Duahia Taudia Edia Henanadai

Nega haida ita kamonai tadikaka idia hereva eiava idia guriguri idia gwau, Dirava ena Basileia do ia mai tanobada dekenai. Unai hereva be maoro, a?

Momokani, unai bamona idia gwauraia be Baibel ese ia herevalaia dalana lasi. Dirava ena Basileia be Guba gauna. Unai dainai, aposetolo Paulo be inai ia torea diba: “Lohiabada ese dika ibounai dekena amo lau do ia hamauria, bona iena Basileia guba dekenai lau do ia abia lao. Iena ladana do ita hanamoa hanaihanai be namo. Amen.”​—⁠2 Timoteo 4:18; Mataio 13:44; 1 Korinto 15:⁠50.

Basileia be lagani 1914 ai guba dekenai ia gini, bona idia havaraia lou tanobada Paradaisona dekenai o ma gabu ta dekenai do idia abia hanaia lao lasi. Iesu Keriso be Basileia ena King. Ia be King dainai, aneru edia ataiai ia be mai ena siahu. Unai dainai, iena lohia gabuna maorona be Dirava ena idiba kahana ai, guba dekenai. Horoa Keristani taudia be guba dekenai ia ida king taudia bona hahelaga taudia ai do idia lao.​—⁠Efeso 1:​19-​21; Apokalupo 5:​9, 10; 20:⁠6.

Vadaeni, unai anina be Lohiabada ena Guriguri lalonai ia noho noinoi herevana, “oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona,” be Dirava dekenai do ita gwauraia lasi, a? (Mataio 6:10) Lasi, unai guriguri be maoro bona ena anina be do bada herea.

Dirava ena Basileia be vaira negana ta ai tanobada do ia kara henia mai ena siahu ida, bona ita guriguri lalonai Lohiabada ena Guriguri herevadia bamona ita gwauraia neganai, ita be unai ita laloa. Haheitalai ta be, Daniela 2:44 ia peroveta ia gwau Basileia do ia “mai” bese edia basileia iboudiai do ia haorea bona tanobada do ia lohiaia. Apokalupo 21:2 be guba amo Ierusalema Matamatana ia diho mai ia herevalaia. Ierusalema Matamatana lalonai be horoa Keristani taudia 144,000, idia be Keriso ena adavana ai do idia lao. Danu, idia be Iesu ida Basileia lalonai do idia lohia. Unai dainai Apokalupo 21:2 be idia ese tanobada do idia laloa karana ia herevalaia, bona abidadama taudia dekenai hahenamo bada herea do idia havaraia.​—⁠Apokalupo 21:​3, 4.

Unai peroveta hereva hereadaedia edia anina idia do vara lasi lalonai, ita be Iesu ena hereva, “Oiemu Basileia ia mai,” hegeregerena ai Dirava ita guriguri henia be maoro. To do ita laloatao Basileia be ita noholaia tanobadana dekenai do ia mai lasi. Basileia gavamanina be guba dekenai, tanobada dekenai lasi.

[Picture Credit Line on page 31]

Earth: Based on NASA photo