“Lohiabada Do Umui Hanamoa!”
“Umui mauri noho gaudia ibounai e, Lohiabada ena ladana do umui hanamoa!”—SALAMO 150:6.
IESU ese ena hahediba taudia be Keristani ekalesiana lalonai ia haboua, bena aposetolo edia nega lalonai unai orea ia tubu badabada. Ena be idau tomadiho taudia ese idia inai henidia dikadika, to “Sivarai Namona . . . [be] tanobada ibounai dekenai [idia] harorolaia vadaeni.” (Kolose 1:23) To Iesu Keriso ena aposetolo idia mase murinai, Satani ese hereva momokani amo raka siri karana ia havaraia hehuni.
2 Aposetolo ese unai idia gwauraia guna. Hegeregere, Paulo ese Efeso amo idia mai elda taudia ia hamaoroa, ia gwau: “Umui sibona do umui naria namonamo, bona mamoe orea ibounai danu. Inai orea naria taudia Lauma Helaga ese umui ia halaoa vadaeni. Dirava ena ekalesia, iena lalokau Natuna ena rarana dekena amo ia hoia orea taudia, do umui ubua. Badina be lau diba, umui lau rakatania murinai, uda sisia dikadia umui emui huanai dohore idia mai, bona mamoe orea do idia hadikaia. Emui huanai tatau haida do idia toreisi, hereva koikoi do idia gwauraia, bona diba tahua taudia do idia hakaua kerere.” (Kara 20:28-30; ma danu 2 Petero 2:1-3; 1 Ioane 2:18, 19 itaia.) Unai hegeregerena, lagani 300 C.E. murinai, hereva momokani amo ia raka siri Keristani oreana be Roma Basileiana ida idia gaukara hebou matamaia. Lagani handred haida murinai, Roma Basileiana Helagana, Roma ena pope ida ia gaukara hebou Basileiana, ese taunimanima momo herea ia lohiaia. Gabeai, Protestan Refomeisen ese Katolik Oreana ena kara dika rohorohodia ia dadaraia, to Keristani tomadiho momokanina ia haginia lou lasi.
3 To, lagani 1900 C.E. be kahirakahira neganai, orea maragina ta, Baibel stadilaia taudia mai edia lalo-momokani unai, ese haroro gaukarana idia goadalaia bona ‘Sivarai Namona be tanobada ibounai dekenai idia harorolaia.’ Baibel ena peroveta herevadia idia tahua namonamo, bona unai kara amo idia davaria gaudia dainai, unai orea taudia ese lagani 30 bamona murinai do ia vara gauna ta idia gwauraia. Idia gwau, lagani 1914 C.E. ai “idau bese edia nega” do ia ore. Edia nega be lagani 607 B.C.E. ai ia matamaia, Babulonia ese Ierusalema ia hadikaia ore neganai, bena “lagani 7,” anina be lagani 2,520, murinai do ia ore. (Luka 21:24; Daniela 4:16) Vadaeni, unai Baibel stadilaia taudia idia laloa hegeregerena, lagani 1914 ai taunimanima edia noho ia senisi. Guba ai danu, gau badadia idia vara. Unai neganai, noho hanaihanai King ese ia ida do ia lohia Pavapavana, Iesu Keriso, be guba terona ai ia atoa. Unai amo ia hegaegae, kara dika ibounai be tanobada amo do ia kokia bona Paradaiso do ia haginia lou.—Salamo 2:6, 8, 9; 110:1, 2, 5.
Mesia Pavapavana Ia Hedinarai!
