Sekit Bona Distrik Naria Taudia Edia Hesiai Gaukara Idia Karaia Namonamo Dalana
“Dirava ese umui ta ta ibounai dekenai harihari gaudia idauidau ia henia vadaeni. . . . Do umui gaukaralaia, emui Keristani varavara taudia do umui durua totona. Unai dekena amo umui be Dirava ena hesiai taudia namodia, bona iena hariharibada idauidau umui hedinaraia noho.”—1 PETERO 4:10.
1, 2. (a) “Hesiai tauna,” ena anina be dahaka? (b) Edena taudia danu be Dirava ese ia gaukaralaia hesiai taudia?
IEHOVA ese Keristani taudia mai edia kamonai iboudiai dekenai hesiai taudia gaukarana ia henia. Hesiai taudia momo ese edia biagudia edia ruma eiava reana edia bisinesi idia naria. (Luka 16:1-3; Galatia 4:1, 2) Iesu ese horoa taudia mai edia kamonai tanobada dekenai edia orea ia gwauraia “hesiai tauna mai ena kamonai.” Ia ese unai hesiai tauna be “iena kohu ibounai dekenai naria tauna” ai ia halaoa vadaeni, unai gau ta be Basileia harorolaia gaukarana.—Luka 12:42-44; Mataio 24:14, 45.
2 Aposetolo Petero ia gwau, Keristani taudia iboudiai be Dirava ena hariharibada naria taudia, dala idauidau amo ia hahedinaraia hariharibadana unai. Keristani taudia ta ta iboudiai be mai edia dala, edia hesiai gaukarana do idia karaia mai edia kamonai ida. (1 Petero 4:10) Keristani elda dagina idia abia taudia be hesiai taudia, bona idia haida be sekit bona distrik naria taudia. (Tito 1:7) Unai sekit bona distrik naria taudia be edena bamona ita laloa be namo? Edena bamona do idia kara bona dahaka do idia tahua be namo? Bona namo bada be edena bamona idia havaraia diba?
Edia Gaukara Dainai Idia Tanikiu Henidia
3. Dahaka dainai sekit bona distrik naria taudia be “hesiai taudia namodia” ita gwauraidia be maoro?
3 Keristani taudia rua, tau ta mai ena adavana, ese sekit naria tauna ta bona ena adavana idia tore henia, idia gwau: “Umui ai tanikiu henia, ai dekenai umui haorea negana bona ai umui henia lalokauna ibounai dainai. Mai emai famili ida, ai ese namo bada ai davaria, emui hahegoada herevadia bona emui sisiba herevadia dainai. Ai diba lauma dalanai do ai tubu noho be namo, to Iehova ena heduru amo bona tadikaka bona taihu umui hegeregerena dainai, unai tubu karana ena hisihisi be maragi.” Unai bamona herevadia be momo, badina be sekit bona distrik naria taudia ese edia Keristani varavara taudia edia namo idia tahua, hesiai tauna namona ese ruma taudia ia naria namonamo hegeregerena. Haida be hereva henia taudia namo hereadia. Momo be haroro gaukarana dekenai idia kwalimu momokani, bona ma haida be edia kara namo bona edia hebogahisi dainai ladana namona idia abia. Sekit bona distrik naria taudia ese unai harihari gaudia idia habadaia toho bona haida edia hesiai lao henia gaukarana lalonai idia gaukaralaia dainai, idia be “hesiai taudia namodia” ita gwauraidia be maoro.
4 Aposetolo Paulo ia gwau: “Hesiai tauna ena gaukara lalonai gau badana momokani be inai: Iena biaguna ena ura do ia karaia momokani.” (1 Korinto 4:2) Pura ta ta amo sekit bona distrik naria taudia ese kongregesen idauidau ta ta idia durua. Unai amo hahenamo idau hereana mai moalena idia abia, to unai be maduna metauna danu. Vadaeni, edia hesiai gaukarana be edena bamona do idia karaia diba mai edia kamonai bona mai edia kwalimu ida?
Edia Hesiai Gaukarana Lalonai Idia Kwalimu
5, 6. Dahaka dainai sekit bona distrik naria taudia be Iehova dekenai do idia tabekau bona do idia guriguri henia loulou be mai anina bada, edia mauri lalonai?
