Inai Oi Laloatao, A?

Vanegai idia halasia Gima Kohorona magasin edia namo oi abia, a? Vadaeni, mani inai henanadai amo sibona oi tohoa dahaka oi laloatao diba:

◻ Amono taudia idia hadarerea karana amo dahaka ita diba? (Sepanaia 2:​9, 10)

Iehova ese badu amo iena hebogahisi ena davana idia haloua taudia edia kara ia laloa momo. Iena nega korikori ai, kara ta do ia karaia, gunaguna ia kara hegeregerena. (Salamo 2:​6-12 itaia.)​—⁠12/15, rau 10.

◻ Keristani taudia be edena dala ai maino idia davaria?

Ginigunana be, “Dirava danu maino idia abia, Iesu Keriso edia Lohiabada dainai.” (Roma 5:⁠1) Iharuana be, idia bogaragidiai maino ia noho, badina be ‘Dirava dekena amo aonegana’ idia habadaia; iena kara ginigunana be “laloa goevagoeva,” unai murinai be “maino.” (Iamesi 3:17)​—⁠1/1, rau 11.

◻ Dirava ena hereva be dahaka gau haida bamona?

Dirava ena Hereva be tauanina ia hagoadaia ratana, aniani korikori, goada ia henia lou bona ia hagoevaia ranuna, hevarivari, bona tuari kaiana mai matana gaudia bamona. Bema unai hereva edia anina ita lalo-pararalaia, Baibel do ita gaukaralaia namonamo diba.​—⁠1/1, rau 29.

◻ Namona be edukeisini maorona ese ita ia durua dahaka do ita karaia?

Ita ia durua ita duahiduahi namonamo totona, ita toretore namonamo totona, iseda diba ita habadaia bona iseda kara ita hamaoromaoroa totona, bona iseda mauri durua gaukaradia karaia daladia ita diba bona hesiai gaukara helagana ita karaia namonamo totona.​—⁠2/1, rau 10.

◻ Edukeisini gaukaralaia karana dekenai, Iesu ena amo dahaka mai anina bada gauna ita diba?

Namona be edukeisini ita gaukaralaia, ita sibona hanamoa totona lasi, to Hadibaia Tauna Hereadaena, Iehova Dirava, ita hanamoa totona. (Ioane 7:​18)​—⁠2/1, rau 10.

◻ Dirava ena Basileia be dahaka?

Basileia be Dirava ese ia havaraia gavamanina, guba lalonai. Unai gavamani ese Dirava ena ura do ia hagugurua, kara dika bona mase edia anina do ia haorea bona tanobada ai kara maoromaoro do ia havaraia lou. (Daniela 2:​44; Apokalupo 11:15; 12:10)​—⁠2/1, rau 16.

◻ Baibel ese edukeisini maorona be edena bamona ia henia, dagedage haorea vaitani totona?

Iehova ese ena Hereva, Baibel, amo taunimanima dekenai maino ura henia karana bona kara maoromaoro ia hadibaia. (Isaia 48:​17, 18) Dirava ena hereva be mai ena siahu tau ta ena lalona ia veria bona ena laloa bona kara ia haidaua diba. (Heberu 4:​12)​—⁠2/15, rau 6.

◻ Edena dala ai ita gwau diba Isaia karoa 35 ena peroveta herevana ena anina be nega toi ia vara?

Isaia ena peroveta herevana ena anina ia vara negana ginigunana be 537 B.C.E. ai, Iuda taudia be Babulonia ena igui amo idia giroa lou neganai. Bona Babulonia Badana ena igui amo lauma Israelana ia raka siri negana amo, lauma dalanai hari ena anina ia vara noho. Bona ena anina ihatoina do ia vara, paradaiso korikorina be tanobada ai do ia vara lou neganai. (Salamo 37:10, 11; Apokalupo 21:​4, 5)​—⁠2/15, rau 17.

◻ Dirava ena natuna, Iesu, ese ia karaia hoa karadia amo edena bamona ia hedinarai Dirava ese taunimanima ia laloa?

Iesu be “sibona kara ta ia karaia diba lasi, to ia ese iena Tamana ena kara ia itaia noho, vadaeni unai kara sibona ia karaia,” unai dainai iena hebogahisi ese ia hahedinaraia Iehova ese iena hesiai taudia ta ta iboudiai ia laloa. (Ioane 5:​19)​—⁠3/1, rau 5.

◻ Ioane 5:​28, 29 ai Iesu ese ia gwauraia herevana, “mase guria gabu [“mase tauna laloatao garana,” NW]” ese dahaka ia hahedinaraia?

Unai siri ai Greek herevana mne·mei’on (mase tauna laloatao garana) idia torea ese ia hahedinaraia Iehova ese mase tauna ta ena mauri ia laloatao, anina be ena kara bona lalohadai gunadia iboudiai ia diba. Unai ese ia hahedinaraia goevagoeva Dirava ese taunimanima ta ta iboudiai ia laloa!​—⁠3/1, rau 6.

◻ Sepanaia ena peroveta herevana ese dahaka heduru sisiba ia henia, ita badinaia totona?

Namo lasi hari inai negai ita laloa daradara matamaia. Iseda darana ai o iseda lalona ai bema ita gwau Iehova ena dina be do daudau, unai be aonega lasi karana. Namona be ita naria namonamo, lauma gaudia laloa lasi lalohadaina ese ita ia hamanokaia garina. (Sepanaia 1:​12, 13; 3:⁠8)​—⁠3/1, rau 17.

◻ Dahaka dainai Dirava ita badinaia be auka?

Ita badinaia be auka, badina ita sibona eda ura tahua urana, iseda tamana bona sinana amo ita abia urana unai, ita dadaraia be mai ena hekwarahi. (Genese 8:21; Roma 7:​19) Bona badina badana ta be Satani bona ena demoni idia gaukara goada, Dirava badinaia karana amo ita do idia veria siri totona. (Efeso 6:​12; 1 Petero 5:⁠8)​—⁠3/15, rau 10.

◻ Edena dala hani dekenai badinaia karana ita hahedinaraia be namo, bona dahaka ese ita do ia durua unai ita karaia totona?

Unai dala hani be, Dirava ita badinaia, ena orea ita badinaia, kongregesen ita badinaia, bona iseda adavana ita badinaia. Ita badinadia totona ita ia durua gauna ta be inai: Namona be ita lalo-parara badinaia karana be mai anina, Iehova ena lohia siahuna hamomokania karana ai.​—⁠3/15, rau 20.

◻ Davida ese Ierusalema dekenai maua helaga ia abia lao toho sivaraina amo dahaka sisiba ita abia? (2 Samuela 6:​2-7)

Davida ese Iehova ena hahegani, maua huaia dalana dekenai, ia laloa lasi, unai dainai dika ia vara. Ita abia sisibana be inai: Bema Iehova ese ia hahedinaraia goevagoeva sisibadia ita badinaia lasi dainai kerere ia vara, namona be ita gwau lasi unai be iena kerere. (Aonega Herevadia 19:⁠3)​—⁠4/1, rau 28, 29.