Emu Mauri Lalonai Keriso Ena Taravatu Badinaia
“Umui ta ta dekenai umui durua henia, emui metau do umui huaia totona. Inai dala dekenai Keriso ena taravatu do umui badinaia.”—GALATIA 6:2.
VANEGAI, Rwanda dekenai, bese idauna ala-ala karana ia vara neganai, Hutu bona Tutsi Iehova ena Witness taudia be edia tadikaka idia naria, herevana idia diba unai dainai do idia mase diba. Kobe, Japan dekenai, Iehova ena Witness taudia edia ruma bese taudia haida be tano mareremarere dekenai idia mase dainai, unai idia lalohisihisilaia bada herea. To, unai dika lalonai hekwakwanai idia davaria taudia ma haida hamauria totona idia hekwarahi. Oibe, hari, tanobada ibounai amo, haheitalai momo ese idia hahedinaraia Keriso ena taravatu ena anina ia vara noho. Ia be namo ia havaraia totona, ena siahu be bada.
2 Nega tamona ai, Baibel ese “nega ena dokona” ia perovetalaia herevana ia guguru noho. Taunimanima momo be “Dirava badinaia kara” ta idia karaia, to unai be ‘toana sibona idia hedinaraia, to iena anina momokani idia negea.’ (2 Timoteo 3:1, 5) Kerisendom lalonai momokani, nega momo tomadiho be kudouna dekenai ia noho lasi gauna, to ia be toana sibona. Keriso ena taravatu badinaia be auka momokani dainai unai ia vara, a? Lasi. Iesu ese ita badinaia diba lasi taravatuna ta do ia henia lasi. Kerisendom ese taravatu ena anina idia lalo-pararalaia lasi. Inai sisiba, lauma helaga amo ia vara sisibana, idia kamonai lasi: “Umui ta ta dekenai umui durua henia, emui metau do umui huaia totona. Inai dala dekenai Keriso ena taravatu do umui badinaia.” (Galatia 6:2) “Keriso ena taravatu” ita badinaia iseda tadikaka ita durua, edia metau gaudia huaia neganai; Farisea taudia ita tohotohoa lasi bona tadikaka edia maduna ita hametaua kava lasi.
3 Keriso ena taravatu lalonai be Iesu Keriso ena hahegani iboudiai—haroro bona hadibaia, iseda matana ia goeva bona namo, maino ia noho ita bona iseda dekena taudia ihuanai, bona kongregesen amo miro karadia kokia taravatudia danu. (Mataio 5:27-30; 18:15-17; 28:19, 20; Apokalupo 2:14-16) Momokani, Keristani taudia be Baibel lalonai Iesu murinai idia raka taudia idia abia hahegani ibounai idia badinaia be edia maduna. Bona unai sibona lasi. Iehova ena orea bona kongregesen ta ta idia heau namonamo totona, badinaia herevadia bona karaia daladia idia haginia be namo. (1 Korinto 14:33, 40) Bema hebou ena nega, edeseniai do idia hebou, bona edena bamona hebou do ia heau taravatudia idia haginia lasi, hebou do ia vara lasi! (Heberu 10:24, 25) Orea lalonai, gunalaia siahuna idia abia taudia ese idia haginia hakaua hereva namodia ita badinaia neganai, unai danu be Keriso ena taravatu badinaia karana ena kahana ta.—Heberu 13:17.
4 Ena be unai be momokani, to Keristani momokani taudia ese edia tomadiho idia hahonua kava lasi taravatu momo amo. Iehova idia tomadiho henia lasi tau ta eiava orea ta ese ia oda henia dainai. To edia tomadiho lalonai idia ia doria gauna badana be lalokau. Paulo ia gwau: “Keriso ena lalokau ese ai ia biagua noho.” (2 Korinto 5:14) Iesu be ia murinai idia raka taudia ia hagania idia lalokau heheni totona. (Ioane 15:12, 13) Sibona ena ura dadaraia lalokauna be Keriso ena taravatu ena anina, bona famili lalonai bona kongregesen lalonai, Keristani momokani taudia edia lalona ia hamarerea bona ha-uraia. Namona be edena bamona unai ia karaia mani ita laloa.
