davida ia gwau: “Kara maoromaoro tauna ena hisihisi be momo, to Lohiabada ese unai tau do ia durua, vadaeni unai hisihisi do [idia] ore.” (Salamo 34:⁠19) Momokani, Baibel ia gwau Iehova ena “matana ese tanobada ena kahana ibounai idia itaia noho, ia ese ia dekenai idia badinaia momokani taudia do ia hagoadaia totona.”​—⁠2 Sivarai 16:9.

Iehova ese Oi Ia Veria Mai

Iesu ena hereva danu ese idia hahedinaraia Iehova ese taunimanima ia lalodia. Iesu ia gwau: “Lauegu Tamana, lau ia siaia Diravana, ese do ia veria mai tauna sibona lau dekenai do ia mai diba.” (Ioane 6:​44) Oibe, Iehova ese taunimanima ta ta ia durua, Keriso ena boubou ena hahenamo do idia abidia totona. Edena dala amo? Dala badana be Basileia harorolaia gaukarana amo. Momokani, unai gaukara amo ‘Sivarai Namona be tanobada ibounai dekenai idia harorolaia,’ to unai bamona idia karaia neganai taunimanima ta ta ibounai idia kamonaia diba. Oi ese sivarai namona oi kamonaia bona oi abia dae diba ese ia hahedinaraia Iehova ese oi ia laloa.​—⁠Mataio 24:14.

Iehova ese ena lauma helaga amo taunimanima ta ta be iena Natuna bona mauri hanaihanai helarona dekenai ia veria mai. Unai ese taunimanima ta ta ia durua lauma herevadia momokanidia idia lalo-pararalaia bona idia badinaia, herevana edia aonega be bada lasi bona idia goevadae lasi. Momokani, bema Dirava ena lauma ena heduru idia abia lasi, Dirava ena ura idia lalo-pararalaia diba lasi. (1 Korinto 2:​11, 12) Paulo ese Tesalonika taudia ia tore henidia, ia gwau: “Taunimanima haida sibona be mai edia abidadama.” (2 Tesalonika 3:⁠2) Iehova ese ena lauma be idia hahedinaraia idia ura do ia veria taudia sibodia mo ia henidia.

Iehova ese taunimanima ia veridia, badina be idia ta ta ia lalokau henidia bona ia ura mauri do idia abia. Unai ese ia hahedinaraia goevagoeva Iehova ese ita ta ta ia laloa! Iesu ia gwau: “Emui Tamana guba dekenai ia noho, be ia ura lasi inai bamona maragina ta do ia mase.” (Mataio 18:⁠14) Oibe, taunimanima ta ta ibounai be mai anina Dirava matana ai. Unai dainai Paulo ia gwau: “Dirava ese taunimanima ta ta ibounai dekenai, edia kara hegeregerena edia davana do ia henia.” (Roma 2:⁠6) Bona aposetolo Petero ia gwau: “Dirava ese taunimanima edia toana ia laloa lasi. To bese ibounai lalonai, Dirava dekenai idia gari, bona kara maoromaoro idia karaia taudia, be Dirava ese do ia abia dae.”​—⁠Kara 10:​34, 35.

Iesu Ena Hoa Karadia

Dirava ena Natuna, Iesu, ese hoa karadia ia karaia, bona idia amo Dirava ese ia hahedinaraia taunimanima ia lalodia. Iesu ese taunimanima ia hamauridia neganai hebogahisi bada ia hahedinaraia. (Mareko 1:​40, 41) Iesu be “sibona kara ta ia karaia diba lasi, to ia ese iena Tamana ena kara ia itaia noho, vadaeni unai kara sibona ia karaia,” unai dainai iena hebogahisi ese ia hahedinaraia Iehova ese ena hesiai taudia ta ta iboudiai ia laloa.​—⁠Ioane 5:​19.

