“Murinai Idia Noho Gaudia” Itaia Lasi

“Tano makohia gauna ia dogoatao bona murinai idia noho gaudia ia itaia tauna, be ia hegeregere lasi Dirava ena Basileia totona.”​—⁠LUKA 9:62.

OI HAERELAIA DIBA, A?

Dahaka dainai ‘Lota ena adavana ita laloatao’ be namo?

Dahaka gau toi ita laloa loulou lasi be namo?

Edena dala ai Iehova ena orea ida ita heau diba?

1. Iesu ena sisiba be dahaka? Bona unai sisiba ena anina be dahaka?

“LOTA ena adavana umui laloatao.” (Luka 17:32) Unai sisiba be Iesu Keriso ese lagani 2,000 bamona gunanai ia gwauraia, bona ita dekenai ia be mai anina bada danu. Unai sisiba ena anina be dahaka? Iuda taudia be Lota ena adavana dekenai ia vara gauna idia diba. Ia bona ena adavana bona natudia be Sodoma amo idia heau lalonai, ia ese Iehova ena sisiba ia dadaraia bona ia giroa dainai, damena nadi ai ia lao.​—⁠Genese 19:17, 26 duahia.

2. Dahaka dainai Lota ena adavana ia giroa? Ia kamonai lasi dainai dahaka ia vara?

² Dahaka dainai Lota ena adavana ia giroa? Reana ia giroa badina ia abia dae lasi Sodoma be Dirava ese do ia hadikaia ore. Eiava ia araia noho hanua ia ura itaia. Reana ena abidadama be ia manoka. Eiava ia ura Sodoma ai ia rakatania kohu totona do ia giroa lou. (Luka 17:31) Murinai idia noho gaudia ia itaia ena badina be ita diba lasi, to ia be Dirava ia kamonai henia lasi dainai ia mase. Mani oi laloa, Sodoma bona Gomora taudia idia mase dinana ai, ia danu ia mase. Unai dainai Iesu ia gwau: “Lota ena adavana umui laloatao.”

3. Edena dala ai Iesu ia hahedinaraia murinai idia noho gaudia ita itaia be aonega karana lasi?

³ Bema Lota ena adavana be murinai idia noho gaudia ia itaia lasi, do ia mauri. Unai hegeregerena, namo lasi iseda murinai idia noho gaudia ita itaia o laloa momo. Iesu ese ia murinai ia ura raka tauna dekenai unai ia herevalaia. Unai tauna ia gwau ia ura ena ruma bese taudia ia bamahuta henidia guna, to Iesu ia gwau: “Tano makohia gauna ia dogoatao bona murinai idia noho gaudia ia itaia tauna, be ia hegeregere lasi Dirava ena Basileia totona.” (Luka 9:62) Iesu be unai tauna dekenai ia hereva auka, a? Lasi, badina ia diba unai tauna be ia ura lasi Keristani maduna ia huaia dainai ekskius idauidau ia gwauraia. Iesu ia gwau ena maduna Dirava dekenai ia dadaraia tauna be “murinai idia noho gaudia” ia itaia. Tano makohia tauna be ia gaukara noho lalonai ia giroa bona murina kahana ia itaia o tano makohia gauna ia atoa diho bona murina kahana ia itaia diba. To bema unai ia karaia loulou, ena gaukara do ia karaia namonamo lasi.

4. Dahaka ita itaia noho be namo?

⁴ Namo lasi guna negadia ita laloa, to namona be vaira negana ita itaia noho. Aonega Herevadia 4:25 ia gwau: “Oiemu matana dekena amo vairana kahana do oi itaia noho. Mai laloa maoromaoro danu gau do oi itaia noho.”

5. Dahaka dainai murinai idia noho gaudia ita itaia lasi be namo?

⁵ Ita ura lasi murinai idia noho gaudia ita itaia. Dahaka dainai? Badina ita be “dina gabediai” ita noho. (2 Tim. 3:1) Kahirakahira Dirava be hanua dikadia rua sibona do ia hadikaia lasi, to tanobada ibounai do ia hadikaia ore. Lota ena adavana ita tohotohoa lasi totona, dahaka ese ita do ia durua? Iseda murinai idia noho bona ita ura ita giroa bona itaia gaudia ita diba be namo. (2 Kor. 2:11) Unai gaudia be dahaka bona edena dala ai ita dadaraidia diba?