Famili Lalonai
5 Aposetolo Paulo be inai ia torea: “Tatau e, emui adavana do umui lalokau henia, Keriso ese ekalesia ia lalokau henia bamona. Keriso ese danu iena mauri ia atoa diho ekalesia dainai.” (Efeso 5:25) Tau ta be Keriso ia tohotohoa bona iena adavana be mai lalokau bona mai lalo-parara ida ia kara henia neganai, Keriso ena taravatu ena anina bada kahana ta ia hagugurua. Danu, Iesu be maragidia dekenai iena lalokau ia hunia lasi, to ia rosia, ena imana ia atoa edia latanai, bona ia hanamoa. (Mareko 10:16) Tama sina be edia natudia dekenai ura henia karana idia hahedinaraia neganai, Keriso ena taravatu idia badinaia. Momokani, tama sina haida idia hekwarahi Iesu ena haheitalai tohotohoa totona. Idia haida edia kara be vaia hemami idia hahedinaraia lasi. Tama sina e, namona be unai ese umui ia koua lasi emui lalokau hemami emui natudia dekenai hahedinaraia totona! Umui diba emui natudia umui lalokau henia be hegeregere lasi. Idia diba danu be gau badana. Bona do idia diba lasi bema lalokau hahedinaraia daladia oi tahua lasi.—Mareko 1:11 itaia.
6 Nega tamona ai, memero kekeni ese hakaua herevadia idia diba be namo. Unai ena anina be edia tama sina ese taravatu do idia haginia bona natudia idia badinaia lasi neganai, do idia matahakani henia. (Heberu 12:7, 9, 11) To, gau badana be natudia idia durua noho unai taravatu edia anina korikorina idia lalo-pararalaia totona: edia tama sina ese idia lalokau henidia. Bona namona be idia diba lalokau be tama sina kamonai henia karana ena badina namona danu. (Efeso 6:1; Kolose 3:20; 1 Ioane 5:3) Lalo-parara tamana o sina ia tahua gauna be maragidia idia hadibaia idia be mai edia “darana ida” idia laloa, gabeai idia sibodia be dala namona do idia abia hidi diba totona. (Roma 12:1, NW; 1 Korinto 13:11 itaia.) To, namona be taravatu be momo herea lasi bona matahakani karana ia auka herea lasi. Paulo ia gwau: “Tamana bona sinana, emui natudia do umui habadua kava lasi, do idia hesiku garina.” (Kolose 3:21; Efeso 6:4) Bema Keriso ena taravatu be ruma bese ta lalonai idia atoa guna, mai badu dikadika ida o hereva dika ida idia karaia matahakani do ia vara lasi. Unai bamona ruma besena lalonai, natudia idia gari lasi bona idia ia hagoadaia; idia ia hametaua lasi eiava ia hamanokaia lasi.—Salamo 36:7 itaia.
7 Betele rumadia idia vadivadi henia taudia haida idia gwau famili edia taravatu namodia haginia dalanai, idia be haheitalai namona. Ena be Betele rumadia dekenai lo taudia sibodia idia noho, to edia heau dalana be famili ena hegeregerena.a Betele lalonai gaukara idauidau idia karaia dainai, taravatu sisina momo idia haginia ia heau namonamo totona—ena taravatu edia momo be famili ena taravatu ena momo idia hanaia. To, Betele rumadia, opesi, bona faktori idia gunalaia elda taudia ese Keriso ena taravatu idia badinaia. Idia laloa edia gaukara be heau dalana namona haginia gaukarana sibona lasi, to idia ura lauma dalanai gaukara taudia iboudiai idia goada bona “Lohiabada dainai” idia moale. (Nehemia 8:10) Unai dainai, idia hekwarahi edia hakaua dalana ia namo, ma haida ia hagoadaia, bona idia kara auka lasi. (Efeso 4:31, 32) Unai dainai ita hoa lasi taunimanima idia diba Betele famili taudia idia moale!