5 Sekit bona distrik naria taudia be edia hesiai gaukarana lalonai do idia kwalimu totona, namona be Iehova dekenai do idia tabekau bona do idia guriguri henia loulou. Edia gaukara bona edia maduna momo dainai, reana nega haida idia lalo-metau. (2 Korinto 5:4 itaia.) Unai dainai Davida ena ane hegeregerena do idia kara be namo; ia gwau: “Oiemu laloa hekwarahi be Lohiabada dekenai do oi henia, bona ia ese idia dekena amo oi do ia durua. Ia ese kara maoromaoro taudia ia durua noho. Idia be do idia moru lasi, lasi momokani.” (Salamo 55:22) Davida ena hereva ma ta ese edia lalodia ia hagoadaia; ia gwau: “[Iehova] do ita hanamoa. Ia ese dina ibounai iseda maduna metaudia ia huaia noho.”—Salamo 68:19.
6 Paulo be edeseniai goada ia abia, iena lauma madunadia do ia huaia diba totona? Ia gwau: “Lau dekenai siahu ia henia Diravana dainai, lau be mai egu goada gau iboudiai karaia totona.” (Filipi 4:13, NW) Oibe, Iehova Dirava be Paulo ena goada ena Badina. Unai hegeregerena, Petero ia gwau: “Bema ta ia heduru, namona be Dirava ese ia henia goadana amo do ia heduru; unai amo gau iboudiai lalonai Dirava do idia hanamoa Iesu Keriso ena amo.” (1 Petero 4:11, NW) Tadikaka ta, guna lagani momo lalonai sekit naria gaukarana ia karaia, ese ia hahedinaraia Dirava dekenai do ita tabekau be gau badana; ia gwau: “Hekwakwanai gaudia kokia daladia do umui tahua negadia iboudiai, Iehova do umui guriguri henia bona ena orea ena heduru do umui tahua be namo.”
7. Sekit bona distrik naria taudia ese aonega be edena bamona idia gaukaralaia?
7 Sekit o distrik naria tauna ta be ena gaukara lalonai do ia kwalimu totona, namona be do ia aonega. Keristani taudia oredia hegeregerena, ‘gau namodia edia toana do ia diba’ dalana ia tahua goadagoada. (Filipi 1:10)a Kongregesen ta ena elda taudia ese gau ta bema idia daradaralaia, namona be sekit naria tauna do idia nanadailaia, do ia vadivadi neganai. (Aonega Herevadia 11:14; 15:22) Do ia itaia gaudia do ia lalohadailaia maoromaoro bena Baibel amo sisiba do ia henia, bena kongregesen do ia rakatania murinai elda taudia ese unai gaukara do idia karaia noho lalonai, ena sisiba ese idia do ia durua bada diba. Unai hegeregerena, Paulo ese Timoteo ia hamaoroa, ia gwau: “Lauegu hadibaia hereva, be oi ese oi kamonai vadaeni, bona taunimanima momo edia vairanai lau gwauraia. Inai hadibaia hereva be abidadama goada taudia dekenai ma do oi gwauraia. Vadaeni idia ese ma taunimanima haida dekenai unai hereva do idia gwauraia lou.”—2 Timoteo 2:2.
8. Dahaka dainai Baibel stadilaia karana, diba tahua karana, bona laloa namonamo karana be mai anina bada?
8 Ta do ia sisiba maoromaoro diba totona, namona be Baibel do ia stadilaia, diba do ia tahua, bona do ia laloa namonamo guna. (Aonega Herevadia 15:28) Distrik naria tauna ta ia gwau: “Ita be elda taudia ida do ita hebou neganai, bema edia henanadai ta ena haere ita diba lasi, unai do ita gwauraia hedinarai garina do ita gari lasi be namo.” Bema ta ese “Keriso ena laloa” gau ta dekenai ia abia neganai, Baibel amo ma haida do ia sisiba henia diba, do ia durudia Dirava ena ura do idia badinaia totona. (1 Korinto 2:16) Nega haida, namona be sekit o distrik naria tauna ta ese Watch Tower Society do ia tore henia, sisiba do ia noia. Herevana dahaka ia vara, Iehova abidadama henia karana bona hereva momokani ura henia karana edia anina be bada, ta ena toana o ena hereva namonamo dalana edia anina be maragi. Paulo ese ena hesiai gaukarana be Korinto dekenai ia hamatamaia neganai, ia be “hereva namo herea o aonega herea” ia gwauraia lasi, to ‘ia be goada lasi. Ia gari, bona ia heudeheude momo.’ Unai dainai ena gaukara ese anina ia havaraia lasi, a? Lasi, iena kara dainai, Korinto taudia edia abidadama be “taunimanima edia aonega dekena amo ia gini lasi, to Dirava ena siahu dekena amo ia gini.”—1 Korinto 2:1-5.
