Heabidae Karadia Umui Karaia
“Bema Dirava ena taudia be mai edia gau lasi neganai, umui durudia. Bema idau taudia be umui dekenai idia mai neganai, emui ruma dekenai do umui abidia dae.”—ROMA 12:13.
HANUABOI momokani ai, ta be ia manadalaia lasi gabuna ai taunimanima ta ta sibodia idia rakalaia dalana ai ia raka be mai garina hari inai negai. Bona ta ena lalona ia hahekwarahia gauna ma ta be taunimanima momo bogaraginai ia noho to ta ia diba lasi. Momokani, taunimanima iboudiai edia ura korikori be haida ese idia do idia naria, do idia abidia dae, bona do idia ura henidia. Ta ia ura lasi do idia kara henia, idau taudia o murimuri taudia idia kara henidia hegeregerena.
2 Iehova Dirava, gau iboudiai ia Karaia bona Havaraia Tauna, ia diba taunimanima idia ura haida ese do idia bamodia. Ia be taunimanima edia Oromana Havaraia Tauna dainai, matamana amo ia diba “tau sibona ia noho be ia namo lasi,” unai dainai ena bamona ia karaia. (Genese 2:18, 21, 22) Iehova bona ena hesiai taudia ese taunimanima idia kara namo henia sivaraidia momo be Baibel lalonai. Idia ese ita idia durua heabidae karana do ita karaia, ma haida hamoalea totona bona iseda lalodia do idia hegeregere totona.—Roma 12:13.
Idau Taudia Ura Henia
3 Inai hereva “heabidae karana,” Baibel ai idia gaukaralaia hegeregerena, be Greek gado herevana phi·lo·xe·niʹa ida idia hahegeregerea. Unai Greek gado herevana be mai ena kahana rua; ta ena anina be “lalokau” bona ta ena anina be “idau tauna.” Unai hegeregerena, heabidae karana ena anina ta be “idau taudia lalokau henia” karana. To ia be hemataurai karana sibona lasi. Ta ena hemami bona iena ura henia karana dainai ia karaia. James Strong ena buka ladana Exhaustive Concordance of the Bible ia gwau, inai hereva phi·leʹo ena anina be “tura henia (eiava [gau ta o tau ta] ura henia).” Unai bamona heabidae karana ese lalohadai maoromaoro dainai ia vara lalokauna eiava kara taravatuna dainai idia karaia karana ia hereaia. Ia be ta ese ma ta ia ura henia, ia lalokau henia, bona ia tura henia karana ta.
4 Unai bamona idia ura henia bona idia lalokau henia tauna be “idau tauna” (Greek gado, xeʹnos). Ia be edena bamona tauna? Strong ena Concordance bukana ia gwau, inai hereva xeʹnos ena anina be ‘idau tano tauna’ (eiava hanua idauna tauna); vadivadi tauna o idau tauna.’ Unai dainai heabidae karana, Baibel lalonai idia hahedinaraia karana, ena anina be ita ese ita ura henia tauna kara namo henia o ita diba lasi idau tauna ta ita kara namo henia. Iesu ia gwau: “Bema umui idia lalokau henia taudia sibona dekenai do umui lalokau henia, dahaka dainai umui laloa Dirava be umui do ia hanamoa? Kara dika taudia ese danu unai bamona idia karaia noho. Bema emui turana sibona do umui hanamoa, emui namo be edena bamona do ia bada? Dika taudia danu unai bamona idia karaia noho.” (Mataio 5:46, 47) Lalo-dika bona gari ese idia havaraia karadia, taunimanima hapararaia bona haidaua karadia unai, be heabidae karana korikorina ese ia hanaia.
Iehova, Heabidae Tauna Goevadaena
5 Iesu be unai bamona ia hahedinaraia taunimanima idia lalokau heheni dalana be hegeregere lasi, bena ia gwau: “Do umui maoromaoro momokani, umui emui Tamana guba dekenai ia noho ia maoromaoro momokani bamona.” (Mataio 5:48) Momokani, Iehova be dala iboudiai dekenai ia maoromaoro momokani, ia goevadae. (Deuteronomi 32:4) To unai neganai Iesu ese Iehova ena goevadae ena toana tamona ia gwauraia guna, ia gwau: “[Dirava] ese kara dika taudia bona kara namo taudia edia latanai dina ena diari ia henia noho. Medu danu kara maoro taudia bona kara kerere taudia edia latanai ia siaia diho.” (Mataio 5:45) Kara namo hahedinaraia karana ai, Iehova ese ta ena toana ia laloa lasi.
