Hanina Dekena amo, Do Idia Roho Daekau Ugava Bamona

LAGANI ima lalonai tau ta be Nazi dibura kamepa dekenai ia haheauka murinai, iena hemami be edena bamona? Ia lalohisihisi? Ia badu? Ia ura kerere davana ia henia, a?

Reana ia idau, to unai bamona tauna ta ia torea, ia gwau: “Guna lau laloa diba lasi dalana ai egu mauri ia hanamoa.” Dahaka dainai iena hemami be unai bamona? Ia gwau: “Atai Herea Tauna ena hanina henunai, roho mauri gabuna lau davaria, bona peroveta tauna Isaia ena hereva be momokani lau dekenai, ia gwau: ‘Lohiabada dekenai idia abidadama henia taudia ese, edia goada do idia hamatamataia lou. Idia be hanina dekena amo, do idia roho daekau, ugava bamona. . . . Idia be do idia heau, bona do idia moru lasi.’ ”​—⁠Isaia 40:31.

Nazi taudia ese unai Keristani tauna, iena tauanina idia dadabaia dikadika bona oi laloa diba lasi kara dika ia abia tauna, ena lauma o ena lalohadai mauri dekenai idia hadikaia diba lasi; laulau dalana ai manu bamona ia roho daekau. Davida hegeregerena, ena hekwakwanai amo hunia gabuna ia davaria Dirava ena “hanina” henunai. (Salamo 57:​1) Unai Keristani tauna be peroveta tauna Isaia ia gwauraia laulauna ia gaukaralaia; ena goada lauma dalanai bona guba dekenai ia roho daekau ugava ena goada ia hahegeregerea.

Nega haida emu hekwakwanai ese oiemu lalona idia hametaua, a? Bena oi danu do oi ura hehuni gabuna Atai Herea Diravana ena hanina henunai oi davaria, bona oi ese ‘hanina dekena amo, do oi roho diba, ugava bamona.’ Edena bamona unai ia vara diba ita lalo-pararalaia totona, namona be ugava, Baibel ia herevalaia momo manuna ta, ena kara ita tahua.

Ugava Pepe Henunai

Idia itaia manu ibounai amo, idaunegai taudia ese ugava idia laloa bada, iena siahu bona iena roho dalana dainai. Idaunegai ami oreadia momo, hegeregere Babulonia, Parasa, bona Roma be idia masi neganai, ugava toana ia noho pepena idia huaia loaloa. Kurese Badana ena ami be idia ta. Baibel ia peroveta ia gwau unai Parasa pavapavana be ugava manu bamona do ia diho mai ist kahana amo, Babulonia Basileiana ia ania totona. (Isaia 45:1; 46:11) Unai peroveta herevana idia torea lagani 200 murinai, Kurese ena ami taudia, mai edia ugava ena toana ia noho pepedia ida, be Babulonia ena hanua dekenai idia diho mai haraga, ugava be ia labana henia gauna dekenai ia diho haraga hegeregerena.

Vanegai, ami taudia, hegeregere Charlemagne bona Napoleon, bona tano haida, hegeregere United States bona Germany, ese ugava idia abia hidi edia tano ena toana ai ia lao totona. Israela taudia ese taravatu idia abia, ugava edia laulau eiava ma animal ta ena laulau idia hesiai henia lasi. (Esodo 20:​4, 5) To, Baibel ena toretore taudia be edia sivarai laulaulaia totona, ugava ena kara haida idia gwauraia. Unai dainai ugava, Baibel ia herevalaia momo manu ta, be aonega, Dirava ena henari, bona haragaharaga karana idia laulaulaia totona idia gaukaralaia.