Kara Namo Hereadia Ma Haida
9. Dahaka dainai sekit bona distrik naria taudia idia hebogahisi be namo?
9 Sekit bona distrik naria taudia be edia hebogahisi amo anina namona idia havaraia diba. Petero ese Keristani taudia iboudiai ia sisiba henia, ‘idia ta ta dekenai do idia bogahisihisi henia.’ (1 Petero 3:8) Sekit naria tauna ta ia laloa namona be ‘kongregesen taudia iboudiai edia namo do ia tahua, bona do ia kamonai mai ena momokani ida.’ Paulo be unai bamona ia laloa danu, ia gwau: “Idia moale taudia danu do umui moale, idia taitai taudia danu do umui tai.” (Roma 12:15) Sekit bona distrik naria taudia ese unai lalohadai idia badinaia dainai, edia Keristani varavara taudia edia hekwakwanai bona edia noho do idia lalo-pararalaia dalana idia tahua goadagoada. Unai neganai Baibel ena hereva amo hagoadaia sisibana idia henidia diba, bena bema unai sisiba idia badinaia, namo momokani ia havaraia diba. Sekit naria tauna ta, hebogahisi bada tauna, ese inai revareva be Turin, Italy, badinai ia noho kongregesen ta amo ia abia: “Bema ta ia ura ia do idia laloa momo, namona be idia do ia laloa momo; bema ia ura ia do idia moale henia, namona be do ia moale henidia; bema ia ura ia do idia lalokau henia, namona be lalokau karadia do ia karaia; bema ma haida edia heduru ia ura, namona be ia hegaegae do ia heduru. Oiemu amo ai diba gaudia be unai!”
10. Sekit bona distrik naria taudia ese lalo-manau karana edena bamona idia herevalaia vadaeni, bona Iesu ese unai kara edena bamona ia hahedinaraia?
10 Sekit bona distrik naria taudia ese namo bada do idia havaraia totona, namona be do idia lalo-manau dainai, tadikaka be idia dekenai do idia lao mai edia gari lasi. Sekit naria tauna ta ia gwau: “Gau badana be ta ena lalona do ia manau hanaihanai.” Vaia, sekit naria taudia matamatadia ia sisiba henidia, ia gwau: “Do umui naria namonamo, tadikaka haida, moni momo taudia, ese edia heduru bada amo emui lalodia do idia ania garina, bona unai bamona taudia sibodia do umui tura henidia lasi, to tadikaka oredia danu be dala tamona amo do umui kara henidia.” (2 Sivarai 19:6, 7) Bona bema sekit o distrik naria tauna ta ena lalona ia manau momokani, ia be sibona ena dagi, Association ena gwaukau dagina, do ia hekokorokulaia lasi. Distrik naria tauna ta ena sisiba maorona be inai: “Namona be do oi manau bona mai emu ura ida tadikaka do oi kamonai henidia. Nega ibounai do oi abidia dae.” Tau hereadaena, Iesu Keriso bema ia ura neganai, taunimanima edia lalona ia hahemaraia diba, to ia manau momokani bona ia abidia dae dainai, maragidia danu edia lalona idia namo, ia dekenai idia noho neganai. (Mataio 18:5; Mareko 10:13-16) Sekit bona distrik naria taudia idia ura memero kekeni maragidia bona badadia, buruka taudia—momokani kongregesen taudia iboudiai—edia lalona do idia hegeregere, idia dekenai do idia lao mai edia gari lasi.
