Duahia Taudia Edia Henanadai
Aposetolo Paulo ena hereva, “lauegu kara gunadia lau laloaboio, bona vaira neganai gaudia do lau goadalaia,” ena anina be dahaka? (Filipi 3:13) Taunimanima ta ese gau ta be mai ena ura ida ia laloaboio diba, a?
Lasi, iseda darana ai ia noho dibana be mai eda ura ida ita kokia diba lasi. To eda kara be, ita ura do ita laloatao gaudia momo ita laloaboio bona ita ura ita laloaboio gaudia momo ita laloatao. Unai dainai, Paulo ena hereva Filipi 3:13 ai ena anina be dahaka? Iena hereva ma haida ese ita idia durua, unai do ita lalo-pararalaia totona.
Filipi karoa 3 lalonai, Paulo ese ‘tauanina ena toana gaudia ia abidadama henia diba’ ena badina ia gwauraia. Ia gwau ia be mai ena ladana namo herea Iuda taudia bogaraginai bona Taravatu ia badinaia momokani—unai gaudia dainai Israela besena lalonai hahenamo momo ia abia diba. (Filipi 3:4-6; Kara 22:3-5) To, unai hahenamo ia dadaraia, ia gwau idia be anina lasi gaudia. Badina be dahaka? Badina be unai gaudia ia hereaia gauna ta ia davaria—“Keriso Iesu, lauegu Lohiabada do lau diba momokani.”—Filipi 3:7, 8.
Paulo ese ia tahua gauna badana be dagi bada inai tanobada lalonai lasi, to “mase dekena amo toreisi lou.” (Filipi 3:11, 12) Unai dainai, ia torea: “Lauegu kara gunadia lau laloaboio, bona vaira neganai gaudia do lau goadalaia. Unai dainai heau helulu ena dokona gabuna dekenai maoromaoro lau heau henia, kwalimu ahuna do lau abia totona. Inai kwalimu ahuna be guba dekenai mauri matamata, Dirava ese lau ia boiria totona gauna, Keriso Iesu dainai.” (Filipi 3:13, 14) Paulo ena hereva, “lauegu kara gunadia lau laloaboio,” ena anina be inai lasi “kara gunadia” be ena darana amo ia kokia. Toana be unai kara ia do lalodia tao, badina be ia gwauraidia lou. Bona inai danu, unai neganai ia gwauraia Greek gado herevana ena anina be kara ta ia karaia noho, ia karaia ore lasi. Greek gado ai ia gwau ia “laloaboio noho,” ia gwau lasi ia “laloaboio vadaeni.”
Greek gado herevana idia hahanaia “laloaboio” (e·pi·lan·thaʹno·mai) be mai ena anina idauidau. Ena anina ta be “laloa momo lasi,” eiava “laloa lou lasi.” Buka ta ladana Exegetical Dictionary of the New Testament (Horst Balz bona Gerhard Schneider ese idia torea), ia gwau Filipi 3:13 ai ia noho herevana, “laloaboio,” ena anina be unai. Paulo ese ia negea vadaeni gaudia ia laloa loulou lasi. Anina lasi gaudia bamona ia laloa. Ena guba helarona ida ia hahegeregerea neganai ia gwau “idia be momoru.”—Filipi 3:8.
Paulo ena hereva ena anina be dahaka hari inai negai? Paulo hegeregerena, reana Keristani tauna ta ese gau haida ia dadaraia, Dirava ena hesiai do ia lao henia totona. Reana moni gaukarana mai ena pei bada ia rakatania, ful-taim hesiai gaukarana karaia totona. Eiava reana iena famili be taga taudia bona ia abia dae hereva momokanina be idia abia dae lasi dainai, moni dalanai idia durua lou lasi. Ta ese unai gau ia dadaraidia be namo, to ia lalodia loulou be namo lasi. Keristani tauna ese “kara gunadia” ia “laloaboio,” ia laloa momo lasi, badina be vaira negana namona ia naria noho.—Luka 9:62.
Paulo ena hereva ena anina be reana dala idauna ta ai ita laloa diba. Bema Keristani tauna ta be Dirava ia do diba lasi neganai ia kara dika, ia be edena bamona? (Kolose 3:5-7) Eiava Keristani tauna ai ia lao murinai bema kara dika rohorohona ta ia karaia bena kongregesen ese ia matahakani henia, ia be edena bamona? (2 Korinto 7:8-13; Iamesi 5:15-20) Bema ia helalo-kerehai momokani bona ena kara ia haidaua vadaeni, ‘Dirava ese ena kara dika ia huria goeva vadaeni.’ (1 Korinto 6:9-11) Ia vara gauna be ia ore vadaeni. Ia karaia karana be reana do ia laloaboio lasi—momokani, aonega dalana be ia vara gauna amo diba ia abia bena unai kara dika do ia karaia lou lasi. To, dala ta ai ia “laloaboio” diba, anina be sibona do ia gwauraia dika loulou lasi. (Isaia 65:17 itaia.) Iesu ena boubou dainai Dirava ese iena dika ia gwauatao, unai dainai ia ese ena kara gunadia ia laloa momo lasi.
Filipi 3:13, 14 ai, Paulo be sibona ia gwauraia heau helulu tauna, ‘vaira neganai gaudia ia goadalaia,’ kwalimu ahuna do ia abia totona. Heau helulu tauna be vairana kahana ia itaia noho, murina kahana ia itaia lasi. Unai hegeregerena, namona be Keristani tauna ese nega vairai do ia abia hahenamodia ia laloa noho, ia rakatania gaudia ia laloa lasi. Paulo be ma ia gwau: “Bema umui haida emui laloa be idau, Dirava ese emui lalona do ia hadiaria diba.” (Filipi 3:15) Unai dainai, Dirava oi noia oi do ia durua unai bamona do oi laloa totona. Emu darana be Dirava ena lalohadai, Baibel lalonai idia noho lalohadaidia, amo oi hahonua. (Filipi 4:6-9) Iehova ese oi ia lalokau henia dalana bona ia dainai oi abia hahenamodia oi lalohadailaia. (1 Ioane 4:9, 10, 17-19) Bena, Iehova ese ena lauma helaga amo oi do ia durua, oi rakatania vadaeni gaudia do oi laloa momo lasi totona. To, Paulo hegeregerena, vaira negana namona do oi laloa noho.—Filipi 3:17.