Iehova be Davana Namona Do Ia Henia Ia Idia Tahua Taudia Dekenai

“Tau ta be Dirava kahirakahira ia ura lao neganai, ia ese Dirava do ia abidadama henia guna, Dirava be ia mauri noho. Bona unai tau ena abidadama be inai bamona: Dirava idia tahua taudia ibounai, be davana namona Dirava ese do ia henidia.”​​—⁠HEBERU 11:⁠6.

1, 2. Dahaka dainai Iehova ena hesiai taudia haida be lalohadai kereredia idia abia?

BARBRAa ia gwau: “Lagani 30 lalonai lau be Iehova ena Witnes hahinena ta, to lau laloa lau be hegeregere lasi unai bamona idia gwauraia totona. Ena be lau be painia gaukara lau karaia bona hahenamo momo lau abia, to egu kudouna ai lau abia dae lasi lau be Witnes hahinena ta.” Keith danu be unai bamona ia laloa, ia gwau: “Nega haida lau laloa lau hegeregere lasi, badina Iehova ena hesiai taudia idia moale ena badina be momo, to lau be lau moale lasi. Unai dainai lau lalohisihisi, bona unai ese egu hekwakwanai ia habadaia sibona.”

² Iehova ena abidadama hesiai taudia momo, idaunegai bona hari, be unai bamona hemami idia abia. Nega haida unai bamona hemami oi abia danu, a? Reana hekwakwanai momo oi davaria, to emu abidadama tamona taudia be idia moale bona idia noho namo. Unai dainai, reana oi mamia Iehova be oi ia lalonamo henia lasi eiava oi ia laloa lasi. Unai bamona lalohadai oi abia haraga lasi. Baibel ia gwau: “[Iehova] ese hisihisi ia abia noho tauna, dekena amo ia raka siri lasi, to ia laloa noho, bona ia dekenai ia taitai neganai, durua ia henia noho.” (Salamo 22:24) Unai Mesia ena peroveta herevadia ese idia hahedinaraia, Iehova be ena kamonai hesiai taudia edia guriguri ia kamonai sibona lasi, to davana namona ia henia danu.

3. Dahaka dainai ita be inai nega ena hekwakwanai ita davaria diba?

³ Taunimanima ibounai​​—⁠Iehova ena taunimanima danu​​—⁠be inai nega ena hekwakwanai idia davaria diba. Ita be Iehova ia inai henia tauna badana, Satani Diabolo ese ia gunalaia tanobadana ai ita noho. (2 Korinto 4:4; 1 Ioane 5:19) Iehova ese ena hesiai taudia be hoa dalanai ia gimaia lasi, idia be Satani ese ia hahisidia bada taudia. (Iobu 1:​7-12; Apokalupo 2:10) Unai dainai, ela bona Dirava ena abia hidi negana ia ginidae, namona be nega dikadia ai ‘ita gini goada’ bona ‘guriguri ita goadalaia,’ bona ita diba Iehova ese ita do ia naria. (Roma 12:12) Namo lasi ita laloa iseda Dirava, Iehova ese ita ia lalokau henia lasi!

Idaunegai Haheauka Idia Hahedinaraia Taudia

4. Lalohisihisi idia davaria Iehova ena kamonai hesiai taudia haida edia haheitalai haida oi gwauraia.

⁴ Idaunegai, Iehova ena hesiai taudia momo be lalohisihisi gaudia idia haheaukalaia. Hegeregere, Hana be “ena lalona ia hisihisi bada” badina ia be natuna lasi​​—⁠ia laloa unai ese ia hahedinaraia Dirava ese ia ia laloaboio. (1 Samuela 1:​9-11) Elia be ala-ala hahinena kwini Iesebele ese ia lulua neganai, ia gari bona Iehova ia guriguri henia: “Mani egu mauri do oi hadokoa, lau mase be namo!” (1 King Taudia 19:⁠4) Bona aposetolo Paulo ese goevadae lasi ena dika ia mamia, ia gwau: “Lau ura be kara namona lau karaia, to kara dika sibona lau karaia diba.” Ma ia gwau: “Lau be dika momokani inai!”​​—⁠Roma 7:​21-24.

5. (a) Edena dala ai Hana, Elia, bona Paulo be davana namona idia abia? (b) Dirava ena Hereva amo dahaka hagoadaia hereva ita abia diba bema lalohadai kereredia ita abia?