6 Iehova be gau iboudiai Havaraia Tauna, unai dainai ia be gau iboudiai edia biaguna. Iehova ia gwau: “Uda dekenai noho mauri gaudia ibounai be lauegu, bona egu ororo ibounai dekenai idia noho boromakau, momo herea, duahia diba lasi, danu be lauegu. Ataiai manudia ibounai danu be lauegu, bona hanua ena murimurinai idia noho mauri gaudia ibounai danu.” (Salamo 50:10, 11) To, gau iboudiai ia gogoa lasi sibona ena. Iena hariharibada dainai, iena mauri gaudia iboudiai ia naria. Salamo torea tauna ese Iehova be inai bamona ia gwauraia: “Oi ese aniani hegeregere oi henidia, bona idia boga kunu noho.”—Salamo 145:16.
7 Iehova ese taunimanima idia dabu gaudia ia henidia—ia idia diba lasi taudia danu be unai bamona ia kara henidia; ia vairanai idia be idau taudia bamona. Paulo bona Banaba ese kaivakuku tomadiho henia taudia Lusitera hanuana ai idia hamaoroa, Iehova ese “iena noho ia hamomokania noho, iena kara namodia dekena amo, gaudia inai: Medu ia siaia diho guba dekena amo, bona aniani haboua nega namodia ia henia umui dekenai. Boga kunu ia henia umui dekenai, bona emui kudouna dekenai moale ia havaraia.” (Kara 14:17) Dabu taudia dekenai Iehova ena hebogahisi bona ena hariharibada be bada herea. (Deuteronomi 10:17, 18) Taunimanima kara namo henia bona harihari henia bada daladia momo—abia dae daladia unai—be Iehova ena amo ita dibaia diba.
8 Iehova ese ia karaia taudia edia tauanina durua gaudia ia henia badabada, bona lauma dalana ai ia durudia danu. Guna, lauma dalana ai ita dika momokani neganai, unai ita do diba lasi neganai Iehova ese ita ia kara henia mai ena hariharibada ida, lauma dalana ai ita do ia hanamoa totona. Roma 5:8, 10 ia gwau: “Dirava ese iena lalokau badana ia hedinaraia ita dekenai, badina ita be do kara dika noho taudia neganai, Keriso be ita dainai ia mase. Guna ita maino lasi Dirava dekenai, to iena Natuna ia mase dekena amo maino ia karaia, vadaeni Dirava bona ita be turana vadaeni.” Unai kara amo dala ia kehoa, kara dika taudia be iseda Tamana guba dekenai ia noho ena bese taudia mai edia moale ai do idia lao. (Roma 8:20, 21) Iehova ese danu hakaua herevadia be ita ia henia; unai dainai, ena be ita be goevadae lasi taudia mai eda kara dika, to iseda mauri dekenai ita kwalimu diba.—Salamo 119:105; 2 Timoteo 3:16.
9 Unai dainai, ita gwau diba dala momo ai Iehova be momokani heabidae tauna goevadaena. Ia ese dabu taudia, manau taudia, bona ogogami taudia ia laloaboio lasi. Ia ese idau taudia bona ia idia inai henia taudia danu edia namo ia tahua mai ena momokani ida, bona idia edia amo davana ia tahua lasi. Unai ibounai lalonai ia be heabidae tauna goevadaena, ani?
10 Iehova be hebogahisi bona hariharibada Diravana, bona ia ura ia idia tomadiho henia taudia ese iena kara do idia tohotohoa. Unai kara namona ena sivarai badadia be Baibel ena kahana ibounai lalonai ita itaia. The Encyclopaedia Judaica bukana ia gwau: “Idaunegai Israelana ai, heabidae karana be hemataurai karana sibona lasi, to ia be kara maoromaoro taravatuna badinaia karana danu . . . Baibel ese ia sivarailaia karadia, ia hesiku laolao tauna bona idau tauna abia dae karadia amo, heabidae karadia momo be gabeai idia vara, Iuda taudia ese idia laloa bada gaudia unai.” Heabidae karana be bese tamona ena toana lasi; ia be Iehova idia tomadiho henia taudia korikoridia iboudiai edia kara korikori.
