Hahenamo Bona Hahedika—Ta Do Idia Abia Hidi!
“Lau be mauri bona mase, hanamoa kara bona hadikaia kara, umui emui vairana dekena lau atoa, do umui abia hidi totona. Unai dainai mauri do umui abia hidi.”—DEUTERONOMI 30:19.
IEHOVA DIRAVA ese ita—taunimanima mai eda lalona—ia havaraia neganai, ita be ura kwalimu taudia. Ita be masini, eiava robot, bamona ia karaia lasi, to abia hidi ena hahenamo bona maduna be ita ia henia danu. (Salamo 100:3) Taunimanima ginigunadia—Adamu bona Heva—be mai edia ura kwalimu ida edia kara idia abia hidi diba, bona edia abia hidi hegeregerena Dirava ese do ia kara henidia.
2 Gau Ibounai Havaraia Tauna ese noho hanaihanai hahenamodia, tanobada paradaisona lalonai, be taunimanima dekenai ia henia badabada. Dahaka dainai unai palani ia do guguru lasi? Badina Adamu ese dala kererena ia abia hidi. Dirava ese unai tau ia hagania ia gwau: “Uma gabu dekenai gini au ibounai edia huahua oi ania diba, idia be taravatu lasi, to kara namo bona kara dika hadibaia au ena huahua oi ania lasi, badina be inai huahua oi ania dina dekenai do oi mase momokani.” (Genese 2:16, 17) Bema Adamu be badinaia karana ia abia hidi, iseda tama sina ginigunadia be hahenamo do idia abia. Gwau-edeede ese mase ia mailaia. (Genese 3:6, 18, 19) Unai dainai kara dika bona mase be Adamu ena natudia ibounai dekenai ia hanai.—Roma 5:12.
Hahenamo Abia Dalana ia Vara
3 Iehova Dirava ese taunimanima ia hanamoa totona, ena palani do ia hagugurua dalana ta ia karaia. Ia sibona ese Garana ta ia perovetalaia, ia gwau: “Lau ese badu oi bona hahine ihuanai do lau atoa bona oiemu garana bona iena garana ihuanai. Ia ese emu kwarana do ia haberoa bona oi ese iena aena geduna do oi haberoa.” (Genese 3:15, NW) Gabeai Dirava ia gwauhamata unai Garana, Aberahamo ena natuna ta, ena amo kamonai taudia dekenai hahenamo do ia mailaia.—Genese 22:15-18.
4 Ia hedinarai, unai hahenamo mailaia Garana be Iesu Keriso. Iesu ena gaukara Iehova ese taunimanima do ia hanamodia karana lalonai be aposetolo Paulo ese inai bamona ia torea: “Dirava ese iena lalokau badana ia hedinaraia ita dekenai, badina ita be do kara dika noho taudia neganai, Keriso be ita dainai ia mase.” (Roma 5:8) Goevadae lasi taudia huanai Dirava idia kamonai henia bona Iesu ena mauri davalaia boubouna ena namo idia abia dae taudia sibona ese hahenamo do idia abia. (Kara 4:12) Oi ese kamonai karana bona hahenamo do oi abia hidi, a? Kamonai lasi ena anina be do ia idau momokani.
Hahedika be Edena Bamona
5 Hahenamo amo ia idau gauna be hahedika. Inai hereva “hahedika herevadia” ena anina be ta oi gwauraia dika o ta latanai dika oi gwauraia. Heberu herevana qela·lahʹ be kara ia herevalaia herevana qa·lalʹ, amo idia abia, bona ena anina be “hametaua lasi.” Dala ta ai idia gaukaralaia neganai, ena anina be ta “hereva dika henia” eiava ta “negea bamona.”—Levitiko 20:9; 2 Samuela 19:43.
6 Mani hahedika ta dainai ia vara hoa karana ta ita laloa. Dirava ena peroveta tauna Elisaia be Ieriko amo Betele ia lao noho lalonai unai ia vara. Unai sivarai ia gwau: “Dala dekenai ia raka lao neganai, memero maragidia haida be hanua ta dekena amo idia raka mai, idia ese Elisaia idia kirikirilaia, idia gwau, ‘Kebere tauna e, oi daekau lao! Kebere tauna e, oi daekau lao!’ Elisaia ese iena vairana ia giroa, vadaeni Lohiabada ena ladana dekenai, unai memero ia gwauraia dika. Vadaeni bea hahine rua be uda dekena amo idia raka mai, memero 42 idia alaia mase.” (2 King Taudia 2:23, 24) Elisaia ese ia idia kirikirilaia memerodia latanai dahaka hahedika ia gwauraia be ia hedinarai lasi. To herevana, ia gwauraia herevana ena anina be ia vara badina be Dirava ena peroveta tauna, Iena ura hegeregerena ia karaia tauna, ese Iehova ena ladana ai ia gwauraia dainai.