4 Lagani 1914 ai, unai Mesia Pavapavana, Iesu, be ia gaukara matamaia. Baibel lalonai ena ladana ma ta idia hatoa Mikaela, anina be “Daika be Dirava Hegeregerena?,” badina be ia ura dikadika Iehova ena lohia siahuna do ia hamomokania. Do ia vara gauna be aposetolo Ioane ese mata hanai lalonai ia itaia, bona Apokalupo 12:7-12 ai ia gwauraia, ia gwau: “Vadaeni guba dekenai tuari ia vara. Mikaela mai ena aneru momo danu ese huala idia tuari henia. Huala mai ena aneru momo danu ese Mikaela idia tuari henia. To huala ena goada hegeregere lasi dainai ia kwalimu lasi. Unai dainai huala mai ena aneru be dala lasi guba dekenai do idia noho. Vadaeni unai huala badana, be Dirava ena aneru ese idia negea diho. Ia be unai idaunegai gaigaina, bona iena ladana be Diabolo bona Satani. Ia be tanobada taudia ibounai ia koia noho gauna. Oibe, ia, mai ena aneru ibounai danu, be idia ese tanobada dekenai idia negea diho.” Moru badana unai!
5 Bena gado badana ta be guba ai ia boiboi, ia gwau: “Harihari iseda Dirava ena hamauria ia ginidae vadaeni. Harihari iena Keriso ese iena siahu ia hedinaraia vadaeni. Badina be unai samania tauna ese Dirava ena vairanai, dina bona hanuaboi, guna ia gini, iseda varavara ia samania, be hari aneru ese idia negea vadaeni. Guba dekena amo ia idia negea diho vadaeni. Iseda varavara [Keristani taudia mai edia kamonai] ese Mamoe ena Natuna [Keriso Iesu] ena rarana dainai, bona iena hereva idia gwauraia dainai, Satani dekena amo idia kwalimu. Bona edia tanobada mauri idia laloa momo lasi, to Keriso dainai edia mauri idia atoa diho.” Unai ena anina be ia ese kara maoromaoro badinaia taudia, Iesu ena boubou, taunimanima edia mauri davalaia boubouna namona, idia abidadama henia taudia, be do ia hamauria.—Aonega Herevadia 10:2; 2 Petero 2:9.
6 Bena unai gado badana guba lalonai be ma ia gwau: “Guba e, bona guba lalonai noho taudia e! Unai kara dainai do umui moale bada! To tanobada bona davara, madi o, nega dika bada do umui davaria! Badina be Satani ese umui dekenai ia lao vadaeni, mai ena badu dikadika. Ia badu, badina ia diba iena nega be ia kwadogi sibona.” Tanobada totona ia perovetalaia gauna, “nega dika bada” unai, be ia vara. Lagani 1900 C.E. murina amo, tanobada ibounai tuaridia, hitolo, daihanai goreredia, tano mareremarere, bona kara dika be idia vara rohoroho. Mataio 24:3-13 ai Iesu ia peroveta unai gau do idia vara, idia be ‘tanobada dokona ena toana.’ Unai peroveta herevana hegeregerena, lagani 1914 amo tanobada dekenai taunimanima ese nega dika bada idia davaria, matamana negana amo ela bona unai nega, unai bamona hisihisina ia vara lasi.
7 Inai nega dikana, Satani ese ia havaraia negana, lalonai, taunimanima ese helaro namona ta nega vaira totona idia davaria diba, a? Oibe. Mataio 12:21 ese Iesu ia gwauraia, ia gwau: “Iena ladana dainai, be bese ibounai ese ia do idia naria, mai laloa namona bona abidadama danu.” Bese iboudiai bogaraginai idia vara gaudia dikadia be ‘tanobada dokona ena toana’ sibona lasi, to Iesu ‘ia giroa mai’ vadaeni bona Mesia ena Basileia ena King dagina be guba ai ia abia vadaeni ena toana danu. Iesu ese unai Basileia ia gwauraia, ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.” (Mataio 24:14) Hari inai negai, tanobada ai edena orea taudia sibodia ese Dirava ena Basileia ena lohia negana sivaraina namona idia harorolaia? Iehova ena Witness taudia unai! Taunimanima vairadiai bona ruma ta ruma ta ai idia haroro goadagoada, idia gwau kahirakahira Dirava ena kara maoromaoro bona maino Basileiana ese tanobada do ia biagua. Oi danu ese unai haroro gaukarana oi karaia, a? Unai hahenamo ia hereaia hahenamona oi davaria diba lasi!—2 Timoteo 4:2, 5.
