Tomadiho Momokani Ena Kwalimu be Kahirakahira
“Lohiabada be tanobada ibounai ena King do ia lao.”—SEKARAIA 14:9.
TANOBADA ibounai tuarina ginigunana negana ai, idia tuari besedia ese nega momo horoa Keristani taudia idia hahisia bona idia hadiburaia. Edia boubou karadia, Iehova hanamoa karadia, idia koua, bona lauma dalana ai idia hadiburadia. Unai ibounai be Sekaraia 14:2 ese ia perovetalaia, ia gwau bese idauidau ese Ierusalema do idia tuari henia. Ia perovetalaia hanuana be “Ierusalema, guba dekenai.” Dirava ena guba Basileiana be unai, ia lalonai be “Dirava bona Mamoe ena Natuna edia helai gabuna badana.” (Heberu 12:22, 28; 13:14; Apokalupo 22:3) Dirava ena horoa taudia tanobada ai be unai hanua ena gwaukau taudia. Unai orea taudia mai edia kamonai be unai tuari lalonai idia boio lasi; edia inai taudia ese ‘hanua dekena amo idia siaidia lao lasi.’a
2 Lagani 1919 ai, Dirava ese ena horoa taudia mai edia kamonai be edia dibura amo ia ruhaia, bena tuari murinai ia vara maino negana be maoromaoro idia gaukaralaia. Idia be guba Ierusalema ena gwaukau taudia, unai dainai idia ese Dirava ena Basileia ena sivarai namona idia harorolaia, bona 144,000 taudia oredia gogoa gaukarana idia durua. (Mataio 24:14; 2 Korinto 5:20) Lagani 1931 ai inai ladana maorona, Iehova ena Witness taudia, be Baibel amo idia abia.—Isaia 43:10, 12.
3 Unai nega amo ema bona hari, Dirava ena horoa Witness taudia be idia kwalimu noho. Hitler bona ena Nazi tuari oreana ese edia hereva idia koua diba lasi. Ena be tanobada hegegemadai haida ese idia dagedage henidia, to tanobada ibounai dekenai edia gaukara ese anina ia havaraia. Lagani 1935 amo ema bona hari, Apokalupo bukana ese ia perovetalaia taudia ‘hutuma bada herea’ bese idauidau amo ese idia bamodia. Idia danu be gwauhamata bona bapatiso vadaeni Keristani taudia, bona “edia dabua idia huria vadaeni Mamoe ena Natuna ena rarana lalonai, vadaeni edia dabua be kurokuro.” (Apokalupo 7:9, 14) To idia be horoa taudia lasi, bona guba maurina idia naria lasi. Edia helaro be Adamu bona Heva ese idia haboioa gauna, taunimanima edia mauri goevadaena paradaiso tanobadana ai, be do idia abia. (Salamo 37:29; Mataio 25:34) Hari inai negai, hutuma bada herea be taunimanima milioni ima mai kahana. Iehova tomadiho henia karana momokanina be ia kwalimu noho, to ena kwalimu ginigabena be dohore.
Idau Bese Taudia Dirava Ena Lauma Dubuna Ai
4 Idia gwauraia guna bamona, “dina bona hanuaboi” hutuma bada herea ese “Dirava ena hesiai gaukara idia karaia noho, iena dubu helaga lalonai.” (Apokalupo 7:15) Idia be lauma Israela taudia lasi, hahelaga taudia lasi, unai dainai toana be Ioane ese ia itadia, dubu lalonai idia gini, Idau Bese taudia edia ariara gabuna ai. (1 Petero 2:5) Iehova ena lauma dubuna ena hairai be bada, badina be ena magu lalonai be unai hutuma bada herea amo ia honu, bona idia be lauma Israela taudia oredia ida Iehova idia hanamoa noho!
