Ta Ta Ita Hagoadaia Heheni
1 Aposetolo Paulo be Roma kongrigeisen taudia ia tore henia neganai, ia gwau: “Badina be lau ura bada umui lau itaia gwauraia, bona umui dekenai Lauma Helaga ena hanamoa do lau henia, vadaeni Lauma ena goada do umui abia. Anina be inai bamona: Lau ura umui emui abidadama ese ia durua lau, bona lauegu abidadama ese ia durua umui. Inai bamona be goada ita abia nega tamona.” (Roma 1:11, 12) Paulo bamona, iseda nega ai idia noho loaloa naria taudia be ita idia hagoadaia bona ita ese idia ita hagoadaia.
2 Kongrigeisen: Sekit naria tauna ena vadivadi be hua toi do vairai neganai, kongrigeisen idia hadibaia be namo. Unai amo palani namona ita karaia diba, bona sekit naria tauna ena vadivadi amo namo bada ita abia diba. (Efe. 5:15, 16) Bema oi be moni gaukara oi karaia neganai, reana emu gaukara biaguna oi noia diba dina ta oi gaukara lasi totona, unai amo sekit naria tauna ena vadivadi purana lalonai grup ida oi haroro diba. Haida be sekit naria tauna ena vadivadi purana lalonai idia heduru painia. Bema oi palani vadaeni gabu ta dekenai oi lao totona, unai palani oi haidaua diba unai amo sekit naria tauna oi bamoa diba, a?
3 Sekit naria tauna ia vadivadi ena badina badana be, ita ta ta do ia hagoadaia bona haroro gaukara dalana ia hadibaia. Sekit naria tauna eiava bema ia be mai ena adavana, idia ta danu oi gaukara hebou diba, a? Sekit naria tauna be pablisa idauidau ida gaukara hebou karana ia moalelaia, bona haroro gaukara idia manadalaia lasi taudia ia durua danu. Haroro gaukara ai, ita ibounai be sekit naria tauna ena haroro dalana amo diba ita abia bona ita badinaia diba. (1 Kor. 4:16, 17) Ia oi boiria umui aniani hebou neganai, unai be nega namona ta ta hagoadaia heheni totona. (Heb. 13:2) Sekit naria tauna be kongrigeisen durua daladia do ia herevalaia dainai, ita kamonai namonamo be namo.
4 Sekit Naria Tauna: Aposetolo Paulo ena loaloa naria gaukara lalonai, ia danu be lalohekwarahi gaudia ia davaria, unai dainai hagoadaia herevadia ia abia neganai ia moale. (2 Kor. 11:26-28) Paulo be dibura tauna bamona Roma dekenai do ia lao ena sivarai be Roma dekenai idia noho Keristani taudia ese idia kamonai neganai, haida be ia idia hedavari henia totona idia raka lao hoihoi gabuna ladana Apio dekenai, ena daudau Roma amo be kilomita 74 bamona! “Paulo ese idia ia itaia neganai, Dirava dekenai ia tanikiu henia, bona iena lalona dekenai goada ia abia.” (Kara 28:15) Oi danu be emu sekit naria tauna oi hagoadaia diba. Mai moale ida ia danu oi gaukara hebou bona ia oi durua, unai amo oi hahedinaraia ia oi “matauraia bada.” (1 Tim. 5:17) Sekit naria tauna ena heduru dainai, ia oi tanikiu henia. Iseda abidadama, lalokau, bona haheauka karana ia itaia dainai, ia bona iena adavana do idia moale bada.—2 Tes. 1:3, 4.
5 Inai “metau dikadia momo” negana lalonai, ita ibounai ita ura ma haida ese ita idia hagoadaia, ani? (2 Tim. 3:1) Hari palani oi karaia, unai amo sekit naria tauna ena vadivadi purana lalonai ia ida oi gaukara hebou diba. Kongrigeisen lalonai loaloa naria taudia bona pablisa taudia ta ta idia hagoadaia heheni diba. Unai dala amo, ‘ta ta dekenai goada do ita henia, bona durua do ita henia.’—1 Tes. 5:11.
[Study Questions]
1. Loaloa naria taudia idia vadivadi neganai, unai be nega namona dahaka ita karaia totona?
2. Dahaka dainai sekit naria tauna ena vadivadi negana be hua toi do vairai neganai, kongrigeisen idia hadibaia be namo?
3. Sekit naria tauna ena vadivadi neganai ita ta ta be dahaka ita karaia diba?
4. Edena dala ai sekit naria tauna ita hagoadaia diba?
5. Dahaka dainai hari inai negai ita ta ta ita hagoadaia heheni be namo?