“Dokona” be Edena Bamona Do Ia Mai?
8 Hahemaoro negana ta ia matamaia vadaeni. Petero Ginigunana 4:17 ia gwau Dirava “ena orea taudia” dekenai ia matamaia. Lagani 1914 ela bona 1918 lalonai Tanobada Ibounai Tuarina Ginigunana ai idia ala-ala neganai, “nega ena dokona” ia matamaia. Unai nega amo unai hahemaoro gaukarana, sibodia idia gwauraia Keristani oreadia hahemaoro henidia gaukarana, be ia hedinarai. Unai hahemaoro lalonai Kerisendom be edena bamona? Lagani 1914 amo ema bona hari, tomadiho oreadia ese tuari idia durudia dalana be mani oi laloa. Haroro taudia ese edia haroro amo idia ha-uraia tuari lalonai do idia vareai totona taudia ‘edia rarana ese edia dabua ia hamiroa vadaeni,’ ani?—Ieremia 2:34.
9 Mataio 26:52 ai Iesu ia gwau: “Tuari kaia idia iusilaia taudia ibounai, be tuari kaia dekenai do idia mase.” Lagani 1900 murina amo idia vara tuaridia lalonai unai be momokani! Haroro taudia ese edia haroro amo tatau matamatadia idia ha-uraia, idia ese tatau matamatadia ma haida, sibodia edia tomadiho oreadia taudia danu, idia alaia mase totona—Katolik taudia ese Katolik taudia idia alaia mase bona Protestan taudia ese Protestan taudia idia alaia mase. Bese abia isi karana idia laloa bada, Dirava bona Keriso idia laloa maragi. Vanegai, Africa tanodia haida lalonai, taunimanima haida ese edia bese idia laloa bada, Baibel ena taravatu idia laloa maragi. Rwanda taudia momo be Katolik taudia, to unuseniai bese ta ese ma ta idia tuari henia neganai, taunimanima 500,000 bamona idia alaia mase. Vatican ena niuspepa ladana L’Osservatore Romano lalonai, pope ia gwau: “Inai be bese idauna hamasea ore karana badana, bona madi, Katolik taudia danu be unai kara lalonai idia vareai.”—Isaia 59:2, 3; Mika 4:3, 5 itaia.
10 Unai bamona tomadiho oreadia, taunimanima idia hagoadaia do idia ala-ala heheni totona, eiava edia orea taudia haida ese edia orea taudia ma haida idia alaia mase lalonai unai idia koua toho lasi oreadia, be noho hanaihanai King ese edena bamona ia lalodia? Apokalupo 18:21, 24 ese Babulonia Badana, tomadiho koikoi basileiana tanobada hegegemadai, ia gwauraia, ia gwau: “Aneru goadana ta ese nadi badana ta, iena toana be uiti ia moia nadina bamona, ia abia. Inai nadi ia abia isi, davara dekenai ia negea diho. Vadaeni aneru ia gwau, ‘Babulonia hanua badana, unai bamona, mai dagedage danu, oi do idia negea diho, vadaeni taunimanima ese oi do idia itaia lou lasi. Oibe, Babulonia be Dirava ese ia panisia, badina be ia ese peroveta taudia ia alaia mase. Ia ese Dirava ena helaga taudia edia rarana ia habubua, bona tanobada dekenai idia alaia mase taudia ibounai, edia rarana be, ia lalonai idia davaria vadaeni.’ ”
11 Kerisendom lalonai gau dika rohorohodia idia vara noho. Unai ese Baibel ena peroveta herevadia ia hamomokania. (Ieremia 5:30, 31; 23:14 itaia.) Haroro taudia ese Baibel ia taravatua karadia haida idia gwauraia dika lasi dainai, edia orea taudia momo ese matabodaga karadia idia karaia. Idia gwau United States be Keristani besena ta, to unai bese lalonai headava iboudiai rua rua amo ta ta idia hadokoa. Tomadiho oreadia edia kekeni momo be idia do headava lasi neganai idia rogorogo, bona tomadiho oreadia edia tatau momo idia sihari heheni. Pris taudia ese memero bona kekeni idia sihari henia—bona unai kara be nega momo ia vara. Unai kara idia kotalaia dainai, reana lagani 10 lalonai Katolik Oreana United States lalonai ese kompenseisen monina dola bilioni do idia henia. Kerisendom ese aposetolo Paulo ena sisiba Korinto Ginigunana 6:9, 10 dekenai ia dadaraia; Paulo ia gwau: “Umui diba lasi, a, kara dika taudia be Dirava ena Basileia do idia davaria lasi? Umui sibona do umui koia lasi: Lebulebu taudia, kaivakuku idia tomadiho henia taudia, heudahanai taudia, o lebulebu hahine edia kara bamona idia karaia tatau, o tatau ese tatau danu hemarai karadia idia karaia taudia. O henaoa taudia, mataganigani taudia, kekero taudia, edia hereva dekenai haida idia hadikaia taudia, o haida edia gau idia dadia taudia. Inai bamona taudia ta lasi be Dirava ena Basileia do ia davaria diba.”
