Basileia Haroro Ripoti
Baibel Ena Hereva Momokanidia be Ireland ai Idia Harorolaia Noho
IDIA hanai laganidia ai, Ireland tanona mai hairaina lalonai heiriheiri bada ia vara. Unai nega lalonai, Ireland taudia ese Baibel ena helaro herevana, Iehova ena Witness taudia ese idia dekenai idia laohaia herevana, be idia abia dae. Unai idia hamomokania sivaraidia rua be inai:
■Dublin ai, Iehova ena Witness tauna ta mai ena natuna kekenina be ruma ta ruma ta ai idia haroro noho neganai, hahine ta ladana Cathy idia davaria, iena natuna momo dainai ia bisi momokani. Witness tauna ese ia noia, iena natuna, haroro ia dibaia noho kekenina, ena hereva kwadogina do ia kamonai. Cathy ena lalona ia hegeregere, bona kekeni maragina ese ia hegaegaelaia namonamo herevana ia hamaoroa goevagoeva. Cathy ese ena lalo-momokani bona ena hemataurai ia hoalaia, bona Baibel herevana pepapepana be iena amo ia abia dae.
Gabeai Cathy ese unai kekeni ena hegaegae namonamo bona ena hemataurai ia laloa lou. Ia gwau: “Lau hoa, badina be kekeni maragina ese hereva namo hereana ia harorolaia mai ena hekokoroku lasi. Egu lalona lau hadaia Iehova ena Witness taudia do idia lou mai neganai, do lau kamonai henidia.”
Bena Cathy be hanua maragina dekenai ia lao, Ireland ena diho kahana ai, Cork bona Kerry edia hetoana kahirakahira, unuseniai ia noho. Gabeai Iehova ena Witness taudia be ena ruma ai idia ginidae bona ia abidia dae. Baibel stadi ia abia dae, bona hari ia be kongregesen heboudia ia lao henia loulou, mai ena natuna haida ida. Ia moale, badina be unai kekeni maragina ia ura momokani sivarai namona do ia hamaorolaia.
■Gabu ta ladana Tullamore ai, lagani 7 lalodiai, Witness taudia be hahine ta ladana Jean ida Baibel idia herevalaia loulou. Nega haida ia kamonai bona magasin ia abidia dae, ma nega haida ia ura lasi. Dina ta, Witness hahinena ta ladana Frances bona ena bamona ta ese Jean idia vadivadi henia neganai, ia badu momokani. Unai Witness hahinena ia gwau: “Herevana dahaka ai gwau, ena badu ia bada ia lao ela bona dokonai ai ia hagania do ai siri bena iduara ia koua haraga.”
Frances ia daradara, bema do ia vadivadi henia lou, unai bamona do ia kara henia lou eiava. Ena lalona ai ia gwau: ‘Bema inai hereva ia ura momokani lasi, do lau vadivadi henia lou lasi be namo.’ To unai ia vara gauna be ena adavana Thomas ida idia herevalaia neganai, Thomas be mai ena helaro namona. Unai gabu idia lao lou neganai, Jean idia vadivadi henia lou. Ia gado namo henidia, bona Gima Kohorona bona Noga! magasin ia abia dae. Gabeai unai bamona ia gado namo henidia loulou, bona Thomas bona Frances be Baibel stadi ia dekenai idia hamatamaia.
Dahaka dainai Jean ese ena kara ia haidaua? Ia gwau, Witness hahinedia ruaosi ia dagedage henia neganai, unai be ia mara bena hospital ia rakatania negana murinai sisina. Ena beibi matamatana be rata ia henia noho bona ena vara guna beibina be sipuni amo ia ubua noho, unai dainai hanuaboi ai ia be hora tamona mai kahana sibona ia mahuta. Ma ia gwau: “Unai neganai lau ura lasi momokani tomadiho do lau herevalaia.”
Hua rua idia do ore lasi neganai, Jean be kongregesen hebou iboudiai dekenai ia lao loulou, bona hua hani idia do ore lasi neganai, haroro gaukarana ia karaia. Ena Baibel stadi ia hamatamaia negana amo hua 10 idia ore neganai, bapatiso ia abia. Hari inai negai Jean sibona ena ekspiriens ese ia durua, haroro gaukarana lalonai. Ia gwau: “Bema badu bada tauna ta lau davaria, lau hebogahisi henia toho. Unai bamona negadia iboudiai unai kara ta ena sivarai lau torea. Ta do lau lou henia neganai, reana ena mauri ia senisi vadaeni dainai, ena lalona do ia namo bona do ia kamonai.”