7 Toana be Elisaia idia kirikirilaia ena badina badana be ia ese Elia ena gaukara dabuana ia karaia dainai, bona unai natudia idia ura lasi unai peroveta tauna ena gabu ia abia tauna ta ia noho. (2 King Taudia 2:13) Ia be Elia ena gabu ia abia herevana ia hamomokania totona bona unai memero kekeni bona edia tama sina dekenai Dirava ena peroveta tauna matauraia karana ia hadibaia totona, Elisaia ese Elia ena Dirava ladana ai ia idia kirikirilaia taudia latanai dika ia gwauraia. Iehova ese ia hahedinaraia Elisaia ia abia dae, ia be iena peroveta tauna, badina dala ia karaia bea hahinedia rua be uda amo idia raka mai bena unai kiri taudia 42 idia hamasea. Iehova be maoromaoro unai ia karaia badina unai nega ai tanobada dekenai Iena hereva halasia totona ia gaukaralaia dalana be idia ese idia matauraia lasi dainai.
8 Lagani gunadia ai, Israela taudia danu be unai hegeregerena Dirava ena gaukara dalana idia matauraia lasi. Ia vara dalana be inai: Lagani 1513 B.C.E. ai, Iehova ese Israela taudia ia lalo-namo henidia dainai, Aigupito ena igui amo ia hamauridia, ‘ugava ena hanina’ latanai bamona. Unai murinai, nega daudau lasi bena Dirava idia gwauhamata henia ia do idia kamonai henia. Ita itaia diba Dirava ena lalo-namo idia abia diba lasi bema idia kamonai henia lasi. Iehova be Mose ena amo ia gwau: “Harihari bema lauegu hereva do umui kamonai henia, bona lauegu taravatu do umui badinaia neganai, umui be lauegu bese korikori do umui lao. Tanobada besedia ibounai be lauegu, to bese ibounai edia huanai umui be lauegu abia hidi besena.” Unai murinai, taunimanima ese idia abia dae, idia gwau: “Ai be Lohiabada ena hereva ibounai do ai karaia.” (Esodo 19:4, 5, 8; 24:3) Israela taudia idia gwau Iehova idia lalokau henia, edia mauri be ia dekenai idia gwauhamatalaia, bona idia gwauhamata iena hereva do idia kamonai. Unai amo hahenamo bada herea do idia abia.
9 To, ‘Dirava ena imana kwakikwaki’ amo idia abia dae gwau-bou taravatudia be nadi dekenai ia do torea lasi lalonai, Dirava ese ena hahedika ia gwauraia danu be namo. (Esodo 31:18) Dahaka dainai unai bamona davana dikadia idia abia be maoro? Israela taudia be idia hahedinaraia vadaeni edia ura be Dirava ia gwauraia gaudia ibounai do idia karaia, ani? Oibe, hereva amo hahenamo idia tahua, to edia kara amo idia abia hidi dalana dainai hahedika idia abia be maoro.
10 Dina 40 lalonai Mose be Sinai Ororona dekenai Taravatu 10 ia abia noho neganai, Israela taudia be idia karaia guna gwauhamatana, Iehova do idia badinaia gwauhamatana, idia hamakohia. Unai sivarai lalonai ia gwau, “Israela taudia idia itaia, Mose be ororo dekenai ia noho daudau herea, bona ia giroa mai haraga lasi. Vadaeni Arona dekenai idia haboua, idia hamaoroa, idia gwau, ‘Mose, Aigupito dekena amo ai ia hakaua tauna dekenai, be dahaka ia vara ai diba lasi. Unai dainai kaivakuku do oi karaia, ia ese ai do ia hakaua totona.’ ” (Esodo 32:1) Unai kara be Iehova ese unai nega ai iena taunimanima hakaua bona hadibaia totona ia gaukaralaia dalana idia matauraia lasi karana ma ta. Israela taudia be Aigupito ena kaivakuku tomadiho henia karana idia tohotohoa bena ena anina dikana idia davaria, dina tamona ai idia 3,000 be tuari kaia amo idia mase.—Esodo 32:2-6, 25-29.