5 Hutuma bada herea ese hahelaga taudia edia lalonai ariara gabuna ia laulaulaia nohona ai Dirava ena hesiai idia lao henia lasi. Ia gwauraidia maoro lasi ena lauma natudia ai do ia halaoa totona. (Roma 8:1, 15) To, Iesu ena boubou karana idia abidadama henia dainai, Iehova vairanai idia goeva. Ia gwauraidia maoro iena turadia ai do idia lao totona. (Iamesi 2:21, 23 itaia.) Idia danu be hegeregere, boubou gaudia maorodia be Dirava ena lauma boubou patana latanai do idia henia. Unai hegeregerena, Isaia 56:6, 7 ena peroveta herevana be dala namo hereana ai ia momokani: “Idau bese taudia bema egu bese ena orea lalonai idia vareai, lau do idia tomadiho henia totona, bona lau Lohiabada egu ladana do idia lalokau henia, . . . inai taudia be lau ese egu ororo helagana dekenai do lau hakaua, bona egu guriguri rumana dekenai lau ese moale do lau henidia. Edia gabua bouboudia bona edia boubou gaudia idauidau be, egu boubou patana ena latanai do lau abidia dae. Bona egu Dubu Helaga be bese idauidau ibounai edia guriguri rumana do idia gwauraia.”
6 Unai idau bese taudia ese idia henia gaudia haida be edia “uduna bibina” amo ‘hanamoa Dirava dekenai idia henia, [idia hegaegaelaia namonamo uitina] boubou gauna bamona,’ bona idia ‘kara namo,’ bona ‘kohu lasi taudia danu edia kohu idia abia hebou.’ (Heberu 13:15, 16) Besini badana mai ena ranu, hahelaga taudia ese idia gaukaralaia idia digu totona gauna, ese idau bese taudia dekenai gau badana ia hadibaia. Edia lalo-parara Dirava ena Hereva dekenai be ia bada ia lao lalonai, namona be lauma dalana ai do idia goeva idia lao, bona edia kara ai danu.
Helaga Gabuna Bona Ena Kohu
7 Unai idau bese taudia hutuma bada herea dekenai Helaga Gabuna bona ena kohu be mai anina, eiava? Helaga Gabuna ese ia laulaulaia nohona be do idia abia lasi. Idia vara lou lasi, Dirava ena lauma natudia ai do idia lao bona guba maurina do idia abia totona. Unai dainai idia mama, a? Lasi. Idia moale, badina be idia laloa 144,000 oredia idia durua be namo, bona Dirava ena palani idia laloa bada; unai palani hegeregerena unai 144,000 be ena lauma natudia ai ia halaoa, bena Keriso ida taunimanima do idia hanamoa ela bona do idia goevadae. Inai danu, idau bese taudia hutuma bada herea ese Dirava ena hariharibada idia laloa bada, badina be helaro ia henidia, tanobada ena Paradaiso dekenai do idia mauri hanaihanai. Unai idau bese taudia haida, idaunegai Nethinim taudia hegeregerena, be kwara dagina idia abia, hahelaga taudia durua gaukaradia ai.b (Isaia 61:5) Idia haida be Iesu ese ‘tanobada kahana ibounai dekenai lohia taudia ai do ia halaodia.’—Salamo 45:16.
8 Ena be idau bese taudia hutuma bada herea be Helaga Gabuna ese ia laulaulaia gabuna ai do idia vareai lasi, to ena kohu amo diba namona idia abia. Lamepa dogoatao gauna ena oela idia bubua loulou hegeregerena, idau bese taudia ese lauma helaga idia abia be namo, Dirava ese Baibel ena hereva momokani, ‘hesiai tauna mai ena kamonai bona mai ena kara maoromaoro’ ena amo ia henia herevadia, idia lalo-pararalaia totona. (Mataio 24:45-47) Danu Dirava ena lauma ese ia durudia inai hereva hegeregerena do idia kara: “Lauma Helaga bona Headava Matamata Hahine [horoa taudia oredia] idia gwau, ‘Oi mai.’ Bona inai hereva idia kamonai taudia danu, namona be idia gwau, ‘Oi mai.’ Ranu mase taudia, umui mai. Bona ranu umui ura henia taudia, mauri ranuna do umui abia dae, ia be davana lasi.” (Apokalupo 22:17) Unai hegeregerena, lamepa dogoatao gauna dainai hutuma bada herea idia diba namona be Keristani taudia hegeregerena, edia diari do idia hahedinaraia bona Dirava ena lauma helaga idia hahisia lalohadai, hereva, o kara iboudiai amo do idia raka siri.—Efeso 4:30.