Ugava Ena Matana

Ugava ena matana idia goada herea dainai, gunaguna ema bona hari taunimanima momo ese idia herevalaia. Ena be golo ugava ta ena metau be nega momo kilogram ima ia hanaia lasi, to iena matana ena bada bona goada ese tau ta ena matana ia hanaia momokani. Iehova be Iobu dekenai ugava ena aniani tahua dalana namona ia kikilaia neganai, ia gwau: “Iena matana be daudau dekenai ia negea lao.” (Iobu 39:​27, 29) Alice Parmelee be ena buka All the Birds of the Bible lalonai ia gwau, “ugava ta be kilomita ima ataiai amo, gohu ta dekenai ia mase vadaeni bona ia hure gwarume ta ia itaia, bona maoromaoro ia diho haraga unai gabu tamona dekenai. Unai ugava ese gau maragina ta be tau ta ia itaia diba lasi daudauna amo ia itaia sibona lasi, to kilomita ima ia roho diho neganai, unai gwarume ia raraia noho diba.”

Ugava ena matana idia goada herea dainai, ia be aonega, Iehova ena kara badadia ta, ia laulaulaia namonamo. (Esekiela 1:​10; Apokalupo 4:7 itaia.) Dahaka dainai ia be laulau namona ta? Aonega ena anina ta be, hari iseda kara be do ia havaraia gaudia ita laloa diba. (Aonega Herevadia 22:⁠3) Ugava ese gabu daudaudia ia itaia diba dainai, daudau dekenai ia noho dikana ta ia itaia bona unai dika ia reaia diba. Ia be Iesu ena parabole ta ena aonega tauna bamona. Ia itaia medu bada herea be reana do ia diho dainai, iena ruma be nadi dekenai ia haginia. (Mataio 7:​24, 25) Spain gado ai, bema tau ta oi gwauraia ia be ugava bamona, ena anina be ia be mai ena lalo-parara bada o mai ena aonega.

Bema nega ta ugava kahirakahira dekenai oi noho, namona be iena matana gaukaralaia dalana oi itaia. Nega sisina lalonai oi do ia itaia lasi; to oiemu toana ibounai do ia tahua namonamo. Unai hegeregerena, aonega tauna ese gau ta ena kahana ibounai do ia tahua namonamo guna, bena iena hemami dainai lasi, to ia itaia gaudia dainai iena lalona do ia haidaua. (Aonega Herevadia 28:26) Ugava ena matana goadadia be Dirava ia henia aonega ia laulaulaia namonamo hegeregerena, iena roho dalana namona danu be Baibel toretore taudia ese idia gaukaralaia.

“Ugava Ena Roho Dalana Guba Dekenai”

“Ugava ena roho dalana guba dekenai” ita laloa bada badina ia roho neganai ia heau haraga, bona toana be ia hekwarahi lasi, dala ia abia hidi guna lasi, bona edeseniai ia roho vadaeni oi itaia diba lasi. (Aonega Herevadia 30:18) Ugava ena heau haraga karana be Lalohisihisi ena Ane 4:​19 ai ia herevalaia, Babulonia ami taudia ia gwauraia neganai, ia gwau: “Ai idia lulua lao taudia edia heau ese, guba ugava manu edia roho ia hereaia. Ororo dekenai ai idia lulua.” Ugava be ataia ia roho giroa bona ia labana gauna ita itaia neganai, ena hanina ia veria mai sisina bena ia roho diho haraga; ripoti haida idia gwau, ena heau ena haraga be kilomita 130 hora tamona lalonai ia abia. Ita hoa lasi, Baibel lalonai nega momo tuari gaudia ia kikilaia neganai, heau haraga laulaulaia totona ugava ia gaukaralaia.​—⁠2 Samuela 1:​23; Ieremia 4:​13; 49:⁠22.

To Isaia be ugava ena hekwarahi lasi bamona roho dalana ia kikilaia. “To Lohiabada dekenai idia abidadama henia taudia ese, edia goada do idia hamatamataia lou. Idia be hanina dekena amo, do idia roho daekau, ugava bamona. Idia be do idia heau, bona do idia manoka lasi. Idia be do idia raka lao, bona do idia moru lasi.” (Isaia 40:31) Edia hekwarahi lasi roho dalana ena hehuni gauna be dahaka? Roho daekau be hekwarahi lasi badina be ugava ese thermal eiava ia daekau hodahoda siahuna ia gaukaralaia. Thermal oi itaia diba lasi, to ugava ese idia davaridia haraga. Thermal idia davaria neganai, ugava ese ena hanina bona iuna ia kehoa bona unai ia daekau noho hodahoda siahuna amo ia daekau lao noho ela bona ia be atai herea. Atai momokani ia noho neganai, ena hanina do idia mareremarere momo lasi to do ia diho lao thermal ma ta ai bena unai kara do ia hamatamaia lou. Unai dala amo hora momo lalonai ataiai do ia roho diba mai ena hekwarahi bada lasi.