Hahenamo Bona Hahedika Herevadia
11 Lagani 40 lalonai tano gagaena dekenai idia loaloa ena dokona kahirakahira ai, Mose ese idia dekenai, bema Dirava kamonai henia karana idia abia hidi neganai, do idia abia diba hahenamodia ia gwauraia. Ia ese hahedika ia gwauraia danu, Israela taudia ese do idia davaria bema Dirava kamonai henia lasi karana idia abia hidi. (Deuteronomi 27:11–28:10) Israela be Gwauhamata Tanona ai idia vareai negana sisina murinai, Iosua be Mose ena hahegani hegeregerena ia karaia, bona unai kara be mai edia anina unai hahenamo bona hahedika dekenai. Israela ena iduhu 6 be Ebala Ororona ena badina ai idia gini, bona ma iduhu 6 be Gerisima Ororona vairanai idia gini. Levi taudia be huanai ia noho kourana dekenai idia gini. Toana be Ebala Ororona vairanai idia gini iduhudia be idia dekenai idia duahia hahedika, eiava hadikaia herevadia, dekenai idia gwau “Amen.” To ma iduhu haida Gerisima Ororona vairanai idia gini be Levi taudia ese idia dekenai hahenamo idia duahia neganai idia haere.—Iosua 8:30-35.
12 Mani oi laloa oi be oi kamonai Levi taudia idia gwau: “Laulau ta au dekena amo, o nadi dekena amo, o auri dekena amo ia koroa tauna be Dirava ese do ia hadikaia momokani. Ia ese iena imana dekenai unai Lohiabada ia badu henia gauna ia karaia, bona hunia gabuna dekenai ia tomadiho henia. . . . Iena tamana bona sinana ia matauraia lasi tauna be Dirava ese do ia hadikaia momokani. . . . Iena badibadinai ia noho tauna ena tano hetoana maka ia kokia tauna be Dirava ese do ia hadikaia momokani. . . . Matakepulu tauna ia koia, dala dekena amo ia hakaua siri, tauna be Dirava ese do ia hadikaia momokani. . . . Idau bese tauna dekenai, o tamana bona sinana lasi maragina, o vabu edia kota ia hagagevaia tauna be Dirava ese do ia hadikaia momokani. . . . Iena tamana ena adavana ta ia sihari henia tauna be Dirava ese do ia hadikaia momokani. Badina unai tau ese iena tamana ia hahemaraia noho. . . . Ubua gauna o mauri gauna ta dekenai ia sihari henia tauna be Dirava ese do ia hadikaia momokani. . . . Iena taihuna, iena tamana ena natuna, o iena sinana ena natuna ia sihari henia tauna be Dirava ese do ia hadikaia momokani. . . . Iena hahine ena sinana ia sihari henia tauna be Dirava ese do ia hadikaia momokani. . . . Iena badibadinai noho tauna be hunia dekenai ia alaia mase tauna, be Dirava ese do ia hadikaia momokani. . . . Ia ese davana ia abia, kerere lasi tauna ta do ia alaia mase totona tauna be Dirava ese do ia hadikaia momokani. . . . Inai taravatu hereva ia abia dae lasi, bona ia kamonai henia lasi tauna be Dirava ese do ia hadikaia momokani.” Bena unai hahedika ta ta murinai, Ebala Ororona vairanai idia gini iduhudia idia gwau, “Amen.”—Deuteronomi 27:15-26.
13 Mani oi laloa, oi be Gerisima Ororona vairanai idia gini taudia edia haere hahenamo ta ta dekenai oi kamonai henia, Levi taudia be inai bamona idia boiboi neganai: “Lohiabada ese emui hanua bona emui uma gabudia do ia hanamoa. Lohiabada ese natuna momo umui dekenai do ia henia. Emui uma ese anina momo do ia havaraia, bona emui boromakau bona mamoe danu be do idia momo herea, Lohiabada ese ia hanamodia dainai. Lohiabada ese emui uiti anina do ia hanamoa, bona uiti dekena amo umui gabua aniani danu, do ia hanamoa. Lohiabada ese emui kara ibounai do ia hanamoa.”—Deuteronomi 28:3-6.
14 Unai hahenamo do idia abia ena badina be dahaka? Unai sivarai lalonai ia gwau: “Bema Lohiabada, emui Dirava umui kamonai henia, bona bema iena oda ibounai, hari dina umui dekenai lau henia gaudia do umui badinaia namonamo, bona edia kara do umui karaia, Lohiabada, emui Dirava ese umui do ia abia isi, tanobada bese edia ataiai. Io, bema Lohiabada, emui Dirava umui kamonai henia neganai, inai hanamoa ibounai do umui davaria.” (Deuteronomi 28:1, 2) Oibe, Dirava ena hahenamo abia dalana be ia idia kamonai henia. To hari ita be edena bamona? Ita ta ta be ‘Iehova ena hereva do ita kamonai henia’ karana amo do ita hahedinaraia hahenamo bona mauri ita abia hidi, a?—Deuteronomi 30:19, 20.