12 Nega daudau lasi, noho hanaihanai King, Iehova, ese ena guba Tuari Biaguna, Keriso Iesu, ena amo do ia kara, hisihisi badana do ia havaraia. Kerisendom bona Babulonia Badana ena kahana oredia iboudiai ese Iehova ena hahemaoro herevana hegeregerena panisi do idia abia guna. (Apokalupo 17:16, 17) Idia hahedinaraia idia be hegeregere lasi, Iehova ese Iesu ena boubou gauna amo ia henia hahemaurina do idia abia. Idia ese Dirava ena ladana helagana idia dadaraia. (Esekiela 39:7 itaia.) Edia dubu mai hairaidia lalonai “Aleluia” anedia idia abia be koikoi karana! Iehova ena ladana namona be edia Baibel amo idia kokia, to toana be idia diba lasi “Aleluia” ena anina be “Iah Hanamoa”—“Iah” be “Iehova” ena ladana kwadogina. “Aleluia” anedia Apokalupo 19:1-6 dekenai be nega daudau lasi Dirava ena orea taudia ese do idia abia, Dirava ese Babulonia Badana do ia panisia neganai unai do idia moalelaia dainai.
13 Unai murinai Iesu do ia ‘ginidae,’ tanobada besedia bona taunimanima do ia hahemaoro henia bena edia davana do ia henidia totona. Ia sibona ia peroveta, ia gwau: “Taunimanima ena Natuna [Keriso Iesu] be mai ena hairai danu do ia mai, mai ena aneru helagadia danu, ena [kota] terona namo herea momokani latanai do ia helai. Vadaeni bese ibounai [tanobada dekenai] be iena vairana dekenai do idia haboua. Vadaeni ia ese idia do ia hapararaia, mamoe naria tauna ese mamoe bona nanigosi ia hapararaia bamona. Mamoe be iena idiba kahana dekenai do ia atoa, nanigosi be iena lauri kahana dekenai do ia atoa. Vadaeni Lohiabada ese iena idiba kahana taudia dekenai do ia hamaoroa, do ia gwau, ‘Umui mai, egu Tamana ese ia hanamoa taudia e, Basileia umui abia, tanobada ia karaia neganai, ia ese ia karaia hegaegae umui emui.’ ” (Mataio 25:31-34) Mat 25 Siri 46 ai, ia be ma ia gwau, nanigosi bamona taudia be “davana ia dika hanaihanai gabuna dekenai do idia lao. To kara maoromaoro taudia be mauri hanaihanai gabuna dekenai do idia lao.”