11. Bema ta be sori herevana ia gwauraia be mai badina, unai hereva ese dahaka anina ia havaraia diba?
11 Momokani, “ita ibounai ese nega momo kerere ita karaia,” bona sekit bona distrik naria taudia ta lasi be ia kara kerere diba lasi. (Iamesi 3:2) Idia ta ia kara kerere neganai, bema sori herevana ia gwauraia mai ena momokani ida, unai amo lalo-manau dalana ia haheitalaia elda taudia dekenai. Aonega Herevadia 22:4 ia gwau: “Lohiabada do oi gari henia [mai emu hemataurai ida], bona do oi manau. Inai bamona oi karaia neganai, kohu, bona matauraia, bona mauri do oi davaria.” Bona namona be Dirava ena hesiai taudia iboudiai be ‘mai manau ida Dirava danu do idia raka hebou,’ ani? (Mika 6:8) Sekit naria tauna ta idia nanadaia, dahaka sisiba be sekit naria tauna matamatana ta do ia henia, neganai, ia gwau: “Tadikaka iboudiai do oi matauraia, emu lalona ai do oi gwau oi idia hereaia. Tadikaka edia amo diba momo do oi abia. Emu lalona do ia manau noho. Oi sibona emu kara korikori do oi karaia. Do oi hekokoroku lasi.”—Filipi 2:3.
12. Dahaka dainai Keristani hesiai gaukarana goadalaia karana be mai anina bada?
12 Keristani hesiai gaukarana goadalaia karana ese sekit o distrik naria tauna ena hereva edia anina ia habadaia. Momokani, ia bona ena adavana ese sivarai namona harorolaia gaukarana idia goadalaia neganai, edia haheitalai amo elda taudia mai edia adavadia bona kongregesen taudia oredia danu be idia hagoadaia, edia hesiai gaukarana do idia goadalaia totona. Sekit naria tauna ta ia sisiba, ia gwau: “Hesiai gaukarana do umui karaia goadagoada.” Ma ia gwau: “Lau davaria vadaeni, bema kongregesen ta be hesiai gaukarana idia goadalaia, idia be mai edia hekwakwanai momo lasi.” Sekit naria tauna ma ta ia gwau: “Lau laloa, bema elda taudia be tadikaka bona taihu ida haroro gaukarana lalonai idia gaukara hebou, bona bema idia durudia unai hesiai gaukarana do idia moalelaia totona, idia iboudiai edia lalona do idia namo, bona Iehova ena hesiai lao henia karana do idia moalelaia bada.” Aposetolo Paulo ese ‘Sivarai Namona, Dirava dekena amo ia mai gauna, be Tesalonika taudia dekenai ia gwauraia, mai gari lasi danu.’ Unai dainai gabeai iena vadivadi bona ena haroro gaukarana idia laloa lou mai edia moale ida, bona idia ura bada ia do idia itaia lou!—1 Tesalonika 2:1, 2; 3:6.
13. Sekit o distrik naria tauna be Keristani taudia ma haida ida idia gaukara hebou neganai, ia be dahaka ia laloa?
13 Sekit o distrik naria tauna ta be ena Keristani varavara taudia ida haroro gaukarana idia karaia hebou neganai, ia ese edia noho bona edia manoka hegeregerena idia ia laloa. Ena be reana ena sisiba herevadia ese do idia durudia, to ia diba reana haida idia gari, gaukara ia diba momo elda tauna ta ida idia gaukara hebou neganai. Unai dainai, reana namona be idia haida be do ia sisiba henidia lasi, to do ia hagoadadia sibona be namo. Baibel stadi ta dekenai pablisa o painia taudia ia bamoa neganai, reana idia ura ia ese do ia karaia. Reana unai amo, edia hadibaia karana hanamoa daladia do idia dibaia.
14. Dahaka dainai ita gwau diba sekit bona distrik naria taudia, gaukara goadagoada taudia, ese ma haida idia hagoadaia?
14 Sekit bona distrik naria taudia, gaukara goadagoada taudia, ese ma haida idia hagoadaia. Sekit naria tauna ta Uganda dekenai be hora ta uda lalonai ia raka, tadikaka ta ida Baibel stadi ta idia lao henia; unai stadi be stadi taudia ese idia goadalaia lasi. Tadikaka idia raka noho neganai, medu bada ia diho dainai, idia ginidae neganai edia dabua idia paripari momokani. Unai famili taudia 6 be idia kamonai ia vadivadi henidia tauna be sekit naria tauna ta neganai, idia hoa. Idia diba edia dubu oreana ena pasto taudia ese edia orea taudia be unai bamona idia naria lasi. Bena Sunday gabena ai, hebou dekenai idia lao, nega ginigunana, bona idia gwau idia ura Iehova ena Witness taudia ai do idia lao.