Aneru Ia Abidia Dae
11 Heabidae karana ena sivarai ta Baibel lalonai, momo idia diba gauna, be Aberahamo bona Sara edia kara ena sivarai; unai be Heberona kahirakahira, Mamare ena au badadia edia gabu dekenai idia kamepa neganai idia karaia karana. (Genese 18:1-10; 23:19) Aposetolo Paulo ese unai sivarai ia laloa, inai bamona ia sisiba neganai: “Do umui laloaboio lasi, idau taudia emui ruma lalonai do umui abia dae. Badina be haida ese unai bamona idia karaia neganai, aneru idia abia dae. To idia diba lasi unai be aneru.” (Heberu 13:2) Bema unai sivarai ita tahua, unai amo do ita diba heabidae karana be bese ta o famili ta edia kastom karana ta sibona lasi. Ia be Dirava ia ura henia karana ta, ia amo hahenamo badadia ita davaria diba.
12 Genese 18:1, 2 ese ia hahedinaraia Aberahamo be unai vadivadi taudia ia diba lasi bona guna ia diba lasi do idia vadivadi henia, idia be idau taudia toi sibona, unai gabu amo idia raka hanai taudia. Haida idia gwau ist kahana taudia edia kastom ta be ta be idau tanona ai ia laolao neganai, ena be unai tano taudia ta ia diba lasi, to do idia abia dae be maoro. To Aberahamo ia naria lasi ela bona unai idau taudia ese idia noia unai kastom hegeregerena idia do ia abia dae; ia kara henidia guna. Idia be do daudau neganai, Aberahamo “ia heau lao,” do ia hedavari henidia totona—unai be ‘dina tubua neganai,’ bona Aberahamo ena mauri laganidia be 99! Unai ese ia hahedinaraia dahaka dainai Paulo ia gwau Aberahamo ena kara do ita tohotohoa be namo, ani? Heabidae karana ena anina be unai, idau taudia ura henia o lalokau henia, bona edia dabu ai durua karana. Ia be kara namona ta.
13 Unai sivarai ese danu ita ia hadibaia, Aberahamo ese unai idau taudia ia hedavari henidia bena “ia tui diho tano dekenai.” Ia diba lasi momokani taudia vairadiai ia tui diho be edena bamona? Unai kara Aberahamo ese ia karaia be vadivadi tauna badana eiava dagi bada tauna hanamoa karana, ia be tomadiho karana lasi; Dirava sibona mo tomadiho henia be maoro. (Kara 10:25, 26; Apokalupo 19:10 itaia.) Aberahamo be ena kwarana ia atoa diho sisina sibona lasi, to “ia tui diho tano dekenai”; unai amo ia hahedinaraia unai idau taudia ia matauraia, ia laloa idia be taunimanima badadia. Ena be ia be kohu momo besena badana ena kwarana, to ia laloa unai idau taudia ese hemataurai bada do idia abia bona ia be hemataurai maragi do ia abia be maoro. Taunimanima be vaia idau taudia dekenai idia naria namonamo, to Aberahamo ena kara be idau vaitani! Iena kara amo inai hereva ena anina ia hahedinaraia: “Umui ta ta dekenai danu do umui matauraia.”—Roma 12:10.
14 Unai sivarai orena ese ia hahedinaraia Aberahamo ena heabidae karana be momokani. Idia dekenai ia henia aniani be namo herea momokani. Ruma besena badana, ena be ia be mai ena boromakau momo, to ‘boromakau natuna, ena hidio be manokamanoka bona mai digara danu,’ be dina ta ta iboudiai idia ania lasi. John Kitto ena Daily Bible Illustrations bukana ese unai gabu taudia edia kara ia gwauraia, ia gwau: “Aniani digaradia idia ania negadia be inai sibona: aria neganai eiava idau tauna ta ia ginidae neganai; mai edia mamoe bona boromakau momo taudia danu be unai bamona.” Unai be siahu gabuna dainai vamu idia haboua diba lasi do ia noho daudau totona, unai dainai kara ibounai be nega tamona idia karaia. Unai dainai unai sivarai kwadogina lalonai inai hereva “karaharaga” be nega toi ia torea, bona Aberahamo be ia “heau lao” aniani hegaegaelaia totona, be hoa gauna lasi!—Genese 18:6-8.