14 Baibel bukana Apokalupo ese ia hahedinaraia “king ibounai edia King, bona lohia ibounai edia Lohia,” iseda Lohiabada guba lalonai, Iesu Keriso, be hosi ta ai do ia gui, Aramagedono tuarina dekenai do ia heau lao bena Satani ena politikol oreadia bona bisinesi oreadia do ia haorea vaitani. Unai neganai Keriso ese “Siahu Ibounai Dirava ena badu, siahu dikadika” be Satani ese ia biagua tanobadana ibounai latanai do ia bubua. Unai ‘gau gunadia do idia ore’ neganai, ia ese Dirava gari henia taudia be tanobada matamatana namo hereana lalonai do ia hakaua vareai, bena Dirava ese “matana ranu ibounai edia matana dekena amo do ia dahua.”—Apokalupo 19:11-16; 21:3-5.
Iehova Hanamoa Negana
15 Unai dava henia dinana be kahirakahira! Unai dainai, noho hanaihanai King ena peroveta herevana ita kamonai henia be namo. Guba amo gado ta ia boiboi, tomadiho koikoi ena hahediba herevadia bona ena kara ese idia do guia taudia ia hamaoroa, ia gwau: “Lauegu orea taudia e, ia dekena amo do umui raka siri, ia danu do umui kara dika hebou garina, bona ia danu panisi do umui abia hebou garina!” To raka siri taudia be edeseniai do idia lao be namo? Hereva momokani be tamona, unai dainai tomadiho dalana momokanina danu be tamona. (Apokalupo 18:4; Ioane 8:31, 32; 14:6; 17:3) Mauri hanaihanai do ita abia totona, namona be unai tomadiho dalana ita davaria bona ia havaraia Diravana ita kamonai henia. Baibel ena hereva Salamo 83:18 ai ese ita ia hakaua lao ia dekenai. Unai siri ia gwau: “Oiemu ladana be Iehova. Bona oi sibona, Ataiai Momokani Diravana, ese tanobada oi biagua noho.”
16 To, noho hanaihanai King ena ladana ita diba sibona be hegeregere lasi. Namona be Baibel ita stadilaia bona iena kara bona ena palani badadia ita dibaia. Bena namona be iena ura hari inai nega totona ita karaia, aposetolo Paulo ese Roma 10:9-13 ai ia hahedinaraia hegeregerena. Ia ese Dirava ena peroveta taudia edia hereva ia gwauraia, bena ia gwau: “Dirava ena ladana idia noinoi henia taudia ibounai, be mauri do idia davaria.” (Ioela 2:32; Sepanaia 3:9) Mauri? Oibe, hari inai negai idia noho taudia hutuma bada herea, Iehova ese Keriso ena amo mauri ia davalaia karana idia abidadama henia taudia, be do ia mai hisihisina badana amo do ia hamauria. Unai neganai ia ese Satani ena tanobada dikana ena davana do ia henia.—Apokalupo 7:9, 10, 14.
17 Edia helaro be do idia roho mauri taudia dekenai Dirava ena ura be dahaka? Ia ura hari inai negai ita ese Mose bona Mamoe ena Natuna edia ane do ita abia. Anina be noho hanaihanai King do ita hanamoa, badina be do ia kwalimu. Ita hanamoa dalana be iena palani namodia be taunimanima ita hamaorolaidia. Iseda lalo-parara Baibel ena hereva dekenai ia bada ia lao neganai, iseda mauri be noho hanaihanai King dekenai ita gwauhamatalaia diba. Unai amo ita ese mauri hanaihanai be unai King badana ese do ia karaia gauna lalonai do ita abia diba. Isaia 65:17, 18 ai unai gau ia herevalaia, ia gwau: “Lau ese tanobada matamata [kara maoromaoro besena matamatana] bona guba matamata [Iesu ena Mesia Basileiana] lau karaia noho, bona kara gunadia be do idia laloa lou lasi, do idia laloaboio momokani. Lau ese lau karaia gauna dainai do umui moale bada ela bona hanaihanai.”