Tahua Namonamo
15 Mani Israela taudia ese Iehova idia kamonai henia dainai idia abia diba hahenamodia haida ita laloa. Hegeregere, Deuteronomi 28:3 be ia gwau: “Lohiabada ese emui hanua bona emui uma gabudia [ai oi] do ia hanamoa.” Dirava ena hahenamo abia ena badina be gabu dainai eiava gaukara dainai lasi. Reana haida do idia laloa edia noho dalana do ia idau lasi, reana ena badina be tauanina gaudia dekenai idia dabu momokani gabuna ta eiava tuari gabuna ta ai idia noho dainai. Reana ma haida idia ura dikadika gabu idauna ta dekenai Dirava ena hesiai gaukara idia karaia. Keristani tatau haida be reana idia lalo-manoka badina kongregesen lalonai hesiai dagina eiava elda dagina idia abia lasi dainai. Nega haida, Keristani hahine idia lalo-manoka badina idia dekenai dala be hegeregere lasi, ful-taim hesiai gaukara, hegeregere painia o misinari gaukara, idia karaia totona. To, ‘Iehova idia kamonai henia bona iena oda ibounai idia badinaia namonamo’ taudia ibounai be hahenamo do idia abia, harihari ela bona hanaihanai.
16 Deuteronomi 28:4 ia gwau: “Lohiabada ese natuna momo umui [“oi,” NW] dekenai do ia henia. Emui [oiemu] uma ese edia anina momo do idia havaraia, bona emui [oiemu] boromakau bona mamoe danu be do idia momo herea.” Heberu herevana idia hahanaia “oiemu,” idia gaukaralaia dainai, ia hedinarai kamonai Israela taudia ta ta ese unai do idia davaria. To Iehova ena kamonai hesiai taudia inai nega ai be edena bamona? Tanobada hegegemadai ai Iehova ena Witness taudia edia orea ia bada noho ena badina be Iehova ese Basileia sivarai namona idia harorolaia taudia 5,000,000 mai kahana edia hekwarahi ia hanamoa noho dainai. (Mareko 13:10) Bona unai namba do ia bada noho toana be ia hedinarai badina be Lohiabada ena Adorahi Anibou idia itaia taudia edia namba be 13,000,000 ia hanaia. Oi be Basileia ena hahenamo oi moalelaidia noho, a?
Israela Taudia Idia Abia Hidi Gauna be mai Ena Anina
17 Anina be, kamonai Israela tauna ese hahenamo ia tahua. Gwauhamata be inai: “Inai hanamoa ibounai do umui davaria.” (Deuteronomi 28:2) Unai hegeregerena hahedika danu be inai bamona idia gwauraia: “Inai dika gaudia be umui dekenai do idia vara.” (Deuteronomi 28:15) Bema oi be Israela tauna ta guna negana ai, oi be hahedika do oi abia eiava hahenamo do oi “davaria”? Dirava oi kamonai henia karana amo eiava oi kamonai henia lasi karana amo, anina do oi davaria.
18 Deuteronomi 28:15-68 ai, edia gwau-edeede ena anina mai edia hisihisi idia hedinarai. Idia haida be Deuteronomi 28:3-14 ai idia torea hahenamo dekena amo idia idau kahana. Nega momo, Israela taudia be hahedika ena anina dikadia idia abia badina tomadiho koikoi lalonai idia vareai. (Esera 9:7; Ieremia 6:6-8; 44:2-6) Dika bada herea! Idia be unai anina dikadia idia reaia diba bema dala maorona, Dirava ena taravatu bona hakaua herevadia badinaia karana, idia abia hidi; unai hereva ese namo bona dika edia idau idia gwauraia hedinarai goevagoeva. Hari, momo be hisihisi bona dika idia davaria badina idia abia hidi dalana be Baibel ena hakaua herevadia hegeregerena lasi; tomadiho koikoi karadia idia karaia, matabodaga karadia idia karaia, drag dikadia idia ania, kekero muramura idia inua momo, bona unai bamona kara ma haida idia karaia. Guna Israela bona Iuda dekenai bamona, unai bamona kara dikadia idia abia hidi dainai Dirava ena lalo-namo idia haboioa bona edia lalona ai idia reaia diba hisihisina idia abia.—Isaia 65:12-14.