15 To, heabidae karana ena anina be inai lasi: Aria badana karaia, taunimanima ta ena lalona veria totona. Mani inai oi laloa, ena be Aberahamo bona Sara ese unai aniani hegaegaelaia bona henia karadia idia hekwarahilaia, to Aberahamo ese inai bamona ia herevalaia guna: “Lau ura ranu totona do lau boiboi, idia mailaia, emui aena huria totona. Bona inai au henunai umui laga-ani. Aniani sisina do lau mailaia, goada do umui abia, gabeai emui dala dekenai ma do umui raka lao. Lauegu ruma dekenai umui mai vadaeni, unai dainai emui ura lau ura karaia.” (Genese 18:4, 5) Unai “aniani sisina” be boromakau natuna ta, ubu-ubu gauna, paraoa namona amo ia karaia beredi, bata, bona rata—aniani namo hereana unai. Ita dekenai unai sivarai ese dahaka ia hadibaia? Gauna be inai: Aniani totona haida ita boiria neganai, aniani bona inuinu gaudia, ita henia gwauraia gaudia, bona ita hamoalelaia gwauraia karadia, do ita herevalaia momo lasi be namo. Herevana ta ese dava bada aniani ia henia diba eiava lasi, to heabidae karana ia karaia diba. Heabidae karana ena badina be ta ese ma haida edia namo ia tahua, bona ia ura ena diba hegeregerena idia do ia kara namo henia. Baibel ena aonega herevana ta, heabidae karana momokanina ena anina ia gwauraia herevana, be inai: “Raisi sibona, oiemu lalokau taudia danu do oi ania be namo, to vamu namo herea, badu noho taudia danu do oi ania be dika.”—Aonega Herevadia 15:17.
16 To namona be ita diba, unai ia vara karana ibounai lalonai Dirava ena lauma ena toana ia hedinarai. Aberahamo ese unai vadivadi taudia ia hereva henia neganai, ena hereva amo ia hahedinaraia ia lalo-parara idia be Iehova ena gwaukau taudia. Ia gwau: “Lauegu Lohiabada e, lau ura oiemu ura lau karaia, mani emu kara lauegu ruma oi hanaia lasi, oi noho iniseni. Lau be oiemu hesiai tauna.”a (Genese 18:3; ma danu Esodo 33:20 itaia.) Aberahamo ia diba guna lasi, hereva ta idia mailaia ia dekenai eiava unai gabu amo idia raka hanai sibona. Ena be unai ia diba lasi, to ia diba Iehova ena palani ena anina ia vara. Unai tatau ese Iehova ia henia gaukarana ta idia karaia noho. Unai gaukara durua totona bema kara ta ia karaia diba, unai do ia moalelaia. Ia diba Iehova ena hesiai taudia ese gau namo hereadia do idia abia be maoro, bona iena noho hegeregerena unai do ia henidia. Unai bamona do ia karaia dainai, ia eiava ma ta ese lauma dalana ai hahenamo ta do ia abia. Vadaeni, Aberahamo bona Sara ese hahenamo bada idia abia, edia heabidae karana momokanina dainai.—Genese 18:9-15; 21:1, 2.
Heabidae Besena
17 Aberahamo ena haheitalai namona be ia ena amo ia vara besena ese do idia laloaboio lasi be namo. Iehova ese Israela taudia dekenai ia henia Taravatuna lalonai, ia hagania idau taudia idia bogaraginai idia noho be do idia abia dae, ia gwau: “Idau taudia be emui bese korikori hegeregerena umui emui huanai do idia noho. Do umui lalokau henidia, umui sibona umui lalokau henia hegeregerena. Do umui laloaboio lasi, umui danu be Aigupito tano dekenai idau taudia bamona umui noho guna. Lau inai Lohiabada, emui Dirava.” (Levitiko 19:34) Namona be ogogami taudia do idia durua bona do idia laloa maragi lasi. Iehova ese ia hanamodia dainai edia uma ese anina bada do idia havaraia neganai, edia aria ai do idia moale neganai, Sabati lagani lalodiai edia gaukara amo do idia laga-ani neganai, bona nega idaudia ma haida ai, namona be dabu taudia do idia laloatao —vabu, tamana lasi memerodia, bona idau taudia unai.—Deuteronomi 16:9-14; 24:19-21; 26:12, 13.