18 Salamo torea tauna Davida ese noho hanaihanai King be inai bamona ia gwauraia: “Lohiabada ena ladana be bada herea, bona ita ese iena ladana do ita abia isi. Iena kara badadia do ita tahua diba lasi, iseda laloa be maragi dainai.” (Salamo 145:3) Iena kara badadia ita tahua diba lasi, guba bona mauri hanaihanai edia hetoana ita tahua diba lasi hegeregerena! (Roma 11:33) Ita ia karaia Diravana bona ena kara, iena Natuna, Keriso Iesu, ena amo mauri ia davalaia karana, do ita dibaia noho lalonai, do ita ura iseda noho hanaihanai King do ita hanamoa bada. Do ita ura Salamo 145:11-13 ese ia gwauraia karana do ita karaia: “Idia ese oiemu King siahuna ena hairaina do idia herevalaia, bona oiemu goada badana do idia gwauraia. Vadaeni taunimanima ibounai ese, oiemu kara badadia ena sivarai do idia diba. Oiemu basileia ena goada bona hairaina danu do idia diba. Oiemu King siahuna be do ia noho hanaihanai, bona oiemu King dagi be do ia doko diba lasi.”
19 Ita diba momokani iseda Dirava ese ena hereva do ia hamomokania. “Oi be emu imana oi kehoa noho bena mauri gaudia ibounai edia ura oi hagugurua noho.” Noho hanaihanai King ese ita do ia hakaua mai ena lalokau ida ela bona inai dina gabedia edia dokona, badina be Davida ia gwau: “Iehova ese ia idia ura henia noho taudia ia naria noho, to dika taudia ibounai ia ese do ia haorea.”—Salamo 145:16, 20, NW.
20 Baibel ena salamo ginigabedia imaosi ta ta edia matamana ai bona edia dokona ai be “Aleluia” boiboina ta. Unai hegeregerena, Salamo 146 ese ita ia boiria, ia gwau: “Lohiabada do umui hanamoa! Egu lauma e, Lohiabada do oi hanamoa! Egu mauri dinadia ibounai lalonai, lau ese Lohiabada do lau hanamoa. Ane dekenai, Lohiabada do lau hanamoa egu mauri dinadia ibounai lalonai.” Unai boiboi hegeregerena do oi kara, a? Momokani, namona be oi ura do oi hanamoa! Namona be Salamo 148:12, 13 ese ia gwauraia taudia edia orea lalonai do oi noho. “Ulato bona uhau, buruka taudia, bona natuna maragidia danu, namona be idia ibounai ese, Lohiabada ena ladana do idia hanamoa bada! Iena ladana badana ese, taunimanima ibounai edia ladana badana ia hereaia noho. Iena hairaina be ataiai momokani, ia ese tanobada bona guba ia hereaia noho.” Namona be inai boiboi, “Lohiabada do umui hanamoa!” do ita abia dae mai eda lalona ibounai ida. Namona be noho hanaihanai King do ita hanamoa mai eda lalo-tamona ida!
Emu Haere be Dahaka?
◻ Iesu ena aposetolo idia gwau dahaka kerere do ia vara?
◻ Lagani 1914 amo, dahaka kara badadia idia vara?
◻ Kahirakahira Iehova ese daidia edia davana do ia henia?
◻ Dahaka dainai inai nega be noho hanaihanai King hanamoa negana korikorina?
[Study Questions]
1, 2. (a) Aposetolo edia negai, Keristani tomadihona momokanina be edena bamona ia bada ia lao? (b) Aposetolo idia gwau dahaka kerere do ia vara? (c) Unai kerere be edena bamona ia bada ia lao?
3. (a) Edena negai bona edena dala amo sivarai namona be tanobada ibounai dekenai idia harorolaia? (b) Baibel amo idia abia helarona hegeregerena, dahaka be lagani 1914 ai ia vara?
4. Iesu ese ena ladana Mikaela ena anina be edena bamona ia hamomokania?
5, 6. (a) Lagani 1914 murinai, dahaka hereva namona be gado ta ese guba amo ia halasia? (b) Mataio 24:3-13 ese unai be edena bamona ia hamomokania?