9 Beredi patana ese hutuma bada herea ia hadibaia lou, lauma dalana ai do idia goada noho totona, namona be lauma anianina be Baibel ena amo bona ‘hesiai tauna mai ena kamonai bona mai ena kara maoromaoro’ ena buka edia amo do idia ania loulou. (Mataio 4:4) Muramura patana ese ia hadibadia, gau badana be mai edia momokani ida Iehova do idia noia do ia durudia do idia kara maoromaoro noho. (Luka 21:36) Namona be edia guriguri lalonai ia do idia hanamoa bona do idia tanikiu henia mai edia lalona ibounai ida. (Salamo 106:1) Muramura patana ese danu ia hadibadia, namona be dala ma haida amo Dirava do idia hanamoa. Anina be Keristani heboudia dekenai Basileia anedia do idia abia goadagoada, bona do idia hegaegae namonamo, ‘edia abidadama be edia uduna dekenai do idia gwauraia hedinarai’ totona.—Roma 10:10.
Tomadiho Momokani Do Ia Kwalimu Guguru
10 Hari inai negai “bese ibounai . . . edia taunimanima” be Iehova ena tomadiho rumana dekenai idia aru mai. (Isaia 2:2, 3) Apokalupo 15:4 ese unai ia hamomokania, ia gwau: “Lohiabada e, daika ese oi dekenai do ia gari henia lasi? Daika ese oiemu ladana do ia hanamoa lasi? Badina be oi sibona be helaga. Bese ibounai oi dekenai do idia mai, oi dekenai do idia tomadiho henia, badina be oiemu kara maoromaoro be ibounai idia itaia vadaeni.” Sekaraia karoa 14 ese unai murinai do ia vara gauna ia gwauraia. Nega daudau lasi, tanobada taudia momo edia lalona do idia dika momokani. Do idia hebou lou, Ierusalema be nega ginigabena ai do idia tuari henia totona—anina be guba Ierusalema ena gwaukau taudia tanobada ai do idia tuari henia. Bena Iehova ese kara ta do ia karaia. Unai idia karaia dainai, Tuari Diravana ta bamona “do ia toreisi, unai bese idauidau taudia do ia tuari henia.”—Sekaraia 14:2, 3.
11 “Vadaeni unai bese idauidau taudia, Ierusalema idia tuari henia bese taudia, be Lohiabada ese gorere dikana dekena amo do ia hadikadia. Inai gorere ena dika be inai: Idia mauri noho neganai edia kopina be do ia bodaga lao. Edia matana bona edia malana danu be edia kwarana lalonai do idia bodaga lao. Unai dina dekenai, Lohiabada ese unai bese idauidau tuari taudia do ia hagaridia, bona idia dekenai daradara do ia havaraia. Vadaeni tuari taudia ta ta ese iena turana tuari tauna do ia dogoatao, bona do ia heatu henia.”—Sekaraia 14:12, 13.
