Dirava Ena Hereva Oi Duahia Bona Momokani ai Ia Oi Hesiai Henia
“Lohiabada e, oiemu dala lau dekenai do oi hadibaia, bona lau be oiemu momokani lalonai do lau raka.”—SALAMO 86:11.
IEHOVA ese diari bona hereva momokani ia siaia lao. (Salamo 43:3) Ia ese diba be ita ia henia danu, iena Hereva, Baibel unai, do ita duahia, bona hereva momokani do ita dibaia totona. Inai magasin ena kopi ginigunana—July 1879 gauna—ia gwau: “Hereva momokani be palaoapalaoa maragina ta bamona tano gagaena lalonai. Lalohadai kereredia be ava dikadia bamona idia tubu namonamo bona hereva momokani idia koua hegege bona kahirakahira idia koua momokani. Bema oi ura hereva momokani oi davaria, namona be nega ibounai oi tahua. Bema oi ura iena hairai do oi itaia, lalohadai kereredia oi kokia, ava dikadia bona ava ginigini oi kokia bamona be gau badana. Bema oi ura hereva momokani oi abia, namona be oi tui diho oi dogoatao totona. Oi gwau lasi hereva momokani ena palaoapalaoa tamona sibona ia hegeregere oi dekenai. Bema palaoapalaoa tamona sibona ia hegeregere, ma palaoapalaoa haida idia vara danu be anina lasi. Idia oi gogoa hanaihanai, ma haida oi tahua.” Dirava ena Hereva duahia bona stadilaia karana ese ita ia durua, diba maorona do ita abia bona iena hereva momokani ai do ita raka.—Salamo 86:11.
2 Ierusalema ena magu be lagani 455 B.C.E. ai idia haginia lou, bena unai murinai hahelaga tauna Esera bona ma haida ese Dirava ena Taravatu be Iuda taudia dekenai idia duahia. Unai murinai Au Raurau Ruma Maragidia Ena Aria idia karaia mai edia moale ida, edia kara dika idia gwauraia hedinarai, bona “gwauhamata aukana” idia karaia. (Nehemia 8:1–9:38) Baibel ia gwau: “Idia ese taunimanima idia durua, bona Taravatu ena hereva ibounai ena anina idia hedinaraia namonamo.” (Nehemia 8:8) Diba taudia haida idia gwau Iuda taudia be Heberu gado idia diba namonamo lasi, unai dainai unai hereva be Aramia gado ai idia hahegeregerea. To unai siri ese unai gado ena anina ia herevalaia lasi. Esera bona ma haida ese Taravatu idia gwauraia hedinarai, taunimanima ese ena hakaua herevadia do idia diba bona do idia badinaia totona. Keristani bukadia bona heboudia danu ese Dirava ena Hereva ena ‘anina idia hahedinaraia.’ Bona elda dagina idia abia taudia, ‘hadibaia gaukara namona idia karaia diba taudia,’ danu ese.—1 Timoteo 3:1, 2; 2 Timoteo 2:24.
Noho Daudau Hahenamodia
3 Keristani ruma bese taudia ese Baibel idia duahia hebou neganai, noho daudau hahenamodia idia abia diba. Idia be Dirava ena taravatu idia dibaia bona hereva momokani hahediba herevadia dekenai, peroveta herevadia dekenai, bona ma gau haida dekenai diba idia abia danu. Baibel ena kahana ta idia duahia murinai, ruma bese kwarana be reana do ia henanadai, ia gwau: Inai ena anina ita dekenai be dahaka? Edena dala ai ia be mai anina Baibel ena hahediba herevadia ma haida dekenai? Inai hereva be sivarai namona harorolaia gaukarana ai edena bamona ita gaukaralaidia diba? Ruma bese ese Baibel idia duahia neganai, bema Watch Tower Publications Index bukana eiava unai bamona buka ma haida idia gaukaralaia hereva ma haida tahua totona, lalo-parara bada do idia davaria diba. Insight on the Scriptures bukadia ruaosi danu idia gaukaralaia diba, heduru abia totona.