7. Dahaka dainai Iehova ena Witness taudia idia haroro goadagoada?
8, 9. (a) Hahemaoro be Dirava “ena orea taudia” dekenai edena bamona ia matamaia? (b) Kerisendom ese Dirava ena Hereva be edena bamona ia hadikaia?
10. Iehova ese dahaka hahemaoro herevana ena anina be tomadiho koikoi latanai do ia karaia?
11. Dahaka gau dika rohorohodia be Kerisendom lalonai idia vara noho?
12. (a) Noho hanaihanai King ese Babulonia Badana be edena bamona do ia panisia? (b) Kerisendom hegeregerena lasi, badina be dahaka Dirava ena orea taudia ese “Aleluia” anedia do idia abia?
13, 14. (a) Unai murinai dahaka gau badadia do idia vara? (b) Dirava gari henia taudia ese dahaka moale do idia davaria?
15, 16. (a) Dahaka dainai Iehova ena peroveta herevana ita kamonai henia be namo? (b) Peroveta taudia bona aposetolo taudia ese idia hahedinaraia bamona, mauri abia totona edena bamona ita kara be namo, bona reana unai ena anina be dahaka, taunimanima hutuma bada herea dekenai?
17. Dahaka helaro namona dainai ita ura Mose bona Mamoe ena Natuna edia ane be hari do ita abia?
18, 19. (a) Davida ese Salamo 145 ai ia torea herevadia dainai edena bamona ita kara be namo? (b) Ita diba momokani Iehova ese dahaka do ia karaia?
20. Noho hanaihanai King ena boiboi, salamo ginigabedia imaosi lalonai idia torea boiboina, dainai, edena bamona oi kara?
[Box on page 19]
Inai Heiriheiri Negana Dikana
Taunimanima momo ese idia hamomokania lagani 1900 C.E. murinai heiriheiri bada negana ia matamaia. Hegeregere, U.S. Senator Daniel Patrick Moynihan ena buka ladana Pandaemonium, lagani 1993 ai idia halasia bukana, ena hamatamaia herevana ese “lagani 1914 ai ia vara hisihisina” ia gwauraia, ia gwau: “Tuari ia vara bona tanobada ia senisi—ia senisi vaitani. Lagani 1914 ai idia noho gavamanidia amo, 8 sibodia mo be hari idia do noho bona unai nega amo ema bona hari, dagedage ese edia gavamani dalana ia haidaua lasi. . . . Hari idia noho gavamanidia oredia 170 bamona amo, haida be vanegai sibona idia haginia dainai heiriheiri momo idia do mamia lasi.” Momokani, lagani 1914 amo ema bona hari, dika badadia be latanai latanai idia vara!
Lagani 1993 ai idia halasia bukana ma ta ladana be Out of Control—Global Turmoil on the Eve of the Twenty-First Century. Torea tauna be Zbigniew Brzezinski, guna ia be U.S. National Security Council gunalaia tauna. Ia gwau: “Guna taunimanima momo idia gwau lagani 1900 be Lalo-parara Negana ena matamana. . . . Ena be nega namona idia gwauhamatalaia, to lagani 1900 ai ia matamaia negana be rara bada herea bubua bona badu dikadika negana, ena dika ese nega gunadia iboudiai edia dika ia hereaia negana, bona ia be politik karadia kavakavadia bona ala-ala dika hereadia negana. Dagedage idia goadalaia momokani bona ala-ala kohudia momo herea idia karaia. Saiens taudia ese namo bada idia havaraia diba, to politik dainai dika bada herea idia havaraia. Matamana negana amo ela bona unai nega, ala-ala be tanobada hegegemadai unai bamona ia vara lasi, bona idia alaia mase taudia edia momo be unai bamona lasi, bona mai edia hekokoroku ida idia palania gaudia dikadia dainai taunimanima idia hamasea ore karana be guna unai bamona idia goadalaia lasi mai edia lalona ibounai ida.” Unai hereva be momokani vaitani!
[Picture on page 17]
Lagani 1914 ai Basileia haginia negana murinai, Mikaela ese Satani bona ena orea ia negea diho tanobada ai