⁵ Oibe, ita diba Hana, Elia, bona Paulo be Iehova ena hesiai gaukara lalonai idia haheauka, bona idia dekenai davana namona ia henia. (1 Samuela 1:20; 2:21; 1 King Taudia 19:​5-18; 2 Timoteo 4:⁠8) To, idia be taunimanima ese idia davaria hemami ibounai idia mamia, hegeregere idia lalohisihisi, lalomanoka bona idia gari. Unai dainai, bema nega haida ita lalohisihisi, unai dekenai ita hoa lasi be namo. To, mauri ena lalometau idauidau dainai oi daradara Iehova ese oi ia lalokau henia eiava lasi neganai, dahaka oi karaia diba? Dirava ena Hereva amo heduru oi abia diba. Hegeregere, stadi hereva ginigunana dekenai ita be Iesu ena hereva, Iehova ese “kwarana huina ibounai” ia duahia vadaeni, ita herevalaia. (Mataio 10:30) Unai hagoadaia herevana ese ia hahedinaraia Iehova be ena hesiai taudia ta ta ia laloa bada. Iesu ese ia gwauraia bisini ena haheitalai danu mani oi laloa lou. Bema unai manu maragina ta be tano dekenai ia moru be Iehova ese ia itaia, anina be oiemu hekwakwanai ia diba danu, ani?

6. Edena dala ai Baibel ese lalohadai kereredia idia abia taudia ia hagoadaia diba?

⁶ Momokani ita goevadae lasi taudia be mai anina bada siahu ibounai Havaraia Tauna, Iehova Dirava ena matanai, a? Oibe! Baibel siri namodia momo ese unai idia hamomokania. Unai siri idauidau ita laloa bada neganai, salamo torea tauna ena hereva ita gwauraia diba: “Egu lalona ia hekwarahi momo neganai, oi ese lau oi hagoadaia, bona egu lauma oi hamoalea noho.” (Salamo 94:19) Mani Dirava ena Hereva amo inai hagoadaia herevadia ita itaia, unai ese ita do ia durua Dirava ese ita ia laloa bada karana ita lalopararalaia totona, bona ia ese ita dekenai davana namona do ia henia bema ena ura ita karaia noho.

Iehova Ena “Taunimanima Momokani”

7. Unai kara gageva besena dekenai, Iehova ese Malaki amo dahaka hagoadaia peroveta herevana ia henia?

⁷ Lagani 500 B.C.E. lalonai, Iuda taudia huanai kara dika badana ta ia vara. Hahelaga taudia ese animal dikadia be Iehova ena boubou patana dekenai idia bouboulaia. Hahemaoro taudia be kota maoromaoro idia karaia lasi. Babalau, koikoi herevadia, bona heudahanai karadia be idia bada. (Malaki 1:8; 2:9; 3:⁠5) Unai kara gageva besena dekenai, Malaki ese peroveta herevana ta ia gwauraia. Gabeai, Iehova ese ena taunimanima do ia hanamoa lou. Ia gwau: “Siahu Ibounai Lohiabada ia gwau, ‘Inai taudia be lauegu taunimanima momokani. Bona unai Dina, lau ese kara ta do lau karaia dinana dekenai, idia be lau sibona egu. Bona lau ese idia do lau hamauria, tau ta ese iena natuna, iena ura ia karaia merona, ia hamauria bamona.’ ”​​—⁠Malaki 3:⁠17.

8. Dahaka dainai Malaki 3:17 be hutuma bada ia herevalaia danu?

⁸ Malaki ena peroveta herevana be hari inai negai lauma amo ia horoa Keristani taudia dekenai ia guguru, unai bese taudia ibounai be 144,000. Unai bese be Iehova ena “taunimanima momokani” eiava “orea korikori taudia.” (1 Petero 2:⁠9) Malaki ena peroveta herevana be hutuma bada taudia ia hagoadaia, unai taudia be “helai gabuna badana ena vairanai bona Mamoe ena Natuna ena vairanai idia gini. Edia dabua be kurokuro.” (Apokalupo 7:​4, 9) Unai taudia be horoa taudia ida mamoe orea tamona ai idia lao, Mamoe Naria Tauna tamona Iesu Keriso henunai.​​—⁠Ioane 10:⁠16.