4 Hakaua herevadia Baibel amo ese ita idia hakaua diba. Danu, unai toretore helagadia duahia bona stadilaia karadia ese ‘ita dekenai aonega idia henia diba, ela bona hamauria do ita davaria.’ (2 Timoteo 3:15) Bema dala ita kehoa Dirava ena Hereva ese ita do ia hakaua totona, iena momokani ai do ita raka noho bona ita ura henia gaudia maorodia do ita abia. (Salamo 26:3; 119:130) To, namona be lalo-parara ita tahua, Mose ena gabu ia abia tauna Iosua ese ia tahua hegeregerena. Dirava ese ia hamaoroa “Taravatu Buka” be ena uduna ai do ia noho hanaihanai, bona dina ai bona hanuaboi ai do ia duahia. (Iosua 1:8) “Taravatu Buka” be ena uduna ai do ia noho hanaihanai, anina be nega ibounai Iosua ese unai buka ena hereva, taunimanima edia lalona hadiaria herevadia, be ma haida dekenai do ia hadibaia. Taravatu be dina ai bona hanuaboi ai do ia duahia, anina be Iosua ese unai hereva do ia laloa dobu, bona do ia stadilaia. Aposetolo Paulo ese Timoteo ia hagoadaia ia ese ena kara, ena hesiai gaukarana, bona ena hahediba do ia ‘laloa namonamo’—do ia laloa dobu. Timoteo be Keristani elda tauna ta dainai, namona be ia naria namonamo, ena kara be haheitalai namona bona ia ese Baibel ena hereva momokanidia ia hahedibalaia totona.—1 Timoteo 4:15, NW.
5 Dirava ena hereva momokani be dava bada gauna ta bamona. Ta ese do ia davaria totona, namona be ia geigei bamona, Baibel lalonai ia tahua loulou. Bema mero maragina ta bamona ita ese Hadibaia Tauna Hereadaena ena amo diba ita tahua, aonega do ita abia bona Dirava gari henia mai hemataurai ida karana do ita lalo-pararalaia. (Aonega Herevadia 1:7; Isaia 30:20, 21) Momokani, namona be Baibel amo hereva iboudiai ita hamomokania. (1 Petero 2:1, 2) Iuda taudia Berea ai be “namo, Tesalonika taudia bamona lasi. Paulo ena hereva idia kamonai, bona idia ura henia danu. Dina ibounai Buka Helaga idia tahua, inai hereva be ia momokani o lasi.” Berea taudia be unai bamona idia kara dainai, Paulo ese ia hanamodia, ia gwau henidia lasi.—Kara 17:10, 11.
6 Iesu ese Iuda taudia haida ia hamaoroa, ia gwau: “Umui ese Buka Helaga dekenai umui tahua, badina be umui laloa inai hereva lalonai mauri hanaihanai do umui davaria. To gauna be, inai hereva ese lau idia gwauraia noho! To umui be umui ura lasi lau dekenai do umui mai, mauri abia totona.” (Ioane 5:39, 40) Buka Helaga ai idia tahua mai edia lalohadai maorona ida—ena hereva ese mauri dekenai do ia hakaudia totona. Momokani, Buka Helaga lalonai be Mesia perovetalaia herevadia; idia hahedinaraia Iesu ena amo mauri idia abia diba. To Iuda taudia ese idia dadaraia. Unai dainai Buka Helaga idia tahua karana ese ia durudia lasi.
7 Iseda lalo-parara Baibel ena hereva dekenai ita habadaia totona, Dirava ena lauma, anina be ena gaukara siahuna, ese ita ia hakaua be namo. “Lauma Helaga ese gau ibounai ia tahua noho, Dirava ena laloa dobu gaudia danu,” edia anina hahedinaraia totona. (1 Korinto 2:10) Keristani taudia Tesalonika ai ese peroveta herevadia idia kamonai neganai, namona be ‘hereva ibounai idia laloa namonamo, idia be Dirava dekena amo idia mai o lasi.’ (1 Tesalonika 5:20, 21) Paulo ese Tesalonika taudia ia tore henidia neganai (lagani 50 C.E. bamona ai), Greek Revarevadia tamona ia noho, Mataio ese ia torea Evanelia Bukana unai. Unai dainai Tesalonika taudia bona Berea taudia ese hereva ibounai idia diba toho dalana be Heberu Revarevadia, Greek gado ai idia torea hanai herevadia Septuagint Baibel lalonai, idia tahua. Buka Helaga idia duahia bona idia stadilaia be namo, bona ita danu be unai bamona ita karaia be namo.