Kongregesen Lalonai
8 Kongregesen lalonai, iseda tahua gauna be mai lalokau ida hagoadaia heheni karana ita karaia. (1 Tesalonika 5:11) Unai dainai namona be Keristani taudia iboudiai idia naria namonamo, tadikaka ma ta sibona ena ura hegeregerena ia abia hidi diba gauna ta dekenai edia lalohadai doria karana amo ena maduna idia hametaua lasi. Nega haida, taunimanima be Watch Tower Society idia tore henia, idia ura idia diba bema muvini piksa, buka, bona gadara gaudia haida idia namo, eiava. To, Society be gwaumaoro ia abia lasi unai gaudia ia tahua bona gwauraia namo o dika totona. Nega momo, unai bamona gaudia be taunimanima ta ta eiava ruma bese ena kwarana ese do ia abia hidi gaudia, ena lalokau Baibel ena hakaua herevadia hegeregerena ai. Ma haida be Society ena hakaua herevadia idia abia neganai, taravatu ai idia halaoa. Haheitalai ta be March 15, 1996, Gima Kohorona lalonai, ena hereva ta ese elda taudia ia hagoadaia kongregesen taudia durudia totona idia vadivadi henia loulou be namo. Unai hereva ena anina be taravatu haginia totona, a? Lasi. Ena be unai sisiba idia badinaia diba elda taudia ese hahenamo momo idia davaria, to badina idauidau dainai idia haida idia karaia diba lasi. Unai hegeregerena, April 1, 1995, Gima Kohorona, ena hereva “Duahia Taudia Edia Henanadai” lalonai, bapatiso negana hemataurai lasi karadia dainai sisiba ia henia, hegeregere ta ia bapatiso dainai pati badana karaia, eiava imana amo ta be toa ta ia karaia, hegeregere ia kwalimu vadaeni bamona. To haida be unai sisiba namona idia habadaia, taravatu idia haginia, idia gwau hanamoa kadi oi siaia be maoro lasi!
9 Mani inai oi laloa danu, bema “taravatu namona bona goevagoeva . . . ita ia ruhaia” gauna be ita ihuanai do ia noho namonamo, namona be ita abia dae Keristani taudia iboudiai edia lalona ena hemami be tamona lasi. (Iamesi 1:25) Bema taunimanima be Baibel ena hakaua herevadia idia hamakohia lasi daladia haida amo idia abia hidi diba, ia namo bema ita badu, a? Lasi. Unai be taunimanima hapararaia karana. (1 Korinto 1:10) Paulo be iseda Keristani tadikaka kota henia lasi sisibana ia henia neganai, ia gwau: “Biaguna sibona ese do ia gwauraia ia be maoro o kerere. Bona ia be do ia gini, badina be Lohiabada ese ia haginia diba.” (Roma 14:4) Bema ma ta ita gwauraia dika, sibona ena lalona ena hemami hegeregerena ia karaia diba gauna ia karaia dainai, Dirava do ita habadua diba.—Iamesi 4:10-12.
10 Namona be inai ita laloatao danu, elda edia maduna be Dirava ena mamoe orea idia gimaia. (Kara 20:28) Heduru henia totona idia noho. Namona be edia sisiba ita tahua, badina be idia be Baibel stiuden taudia bona Watch Tower Society ia herevalaia gaudia idia diba namonamo. Elda taudia ese Baibel ena hakaua herevana ia hadikaia karana ta idia itaia neganai, sisiba do idia henia mai gari lasi ida. (Galatia 6:1) Kongregesen ena memba taudia be idia huanai idia noho mamoe naria taudia ida idia gaukara hebou namonamo neganai, Keriso ena taravatu idia badinaia.—Heberu 13:7.
Elda Taudia be Keriso Ena Taravatu Idia Gaukaralaia
11 Elda taudia idia ura bada Keriso ena taravatu idia badinaia kongregesen lalonai. Idia be sivarai namona harorolaia gaukara idia gunalaia, Baibel amo idia hadibaia taunimanima edia lalona veria totona bona idia be mamoe naria taudia mai edia lalokau bona manau dainai, ‘gari taudia idia hagoadaia.’ (1 Tesalonika 5:14) Idia be Keristani lasi lalohadaidia, Kerisendom ena tomadiho momo lalonai idia noho gaudia, idia dadaraia. Momokani, inai tanobada ia bodaga ia lao haraga, bona Paulo bamona, elda taudia be mamoe orea idia lalo-hekwarahilaia; to idia ese edia laloa namonamo karana idia reaia lasi.—2 Korinto 11:28.