9. Dahaka dainai Iehova be ena bese taudia ia gwauraia ena “taunimanima momokani”?

⁹ Iehova ese ia idia hesiai henia taudia be edena bamona ia lalodia? Malaki 3:17 ena hereva bamona, lalokau tamana ese ena natuna ia laloa bada bamona idia Ia lalodia bada. Bona ena bese taudia ia gwauraia totona ia gaukaralaia herevadia mani oi laloa, ia gwau idia be ena “taunimanima momokani.” Baibel haida ese unai hereva be inai bamona idia hahanaia, “lau sibona egu,” “lauegu dava bada kohu,” bona “lauegu dava bada herahera gauna.” Dahaka dainai Iehova ese ena hesiai taudia be unai bamona ia gwauraia? Badina ta be, Dirava be ena hesiai taudia ese idia karaia gaudia ia laloa bada. (Heberu 6:10) Mai kudouna ibounai ida Ia idia hesiai henia taudia kahirakahira ia lao bona idia ia laloa bada.

10. Edena dala ai Iehova ese ena taunimanima ia gimaia?

¹⁰ Oi dekenai dava bada kohuna ta ia noho, a? Dala do oi tahua unai gauna oi gimaia totona, ani? Iehova danu be unai bamona ia karaia ena “taunimanima momokani” dekenai. Momokani, mauri ena hahetoho bona dika ibounai amo ena taunimanima ia gimaia lasi. (Hadibaia Tauna 9:11) To, Iehova be lauma dalanai ena abidadama hesiai taudia ia gimaia diba. Ia ese goada ia henia hahetoho idauidau idia haheaukalaia totona. (1 Korinto 10:13) Unai dainai, Mose ese Dirava ena idaunegai Israela besena ia hamaoroa: “Do umui goada, emui lalona do umui ha-aukaia. . . . Lohiabada, emui Dirava ese umui dekenai do ia noho. Ia ese umui do ia negea lasi, ia ese umui do ia rakatania lasi.” (Deuteronomi 31:⁠6) Iehova ese ena taunimanima ia kara namo henidia. Ia dekenai, idia be ena “taunimanima momokani.”

Iehova be “Davana Namona” Henia Tauna

11, 12. Iehova be Davana Namona Henia Tauna bamona ita laloa neganai, unai ese edena bamona ita ia durua ita daradara lasi totona?

¹¹ Iehova ese ena hesiai taudia ia laloa bada karana ia hamomokania gauna ta be, idia dekenai davana namona ia henia. Israela taudia ia hamaoroa: “ ‘Lau do umui tohoa karaia. Unai kahana ta lau dekenai do umui henia, vadaeni lauegu kara namona do umui itaia. Lau ese guba ena uindo do lau kehoa, bona gau namodia momo herea umui dekenai do lau bubua diho.’ ” (Malaki 3:10) Oibe, Iehova ese ena hesiai taudia dekenai mauri hanaihanai ena davana namona do ia henia. (Ioane 5:24; Apokalupo 21:⁠4) Unai davana namona ese Iehova ena lalokau bona harihari karana ia hahedinaraia. Ma unai ese ia hahedinaraia, Iehova ese ia idia hesiai henia taudia ia laloa bada. Iehova be Davana Namona Henia Tauna bamona ita laloa neganai, unai ese ita ia durua iseda gini Dirava vairanai ita daradaralaia lasi totona. Oibe, Iehova ese ita ia hagoadaia Davana Namona Henia Tauna bamona ia ita laloa totona! Paulo ia gwau: “Tau ta be Dirava kahirakahira ia ura lao neganai, ia ese Dirava do ia abidadama henia guna, Dirava be ia mauri noho. Bona unai tau ena abidadama be inai bamona: Dirava idia tahua taudia ibounai, be davana namona Dirava ese do ia henidia.”​​—⁠Heberu 11:⁠6.

¹² Oibe, Iehova ita hesiai henia badina ia ita lalokau henia, ia ese ita dekenai davana namona ia henia sibona dainai lasi. To, davana namona do ita abia ita laloa bada karana be kerere lasi eiava sibona eda namo tahua karana lasi. (Kolose 3:​23, 24) Iehova ese ia idia tahua taudia ia lalokau henia bona idia ia laloa bada dainai, idia dekenai davana namona ia henia.