Mai Anina Bada Taunimanima Iboudiai Dekenai
8 Namona be elda dagina idia abia taudia ese Baibel idia diba momo. Namona be ‘hadibaia gaukara namona idia karaia diba’ bona ‘hereva momokani, ita abidadama henia bona ita hadibaia gauna, idia badinaia momokani.’ Ekalesia gunalaia tauna Timoteo ese ‘hereva momokani ia hadibaia maoromaoro’ be mai anina bada. (1 Timoteo 3:2; Tito 1:9; 2 Timoteo 2:15) Ena be ena tamana be Keristani tauna ta lasi, to iena sinana, Eunike, bona ena tubuna hahinena Loi ese ia maragi negana amo revareva helagadia bona “abidadama momokani” be ia dekenai idia hadibaia. (2 Timoteo 1:5; 3:15) Namona be tama mai edia abidadama ese edia natudia dekenai ‘Lohiabada ena hadibaia hereva idia hadibaia,’ bona bema idia be elda taudia, ‘edia natudia ese idia kamonai henidia, idia lebulebu lasi, bona Iesu idia abidadama henia’ be gau badana. (Efeso 6:4; Tito 1:6) Herevana iseda noho be edena bamona, to namona be ita diba Dirava ena Hereva ita duahia, ita stadilaia, bona ita badinaia be mai anina bada.
9 Namona be Keristani taudia ma haida ida ita hebou bona Baibel ita stadilaia hebou. Paulo ia ura Keristani taudia Tesalonika ai ese iena sisiba do idia herevalaia hebou. (1 Tesalonika 4:18) Iseda lalo-parara hereva momokani dekenai do ita habadaia totona, dala namona be abidadama taudia ma haida ida Baibel ita tahua hebou. Inai aonega herevana be momokani: “Tau ta ese ma tau ta dekena amo, diba ia davaria noho, auri ta ese ma auri ta ia segea noho bamona.” (Aonega Herevadia 27:17) Bema auri tulu ta idia gaukaralaia loulou lasi bona idia segea lasi, do ia raraka. Unai hegeregerena, namona be ita hebou loulou bona iseda diba, Dirava ena Hereva momokani ita duahia, ita stadilaia, bona ita laloa dobu karana amo ita abia dibana, do ita herevalaia heheni, unai amo ita segea heheni bamona. (Heberu 10:24, 25) Inai danu, unai be lauma diarina ena namo ita abia diba dalana ta.—Salamo 97:11; Aonega Herevadia 4:18.
10 Baibel ita stadilaia lalonai, Dirava ita noia diba, salamo torea tauna ese ia noia hegeregerena, ia gwau: “Oiemu diari bona oiemu hereva momokani, be mani oi siaia mai, idia ese dala maorona lau dekenai do idia hedinaraia.” (Salamo 43:3) Bema ita ura Dirava ese ita do ia lalo-namo henia, namona be iena hereva momokani ai ita raka. (3 Ioane 3, 4) Unai ena anina ta be iena taravatu ita badinadia bona iena hesiai ita lao henia mai eda abidadama bona mai eda momokani ida. (Salamo 25:4, 5; Ioane 4:23, 24) Namona be momokani ai Iehova ita hesiai henia, iena Hereva ese ia hahedinaraia bona “hesiai tauna mai ena kamonai, bona mai ena kara maoromaoro” ena bukadia ese idia gwauraia hedinarai hegeregerena. (Mataio 24:45-47) Unai dainai namona be Baibel ita dibaia maoromaoro. Vadaeni, Dirava ena Hereva ita duahia bona ita stadilaia dalana maorona be dahaka? Genese karoa 1, siri 1, amo ita duahia matamaia ia lao bona buka 66 iboudiai ita duahia be namo, a? Oibe, namona be Keristani taudia, idia be mai edia Baibel edia gado ai taudia, iboudiai ese Genese amo ela bona Apokalupo idia duahia. Bona namona be inai dainai Baibel bona Keristani bukadia ita duahia: Iseda lalo-parara Baibel ena hereva momokani ibounai dekenai ita habadaia, Dirava ese “hesiai tauna mai ena kamonai” amo ia halasia hegeregerena.
Dirava Ena Hereva Oi Duahia Hedinarai
11 Ita sibona ita noho neganai reana iseda lalona ai hereva ita duahia. To, idaunegai, taunimanima be idia sibodia idia noho bona idia duahiduahi neganai, hereva idia duahia hedinarai. Etiopia eunuko tauna be ena kariota ai ia heau lalonai, evanelia tauna Filipo ese ena gadona ia kamonai, Isaia peroveta tauna ena buka ia duahia. (Kara 8:27-30) Heberu gado herevana ta, “duahia” be ia ida idia hahegeregerea herevana, ena anina ginigunana be “boiria.” Unai dainai, matamana ai edia lalona ai hereva idia duahia neganai edia anina idia lalo-pararalaia lasi taudia bema idia ura hereva ta ta iboudiai do idia duahia hedinarai, namona be ta ese ia koudia lasi. Gau badana be Dirava ena Hereva, idia torea gauna, ita duahia karana amo hereva momokani ita dibaia.
