“Unai Bamona Taudia Umui Hanamoa Bona Matauraia be Namo”
KORINTO kongregesen lalonai gau iboudiai be idia namo lasi. Heudahanai karana dikana ta ia vara, bona tadikaka bogaraginai orea maragidia idauidau idia noho. Haida be mai edia hekwakwanai badadia, eiava mai edia henanadai bona edia haere idia abia be namo. Tadikaka haida ese kota dekenai ta ta idia samania; ma haida be toreisi lou herevana idia gorea.
Henanadai badadia idia vara danu. Tomadiho dainai idia parara ruma besena lalonai edia abidadama lasi adavana ida idia noho hebou, eiava idia parara be namo? Kongregesen lalonai, taihu edia gaukara be dahaka? Kaivakuku dekenai idia bouboulaia vamu idia ania be maoro, a? Hebou iboudiai—Lohiabada Ena Anibou danu—be edena dala ai idia karaia be namo?—1 Korinto 1:12; 5:1; 6:1; 7:1-3, 12, 13; 8:1; 11:18, 23-26; 14:26-35.
Unai bamona kongregesen lalonai idia noho tadikaka edia namo idia laloa bada dainai, Akaiko, Forotunato, bona Stepana be Efeso ai idia lao aposetolo Paulo idia itaia totona. Unai sivarai dikadia sibona lasi, to reana idia ese kongregesen amo revareva ta, ia lalonai unai hekwakwanai dainai idia vara henanadai idia noho be Paulo dekenai idia abia lao. (1 Korinto 7:1; 16:17) Ia hedinarai unai tadikaka toi sibona lasi be unai kongregesen lalonai idia vara gaudia idia laloa bada. Oibe, Paulo ese “Kiloe ena varavara taudia” amo sivarai ia kamonai vadaeni, kongregesen taudia huanai heai idia vara. (1 Korinto 1:11) Unai sivarai idia gwauraia taudia edia ripoti ese Paulo ia durua idia vara gaudia ia lalo-pararalaia totona, bena iena lalona ia hadaia diba, edena bamona sisiba do ia henia bona edena dala ai unai henanadai do ia haerelaia. Toana be, hari Korinto Ginigunana ita gwauraia revarevana be Paulo ena haere, Dirava ena lauma amo ia torea gauna. Reana Akaiko, Forotunato, bona Stepana ese unai revareva idia abia lao.
Akaiko, Forotunato, bona Stepana be daidia? Baibel ese idia ia herevalaia gaudia ita stadilaia karana amo, dahaka do ita diba?
Stepana Ena Famili
Stepana ena famili be lagani 50 C.E. ai, Akaia, Saut Greece dekenai Paulo ena hereva idia abia dae taudia ginigunadia, bona Paulo ese idia ia bapatisoa. Paulo ia laloa idia be famili namona, idia be lo taudia bona Korinto ena kongregesen idia hagoadaia. Kongregesen idia durua dainai ia ese ia hanamoa bada, ia gwau: “Umui be Stepana mai ena famili umui diba vadaeni. Idia be Keriso idia abidadama henia taudia ginigunadia Akaia dekenai. Idia ese sibodia idia henia, Dirava ena taudia edia hesiai gaukara do idia karaia totona. Lauegu varavara taudia e, umui lau noia, inai bamona taudia edia hereva do umui kamonai henia. Bona inai taudia danu idia gaukara hebou bona durua taudia, idia do umui kamonai henia danu.” (1 Korinto 1:16; 16:15, 16) Daidia be Stepana ena “famili” taudia be Baibel ese ia gwauraia lasi. Reana unai hereva ena anina be famili taudia korikoridia sibona, to reana hesiai taudia bona gaukara taudia danu. Badina Latin gado ladana Akaiko be hesiai taudia dekenai idia henia, bona hesiai gaukara amo idia ruhaia taudia edia ladana be Forotunato idia atoa dainai, Baibel idia herevalaia taudia haida idia laloa, idia ruaosi be Stepana ena famili taudia danu.
Unai be herevana, to Paulo ia laloa Stepana ena famili taudia be haheitalai namona. “Idia ese sibodia idia henia, Dirava ena taudia edia hesiai gaukara do idia karaia totona.” Stepana ena famili taudia idia lalo-parara, gaukara haida do idia karaia kongregesen ia namo totona, bona unai gaukara idia abia dae sibona edia maduna bamona. Idia ura Dirava ena helaga taudia idia durua dainai, haida ese idia durudia, idia hanamoa bona matauraia be namo.