GUNA NEGADIA NAMODIA

6. Dahaka dainai guna negadia ita laloa lasi be namo?

⁶ Reana ita laloa guna negadia ai mauri be namo herea. To unai be lalohadai kererena. Reana, do ita gwau guna ita moale bona ita davaria hekwakwanai be dika momokani lasi. Bona ita laloa unai nega ai mauri be namo herea. Reana do ita ura guna negadia dekenai ita giroa lou. To, Baibel ia gwau: “Do oi hereva lasi inai bamona, ‘Badina dahaka nega gunadia be namo, to inai nega be ia dika noho?’ Badina inai bamona henanadai be aonega lasi.” (Had. 7:10) Dahaka dainai unai bamona lalohadai be dika?

7-9. (a) Aigupito ai Israela taudia dekenai dahaka ia vara? (b) Dahaka dainai idia moale? (c) Dahaka dainai idia maumau?

⁷ Mose ena negai Israela taudia dekenai ia vara gauna mani ita laloa. Matamanai, Israela taudia be vadivadi taudia bamona Aigupito dekenai idia noho. To Iosepa ia mase murinai, Farao matamata ese gaukara biagua taudia ia abia hidi, bona idia ese mai dagedage ida Israela taudia idia naria. (Eso. 1:11) Gabeai, Farao ese Aigupito taudia ia oda henidia Israela natudia memero idia hamasea totona, badina ia ura lasi Israela taudia idia momo herea. (Eso. 1:15, 16, 22) Unai dainai Iehova ese Mose ia hamaoroa: “Lauegu bese taudia edia hisihisi Aigupito dekenai lau itaia vadaeni. Edia biagudia ese hekwarahi idia henidia noho dainai idia taitai, be lau kamonai vadaeni, badina be edia hisihisi lau diba vadaeni.”​—⁠Eso. 3:7.

⁸ Mani oi laloa, Israela taudia be Aigupito idia rakatania neganai, idia moale bada, ani? Idia itaia Iehova ese hekokoroku tauna Farao bona ena taunimanima latanai Hisihisi Ten ia mailaia. (Esodo 6:1, 6, 7 duahia.) Unai murinai, Aigupito taudia ese Israela taudia idia ruhaia. Bona idia oda henidia Aigupito do idia rakatania haraga, bona idia dekenai golo bona siliva momo idia henia. Baibel ia gwau Dirava ena taunimanima ese “Aigupito taudia edia kohu idia kokia lao.” (Eso. 12:33-36) Dokonai, Israela taudia idia itaia Iehova ese Farao bona ena ami be Davara Kakakakana ai ia hamasedia neganai, idia moale bada. (Eso. 14:30, 31) Iehova ese ia karaia gaudia ibounai idia itaia dainai, edia abidadama ia goada be namo!

⁹ To, Iehova ese idia ia ruhaia bona nega sisina murinai idia maumau matamaia. Dahaka dainai? Aniani totona! Iehova ese ia henidia aniani idia ura lasi bona idia maumau, idia gwau: “Aigupito ita noho neganai, gwarume ita ania be davana lasi, ani? Bona kiukamba, bona meloni bona liki bona oniani bona galiki be momo herea, ani? To harihari iseda goada ia ore, aniani gauna ta be lasi, inai mana sibona mo ita itaia noho.” (Num. 11:5, 6) Edia lalohadai ia kerere, badina idia ura igui hesiai gaukara idia karaia tanona dekenai idia giroa lou! (Num. 14:2-4) Israela taudia be guna negadia idia laloa dainai, Iehova be idia dekenai ia badu.​—⁠Num. 11:10.

10. Israela taudia dekenai ia vara gauna amo dahaka ita dibaia?

¹⁰ Unai sivarai amo dahaka ita dibaia? Hekwakwanai idia vara neganai, namo lasi ita gwau, guna hereva momokani ita do diba lasi neganai, mauri be namo herea. Momokani, nega gunadia namodia haida ita laloa diba bona idia amo gau haida ita dibaia. To namona be ita laloa maoromaoro, badina guna negadia ai dika gaudia haida idia vara danu. Bema lalohadai maorona ita abia, hari ita noholaia maurina do ita moalelaia, bona guna negadia do ita laloa momo lasi.​—⁠2 Petero 2:20-22 duahia.