12 Keristani heboudia ai Baibel idia duahia hedinarai karana amo namo ita davaria. Aposetolo Paulo ese ia ida ia gaukara hebou tauna, Timoteo, ia hamaoroa, ia gwau: “Buka Helaga taunimanima dekenai do oi duahia, sisiba goada do oi henidia, bona hadibaia gaukara do oi goadalaia noho.” (1 Timoteo 4:13) Paulo ese Kolose taudia ia hamaoroa, ia gwau: “Inai revareva umui emui huana dekenai umui duahia murinai, Laodikea ekalesia orea dekenai do umui siaia, idia danu do idia duahia. Bona revareva ta Laodikea Keristani taudia dekenai lau siaia vadaeni. Unai revareva danu do umui duahia.” (Kolose 4:16) Bona Apokalupo 1:3 ia gwau: “Inai buka ia duahia [“duahia hedinarai,” NW] tauna be do ia moale. Ma danu, inai buka ena peroveta hereva idia kamonai henia, bona iena hadibaia hereva idia badinaia taudia be do idia moale. Badina inai gaudia ibounai do idia vara ena nega be ia kahirakahira vadaeni.” Unai dainai, namona be pablik tok henia tauna ese Baibel siridia be kongregesen taudia dekenai ia duahia, iena hereva hamomokania totona.
Hereva Ta Ta Stadilaia Karana
13 Hereva ta ta stadilaia karana be iseda diba Baibel ena hereva momokani dekenai ita habadaia dalana namona. Konkodens bukadia lalonai, Baibel ena hereva ta ta be alfabet hegeregerena idia torea, idia hahedinaraia edena buka, karoa, bona siri lalodiai idia noho. Bema unai bamona bukadia ita gaukaralaia diba, hereva ta ena Baibel siridia ita davaria haraga diba. Bona Baibel ena Toretore ia havaraia Tauna ese sibona ena hereva ia hakoikoia lasi dainai, unai siri idauidau idia hamomokania heheni. Iena lauma helaga amo tatau 40 bamona ia hasiahua, lagani 1,600 bamona lalodiai Baibel do idia torea totona, bona lagani momo herea lalodiai taunimanima ese idia hamomokania vadaeni ena hereva ta ta stadilaia karana be dala namona hereva momokani dibaia totona.
14 Baibel ena hereva momokani ita laloa bada ese ita ia ha-uraia Keristani Greek Revarevadia bona Heberu Revarevadia ita duahia bona ita stadilaia be namo. Unai ese do ia hahedinaraia edena dala ai Greek Revarevadia be mai anina Dirava ena palani dekenai, bona Heberu Revarevadia edia peroveta herevadia edia anina do ia hahedinaraia. (Roma 16:25-27; Efeso 3:4-6; Kolose 1:26) Heduru gauna badana ta be New World Translation of the Holy Scriptures Baibel. Dirava ena hesiai taudia, idia gwauhamata vadaeni taudia, ese idia hegaegaelaia. Idia ese diba matamata Baibel ena revareva gunadia dekenai bona idia torea negadia edia toana bona unai negai taudia edia kiki daladia dekenai, idia gaukaralaia. Danu, Iehova ese “hesiai tauna mai ena kamonai, bona mai ena kara maoromaoro” ena amo ia henia Baibel stadi bukadia be mai anina bada.