“Lauegu Lalona Idia Hanamoa Bona Hagoadaia, Umui Emui Lalona Idia Hagoadaia Guna Bamona”
Ena be Paulo ia lalohisihisi Korinto dekenai idia vara gaudia dainai, unai hereva idia mailaia taudia toi ese ia idia hagoadaia. Paulo ia gwau: “Lau moale, badina be Stepana bona Forotunato bona Akaiko be lau dekenai idia ginidae dainai. Badina be umui mai lau dekenai be dala lasi, to inai taudia ese emui gabu dekenai, durua lau dekenai idia henia noho. Oibe, inai taudia ese lauegu lalona idia hanamoa bona hagoadaia, umui emui lalona idia hagoadaia guna bamona.” (1 Korinto 16:17, 18) Unai gaudia idia vara neganai, Paulo be Korinto taudia ida ia noho diba lasi dainai reana ia lalohisihisi, to unai kongregesen amo idia mai taudia ese ena lalohisihisi idia hamaragia. Edia ripoti ese Paulo ia durua idia vara gaudia ia diba namonamo bona ia garilaia gaudia haida ia kokia totona. Reana idia vara gaudia edia dika be guna ia laloa bamona lasi.
Paulo ena hereva hegeregerena, unai tatau toi idia mai ese iena lalona ia hanamoa sibona lasi, to ia ese Korinto kongregesen ena mamina ia hanamoa danu. Idia moale badina idia diba unai taudia ese idia vara gaudia iboudiai be Paulo dekenai idia hahedinaraia namonamo bona idia giroa neganai iena sisiba do idia mailaia.
Unai dainai Stepana bona ena bamoa rua idia hanamoa bada, badina Korinto taudia durua totona idia hekwarahi dainai. Paulo ese unai tatau ia laloa bada dainai ia gwau idia giroa negana ai, idia ese ia parara Korinto kongregesen do idia gunalaia. Aposetolo Paulo ese tadikaka ia hagoadaia, ia gwau: “Inai bamona taudia edia hereva do umui kamonai henia. Bona inai taudia danu idia gaukara hebou bona durua taudia, idia do umui kamonai henia danu. . . . Unai bamona taudia umui hanamoa bona matauraia be namo.” (1 Korinto 16:16, 18) Unai bamona hanamoa herevadia ese idia hahedinaraia ena be hekwakwanai idia vara kongregesen lalonai, to unai tatau be badinaia karana dekenai idia kwalimu. Unai bamona idia karaia taudia ita laloa bada be namo.—Filipi 2:29.
Mai Abidadama ida Gaukara Hebou amo Anina Namo Idia Vara
Ita daradara lasi, Iehova ena orea bona ena abia hidi taudia ida ita gaukara hebou namonamo amo anina namona idia vara. Paulo ese iena revareva ginigunana ia siaia bena daudau lasi murinai iena revareva ma ta, hari ita gwauraia Korinto Iharuana ia torea neganai kongregesen lalonai idia vara gaudia idia namo idia lao vadaeni. Akaiko, Forotunato, bona Stepana bamona tadikakadia ese mai haheauka ida idia gaukara goada noho dainai, bona Tito ena vadivadi dainai, anina namona idia vara.—2 Korinto 7:8-15; Kara 16:4, 5 itaia.
Hari inai negai Iehova ena kongregesen taudia be namo do idia davaria diba bema Baibel ena hereva kwadogina unai mai abidadama taudia dekenai do idia lalohadailaia. Haheitalai ta be, reana kongregesen lalonai hekwakwanai ta be nega daudau lalonai ia noho bona badina ta dainai idia hanamoa haraga lasi, bona unai dainai tadikaka ese unai idia lalohisihisilaia. Dahaka oi karaia be namo? Namona be Stepana, Forotunato, bona Akaiko edia haheitalai oi badinaia, idia be edia maduna idia dadaraia lasi to idia vara gaudia be Paulo idia hamaoroa, bona unai murinai mai lalo-goada ida gau ibounai be Iehova ena imana dekenai oi rakatania. Ena be kara maoromaoro idia goadalaia, to idia sibona ese unai kerere idia hamaoromaoroa toho lasi, eiava “Lohiabada idia badu henia” lasi.—Aonega Herevadia 19:3.
Kongregesen iboudiai be Iesu Keriso ena, bona iena nega ai, Korinto dekenai ia vara hegeregerena, edia lauma maurina bona edia maino idia hadikaia gaudia iboudiai ia kokia totona kara ta do ia karaia. (Efeso 1:22; Apokalupo 1:12, 13, 20; 2:1-4) Unai ita naria noho lalonai, bema Stepana, Forotunato, bona Akaiko edia haheitalai ita badinaia bona iseda tadikaka durua totona ita hekwarahi, ita danu be kongregesen ena heau dalana do ita badinaia, iseda tadikaka do ita hagoadaia noho, bona ita hagoadaia ‘lalokau dekena amo kara namodia do idia karaia’ noho totona.—Heberu 10:24, 25.