Iesu ena hoa karana ta, Mareko 7:​31-37 ese ia gwauraia karana, mani oi laloa. Iesu ese taia kudima bona hereva diba lasi tauna ta ia hamauria. Baibel ia gwau: “Iesu ese ia hakaua siri idau gabu dekenai,” bena “iena matana ia negea gubai, ia noinoi, gabeai ia gwau, ‘Epata,’ hereva anina be, ‘Oi kehoa.’ ”

Badina be dahaka Iesu ese unai tau be hutuma lalona amo ia hakaua siri? Reana badina be taia kudima bona hereva diba lasi tauna be taunimanima vairadiai do ia hemarai dainai. Reana Iesu ia itaia unai tau ia hemarai, unai dainai ia laloa hehuni gabuna ai do ia hamauria be namo. Baibel tahua namonamo tauna ta ia gwau: “Unai sivarai ibounai ese ia hahedinaraia goevagoeva Iesu ese unai tau ena gorere sibona ia laloa lasi; lasi, to unai tau danu ia laloa. Unai tau ena hekwakwanai be idau bona heduru idauna ia abia be namo, unai dainai Iesu ese ia kara henia mai ena hebogahisi bada ida, unai amo ia hahemaraia lasi bona tau ese ena kara ia lalo-pararalaia diba.”

Unai sivarai ese ia hahedinaraia Iesu ese taunimanima ia lalodia. Oi abia dae diba ia ese oi danu ia laloa. Momokani, iena mauri ia bouboulaia karana ese ia hahedinaraia Dirava ia hoia lou diba taudia iboudiai ia lalokau henidia. To, Paulo ia laloa bamona oi danu oi laloa diba; ia gwau: “Dirava ena Natuna . . . ese lau ia lalokau henia, bona lau dainai iena mauri ia atoa diho.” (Galatia 2:​20) Bona ita abia dae diba Iehova ese ita iena hesiai taudia ta ta ia laloa, Iesu ese ita ia laloa bamona, badina be ia gwau: “Lau ia itaia tauna ese egu Tamana danu ia itaia.”​—⁠Ioane 14:9.

Iehova be Davana Namona Henia Tauna ai Ia Lao

Dirava ita diba anina be iena kara, Baibel ese ia gwauraia karadia, ta ta iboudiai ita diba. Iena ladana, Iehova, anina be “Ia ese Ia Halaoa.” Unai ese ia hahedinaraia, dahaka ai ia lao gwauraia be ia lao diba, iena ura karaia totona. Matamana amo ema bona hari, ia ese dagi idauidau ia abia sibona ena; unai dagi haida edia ladadia be inai: gau iboudiai karaia Diravana, Tamana, Atai Herea Lohiabadana, Mamoe Naria Tauna, tuari oreadia edia Iehova, guriguri kamonaia Diravana, Kota Biaguna, Hadibaia Tauna Badana, bona Hoia Lou Tauna.b

Dirava ena ladana ena anina ibounai ita lalo-pararalaia totona, namona be iena dagi ta, davana namona henia Tauna ena dagi, ita diba. Paulo ia gwau: “Tau ta bema Dirava ia abidadama henia lasi neganai, ia hegeregere lasi Dirava ena ura do ia badinaia. Badina be bema tau ta be Dirava kahirakahira ia ura lao neganai, ia ese Dirava do ia abidadama henia guna, Dirava be ia mauri noho. Bona unai tau ena abidadama be inai bamona: Dirava idia tahua taudia ibounai, be davana namona Dirava ese do ia henidia.”​—⁠Heberu 11:6.

Iehova ia gwauhamata vadaeni, hari inai negai iena hesiai idia lao henia mai edia lalona ibounai ida taudia be tanobada paradaisona lalonai mauri hanaihanai do ia henidia. Unai gwauhamata hereadaena ena anina do ia vara negana ita naria mai eda ura bada ida be siboda ena namo tahua karana lasi, bona iseda lalona edia matana amo siboda ita itaia unuseniai ita noho be hekokoroku karana lasi. Mose ese “Dirava do ia henia davana namona ia laloa.” (Heberu 11:⁠26) Unai hegeregerena Dirava ena gwauhamata horoa Keristani taudia mai edia kamonai totona ena anina do ia vara negana be Paulo ese ia naria mai ena ura bada ida. Ia gwau: “Heau helulu ena dokona gabuna dekenai maoromaoro lau heau henia, kwalimu ahuna do lau abia totona. Inai kwalimu ahuna be guba dekenai mauri matamata, Dirava ese lau ia boiria totona gauna, Keriso Iesu dainai.”​—⁠Filipi 3:14.