15 Taunimanima haida be reana idia gwau, ‘Emui buka lalodiai Baibel ena hereva tausen tausen umui torea hanai, to badina be dahaka Baibel ena kahana idauidau amo umui abidia?’ Baibel stadi bukadia ese Baibel bukadia 66 edia kahana idauidau herevadia idia gwauraia, unai amo Dirava ese ena lauma amo ia hasiahua taudia momo edia hereva idia gaukaralaia, hahediba herevana ta hamomokania totona. Iesu ese unai hadibaia dalana ia gaukaralaia. Ororo ai ia haroro neganai, hereva idauidau 21 be Heberu Revarevadia amo ia gwauraia. Unai haroro herevana lalonai, hereva toi be Esodo amo, rua be Levitiko amo, ta be Numera amo, 6 be Deuteronomi amo, ta be King Taudia Iharuana amo, hani be Salamo amo, toi be Isaia amo, bona ta be Ieremia amo. Unai kara amo, Iesu ese ‘hereva ta ia hamomokania kava toho,’ a? Lasi, badina be ‘iena hadibaia hereva be taravatu hadibaia taudia edia bamona lasi. Ia ese taunimanima ia hadibaia mai siahu danu.’ Unai be momokani, badina be Iesu ese ena hahediba herevadia be Dirava ena Hereva, idia torea vadaeni herevana, ena siahu amo ia hamomokania. (Mataio 7:29) Aposetolo Paulo danu be unai bamona ia karaia.
16 Roma 15:7-13 lalonai, Paulo ese Heberu Revarevadia edia kahana toi amo hereva ia gwauraia—Taravatu bukana, Peroveta taudia edia buka, bona Salamo bukana. Ia hahedinaraia Iuda taudia bona Iuda Lasi taudia ese Dirava do idia hanamoa, bona Keristani taudia ese taunimanima bese iboudiai amo idia abia dae be namo. Paulo ia gwau: “Umui ta ta do umui abia dae, Keriso ese umui ia abia dae hegeregerena, taunimanima ese Dirava do idia hanamoa totona. Badina be umui lau hamaoroa, Keriso be Iuda taudia durua bona hanamoa totona ia mai, bona ia mai be Dirava ena hereva momokani do ia hedinaraia totona. Inai anina be, Dirava ese iena gwauhamata Iuda sene taudia dekenai ia hamomokania vadaeni. Bona Iuda lasi bese idauidau taudia ese danu Dirava idia hanamoa diba, iena bogahisihisi dainai, Buka Helaga dekenai [Salamo 18:49 ai] ia torea bamona, ia gwau: ‘Unai dainai Iuda lasi taudia edia huanai oi do lau hanamoa.’ . . . Ma [Deuteronomi 32:43 ai] ia gwau: ‘Iuda lasi taudia e, iena abia hidi besena danu do umui moale hebou.’ Ma [Salamo 117:1 ai] Buka Helaga ia gwau, ‘Umui Iuda lasi taudia ibounai e, Lohiabada do umui hanamoa. Taunimanima ibounai e, Lohiabada do umui hanamoa.’ Ma Isaia [11:1, 10] danu ia gwau: ‘Iese ena bese dekena amo tau ta do ia hedinarai, bese idauidau edia lohia tauna do ia lao. Iuda lasi taudia ese ia do idia abidadama henia.’ Dirava be iseda abidadama ena badina korikori dainai ia dekenai ita naria noho. Ia ese umui emui abidadama dainai, moale momokani bona maino momokani do ia henia umui dekenai. Inai dainai umui ese Dirava ena nega namona umui naria dalana, be do ia tubu daekau noho, Lauma Helaga ena siahu dekena amo.” Unai dala amo, Paulo ese ia hahedinaraia siri idauidau be edena bamona ita gaukaralaia diba, Baibel ena hereva momokanidia hamomokania totona.
17 Aposetolo Petero ese Dirava ena lauma amo ia torea revarevana ginigunana lalonai be hereva idauidau 34, buka 10 amo—Taravatu bukana, Peroveta taudia edia buka, bona Salamo bukana unai. Iena revareva iharuana lalonai, Petero be hereva idauidau 6, buka toi amo ia gwauraia. Mataio ena Evanelia lalonai be hereva idauidau 122, Genese ela bona Malaki amo. Greek Revarevadia edia buka 27 lalodiai, hereva idauidau 320 be Genese ela bona Malaki amo idia torea hanai herevadia, bona hereva idauidau handred momo be Heberu Revarevadia edia hereva bamona. Iesu ena kara bona ena aposetolo taudia ese idia tohotohoa hegeregerena, Keristani taudia hari inai negai ese Baibel ena hereva ta idia stadilaia neganai, Baibel ibounai ena kahana idauidau amo hereva idia gwauraia. Unai be mai anina bada inai “nega ena dokona” lalonai, Heberu bona Greek Revarevadia edia hereva momo herea edia anina idia vara negana ai. (2 Timoteo 3:1) “Hesiai tauna mai ena kamonai” ese Baibel be unai bamona ia gaukaralaia ena buka lalodiai, to Dirava ena Hereva latanai hereva ta ia atoa kau lasi eiava ia amo hereva ta ia kokia lasi.—Aonega Herevadia 30:5, 6; Apokalupo 22:18, 19.