12 Ita do diba lasi unai be gorere korikorina eiava gau ta ia laulaulaia dainai namona be ita naria, ela bona do ita itaia. To ita diba momokani gauna be inai: Dirava ena inai taudia ese Iehova ena hesiai taudia tanobada hegegemadai do idia tuari henia gwauraia neganai, Dirava ese ena siahu bada herea do ia hahedinaraia, unai amo do ia koudia. Edia uduna do ia koua, hegeregere edia gwau-edeede malana idia bodaga bamona. Idia be guna mai edia lalo-tamona ida idia tahua gauna be do idia itaia namonamo diba lasi, hegeregere edia matana idia bodaga bamona. Edia tauanina edia goada, ia dainai tuari idia goadalaia gauna, be do ia ore. Edia daradara ai, do idia ala-ala heheni badabada. Dirava ena tomadiho idia inai henia taudia iboudiai tanobada ai be unai dala amo do ia haorea. Unai neganai Iehova ese bese iboudiai ia doria vadaeni ena tanobada bona guba lohia siahuna idia diba totona. Inai peroveta herevana do ia momokani: “[Iehova] be tanobada ibounai ena King do ia lao.” (Sekaraia 14:9) Unai murinai, Satani bona ena lauma dikadia do idia guia bona Keriso ena Lagani 1,000 Lohia Negana do ia matamaia; unai nega lalonai taunimanima ese hahenamo badadia do idia abia.—Apokalupo 20:1, 2; 21:3, 4.
Tanobada ai Do Idia Toreisi Lou
13 Sekaraia be Sekaraia karoa 14, siri 16 ai ma ia peroveta, ia gwau: “Bese idauidau taudia, tuari dekena amo idia do mauri noho taudia, be lagani ta ta ibounai Ierusalema dekenai do idia lao, Siahu Ibounai Lohiabada, edia King, do idia tomadiho henia totona. Au Raurau Ruma Maragidia Aria ena tomadiho kara danu do idia badinaia.” Baibel ese ia hahedinaraia, hari inai negai idia noho bona do idia mauri noho ela bona inai nega dikana ena dokona bena hahemaoro do idia abia idia be tomadiho momokani idia inai henia noho taudia, be “Dirava ese idia do ia hadikaia ore momokani, bona inai bamona do idia noho hanaihanai.” (2 Tesalonika 1:7-9; ma danu Mataio 25:31-33, 46 itaia.) Do idia toreisi lou lasi. Unai dainai, toana be “tuari dekena amo idia do mauri noho taudia” haida be bese idauidau taudia, Dirava ena tuari ginigabena ia do vara lasi neganai idia mase taudia unai; Baibel ese ia hahedinaraia do idia toreisi lou diba. Iesu ia gwauhamata, ia gwau: “Nega ta do ia mai, mase guria gabu dekenai idia noho taudia ibounai ese iena gadona do idia kamonai. Vadaeni guria gabu dekena amo do idia toreisi, kara namo taudia ese do idia toreisi mauri hanaihanai totona, to kara dika taudia do idia toreisi kota henia totona.”—Ioane 5:28, 29.
14 Unai toreisi lou taudia iboudiai be kara ta do idia karaia be namo, edia toreisi lou amo mauri do idia abia bona hahemaoro davana dikana do idia abia lasi totona. Namona be tanobada ai Iehova ena dubu ena ariara dekenai do idia mai bona Dirava do idia igo diho henia, anina be Iesu Keriso ena amo do idia gwauhamata henia. Idia toreisi lou murinai unai bamona idia kara lasi taudia ese hisihisi do idia davaria, hari inai negai idia noho besedia do idia davaria hisihisina hegeregerena. (Sekaraia 14:18) Daika ia diba toreisi lou taudia hida be hutuma bada herea ida Au Raurau Ruma Maragidia Ariana do idia badinaia mai edia moale ida? Momokani, idia momo ese do idia badinaia, bona unai dainai Iehova ena lauma dubuna badana ena hairai be ma do ia bada ia lao!
