“Aonega Herea” Mauri Gaudia be Ita Dekenai Dahaka Idia Hadibaia

AIR-CONDITIONING, antifreeze, davara ranuna be inuinu ranuna halaoa dalana, bona sonar be hari iseda nega lalonai taunimanima momo ese idia diba namonamo vadaeni gaudia. To, lagani tausen momo lalodia, animal idauidau ese unai gaudia idia karaia noho. Oibe, taunimanima ese unai “aonega herea” mauri gaudia idia stadilaia neganai, namo idia davaria. (Aonega Herevadia 30:​24-28; Iobu 12:​7-9) Ena be animal idia hereva diba lasi, to idia haida be tanobada taudia idia hadibaia, bona mai iseda ura ida edia kara ita tahua.

Animal haida edia kara ita laloa neganai, ita ia hadibaia diba, a? Nega haida Iesu Keriso ia gwau ia murinai idia raka taudia be mamoe, gaigai, pune, bona kwadi bamona. Unai taudia be unai mauri gaudia bamona ia gwauraia neganai, dahaka ia laloa noho? Namona be ita itaia.

“Egu Mamoe ese Lauegu Gadona Idia Kamonai”

Baibel be nega 200 bamona mamoe ia gwauraia. Smith’s Bible Dictionary ia hahedinaraia, ia gwau, “mamoe be manau, haheauka, bona kamonai karana ia laulaulaia.” Isaia karoa 53 ai, Iesu danu be peroveta dalanai mamoe ta bamona ia gwauraia. Unai dainai iena murinai idia raka taudia be unai animal danu ia hahegeregerea be maoro! To edena kara, mamoe ese ia hahedinaraia, ia laloa noho?

Iesu ia gwau: “Egu mamoe ese lauegu gadona idia kamonai, lau diba vadaeni idia, bona idia ese lauegu murina dekenai idia raka.” (Ioane 10:27) Unai amo Iesu ese iena hahediba taudia edia manau bona badinaia urana ia hahedinaraia. Mamoe korikoridia be mamoe naria tauna idia kamonai henia bona mai edia ura ida idia badinaia. Mamoe naria tauna ese ena mamoe orena ia ura henia bada danu.

Mamoe ese ava idia ania neganai reana idia be gabu tamona ai lasi, to idia ta ta idia diba mamoe orea be edeseniai ia noho. Unai dainai, Alles für das Schaf (Gau Ibounai be Mamoe Totona) bukana ia gwau, bema idia gari “karaharaga idia hebou.” Bema mamoe be dika ta reaia totona idia heau, orea tamona ai idia heau hebou, nega ta ta ai do idia gini, dika gauna do ia ore eiava lasi idia itaia totona. “Unai heau bena gini karana ese mamoe edia natudia bona manoka animal ia durua, mamoe orea ida idia noho diba totona. Seri ese unai bamona mamoe idia naria namonamo danu.” Unai kara amo dahaka ita dibaia?

Keristani momokani taudia be Kerisendom ena dubu idauidau bona tomadiho idauidau lalonai idia noho lasi. To idau, idia be mamoe orea tamona ai idia haboua. Keristani ta ta be Dirava ena mamoe orea idia ura idia badinaia, bona unai ese Iehova ena Witness taudia edia orea ena lalo-tamona ia hagoadaia. Kerere ta ia vara neganai​—⁠herevana ia be gorere, tuari, eiava ia vara kava dika badana​—⁠edeseniai idia lao hakaua herevadia bona henari tahua totona, a? Iehova ena orea dekenai, lauma henari henia gabuna unai.

Baibel ena sisiba be edena bamona idia abia? Gima Kohorona bona Noga! magasin amo. Unai magasin bona Keristani heboudia ese mamoe natudia bona manoka mamoe bamona taudia dekenai heduru idia henia diba. Hegeregere, tamana o sinana sibona ia noho famili durua herevadia bona lalo-metau taudia durua herevadia idia noho. Aonega karana be unai magasin iboudiai ita duahia, bona kongregesen ena hebou iboudiai ita lao henia, bona ita dibaia gaudia ita badinaia! Unai amo do ita hahedinaraia ita manau bona Dirava ena mamoe orea ita ura bada ita badinaia.​—⁠1 Petero 5:⁠2.

Smith’s Bible Dictionary ia gwau: “East kahana ai gaigai ese dika ta, gwau-edeede ena lauma, ia laulaulaia.” To danu, “egu pune manu” be lalokau herevana. (Solomona ena Ane 5:⁠2) Vadaeni, Iesu be ena hahediba taudia dekenai ia gwau “do umui aonega, gaigai bamona, bona do umui dagedage lasi, pune manu bamona” neganai, dahaka ia laloa noho?​—⁠Mataio 10:⁠16.

Iesu ese haroro bona hadibaia daladia ia sisibalaia. Taunimanima iboudiai ese iena hahediba taudia do idia abia dae lasi. Haida do idia kamonai, to ma haida ese sivarai namona do idia dadaraia. Idia haida be Dirava ena hesiai taudia korikoridia do idia dagedage henia. (Mataio 10:​17-​23) Iena hahediba taudia be unai dagedage karana edena bamona do idia laloa?