Nega Ibounai Momokani ai Oi Raka
18 Namona be hereva ta be Baibel amo ita kokia lasi, badina be Keristani hahediba herevadia iboudiai Dirava ena Hereva lalonai be “momokani,” “Sivarai Namona ena momokani.” Hahemauri do ita abia totona, gau badana be unai hereva momokani ita badinaia—ena dala ai ita “raka noho.” (Galatia 2:5; 2 Ioane 4; 1 Timoteo 2:3, 4) Keristani tomadihona be “hereva momokani ena dala” dainai, iena namo ita tahua totona ma haida ita durua karana amo, ita be ‘hereva momokani durua totona ita gaukara hebou’ taudia ai ita lao.—2 Petero 2:2; 3 Ioane 8.
19 ‘Hereva momokani ena dala dekenai do ita raka noho’ totona, namona be Baibel ita duahia bona Dirava ese “hesiai tauna mai ena kamonai” ena amo ia henia heduruna lauma dalana ai ita abia dae. (3 Ioane 4) Namona be unai bamona ita kara, ita sibona ese namo do ita abia totona bona do ita hegeregere, Iehova Dirava, Iesu Keriso, bona Dirava ena ura be ma haida dekenai do ita hadibaia totona. Bona namona be Iehova ita tanikiu henia, badina be iena lauma ese ita ia durua, iena Hereva ita lalo-pararalaia bona momokani ai ena hesiai lao henia karana ai ita kwalimu totona.
Emu Haere be Dahaka?
◻ Baibel duahia karana ena noho daudau hahenamodia haida be dahaka?
◻ Dahaka dainai Keristani taudia ma haida ida ita hebou Baibel stadilaia totona be namo?
◻ Dahaka dainai Baibel ena kahana idauidau amo hereva ita gwauraia be maoro?
◻ ‘Hereva momokani ena dala dekenai ita raka’ ena anina be dahaka, bona edena bamona ita karaia diba?
[Study Questions]
1. Inai magasin ena kopi ginigunana ese hereva momokani be edena bamona ia gwauraia?
2. Idaunegai Ierusalema ai Esera bona ma haida ese Dirava ena Taravatu be Iuda taudia dekenai idia duahia neganai, dahaka ia vara?
3. Baibel duahia karana amo dahaka hahenamo haida ita davaria diba?
4. Iosua 1:8 lalonai ia noho hahegani herevana be Iosua ese edena bamona ia badinaia be namo?
5. Dirava ena hereva momokani do ita davaria totona, dahaka ita karaia be namo?
6. Dahaka dainai Iesu ia gwau Buka Helaga tahua karana ese Iuda taudia haida ia durua lasi?
7. Iseda lalo-parara Baibel ena hereva dekenai ita habadaia totona, dahaka ita abia be namo, bona badina be dahaka?
8. Dahaka dainai elda dagina idia abia taudia ese Baibel idia diba momo be gau badana?
9. Dahaka dainai Keristani taudia ma haida ida ita hebou Baibel stadilaia totona be namo?
10. Hereva momokani ai ita raka ena anina be dahaka?
11, 12. Hebou lalodiai Baibel idia duahia hedinarai ena namo be dahaka?
13. Iseda diba Baibel ena hereva momokani dekenai ita habadaia dalana namona be dahaka, bona dahaka ese ita ia durua diba, Baibel siridia do ita davaria totona?
14. Heberu bona Keristani Greek Revarevadia stadilaia hebou karana ena namo be dahaka?
15. Edena bamona do oi hamomokania, Baibel ena kahana idauidau amo hereva ita gwauraia be namo?
16. Roma 15:7-13 ai, Paulo ese edena Baibel siridia ia gwauraia?
17. Daidia edia kara hegeregerena, Keristani taudia ese Baibel ibounai ena kahana idauidau amo hereva idia gwauraia?
18. Dahaka dainai ‘hereva momokani ena dala dekenai ita raka’ be namo?
19. Edena bamona ita be ‘hereva momokani ena dala dekenai ita raka noho’ diba?
[Picture on page 17]
Tama sina e, Buka Helaga be emui natudia dekenai umui hadibaia
[Picture on page 18]
Iesu be ororo ai ia haroro neganai, Heberu Revarevadia edia kahana idauidau amo hereva ia gwauraia