Au Raurau Ruma Maragidia Ariana ese Ia Laulaulaia Gauna
15 Dirava ese idaunegai Israelana ia hagania, lagani ta ta iboudiai Au Raurau Ruma Maragidia Ariana do idia badinaia. Dina 7 lalodiai idia karaia, edia uma edia anina gogoa negana ena dokona ai. Unai be Dirava tanikiu henia negana mai moalena. Unai pura lalonai idia be au raurau ruma maragidia lalodiai idia noho, unai raurau momo be pamu au rauraudia. Unai aria dainai Israela taudia ese Dirava ena kara idia laloa lou, edia tubudia be Aigupito amo ia hamauria, bena lagani 40 lalonai tano gagaena ai idia loaloa lalonai kalaga dekenai idia noho neganai ia naridia ela bona Gwauhamata Tanona ai idia ginidae. (Levitiko 23:39-43) Unai aria negana lalonai, boromakau 70 be dubu ena boubou patana latanai idia bouboulaia. Toana be unai aria karana ese Iesu ena hahemauri gaukarana goevadaena, ia karaia guguru gaukarana, ia laulaulaia. Gabeai, Noa ena amo idia vara besedia 70 edia tubudia momo herea ese iena boubou karana ena anina namona do idia abia.—Genese 10:1-29; Numera 29:12-34; Mataio 20:28.
16 Unai dala amo Au Raurau Ruma Maragidia Ariana ese ia hahedinaraia Keriso ese ia hoia lou kara dika taudia be Iehova ena lauma dubuna badana ai do idia gogodia mai edia moale ida. Unai aria ese ia laulaulaia gauna be Pentekoste 33 C.E. ai ia matamaia, lauma Israela taudia be Keristani ekalesiana lalonai idia gogoa matamaia mai edia moale ida neganai. (Kara 2:41, 46, 47) Unai horoa taudia idia diba Satani ena tanobada dekenai idia be “hanua lasi taudia,” badina be “edia hanua korikori be guba.” (1 Petero 2:11; Filipi 3:20) Momo ese hereva momokani dalana idia rakatania dainai Kerisendom ia vara bona unai ese unai aria badinaia karana ia koua. (2 Tesalonika 2:1-3) To unai aria be lagani 1919 ai idia badinaia matamaia lou; unai neganai lauma Israela taudia 144,000 ginigabedia idia gogoa, bena unai murinai Apokalupo 7:9 ia gwauraia hutuma bada herea be bese idauidau amo idia gogoa.
17 Baibel ia gwau hutuma bada herea edia imana ai pamu au rauraudia idia dogoatao. Unai ese ia hahedinaraia Au Raurau Ruma Maragidia Ariana ese ia laulaulaia gauna be idia danu ese idia badinaia mai edia moale ida. Idia be gwauhamata Keristani taudia, unai dainai idia danu ese tomadiho taudia ma haida be Iehova ena dubu lalonai gogodia gaukarana idia karaia. Inai danu, idia be kara dika taudia dainai, idia diba idia be hegeregere lasi tanobada ai do idia noho hanaihanai. Namona be idia, bona nega vairai do idia toreisi lou taudia danu, ese Keriso ena boubou karana do idia abidadama henia noho, ela bona Keriso ena Lagani 1,000 Lohia Negana ena dokona ai do idia goevadae.—Apokalupo 20:5.
18 Unai neganai, tanobada ai Dirava idia tomadiho henia taudia be ia vairanai do idia gini mai edia mauri goevadaena, bona guba ena hahelaga taudia ese do idia durudia lou be anina lasi. Unai neganai danu Iesu Keriso ese “Basileia be Tamana Dirava ena imana dekenai do ia atoa.” (1 Korinto 15:24) Satani be “nega sisina sibona” do idia ruhaia, idia goevadae vadaeni taudia tohoa totona. Idia gini auka lasi taudia be do idia hamasea ore ela bona hanaihanai, Satani bona ena demoni dikadia ida. Idia gini auka taudia ese mauri hanaihanai do idia abia. Tanobada ena Paradaiso dekenai do idia noho ela bona hanaihanai. Au Raurau Ruma Maragidia Ariana ese ia laulaulaia gauna be unai dala amo do ia guguru mai ena hairai bona mai ena kwalimu ida. Tomadiho momokani do ia kwalimu dainai, Iehova do idia hanamoa ela bona hanaihanai bona taunimanima do idia moale ela bona hanaihanai.—Apokalupo 20:3, 7-10, 14, 15.