12 Hegeregere, Keristani tauna ta be reana ia ura elda tauna ta ida anina bada gauna ta idia herevalaia, Baibel siri tamona ese ia gwauraia namonamo lasi gauna, eiava unai gauna dainai Keristani hakaua herevadia haida do ia hahegeregerea be namo. Reana ena gaukara gabuna ai dagi bada gaukara do idia henia, bona moni bada do ia abia to ena maduna be do ia bada danu. Eiava Keristani tauna matamatana ena abidadama lasi tamana ena noinoi karana ese ena hesiai gaukara ia hadikaia. Unai bamona gaudia idia vara neganai, elda tauna be iena lalohadai do ia henia lasi. To, Baibel do ia kehoa bona unai tauna do ia durua ena hakaua herevadia ia laloa namonamo totona. Reana Watch Tower Publications Index, bema ia noho, do ia gaukaralaia Gima Kohorona bona buka ma haida amo “Hesiai tauna mai ena kamonai, bona mai ena kara maoromaoro” edia lalohadai davaridia totona. (Mataio 24:45) Bema elda tauna ia laloa unai Keristani tauna ia abia hidi dalana be aonega dalana lasi, dahaka do ia vara? Bema ia abia hidi dalana be Baibel ena hakaua herevadia eiava ena taravatudia ia hamakohia lasi, unai Keristani tauna do ia davaria elda tauna ese iena maoro unai bamona abia hidi karana ai do ia matauraia, badina ia diba “ibounai ta ta sibona ena metau, ena metau do idia huaia.” To namona be unai Keristani tauna ese ia laloaboio lasi, “tau ta aniani uhena ia hadoa, vadaeni unai bamona aniani sibona be do ia abia.”—Galatia 6:5, 7.
13 Dahaka dainai lo elda tauna ese do ia kara henia unai bamona? Badina be rua. Gau ginigunana be, Paulo be kongregesen ta dekenai ia gwau “ai ese umui emui abidadama ai biagua lasi.” (2 Korinto 1:24) Paulo ena hereva ia tohotohoa elda tauna be iena tadikaka ia durua Baibel siridia ia laloa namonamo totona, bena sibona ena abia hidi ia karaia diba. Ia diba iena siahu be mai ena hetoana, Iesu ia diba iena siahu be mai ena hetoana hegeregerena. (Luka 12:13, 14; Iuda 9) Nega tamona ai, elda taudia ese Baibel amo sisiba namona, nega haida sisiba goadana, kerere hadokoa totona do idia henia. Gau iharuana be, elda tauna ia ura ena Keristani tadikaka ia hadibaia. Aposetolo Paulo ia gwau: “Aniani korikori be tau badadia idia ania diba. Idia sibona ese edia lalona idia hadibaia lou, hadibaia lou, ela bona idia manada vadaeni. Unai neganai idia be maoro bona kerere edia toana idia diba namonamo.” (Heberu 5:14) Unai dainai, lauma dalanai ita lo haraga totona, namona be sibona eda lalona hadaia loulou karana do ita goadalaia, bona ma haida do ita noia loulou lasi iseda abia hidi idia karaia totona. Elda tauna, be Keristani tauna dekenai Baibel siridia laloa namonamo dalana ia hahedinaraia karana amo, be do ia durua lauma dalanai ia goada ia lao totona.