13. Dahaka dainai mauri davalaia boubouna be Iehova ese ita ia lalokau henia karana ia hamomokania gauna badana?

¹³ Iehova ena matana ai taunimanima be mai anina bada ia hamomokania gauna badana be, mauri davalaia boubouna. Aposetolo Ioane ia gwau: “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” (Ioane 3:16) Iesu Keriso ena mauri davalaia boubouna ese inai lalohadai, ita be anina lasi eiava Iehova ese ita ia lalokau henia lasi lalohadaina unai, ia hakoikoia. Momokani, bema Iehova be unai bamona davana badana​​—⁠ena Natuna tamona sibona unai​​—⁠ia henia diba ita ia hoia totona, ia ese ita ia lalokau henia bada.

14. Paulo ese mauri davalaia boubouna ia laloa dalana be dahaka ese ia hahedinaraia?

¹⁴ Unai dainai, lalohadai kereredia oi abia neganai, mauri davalaia boubouna oi laloa be namo. Oibe, namona be oi laloa unai harihari gauna be Iehova ese oi totona ia henia. Aposetolo Paulo be unai bamona ia karaia. Ena hereva mani oi laloa: “Lau be dika momokani inai!” To Paulo ma ia gwau: “Dirava lau tanikiu henia, ia ese lau ia hamauria, Iesu Keriso dekenai amo.” Iesu ese “lau ia lalokau henia, bona lau dainai iena mauri ia atoa diho.” (Roma 7:​24, 25; Galatia 2:20) Paulo be unai ia gwauraia neganai, ia be sibona ia laloa bada lasi. To ia diba momokani Iehova be ia ia laloa bada. Paulo bamona, namona be oi diba mauri davalaia boubouna be Iehova ena harihari gauna bamona oi dekenai. Iehova be mai ena siahu Hamauria Tauna sibona lasi, to ia be mai lalokau ida davana namona ia henia tauna danu.

Satani Ena “Koikoi Karadia” Dekenai Oi Naria Namonamo

15-17. (a) Edena dala ai Diabolo ese lalohadai kereredia ia gaukaralaia kerere diba? (b) Iobu ena haheitalai ese edena bamona ita ia hagoadaia diba?

¹⁵ To, reana oi abia dae be auka Dirava ena Hereva lalonai idia noho hagoadaia herevadia be oi totona. Reana oi laloa mauri hanaihanai Dirava ena tanobada matamatana lalonai be ma haida totona, to oi hegeregere lasi unai gabu dekenai oi noho totona. Bema emu hemami be unai bamona, dahaka oi karaia diba?

¹⁶ Paulo ese Efeso taudia dekenai ia henia sisiba be reana oi diba: “Dirava ese ia henia tuari dabua ibounai do umui kwatua, vadaeni do umui goada, Satani ena koikoi karadia do umui koua.” (Efeso 6:11) Satani ena tarapu idauidau ita laloa neganai, maoromaoro kohu ura dikadika bona matabodaga karadia ita laloa. Unai hahetoho dainai Dirava ena taunimanima momo idaunegai bona hari be tarapu lalonai idia moru vadaeni. To, Satani ena koikoi karana ta ita laloaboio lasi be namo​​—⁠ia ura taunimanima idia laloa Iehova Dirava be idia ia lalokau henia lasi.

¹⁷ Diabolo be ia diba edena dala ai unai bamona lalohadai do ia gaukaralaia taunimanima be Dirava amo do ia hakaua siri totona. Biledada ena hereva Iobu dekenai mani oi laloa: “Tau ta be, edena bamona Dirava ena vairanai do ia maoromaoro diba, a? Hahine ena bogana dekena amo ia vara tauna, be edena bamona do ia goevagoeva diba? Badina Dirava ena vairana dekenai, hua be ia diari lasi, bona, hisiu danu be idia goevagoeva lasi. Unai bamona dainai, edena bamona tau ta be Dirava ena vairanai ia goevagoeva diba? Taunimanima be biluga sibona bamona, Dirava ena vairana dekenai.” (Iobu 25:⁠4-6; Ioane 8:44) Unai hereva ese Iobu ena lalona ia hadikaia momokani, ani? Unai dainai namo lasi Satani ese emu lalona ia hahisia. To, namona be Satani ena koikoi karadia oi diba, unai amo mai gari lasi bona goada ida kara maoromaoro oi karaia diba. (2 Korinto 2:11) Ena be Iehova ese Iobu ena lalohadai ia hamaoromaoroa, to ena haheauka dainai ia haboioa gaudia be Iehova ese nega rua amo ia habadaia.​​—⁠Iobu 42:⁠10.

Iehova ese “Iseda Kudouna Ena Diba Ia Hereaia Momokani”

18, 19. Edena dala ai Dirava be “iseda kudouna ia hereaia,” bona edena dala ai “gau ibounai ia diba”?