[Footnotes]
a Sekaraia karoa 14 ena siri ta ta iboudiai edia anina herevadia be buka ta ladana Paradise Restored to Mankind—By Theocracy!, Watchtower Bible and Tract Society of New York, Inc. ese lagani 1972 ai ia halasia bukana, ena karoa 21 bona 22 lalonai idia torea.
b Hari inai nega ena Nethinim taudia herevadia ma haida be Gima Kohorona, April 15, 1992 gauna, rau 16 ai.
Riviu Henanadai
◻ Tanobada ibounai tuarina ginigunana negana ai, “Ierusalema” be edena bamona idia tuari henia?—Sekaraia 14:2.
◻ Lagani 1919 amo ema bona hari, dahaka ia vara Dirava ena orea taudia dekenai?
◻ Hari inai negai, daidia ese Au Raurau Ruma Maragidia Ariana ese ia laulaulaia gauna idia badinaia?
◻ Tomadiho momokani be edena bamona do ia kwalimu vaitani?
[Study Questions]
1. Tanobada Ibounai Tuarina Ginigunana negana ai, dahaka ia vara horoa Keristani taudia dekenai, bona Baibel ese unai be edena bamona ia perovetalaia?
2, 3. (a) Lagani 1919 amo ema bona hari, Iehova tomadiho henia karana be edena bamona ia kwalimu? (b) Lagani 1935 amo ema bona hari, dahaka ia vara?
4, 5. (a) Hutuma bada herea be edeseniai Iehova idia tomadiho henia? (b) Dahaka hahenamo idia abidia, bona unai ese dahaka peroveta herevana ia hamomokania?
6. (a) Idau bese taudia ese dahaka boubou gaudia idia henia? (b) Hahelaga taudia edia ariara gabuna ai ia noho besini mai ena ranu ese dahaka ia hadibalaia?
7. (a) Hutuma bada herea ese hahelaga taudia edia dagi be edena bamona idia laloa? (b) Idau bese taudia haida ese dahaka hahenamo ma haida idia abia?
8, 9. Hutuma bada herea ese Helaga Gabuna ena kohu idia laloa neganai, unai amo dahaka namo idia davaria?
10. (a) Dahaka gau namo hereana ita naria mai eda ura ida? (b) Dahaka do ia vara guna?
11, 12. (a) Dirava ena inai henia taudia ese iena dubu lalonai idia tomadiho henia taudia tanobada hegegemadai do idia tuari henia neganai, Iehova be edena bamona do ia kara? (b) Dirava ena tuari dainai dahaka do ia vara?
13. “Tuari dekena amo idia do mauri noho taudia” be daidia?
14. (a) Toreisi lou taudia be edena bamona do idia kara be namo, mauri hanaihanai do idia abia totona? (b) Idia ura lasi Iehova do idia gwauhamata henia bona tomadiho momokani do idia badinaia taudia dekenai dahaka do ia vara?
15. (a) Idaunegai Israelana ena Au Raurau Ruma Maragidia Ariana ena kara badadia haida be dahaka dahaka? (b) Dahaka dainai unai aria neganai boromakau 70 idia bouboulaia?
16, 17. (a) Au Raurau Ruma Maragidia Ariana ese ia laulaulaia gauna be edena negai ia matamaia, bena edena bamona idia badinaia? (b) Hutuma bada herea ese edena bamona idia badinaia?
18. (a) Iesu Keriso ena Lagani 1,000 Lohia Negana ena dokona ai, dahaka do ia vara? (b) Dokona ai, Iehova tomadiho henia karana momokanina be edena bamona do ia kwalimu?
[Picture on page 23]
Au Raurau Ruma Maragidia Ariana idia moalelaia neganai, pamu raudia idia gaukaralaia