Iehova ese ia gwauhamatalaia davana namona, idia haheauka taudia do ia henidia davana, be oi danu oi naria diba mai emu ura bada ida. Dirava oi diba bona ena hesiai oi lao henia mai emu haheauka ida dainai, unai davana namona oi naria diba. Unai dainai, Iehova ese oi totona ia hegaegaelaia vadaeni hahenamodia be dina ta ta iboudiai oi lalodia dobu. Mary, inai hereva matamanai ai gwauraia hahinena, ia hekwarahi unai bamona do ia karaia totona. Ia gwau: “Vanegai sibona be lauegu nega ginigunana lau abia dae, Iesu ena boubou, mauri davalaia boubouna, be mai anina lau dekenai. Hari lauegu mamina be Iehova ese lau ia laloa. Lagani 20 bamona lalodiai lau be Keristani hahinena vadaeni, to vanegai sibona unai lau abia dae.”

Baibel stadilaia bona mai lalona ibounai ida laloa dobu karana amo, Mary, bona taunimanima ma milioni momo be hari idia diba Iehova ese iena orea taudia edia orea sibona lasi to idia ta ta iboudiai danu ia laloa. Aposetolo Petero ese unai ia abia dae vaitani, unai dainai ia gwau: “Ia ese umui ia naria noho. Unai dainai emui laloa hekwarahi gaudia ibounai be iena imana dekenai do umui atoa.” (1 Petero 5:⁠7) Oibe, Dirava ese oi ia laloa!

[Footnotes]

[Box on page 6]

Toreisi Lou ese Ia Hamomokania Dirava ese Taunimanima Ia Lalodia

BAIBEL ena hereva Ioane 5:​28, 29 ai ese ia hamomokania Dirava ese taunimanima ta ta ia laloa; ia gwau: “Nega ta do ia mai, mase guria gabu dekenai idia noho taudia ibounai ese [Iesu ena] gadona do idia kamonai. Vadaeni guria gabu dekena amo do idia toreisi.”

Unai siri be Greek gado ai idia torea neganai, mne·meiʹon (mase tauna laloatao garana) idia torea, taʹphos (gara) idia torea lasi. Inai hereva taʹphos ena anina be mase tauna guria gabuna mo. To mne·meiʹon amo idia hahedinaraia mase tauna sivaraina idia laloatao.

Unai hegeregerena, mani inai oi laloa: Iehova Dirava ese mase tauna ta do ia hamauria lou diba totona, namona be ena kara bona ena lalohadai gunadia iboudiai ia diba. Unai dala tamona amo ia hegeregere mase tauna ia hamauria lou bona ena toana bona kara gunadia iboudiai ia henia lou.

Momokani, taunimanima ta be unai bamona ia karaia diba lasi, to “Dirava ese gau ibounai ia karaia diba.” (Mareko 10:⁠27) Ia ese taunimanima ta ena lalona ena anina ia davaria diba. Ena be tau ta be lagani handred momo lalonai ia mase vadaeni, to Dirava ese ia laloatao goevagoeva diba; ia laloaboio sisina lasi. (Iobu 14:​13-​15) Unai hegeregerena, Aberahamo, Isako, bona Iakobo idia mase bena lagani handred momo murinai, Iesu ese Iehova ia gwauraia, ia gwau: “Ia be mase taudia edia Dirava lasi, to mauri taudia edia, badina iena matana ai idia be idia mauri noho.”​—⁠Luka 20:​38, NW.

Unai hegeregerena, idia mase vadaeni taudia bilioni bilioni be Iehova Dirava ese ia laloatao goevagoeva. Unai ese ia hamomokania goevagoeva Dirava ese taunimanima ta ta iboudiai ia laloa!

[Picture on page 7]

Iesu ese ia hamauria taudia ta ta ena namo ena namo ia laloa