19 Israela taudia ese Iehova idia kamonai henia negana sibona ai be hahenamo bada idia abia bona lalo-maino ia noho. Hegeregere, King Solomona ena nega ena sivarai ita duahia, ia gwau: “Iuda taudia bona Israela taudia be momo herea, kone ena miri bamona, idia aniani, idia inuinu, bona idia moale noho. . . . Solomona ena mauri dinadia ibounai lalonai Iuda bona Israela taudia be mai maino danu idia noho. Edia bese ta ta ibounai be mai edia vain audia bona mai edia fig audia.” (1 King Taudia 4:20-25) King Davida ena nega ai danu, ena be Dirava idia inai henia taudia idia gwau-edeede bada, to unai bese ese hereva momokani Diravana, Iehova, badinaia karana idia abia hidi neganai, ia ese idia ia durua bona hanamoa.—2 Samuela 7:28, 29; 8:1-15.
20 Dirava do oi kamonai henia, eiava ia do oi kamonai henia lasi? Israela taudia ese unai dala ta idia abia hidi be namo. Ena be ita ibounai be Adamu ena amo kara dika karaia urana ita abia hanai, to ita abia harihari gauna ta be mai eda ura kwalimu ida dala ita abia hidi diba. Herevana Satani, inai tanobada dikana, bona iseda ura kereredia idia noho, to ita be dala maorona ita abia hidi diba. Bona inai danu, ita ia Havaraia Tauna ia diba ena be hekwakwanai bona hetoho momo do idia vara, to haida ese dala maorona do idia abia hidi, hereva amo sibona lasi to kara amo danu. (1 Petero 5:8-10) Oi be idia huanai do oi noho, a?
21 Hereva gabena dekenai, ita be guna haheitalaidia do ita laloa karana amo, iseda lalohadai bona kara do ita tahua. Ita ta ta be inai hereva, Dirava ese Mose ena amo ia henia herevana, do ita abia dae be namo: “Lau be mauri bona mase, hanamoa kara bona hadikaia kara, umui emui vairana dekenai lau atoa, do umui abia hidi totona. Unai dainai mauri do umui abia hidi, vadaeni umui bona emui natudia do umui mauri noho.”—Deuteronomi 30:19.
Edena Bamona Do Oi Haere?
◻ Kara dika taudia ese hahenamo idia abia dalana be Iehova ese edena bamona ia kehoa?
◻ Hahedika be dahaka dahaka?
◻ Israela taudia be edena bamona hahenamo idia abia diba to hahedika idia reaia?
◻ Israela taudia ese Dirava idia kamonai henia dainai dahaka hahenamo idia abia?
[Study Questions]
1. Taunimanima be dahaka idia karaia diba?
2. Adamu be dahaka ia abia hidi, bona unai dainai dahaka ia vara?
3. Dirava be edena bamona ia hamomokania, iena palani taunimanima totona be do ia hagugurua?
4. Iehova ese dahaka ia hegaegaelaia taunimanima ia hanamodia totona?
5. Unai hereva “hahedika herevadia” ena anina be dahaka?
6. Hanua gunana Betele badinai dahaka ia vara Elisaia dekenai?
7. Elisaia idia kirikirilaia natudia dekenai dahaka ia vara?
8. Israela taudia idia haere dahaka do idia karaia, bona unai amo dahaka idia abia diba?
9, 10. Mose be Sinai Ororona dekenai ia do noho lalonai, Israela taudia be dahaka idia karaia, bona unai dainai dahaka ia vara?
11. Dahaka sisiba hahenamo bona hahedika dekenai be Iosua ese ia badinaia?
12. Levi taudia ese idia gwauraia hahedika haida be dahaka dahaka?
13. Oi sibona emu hereva amo oi gwauraia; Levi taudia ese idia boiboilaia hahenamodia be dahaka dahaka?
14. Israela taudia ese hahenamo do idia abia ena badina be dahaka?
15. Deuteronomi 28:3 dekenai ia noho hahenamo herevana lalonai dahaka hereva badana ia hedinarai, bona ena namo be edena bamona ita abia diba?
16. Deuteronomi 28:4 dekenai, dahaka hereva badana ena anina be hari Iehova ena orea lalonai ia vara noho?
17. Hahenamo do idia abia eiava hahedika do idia “davaria” be dahaka dainai?
18. Israela taudia ese hahedika be edena bamona idia readia diba?
19. Iuda bona Israela taudia ese dala idia abia hidi Iehova idia kamonai henia neganai, edia noho dalana oi gwauraia.
20. Dirava be taunimanima dekenai dahaka gau ia diba?
21. Hereva gabena ai dahaka do ita tahua?
[Picture on page 15]
Israela taudia be Gerisima Ororona bona Ebala Ororona vairanai idia haboua
[Credit Line]
Pictorial Archive (Near Eastern History) Est.