ITA RAKATANIA GAUDIA

11. Haida be idia rakatania gaudia be edena bamona idia laloa?

¹¹ Haida be idia rakatania gaudia haida idia laloa lou dainai idia lalohisihisi. Reana unai nega ai edukeisen badana, dagi badana, o moni momo oi abia diba, to emu lalona oi hadaia unai gaudia do oi tahua lasi. Tadikaka taihu momo be guna moni gaukara namona idia karaia. Haida be mai edia bisinesi, haida be ane abia taudia, iunivesiti edia profesa taudia, o spot gadara taudia, to unai ibounai idia rakatania. Hari lagani momo idia hanaia vadaeni, to dokona ia do ginidae lasi. Unai dainai reana nega haida oi laloa, ‘bema unai gaudia lau rakatania lasi, hari egu mauri be do ia namo.’

12. Paulo ese ia rakatania gaudia be edena bamona ia laloa?

¹² Aposetolo Paulo be Keriso ena hahediba tauna ai ia lao totona, gau momo ia rakatania. (Fili. 3:4-6) Ia rakatania gaudia be edena bamona ia laloa? Ia gwau: “Guna lau laloa bada gaudia be mai egu ura ida lau rakatania, Keriso dainai.” Dahaka dainai unai bamona ia hereva? Filipi 3:7, 8 ia gwau: “Egu Lohiabada Keriso Iesu ena diba hereadaena dainai, lau laloa gau ibounai be anina lasi. Oibe, ia dainai lau ese gau ibounai lau rakatania bona lau laloa unai gaudia be momoru sibona, unai amo Keriso lau abia diba.”a Tau ta be momoru ia negea neganai, gabeai unai gaudia dainai ia lalohisihisi lasi. Unai hegeregerena, Paulo be ia rakatania gaudia dainai ia lalohisihisi lasi. Ia diba idia be anina lasi.

13, 14. Edena dala ai Paulo ena haheitalai ita tohotohoa diba?

¹³ Bema ita be guna ita rakatania gaudia ita laloa momo, dahaka ita karaia be namo? Namona be Paulo ena haheitalai ita tohotohoa. Bona hari oi abia hahenamo oi laloa; Oi be Iehova ena turana, bona ia diba oi be abidadama tauna. (Heb. 6:10) Iehova ese hari ita dekenai ia henia gaudia bona nega vaira do ia henia gaudia, be tanobada gaudia ta ese ia hereaia diba lasi.​—⁠Mareko 10:28-30 duahia.

¹⁴ Iehova ita hesiai henia noho totona, ita ia durua diba gauna ma ta be Paulo ese ia herevalaia. Ia gwau: “Lau rakatania gaudia lau laloaboio bona vaira gaudia totona lau hekwarahi noho.” (Fili. 3:13) Paulo ia gwau gau rua ita karaia be mai anina bada. Gau ginigunana be, ita rakatania gaudia do ita laloaboio. Anina be iseda goada bona nega bada ita halusia kava lasi unai gaudia ita laloa totona. Gau iharuana be, namona be vaira gaudia totona ita hekwarahi. Anina be heau helulu tauna bamona, iseda vairanai ia noho laini sibona ita raraia, bona ita heau goadagoada ela bona dokona.

15. Dahaka dainai idaunegai idia noho abidadama taudia edia haheitalai ita laloa be namo?

¹⁵ Idaunegai bona hari inai negai, Dirava idia hesiai henia abidadama taudia edia haheitalai mani ita laloa. Edia haheitalai ese oi do idia hagoadaia vaira gaudia oi laloa totona. Hegeregere, bema Aberahamo bona Sara be Uru hanuana idia laloa momo, ‘dala ia noho idia giroa lou totona.’ To, idia giroa lou lasi. (Heb. 11:13-15) Mose be nega ginigunana Aigupito amo ia heau neganai, gau momo ia rakatania. To, Israela taudia be Aigupito idia rakatania neganai, gau momo idia rakatania lasi. Baibel ese Mose be inai bamona ia herevalaia, ia gwau: “Horoa Tauna dainai ia abia hemarai be dava bada gauna bamona, bona unai ese Aigupito ena dava bada gaudia ia hereaia, bona do ia abia davana namona sibona ia laloa.”​—⁠Heb. 11:26.

GUNA ITA DAVARIA HEKWAKWANAI

16. Guna ita davaria hekwakwanai be edena bamona ita lalodia?

¹⁶ Reana guna hekwakwanai metaudia haida ita davaria. Hegeregere, ita karaia kerere o kara dika ita laloa momo bona ita lalometau. (Sal. 51:3) Ita abia sisiba aukana dainai reana ita badu o hemarai noho. (Heb. 12:11) Reana ta be ita dekenai ia karaia kara dika ita laloa momo. Eiava ena be unai ia karaia lasi, to ita be ia dekenai lalohadai kererena ita abia bona ita lalohisihisi. (Sal. 55:2) Unai gaudia ita laloa lasi totona, dahaka ese ita ia durua diba? Mani gau toi ita herevalaia.

