Taunimanima be Iseda Ruma Ai Ita Abia Dae
1 Iena ruma ai taunimanima haida ia abidia dae tauna bona unai ia abidia dae taudia danu ese namo idia davaria. Heabidae be Keristen taudia edia kara badana ta. (Heb. 13:2) Taunimanima haida be hereva momokani lalonai idia vareai, badina tadikaka haida edia heabidae karadia ese edia lalona idia veria dainai. Vadaeni, oi be heabidae karadia momokani oi karaia, a? Oiemu heabidae karadia edia dala ia namo ia lao, eiava?
2 Heabidae ena anina be inai: “Ta ese ena turana haida o idau taudia haida be ena ruma ai ia abidia dae mai ena gado-namo bona hariharibada danu.” Unai dainai, heabidae momokani be taunimanima edia kudouna amo ia vara gauna. Lidia hegeregerena, heabidae momokani tauna “ia ura bada” vadivadi taudia be iena ruma dekenai do idia vareai. (Kara 16:14, 15) Heabidae taudia korikori ese dala idia tahua taunimanima idia durua totona.
ITA HAHEDINARAIA DALANA
3 Heabidae karadia be edena bamona ita hahedinaraia diba? Edena taudia be iseda ruma ai ita abidia dae diba? Idau nega lalonai, haida ese peroveta taudia bona Dirava ena hesiai taudia ma haida idia abidia dae. Heabidae taudia ese aneru danu idia abidia dae. (Gen. 18:3, 8) Sakaio, Mareta, Maria bona Lasaro ese Iesu be edia ruma ai idia abia dae dainai, davana namo herea idia abia! (Luka 19:5-10; 10:38-42) Hari inai nega lalonai danu, haida ese unai bamona hahenamo idia abia, badina be sekit naria taudia, pablik tok totona edia kongregesen dekenai idia mai taudia, pioneer taudia bona misinari taudia idia abidia dae dainai.—Roma 1:11.
4 Danu, kongregesen lalonai idia vareai matamata taudia be iseda heabidae karadia amo namo idia davaria. Reana kongregesen taudia haida idia hemarai. Reana ma haida idia ogogami o idia buruka o idia gorere. Memero kekeni haida edia tamadia bona sinadia be iseda orea taudia lasi. Mani umui laloa, bema idia ita boiria iseda ruma dekenai do idia mai bona ita danu do idia aniani hebou, o moale karadia namodia haida eiava stadi be ita danu do idia karaia hebou totona, do idia moale bada herea, ani? Iesu ena sisiba hereva mai aonegana Luka 14:12-14 dekenai, mani umui laloa.
5 Iseda kongregesen taudia sibodia lasi, to taunimanima ma haida danu ita abidia dae be namo. Bema iseda dekena taudia idia hekwarahi badina be aksiden, gorere o mase be edia ruma bese lalonai ia vara dainai, ita abidia dae bona ita durudia, a? Iseda varavara ita abidia dae, a? Namona be ita naria namonamo, nega bada be abidia dae karadia dekenai ita halusia kava garina; ita idia vadivadi henia neganai, reana Bible ena hereva be idia dekenai ita gwauraia diba, o iseda hereva amo edia lalona ita hagoadaia diba, o dala idaudia amo idia ita durua diba.
DAVANA NAMONA
6 Ita be Keristen dalanai taunimanima ita abidia dae be mai ena hekwarahi. To unai lalokau karadia amo ita hahedinaraia ita be Keriso ena hahediba taudia. (Ioane 13:35) Iehova ia ura ita be heduru henia taudia ai ita lao. Gau haida be taunimanima ita henidia neganai ita moale bada, gau haida be idia edia amo ita abia neganai ita moale maragi. (Kara 20:35) Ena be ita hekwarahi bada taunimanima be iseda ruma ai ita abidia dae neganai, to namona be ita laloatao, gaukara be Dirava ena harihari gauna ita dekenai. (Koh. 3:13) Hariharibada tauna be davana namona do ia abia, iena hariharibada dainai.—Her. 11:25; Luka 6:38.
7 Bema iseda Keristen heabidae karadia amo taunimanima ta ita durua Basileia harorolaia gaukarana ia karaia totona, unai ita itaia neganai ita moale bada herea. Hari inai nega lalonai ita abidia dae taudia bema gabeai Nega Matamatana lalonai ita itaia Iehova ena hahenamo hanaihanai idia abia noho, iseda lalona do idia hegeregere momokani! Oibe, heabidae taudia bona idia ese idia abidia dae taudia danu be davana namona do idia abia diba ela bona hanaihanai.—Mat. 25:34-40.