¹⁸ Ita gwau diba, lalomanoka ita hanaia be auka bema iseda lalona dekenai ia noho daudau vadaeni. To, Iehova ena lauma ese oi ia durua diba unai bamona lalohadai oi kokia totona. (2 Korinto 10:​4, 5; NW ) Nega momo lalohadai kereredia oi abia neganai, aposetolo Ioane ena hereva oi laloa: “Inai iseda lalokau kara dekena amo, be do ita diba ita be momokani taudia. Vadaeni unai dainai, iseda kudouna be mai maino danu, Dirava ena vairana dekenai. Bona bema iseda kudouna ese ita idia kota henia noho neganai, Dirava ena vairanai do ita laloa hekwarahi lasi. Badina Dirava ese gau ibounai ia diba, bona iena diba ese iseda kudouna ena diba ia hereaia momokani.”​​—⁠1 Ioane 3:​19, 20.

¹⁹ Inai hereva Dirava be “iseda kudouna ia hereaia,” ena anina be dahaka? Nega haida, iseda kudouna ese ita ia kota henia diba, bema iseda kara dika bona kerere ita lalohisihisilaia. Eiava iseda mauri dalana dainai, ita sibona dekenai ita laloa kerere diba, ita laloa gau ta ita karaia be Iehova ese ia abia dae lasi. Aposetolo Ioane ese ita ia hagoadaia, Iehova be iseda kudouna ia hereaia! Iseda kerere ia laloa lasi, to ita karaia diba gaudia ia laloa. Iseda ura bona lalohadai ia diba danu. Davida ia gwau: “Dirava ia diba, ita be tanobada ena kahu dekena amo ita ia karaia. Bona ita dekenai ia laloa noho, ita be kahu sibona.” (Salamo 103:14) Oibe, ita be sibona ita diba goevagoeva lasi, to Iehova be ita ia diba namonamo!

“Korona mai Hairaina” Bona “Kwarana Gauna Namo Herea”

20. Iehova ese ena hesiai taudia ia laloa dalana dekenai, Isaia ena peroveta herevana ese dahaka ia hahedinaraia?

²⁰ Peroveta tauna Isaia amo, Iehova ese ena idaunegai besena ia hamaoroa edia tano dekenai do idia giroa lou. Babulonia dekenai idia noho neganai, unai hagoadaia hereva ese edia lalona ia hagoadaia! Iehova ia gwau nega ta edia tano dekenai do idia giroa lou, ia gwau: “Oi be korona mai hairaina danu do oi lao, Lohiabada ena. Oi be kwara gauna namo herea do oi lao, oiemu Dirava ena.” (Isaia 62:⁠3) Iehova be unai hereva amo ena taunimanima dekenai hairai bona hemataurai ia hahedinaraia. Hari inai negai danu, lauma Israela dekenai unai bamona ia karaia. Unai be hegeregere idia ia abia isi taunimanima ibounai ese idia itaia totona.

21. Edena dala ai oi diba momokani mai abidadama ida oi haheauka dainai Iehova ese oi dekenai davana namona do ia henia?

²¹ Ena be unai peroveta herevana be horoa taudia dekenai ia guguru, to ia hahedinaraia Iehova be ena hesiai taudia ibounai ia matauraia danu. Unai dainai, oi daradara neganai, namona be oi diba ena be oi be goevadae lasi tauna, to Iehova dekenai oi be “korona mai hairaina” bona “kwarana gauna namo herea” bamona. Unai dainai iena ura do ita karaia goadagoada karana amo ia do ita hamoalea noho. (Aonega Herevadia 27:11) Unai bamona oi karaia neganai, namona be oi diba momokani mai abidadama ida oi haheauka dainai, Iehova ese oi dekenai davana namona do ia henia!

[Footnote]

Oi Laloatao, A?

• Edena dala ai ita be Iehova ena “taunimanima momokani”?

• Dahaka dainai Iehova be Davana Namona Henia Tauna bamona ita laloa be namo?

• Satani ese edena koikoi karana ta ia gaukaralaia bona unai kara dainai ita naria namonamo?

• Edena dala ai Dirava be “iseda kudouna ia hereaia”?

[Picture on page 22]

Paulo

[Picture on page 22]

Elia

[Picture on page 22]

Hana

[Picture on page 24]

Dirava ena Hereva be hagoadaia herevadia amo ia honu