14 Iehova Dirava ita abidadama henia, ia be ena lauma helaga amo, tomadiho momokani taudia edia kudouna do ia hamarerea. Unai dainai, lo Keristani taudia ese tadikaka edia lalona ia veria herevadia amo idia noidia, aposetolo Paulo ia karaia hegeregerena. (2 Korinto 8:8; 10:1; Filemona 8, 9) Paulo ia diba taravatu haginia ena badina badana be idia kara maoro lasi taudia biagua namonamo totona, idia kara maoro taudia biagudia totona lasi. (1 Timoteo 1:9) Ia ese ena tadikaka dekenai ia daradara lasi o laloa kerere lasi to ia abidadama henidia. Kongregesen ta ia tore henia: “Ai be Lohiabada ai abidadama henia dainai, ai ese umui danu ai abidadama henia.” (2 Tesalonika 3:4) Paulo ena abidadama, laloa daradara lasi karana, bona lalo-goada unai Keristani taudia dekenai ese idia ia hagoadaia. Hari, unai be elda taudia bona loaloa naria taudia edia tahua gauna. Unai abidadama tatau ese Dirava ena mamoe oreana idia naria mai lalokau ida neganai, ita idia hagoadaia bada!—Isaia 32:1, 2; 1 Petero 5:1-3.
Keriso Ena Taravatu Hegeregerena Oi Mauri Noho
15 Namona be ita ibounai be sibona eda kara ita tahua loulou, Keriso ena taravatu amo ita mauri noho bona ita hariharilaia momokani eiava lasi ita itaia totona. (2 Korinto 13:5) Momokani, namona be ita ibounai be sibona ita nanadaia: ‘Lau be ma haida lau hagoadaia eiava ma haida lau hamanokaia? Laloa namonamo dalana lau badinaia eiava gau haida lau goadalaia kava? Taunimanima ma haida lau matauraia, eiava egu maoro lau tahua guna?’ Namona be Keristani ta ese iena tadikaka ia biagua toho lasi Baibel siridia ese idia herevalaia goevagoeva lasi gauna ta, sibona ena lalona ena hemami ia karaia diba gauna, ia abia hidi neganai.—Roma 12:1, NW; 1 Korinto 4:6.
16 Nega dokona dekenai ita noho dainai, hagoadaia heheni daladia ita tahua be mai anina. (Heberu 10:24, 25; Mataio 7:1-5 itaia danu.) Iseda tadikaka bona taihu ita itaia neganai, edia manoka gaudia lasi, to edia kara namodia ita laloa bada, ani? Iehova ena matana dekenai, idia ta ta be dava bada gaudia. To madi, tadikaka haida edia hemami be unai bamona lasi, bona idia laloa idia sibona danu be anina bada lasi. Idia momo be sibodia edia manoka bona kerere idia itaia sibona. To unai bamona taudia —bona ma haida—hagoadaia totona, reana ita be hebou ta ta ai, taunimanima ta eiava rua ita hereva henia, bona idia ita hamaoroa diba idia mai dainai bona kongregesen idia durua dainai idia ita laloa bada, ani? Do ita moale bema unai dala amo edia maduna ita hamaragia bona Keriso ena taravatu ita badinaia!—Galatia 6:2.
Keriso Ena Taravatu Ia Gaukara Noho!
17 Keriso ena taravatu be Keristani kongregesen lalonai ia gaukara noho. Dina ta ta ai unai ita itaia—Witness taudia be mai edia ura ida sivarai namona idia harorolaia neganai, idia durua heheni bona hagoadaia heheni neganai, hekwakwanai momo idia davaria to Iehova hesiai henia totona idia hekwarahi neganai, tama sina be edia natudia idia hadibaia Iehova idia lalokau henia mai kudou moalena ida neganai, kongregesen naria taudia be Dirava ena Hereva mai lalokau bona mai hebogahisi ida idia hadibaia neganai, bena mamoe orea lalonai Iehova tomadiho henia mai goada ida ela bona hanaihanai hemamina ia vara. (Mataio 28:19, 20; 1 Tesalonika 5:11, 14) Iseda mauri lalonai ita ta ta be Keriso ena taravatu ita gaukaralaia neganai, Iehova ena kudouna ita hamoalea bada! (Aonega Herevadia 23:15) Ia ura ena taravatu goevana idia ura henia taudia iboudiai do idia mauri hanaihanai. Do ia vara Paradaisona lalonai, taunimanima do idia goevadae, taravatu utua taudia be lasi, bona iseda kudouna ena ura ita biagua diba negana do ita itaia. Unai be Keriso ena taravatu badinaia davana namo hereana!