Das Evangelium des Matthäus (Mataio ena Evanelia) bukana lalonai, Fritz Rienecker be Mataio 10:16 ia herevalaia, ia gwau: “Namona be aonega . . . be badinaia karana, namo karaia urana, bona hereva maoromaoro ida oi hakapua, dika ta ese ena inai henia taudia dekenai badina ta ia henia bema mai maoro ida ia idia maumauraia garina. Iesu ena gwaukau taudia be dagedage inai henia taudia bogaraginai idia noho, idia ese dala idia tahua, mai edia hebogahisi lasi ida aposetolo taudia idia dagedage henia totona. Unai dainai​—⁠gaigai ta bamona​—⁠unai inai taudia idia itaia noho, bona edia matana amo bona edia lalo-parara amo dahaka ia vara idia tahua namonamo; koikoi herevadia eiava koikoi karadia amo do idia kwalimu lasi, to idia goeva bona edia hereva bona kara ia momokani, pune bamona.”

Hari iseda nega ai, Dirava ena hesiai taudia be Iesu ena hereva Mataio 10:16 amo dahaka idia dibaia? Hari iseda nega ai, taunimanima edia kara sivarai namona dekenai be aposetolo edia nega ai idia noho taudia edia kara hegeregerena. Keristani taudia momokanidia be dagedage idia davaria neganai, gaigai ena aonega karana bona pune ena goeva karana idia gaukaralaia be namo. Keristani taudia be koikoi eiava kara gagevadia idia gaukaralaia lasi, idia be hereva bona kara momokani amo Basileia ena sivarai idia harorolaia.

Haheitalai ta be inai: Reana emu gaukara taudia, sikuli taudia, eiava emu famili taudia haida ese Iehova ena Witness taudia idia abia dae gaudia, oi abidadama henia gaudia, idia kirikirilaia. Reana karaharaga oi ura oi hereva auka bona edia abidadama oi hadikaia. To unai be kerere lasi dalana, a? Lasi. Bema emu abidadama idia hadikaia toho taudia dekenai oi hahedinaraia edia hereva ese emu moale do ia hadikaia lasi, reana edia kara do idia haidaua. Unai neganai oi be aonega bona kerere lasi tauna​—⁠oi ‘aonega, gaigai bamona, bona dagedage lasi, pune bamona.’

“Kwadi Edia Toana be Tuari Hosi Bamona”

GEO magasin ia gwau lagani 1784 ai, South Africa lalonai, “guna taunimanima edia histori lalonai ia do vara lasi [kwadi] orea bada hereana ta ia hedinarai.” Unai kwadi orea ese square kilomita 5,200 idia koua, unai be Hong Kong ena tano, nega 5 amo oi habadaia ena bada. Smith’s Bible Dictionary ia gwau unai kwadi be “idia vadivadi tanodia ai, ava bona au idia ania haorea.”

Iesu be dahaka do ia vara “Lohiabada ena Dina dekenai” ia hahedinaraia neganai, unai Dirava amo ia abia matahanai lalonai kwadi ia gaukaralaia. Ia gwau: “Kwadi edia toana be tuari hosi bamona.” (Apokalupo 1:​1, 10; 9:​3-7) Unai laulau ena anina be dahaka?

Nega daudau vadaeni Iehova ena Witness taudia idia diba Apokalupo bukana karoa 9 ia kikilaia kwadi be hari iseda nega ai tanobada dekenai idia noho horoa orena taudia.a Unai Keristani taudia be gaukara ta idia abia​—⁠Basileia ena sivarai be tanobada ibounai dekenai idia harorolaia bona taunimanima be hahediba taudia ai do idia halaoa. (Mataio 24:14; 28:​19, 20) Unai idia karaia totona, hekwakwanai do idia hanaia bona edia gaukara do idia rakatania lasi. Unai bamona kara ia laulaulaia gauna namona be idia hesiku haraga lasi kwadi, ani?

Ena be kwadi ena lata be sentimita 5 sibona, nega momo dina ta ta ai kilomita 100 ia lao 200 bamona ai ia loaloa. Tano kaukau kwadina be reana kilomita 1000 ia roho lao diba. GEO magasin ia gwau “iena hanina be sekoni ta lalonai ia hamarerea nega 18 bona dina ta ai reana hora 17 lalonai unai do ia karaia​—⁠manumanu ma ta ese unai ia karaia diba lasi.” Unai mauri gauna maragina ese gaukara badana ia karaia!

Grup ta bamona, Iehova ena Witness taudia be Basileia ena sivarai namona idia harorolaia noho. Hari tano 230 bona ma haida ai idia haroro. Unai Dirava hesiai henia taudia ese hekwakwanai momo idia hanaia unai gaukara idia hagugurua totona. Edena bamona hekwakwanai idia davaria? Edia hekwakwanai haida be inai: Taunimanima be edia tomadiho dalana idia inai henia o idia taravatua, idia gorere, edia lalona ia manoka, bona edia varavara ese idia dagedage henia. To gau ta ese idia ia koua lasi. Dirava ese ia henidia gaukarana idia karaia noho.

Keristani Karadia Hahedinaraia Noho

Oibe, Iesu ese ia murinai idia raka taudia be mamoe, gaigai, bona kwadi ida ia hahegeregerea. Iseda nega lalonai unai be maoro. Dahaka dainai? Badina inai tanobada ena oromana dikana ena dokona be kahirakahira, bona hekwakwanai idia bada idia lao noho.

Iesu ena laulau herevadia idia laloa noho Keristani korikori taudia be Dirava ena mamoe orea do idia badinaia goadagoada bona mai manau ida Iehova ena orea ia halasia sisibana do idia kamonaia. Idia gima noho bona edia Keristani gaukara idia koua diba gaudia idia naria namonamo; gau ibounai idia karaia neganai, edia ladana namona idia haboioa lasi. Danu, hekwakwanai idia davaria neganai, Dirava ena ura idia karaia noho. Bona “aonega herea” mauri gaudia amo gau momo idia dibaia noho.

[Footnotes]