15. Mexico ai, ia gaukara goadagoada sekit naria tauna ta be dahaka ia karaia neganai moale bada ia davaria?
15 Mexico ena Oaxaca provinsi ai, sekit naria tauna ta ese ena gaukara korikorina ia hereaia karana ta ia karaia. Hanuaboi hani dibura rumana ena daiutu ta lalonai ia mahuta, badina be ia ura dibura taudia 7, Basileia harorolaia taudia ai idia lao vadaeni taudia, edia orea do ia vadivadi henia. Dina haida lalonai, unai dibura taudia be daiutu ta daiutu ta dekenai idia haroro bona Baibel stadi idia karaia negadiai, ia ese idia ia bamoa. Stadi taudia haida edia ura be bada dainai, idia stadi henidia ela bona hanuaboi momokani. Unai sekit naria tauna, gaukara goadagoada tauna, be ia gwau: “Egu vadivadi negana ena dokonai, dibura taudia bona lau be ai moale bada, badina be ai hagoadaia heheni vadaeni dainai.”
16. Sekit bona distrik naria taudia bona edia adavadia ese kongregesen taudia idia hagoadaia neganai, dahaka dainai unai ese namo bada ia havaraia?
16 Sekit bona distrik naria taudia ese tadikaka idia hagoadadia toho. Paulo ese Makedonia ena kongregesen ia vadivadi henidia neganai, “do idia goada totona hereva momo ia henidia.” (Kara 20:1, 2) Hagoadaia herevadia amo matamatadia bona burukadia idia durua diba, lauma gaudia do idia tahua totona. Watch Tower Society ena brens opesi badana ta dekenai idia gaukara taudia idia nanadaia neganai, idia davaria idia ima ima amo ta ta be sekit naria taudia ese guna idia hagoadadia, ful-taim hesiai gaukarana do idia karaia totona. Sekit bona distrik naria taudia edia adavadia be nega ibounai Basileia idia harorolaia lalonai, idia danu edia haheitalai ese tadikaka bona taihu ia hagoadaia momokani.
17. Sekit naria tauna burukana ta ese haida ia durua karadia be edena bamona ia laloa?
17 Burukadia bona lalo-metau taudia do idia hagoadaia be mai anina bada. Sekit naria tauna burukana ta ia gwau: “Egu gaukara ena kahana ta, egu lalona ia hamoalea bada gauna, be inai: Idia haroro lasi taudia bona edia tauanina idia manoka taudia lau durua. Roma 1:11, 12 ena hereva be mai anina bada lau dekenai, badina be ‘unai bamona taudia dekenai Lauma Helaga ena hanamoa lau henia, goada do idia abia’ totona neganai, unai ese egu lalona ia hagoadaia momokani.”
Edia Moale Gaukarana Ena Davana Namodia
18. Baibel ena hereva hegeregerena, sekit bona distrik naria taudia be dahaka idia tahua?
18 Sekit bona distrik naria taudia ese edia Keristani varavara taudia edia namo idia tahua mai edia momokani ida. Idia ura kongregesen be lauma dalanai do idia hagoadadia. (Kara 15:41) Sekit naria tauna ta be ia gaukara goadagoada, “tadikaka do ia hagoadadia bona do ia ha-uradia, edia hesiai gaukarana do idia hagugurua bona hereva momokani do idia badinaia totona.” (3 Ioane 3) Ma ta ese dala ia tahua, ena Keristani varavara taudia do ia hagoadaia, ita abia dae herevadia do idia abidadama henia goada totona. (Kolose 2:6, 7) Mani inai oi laloa, sekit naria tauna be iseda “durua tauna namona,” bona tadikaka edia abidadama ia biagua lasi. (Filipi 4:3; 2 Korinto 1:24) Iena vadivadi negana be lalona hagoadaia negana bona gaukara momo negana. Unai negai elda taudia edia orea ese kongregesen ena goada bona ena manoka do idia laloa lou, bona palani be nega vaira totona do idia karaia. Kongregesen ena pablisa taudia, painia taudia, hesiai taudia, bona elda taudia idia diba ena hereva bona ena kara amo do ia hagoadadia bona do ia ha-uradia, nega vairai do idia gaukara totona. (1 Tesalonika 5:11 itaia.) Unai dainai, sekit naria tauna ena vadivadi negana karadia iboudiai do umui karaia, bona distrik naria tauna ena heduru ibounai do umui abia dae.