Israela dekenai, ena Rift Valley lalonai, Ezion-geber, Davara Kakakakana ena kone ai ia noho gabuna amo, ia lao not kahana Dan dekenai, ugava momo oi itaia. Siahu negana bona keru negana idia matamaia negadia ai momo herea idia noho, badina be unai be edia tano ma ta dekenai idia roho lao negana. Lagani haida lalodiai, kahirakahira ugava 100,000 idia duahia. Daba ai dina ese hodahoda ia hasiahua neganai, duna manudia handred momo be Rift Valley ena hagahaga ataiai idia roho.

Ugava ena hekwarahi lasi roho dalana ese Iehova ena siahu ia laulaulaia namonamo, badina be lauma dalanai bona tauanina dalanai ena siahu ese ita ia abia isi bona iseda lalona ia hagoadaia iseda gaukara ita karaia noho totona. Ugava ta be sibona ia roho ataiai momokani totona ia hegeregere lasi, ita danu, bema sibona eda goada dekenai ita tabekau, do ita hegeregere lasi. Aposetolo Paulo ia gwau: “Keriso ese lau ia hasiahua, vadaeni gau ibounai lau goadalaia diba.” (Filipi 4:​13) Ugava ese hanaihanai ia itaia diba lasi thermal ia tahua hegeregerena, ita ese Iehova ena gaukara siahuna, ita itaia diba lasi gauna, be iseda guriguri loulou karana amo ita “noia” be namo.​—⁠Luka 11:​9, 13.

Ma tano ta dekenai idia roho lao ugava be duna ma haida raraia karana amo, thermal haida idia davaria. Animal stadilaia tauna D. R. Mackintosh ia gwau, nega ta ai ugava bona vulture manudia 250 be thermal tamona lalonai idia roho daekau hebou. Hari iseda negai Keristani taudia be Iehova ena goada tabekau henia karana idia dibaia diba, ma abidadama hesiai taudia edia haheitalai tohotohoa karana amo.​—⁠1 Korinto 11:⁠1 itaia.

Ugava Ena Hanina Henunai

Ugava be roho dalana idia dibaia noho negana be nega aukana iena mauri lalonai. Idia sisina momo be idia roho toho neganai idia mase. Manu maragina bamona ia noho daudau lasi besena, Israela, be Aigupito ia rakatania neganai, reana dika do ia davaria danu. Unai dainai Iehova ena hereva Israela taudia dekenai be mai anina: “Aigupito taudia dekenai edena bamona lau karaia gaudia umui itaia vadaeni. Umui diba danu edena bamona lau abia mai umui, ugava manu ese iena hanina latanai iena natuna maragi ia abia mai bamona. Vadaeni umui lau hakaua mai inai gabu dekenai, bona lau dekenai umui noho inai.” (Esodo 19:4) Ripoti haida idia gwau nega sisina lalonai ugava be iena doruna dekenai manu maragina ia huaia, ia roho matamaia toho neganai ia moru lasi totona. G. R. Driver be Palestine Exploration Quarterly lalonai unai ripoti ia kikilaia, ia gwau: “[Baibel] ia herevalaia laulauna be gori ta lasi, to ia vara momokani gauna amo idia abia.”

Daladia ma haida dekenai ugava be tama sina namodia. Edia ruma dekenai ia noho maragina idia ubua loulou, to tamana manu be vamu ia mailaia murinai, sinana manu be unai vamu ia utua maragimaragi beibi ugava ese ia hadonoa diba totona. Edia ruma idia haginia hagahaga ai eiava au latadia ai dainai, lai bona dina edia siahu ese manu maragidia idia hadikaia diba. (Iobu 39:​27, 28) Baibel tanodia ai dina ena siahu ia goada herea dainai, manu maragina do ia mase diba bema iena tama sina ese idia naria namonamo lasi. Lo ugavana be iena hanina ia kehoa, nega haida hora haida lalonai, iena ruma dekenai ia noho beibi ugava ia hakerua totona.