[Footnotes]
a Edia ruma be Kerisendom ena monasteri rumadia bamona lasi. “Abbot” eiava “tamana” bamona taudia be lasi. (Mataio 23:9) Maduna idia abia tadikakadia idia matauraia bada, to edia hesiai gaukara lalonai elda iboudiai idia badinaia hakaua herevadia idia badinaia.
Dahaka Oi Laloa?
◻ Dahaka dainai Kerisendom be Keriso ena taravatu ena anina ia lalo-pararalaia lasi?
◻ Famili lalonai, Keriso ena taravatu gaukaralaia dalana be dahaka?
◻ Kongregesen lalonai, Keriso ena taravatu badinaia totona, dahaka do ita karaia bona dahaka do ita karaia lasi?
◻ Kongregesen lalonai, elda taudia be Keriso ena taravatu badinaia karana be edena bamona idia hahedinaraia?
[Study Questions]
1. Dahaka dainai ita gwau diba hari iseda nega ai Keriso ena taravatu be namo ia havaraia siahu goadana?
2. Kerisendom be edena dala ai Keriso ena taravatu ena anina ia lalo-pararalaia lasi, bona edena dala idauidau ai unai taravatu ita badinaia?
3. (a) Keriso ena taravatu lalonai idia noho hahegani be dahaka dahaka? (b) Dahaka dainai ia maoro lasi bema ita laloa Keristani kongregesen lalonai Keriso ia oda maoromaoro gaudia sibona do ita badinaia, to taravatu ma haida do idia noho lasi?
4. Tomadiho goevana ia havaraia gauna badana be dahaka?
5. (a) Tama sina be edia ruma lalonai Keriso ena taravatu be edena bamona idia badinaia? (b) Natu be ena tama sina amo ia ura ia abia gauna be dahaka, bona tama sina haida ese idia henia totona, dahaka hekwakwanai do idia hanaidia?
6. (a) Natudia be edia tama sina amo taravatu idia abia be namo, a? Bona dahaka dainai unai bamona oi haere? (b) Dahaka dainai taravatu haginia ena badina idia lalo-pararalaia be namo? (c) Ruma bese be dahaka dika do ia reaia diba bema Keriso ena taravatu ia badinaia?
7. Edena dala ai Betele rumadia be haheitalai namona, ruma lalonai taravatu haginia dalana ai?
8. (a) Kongregesen lalonai, iseda tahua gauna badana be dahaka? (b) Edena bamona gaudia dainai, haida be taravatu idia tahua eiava idia ura haginia?
9. Dahaka dainai ita maumauraia heheni lasi bona hahemaoro heheni lasi be mai anina bada?
10. Daidia be maduna idia abia kongregesen naria totona, bona edena bamona ita durudia diba?
11. Kongregesen lalonai, elda taudia be edena bamona Keriso ena taravatu idia badinaia?
12. Keristani tauna ta be heduru tahua totona elda ta dekenai ia lao neganai, elda tauna be reana dahaka do ia karaia?
13. Dahaka dainai elda taudia be henanadai ta do idia haerelaia maoromaoro lasi eiava edia lalohadai do idia gwauraia lasi, to tadikaka do idia durua idia laloa namonamo totona?
14. Lo taudia be edena bamona idia hahedinaraia diba idia be Iehova idia abidadama henia?
15. Ita sibona dekenai dahaka henanadai ita henia, Keriso ena taravatu ita badinaia iseda tadikaka tura henia karana lalonai eiava lasi tahua totona?
16. Sibodia idia laloa bada lasi taudia durua totona, dahaka ita karaia diba, bena Keriso ena taravatu ena kahana ta mai anina bada do ita hagugurua?
17. Edena dala idauidau ai Keriso ena taravatu be ia gaukara noho oiemu kongregesen lalonai?
[Picture on page 23]
Emu natuna ia ura bada lalokau ia abia
[Picture on page 24]
Iseda lalokau mamoe naria taudia ese ita idia hagoadaia!