19, 20. Sekit bona distrik naria taudia haida bona edia adavadia ese edia gaukara namona ena davana be edena bamona idia abia vadaeni?
19 Sekit bona distrik naria taudia bona edia adavadia edia hesiai gaukarana, mai edia kamonai ida idia karaia gaukarana, ena davana idia abia badabada, bona idia diba momokani Iehova ese do ia hanamodia edia kara namodia dainai. (Aonega Herevadia 19:17; Efeso 6:8) Georg bona ena adavana Magdalena be buruka taudia, lagani momo lalodiai sekit naria gaukarana idia karaia. Luxembourg ena hebouhebou ta dekenai, Magdalena be lagani 20 gunanai ia haroro henia hahinena ta be ia dekenai ia lao. Magdalena ese ia henia Baibel bukadia dainai, unai Iuda hahinena ese hereva momokani ia ura henia matamaia, bena gabeai bapatiso ia abia. Taihu ta be Georg dekenai ia lao, ia hamaoroa lagani 40 gunanai ena ruma dekenai ia vadivadi negana be ia ese ia laloatao. Unai neganai Georg ese sivarai namona ia harorolaia goadagoada dainai, gabeai ia bona ena adavana ese hereva momokani idia abia dae. Momokani, Georg bona Magdalena idia moale bada.
20 Paulo ena hesiai gaukarana Efeso dekenai ese anina bada ia havaraia dainai ia moale, bona reana unai dainai Iesu ena hereva ia gwauraia, ia gwau: “Henia kara ena moale be bada, abia kara ena moale be maragi.” (Kara 20:35) Sekit o distrik naria gaukarana idia karaia taudia ese nega ibounai gau idia henia dainai, moale idia davaria, bona edia gaukara ena anina namona idia diba neganai, idia moale bada. Elda ta ena lalona ia hesiku neganai, sekit naria tauna ta ese ia durua, bena unai elda ese ia tore henia, ia gwau: “Oi ese lau oi ‘durua bada herea’ vadaeni, egu lauma maurina lalonai—unai emu heduru ena anina ibounai be oi diba lasi. . . . Do oi diba vaitani lasi oi ese hari inai negai Asapa ena aena bamona ‘iena aena be kahirakahira ia dedi’ tauna ta be edena bamona oi durua bada vadaeni.”—Kolose 4:11; Salamo 73:2.
21. Dahaka dainai oi gwau 1 Korinto 15:58 be mai anina, sekit bona distrik naria taudia edia gaukara dekenai?
21 Keristani tauna burukana ta, lagani momo lalodiai sekit naria gaukarana ia karaia vadaeni, ese 1 Korinto 15:58 ia laloa mai ena ura ida; unai siri lalonai Paulo ia gwau: “Do umui gini goada, do umui marere lasi. Nega ibounai Lohiabada ena gaukara do umui karaia goadagoada. Badina be umui diba Lohiabada ena gaukara lalonai, emui hekwarahi be hekwarahi kava lasi momokani.” Sekit bona distrik naria taudia be momokani Lohiabada ena gaukara momo idia karaia. Bona Iehova ita tanikiu henia bada, badina be idia be iena hesiai taudia namodia, bona iena hariharibada idia hahedinaraia!
[Footnotes]
a Hereva ladana “Can You Be Happy With Much To Do?” The Watchtower, May 15, 1991, rau 28-31 lalonai oi itaia.
Edena Bamona Do Oi Haere?
◻ Dahaka dainai ita laloa sekit bona distrik naria taudia be “hesiai taudia namodia”?
◻ Edena dala amo sekit bona distrik naria taudia ese namo bada idia havaraia diba?
◻ Dahaka dainai sekit bona distrik naria taudia idia manau bona idia gaukara goadagoada be mai anina bada?
◻ Sekit bona distrik naria taudia ese dahaka gau namodia idia tahua?
4. Dahaka henanadai be harihari do ita laloa?
[Picture on page 16]
Sekit bona distrik naria taudia ese edia Keristani varavara taudia idia hagoadaia toho
[Picture on page 17]
Sekit bona distrik naria taudia bona edia adavadia edia hebamo ese matamatadia bona burukadia danu ia hanamoa diba
[Picture on page 18]
Sekit bona distrik naria taudia edia gaukara goadagoada karana ese ma haida ia hagoadaia