Unai dainai Baibel lalonai ugava hanina ese Dirava ena henari idia laulaulaia be maoro. Deuteronomi 32:​9-​12 ia hahedinaraia Iehova ese idia loaloa Israela taudia be edena bamona ia naria. “Lohiabada ese iena bese korikori, be Iakobo dekena amo ia abia hidi. Ia ese taunimanima noho lasi tano dekenai idia ia davaria. Rei lasi tano dekenai idia ia davaria. Lohiabada ese idia ia naria bona ia ubua. Ia ese idia ia gimaia, sibona ena lalokau tauna ia gimaia bamona, ugava manu bamona, iena natuna be roho dalana ia hadibaia neganai. Ia be iena natuna ugava danu ia roho noho, bona iena natuna idia moru, o roho hegeregere lasi neganai, ugava ese iena hanina ia atoa maoromaoro, hanina dekena amo iena natuna ia gobea, bona natuna be iena sinana ena hanina dekenai do idia helai, do idia moru garina.” Iehova ena henari lalokauna do ita abia danu bema ia ita abidadama henia.

Hamauria Dalana

Nega haida hekwakwanai ita davaridia neganai, ita ura idia dekena amo ita roho lao. Unai be Davida ena hemami hegeregerena. (Salamo 55:​6, 7 itaia.) Ena be Iehova ia gwauhamata ita do ia durua ita davaria hetoho bona hisihisi haheaukalaia totona, to unai dika koua vaitani dalana ia henia lasi. Baibel ese ita ia hagoadaia, ia gwau: “Umui dekenai idia pidia dibagani ibounai ese taunimanima ibounai dekenai danu idia pidia noho. To Dirava be ia momokani. Ia ese umui do ia naria, emui goada ia hanaia dibagani ese umui do ia pidia garina. Bona dibagani ia mai neganai, emui dala ta do ia kehoa. Vadaeni inai dala dekena amo unai dibagani dekena amo do umui kwalimu diba.”​—1 Korinto 10:⁠13.

“Ia kehoa” kwalimu dalana eiava “heau mauri dalana” (King James Version) abia totona, Iehova ita abidadama henia be gau badana. Max Liebster, ena hereva be paragraf ginigunana dekenai ai torea tauna, ese unai dala ia davaria. Dibura kamepa lalonai ia noho laganidia ai, Iehova ia dibaia bona ia tabekau henia. Max ia davaria, Iehova be iena Hereva, iena lauma, bona iena orea amo, ita ia hagoadaia. Ena be kamepa dekenai idia noho, to Witness taudia ese ma Witness taudia idia tahua bona Baibel siridia eiava idia dogoatao buka o magasin amo lauma dalanai idia heduru heheni. Idia roho mauri abidadama taudia be idia gwauraia loulou hegeregerena, Iehova ese idia ia hagoadaia. Max ia gwau: “Hanaihanai Iehova lau noia lau ia durua totona, bona ena lauma be lau dekenai goada ia henia.”

Herevana edena hahetoho ita davaria, bema Dirava ena lauma helaga ita abia totona ita noinoi, iena heduru do ita abia. (Mataio 7:​7-​11) Unai ‘ita dekenai amo lasi siahu badana’ ita abia dainai, iseda hekwakwanai ese ita do idia hametaua bada lasi, to do ita roho bamona. Iehova ena dala dekenai do ita raka noho bona do ita hesiku lasi. Hanina dekena amo, do ita roho daekau, ugava ta bamona.​—⁠2 Korinto 4:⁠7; Isaia 40:⁠31.

[Blurb on page 10]

Nega sisina lasi lalonai oi do ia itaia

[Picture Credit Line on page 9]

Foto: Cortesía de GREFA

[Picture Credit Line on page 10]

Foto: Cortesía de Zoo de Madrid