18 Ogogami taudia bona ma haida kara namo henidia, harihari henidia, bona abidia dae karadia be mai anina bada. Israela taudia be unai kara idia karaia lasi neganai Iehova ese ia kara henidia dalana ese unai ia hahedinaraia. Iehova ese ia hahedinaraia goevagoeva iena bese taudia ese iena hahenamo do idia abia hanaihanai totona, namona be idau taudia bona ogogami taudia do idia kara namo henia bona idia harihari henia. (Salamo 82:2, 3; Isaia 1:17; Ieremia 7:5-7; Esekiela 22:7; Sekaraia 7:9-11) Israela besena ese unai hahegani bona hahegani ma haida idia badinaia mai edia momokani ida neganai, edia namo ia bada, bona tauanina durua gaudia momo bona lauma gaudia momo idia abia. To sibona edia ura idia tahua badabada bona ogogami taudia be unai dala namodia amo idia durua lasi neganai, Iehova ese idia ia gwauraia dika, bena gabeai edia davana dikana ia henia.—Deuteronomi 27:19; 28:15, 45.
19 Unai dainai, gau badana be sibona eda kara ita tahua namonamo, ita be Iehova ena ura unai kara dekenai hegeregerena ita kara eiava lasi! Unai be mai anina bada, badina be tanobada taudia ese sibodia edia namo idia tahua bona lalo-tamona karana idia tahua lasi. Ia parara tanobadana dekenai Keristani heabidae karana be edena bamona ita hahedinaraia diba? Hereva gabena lalonai unai do ita herevalaia.
[Footnotes]
a Inai sivarai herevadia momo be Gima Kohorona, February 1, 1989 gauna, rau 24-7 ai, inai hereva, “Taunimanima ta ese Dirava Ia Itaia A?” lalonai.
Inai Oi Laloatao, A?
◻ Baibel ena hereva ta, ita hahanaia “heabidae karana,” ena anina be dahaka?
◻ Heabidae karadia ai, edena dala idauidau ai Iehova be haheitalai hereadaena?
◻ Aberahamo ese ena heabidae karana be edena bamona ia hahedinaraia?
◻ Dahaka dainai tomadiho momokani taudia ese heabidae karadia idia karaia be namo?
[Study Questions]
1. Taunimanima edia ura korikorina ta be dahaka, bona unai be edena bamona idia hahedinaraia?
2. Iehova ese iseda hebamo ura henia urana be edena bamona ia hagugurua?
3. Heabidae karana ena anina korikori mani oi gwauraia.
4. Heabidae karadia be daidia dekenai ita hahedinaraia be namo?
5, 6. (a) Iesu ia gwau, “Emui Tamana guba dekenai ia noho ia maoromaoro momokani” neganai, dahaka ia laloa? (b) Iehova ese ena hariharibada be edena bamona ia hahedinaraia?
7. Iehova ese idau taudia bona dabu taudia ia kara henia dalana amo dahaka ita dibaia?
8. Lauma dalana ai, Iehova ese ita dekenai ena harihari bada karana be edena bamona ia hahedinaraia?
9, 10. (a) Dahaka dainai ita gwau diba Iehova be heabidae tauna goevadaena? (b) Unai kara ai, tomadiho momokani taudia ese Iehova be edena bamona idia tohotohoa be namo?
11. Dahaka sivarai badana ese ia hahedinaraia ta ese ia laloa guna lasi hahenamodia be ena heabidae karana dainai idia vara? (Genese 19:1-3; ma danu Gunalaia Taudia 13:11-16 itaia.)
12. Aberahamo ese edena bamona ia hahedinaraia idau taudia ia lalokau henia?
13. Badina be dahaka Aberahamo be vadivadi taudia vairadiai “ia tui diho”?
14. Aberahamo ese unai idau taudia ia abia dae neganai, edena bamona ia hekwarahi, bona dahaka ia henidia?
15. Aberahamo ese ia hahedinaraia hegeregerena, heabidae karana ita karaia neganai ita henia aniani be edena bamona ita laloa be maoro?
16. Aberahamo ese vadivadi taudia ia kara henia karana amo, edena bamona ia hahedinaraia lauma gaudia ia laloa bada?
17. Iehova ese Israela taudia ia hagania idia bogaraginai idia noho idau taudia bona dabu taudia be edena bamona do idia kara henidia?
18. Iehova ena lalo-namo bona ena hahenamo abia totona, heabidae karana ena anina ena bada be edena bamona?
19. Dahaka danu do ita laloa be namo?