17. (a) Dahaka dainai Paulo ia mamia ia be maragi herea? (b) Dahaka ese Paulo ia durua dainai ena hesiai gaukara ia rakatania lasi?

¹⁷ Kerere gunadia. Paulo ia mamia ‘helaga taudia ibounai huanai ia maragi momokani tauna amo ia be maragi herea.’ (Efe. 3:8) Dahaka dainai unai bamona ia laloa? Badina guna ia ese Dirava ena taunimanima ia dagedage henia. (1 Kor. 15:9) Reana guna ia dagedage henia tadikaka taihu ia hedavari henia neganai, ia hemarai. To, ia ura lasi unai lalohadai ese ena hesiai gaukara ia hadikaia. Unai dainai, Dirava ese ia dekenai ia hahedinaraia hebogahisi hereadaena ia laloa loulou. (1 Tim. 1:12-16) Unai dainai ia moale bona ena hesiai gaukara ia rakatania lasi. Paulo ia gwau ia ura murinai idia noho gaudia ia laloaboio neganai, guna ia karaia kereredia ia herevalaia danu. Momokani, guna ita karaia kerere ita haidaua diba lasi, unai dainai bema unai kerere ita lalodia loulou, iseda nega bona goada ita haorea kava unai. To namona be Iehova ese ita dekenai ia hahedinaraia hebogahisi hereadaena ita laloa, bona iseda goada ita gaukaralaia ia ita hesiai henia totona.

18. (a) Dahaka do ia vara bema ita abia sisiba aukana ita laloa loulou? (b) Edena dala ai Solomona ena sisiba ita badinaia diba?

¹⁸ Sisiba aukana. Reana guna ita abia sisiba ita laloa loulou neganai, ita lalohisihisi, badu, bona lalomanoka. (Heb. 12:5) Herevana unai sisiba ita dadaraia eiava ita abia dae bena gabeai ita manoka, unai ese ita do ia durua lasi. To, namona be Solomona ena sisiba ita badinaia, ia gwau: “Egu hadibaia hereva do oi dogoatao, do oi rakatania lasi. Inai diba do oi gimaia, badina ia be oiemu mauri ena badina.” (Aon. 4:13) Motuka taria tauna ese dala ena taravatu ia badinaia hegeregerena, namona be sisiba ita abia dae, badinaia, bona vaira kahana sibona ita itaia.​—⁠Aon. 4:26, 27; Heberu 12:12, 13 duahia.

19. Edena dala ai Habakuku bona Ieremia edia abidadama ita tohotohoa diba?

¹⁹ Haida ese ita idia hahisia o lalohadai kerere ita abia. Nega haida reana ita be peroveta tauna Habakuku bamona ita laloa. Ia itaia metau bona hisihisi dainai Iehova ia guriguri henia. Ia laloparara lasi dahaka dainai Iehova be taunimanima edia kara gageva ia koua lasi. (Hab. 1:2, 3) To, namona be Habakuku ena abidadama ita tohotohoa, ia gwau: “Lau be Lohiabada Dirava dekenai, do lau moale bada noho, badina ia be lauegu Hamauria Tauna.” (Hab. 3:18) Ieremia danu be haheitalai namona, ia be Iehova ia naria kara ta ia karaia totona. Ieremia bamona, namona be Iehova, kota maoromaoro Diravana, ita abidadama henia, bona ita abia dae ia ese nega korikori ai gau ibounai do ia hamaoromaoroa.​—⁠Lal. 3:19-24.

20. Edena dala ai ita hahedinaraia ita be ‘Lota ena adavana ita laloatao’?

²⁰ Hari iseda negai gau namodia momo idia vara noho, bona kahirakahira gau ma haida do idia vara. Iehova ena orea be vaira kahana ia heau henia noho bona ena orea ida ita heau hebou be gau badana. Namona be Baibel ena sisiba ita badinaia bona vaira kahana sibona ita itaia noho, to murinai idia noho gaudia ita itaia lasi. Unai dala amo ita hahedinaraia ita be ‘Lota ena adavana ita laloatao’!

[Footnote]