Dahaka Dainai Ita Ibounai ese Dirava Ita Hanamoa be Namo?

ALELUIA! Kerisendom ena dubu dekenai idia lao taudia be inai hereva idia diba momo. Haida be edia Sunday guriguri dekenai unai hereva idia boiboilaia badabada. To, idia hida be unai hereva ena anina korikorina idia diba? Ia be Heberu gado herevana ta, bona ena anina be “Iah Hanamoa!” Unai be Havaraia Tauna, iena ladana be Iehova, ena hanamoa boiboina moalena.a

Unai hereva “Aleluia” be nega momo Baibel lalonai ia hedinarai. Dahaka dainai? Badina Dirava ita hanamoa ena badina momo idia noho. Iah (Iehova) be tanobada bona guba ia Havaraia Tauna bona Mauri Durua Tauna. (Salamo 147:​4, 5; 148:​3-6) Ia ese mauri gaudia edia gaukara hebou daladia ia havaraia, unai amo tanobada dekenai mauri gaudia idia noho hebou diba. (Salamo 147:​8, 9; 148:​7-10) Bona ia be taunimanima ia lalodia bada. Bema iena ura ita karaia, ia ese ita ia hanamoa bona ita ia durua hari bona nega vairai totona mauri namona ena helaro ia henia ita dekenai. (Salamo 148:​11-14) Iah (Iehova) ese inai hereva ia gwauraia: “Kara maoromaoro taudia ese, Dirava ia henidia tano dekenai do idia noho ela bona hanaihanai.”​—⁠Salamo 37:⁠29.

Unai dainai, inai hagoadaia herevana be ita ibounai dekenai: “Umui taunimanima e, Iah hanamoa!” (Salamo 104:​35, NW; futnout) To, madi, taunimanima ibounai be unai bamona idia karaia lasi. Hari iseda negai, taunimanima idia hisihisi noho. Momo be idia hitolo, idia gorere, eiava idia lalohisihisi. Taunimanima momo be lalohisihisi bada idia haheaukalaia badina drag o kekero muramura idia gaukaralaia kerere eiava matabodaga eiava dagedage karadia idia karaia dainai. Badina ta ia noho unai bamona taudia be Dirava idia hanamoa totona, a?

‘Iehova Sibona ese Lau Dekenai Helaro Ia Henia Diba’

Oibe, badina ia noho. Iehova ese haida ia dadaraia lasi to taunimanima ibounai ia boiridia ia do idia diba, iena ura karaia dalana do idia dibaia, bona ia henia hahenamo idia moalelaia dainai taunimanima idia ura ia idia hanamoa. Bona momo be idia abia dae. Mani, Guatemala dekenai Adriana ena haheitalai ita laloa. Adriana ena mauri lagani be 7 neganai, ena sinana ia mase. Daudau lasi murinai iena tamana ese ia rakatania. Iena mauri lagani be 10 neganai, sibona ia naria totona ia gaukara matamaia. Iena sinana ese ia hamaoroa Dirava bona dubu do ia hesiai henia dainai, Adriana ese Katolik orea idauidau ia bamodia, to iena mauri lagani be 12 neganai, ia moale lasi bona raskol oreana ta lalonai ia vareai. Kuku ia ania, drag ia gaukaralaia, bona ia henaohenao matamaia. Unai bamona kekeni matamatana be dahaka dainai do ia ura Dirava ia hanamoa?

Adriana ena kakana be Iehova ena Witness taudia ida Baibel ia stadilaia matamaia, to Adriana ese ia kirikirilaia. Bena ena sinana maragina ia mase. Sinana maragina ena mase herevana idia karaia neganai, Adriana be henanadai momo ia lalo-hekwarahilaidia. Sinana maragina be edeseniai ia lao? Ia be guba dekenai, a? Lahi gabuna dekenai ia lao, a? Adriana ia daradara bada bona gara gabuna ena dubu maragina dekenai ia lao bona heduru abia totona ia guriguri. Iena kakana ese ia hadibaia hegeregerena, Dirava ena ladana Iehova, ia gaukaralaia.

Daudau lasi murinai Iehova ena Witness taudia ida Baibel ia stadilaia bona edia Keristani hebou dekediai ia lao. Unai ese ena mauri lalonai lalohadai matamata ia henia, bona raskol oreana bamoa karana ia hadokoa. Hari Adriana ena mauri lagani be 25 bamona, bona ia gwau: “Egu lalokau Iehova dekenai sibona ese lau ia doria mauri dikana lau rakatania totona. Iehova sibona ena hebogahisi bada karana dainai mauri hanaihanai helarona ia henia lau dekenai.” Ena be Adriana ena mauri ena matamana dekenai hekwakwanai ia davaria, to ia be mai ena badina namo hereadia Dirava ia hanamoa totona.

Toana be do ia namo lasi momokani sivaraina be Ukraine amo ia mai. Tau ta be dibura dekenai ia helai ena mase negana ia naria noho. Sibona ia bogaia hisi noho, a? Ia daradoko, a? Lasi, iena mamina be unai bamona lasi. Vanegai, Iehova ena Witness taudia ese ia idia davaria bona diba haida Iehova dekenai ia abia murinai, ia nanadaidia iena sinana do idia vadivadi henia totona. Hari ia tore henidia noho badina ia kamonai iena ura idia hamomokania. Ia gwau: “Tanikiu bada egu sinana umui vadivadi henia dainai. Ia be inai hanaia lagani lalonai lau kamonai sivarai namo hereana.”

Ia bona ia haroro henia dibura taudia, ia herevalaidia neganai, ia gwau: “Hari ai be mai emai abidadama Dirava dekenai bona ai hekwarahi emai abidadama hegeregerena ai kara totona.” Ena revareva dokonai, ia gwau: “Ai umui durua lalokau ai dibaia bona abidadama ai abia totona dainai, umui ai tanikiu henia. Bema lau mauri noho, umui do lau durua danu. Dirava lau tanikiu henia umui noho bona ma haida umui durua Dirava idia lalokau henia bona idia abidadama henia totona.” Unai tau ese kota badana dekenai ia noinoi ena mase hahemaoro herevana idia kokia totona. To herevana do idia hamasea eiava lagani momo do ia dibura, ia hedinarai goevagoeva ia be mai ena badina Dirava ia hanamoa totona.

‘Ena be Lau Matakepulu, Lau Itaia Diba’

Hari, goada kekeni matamatana be karaharaga ia matakepulu ena sivarai ita laloa. Unai ia vara Argentina dekenai ia noho kekenina Gloria dekenai. Gloria ena mauri lagani be 19 neganai, karaharaga ia matakepulu, bona ia itaia lou diba lasi. Ena mauri lagani be 29 neganai, tau ta ida ia noho hebou bona daudau lasi murinai ia rogorogo. Hari ia laloa iena mauri be mai ena anina. To iena natuna ia mase neganai, henanadai momo ia lalodia. Ia laloa, ‘Dahaka dainai inai bamona ia vara lau dekenai? Dahaka lau karaia inai? Dirava ia noho momokani, a?’

Unai neganai, Iehova ena Witness hahinedia rua be iena iduara dekenai idia ginidae. Baibel ia stadilaia matamaia bona tanobada matamatana ai matakepulu taudia do idia itaia lou helarona ia dibaia. (Isaia 35:⁠5) Unai be helaro namo herea Gloria dekenai! Ena adavana ese gwaumaoro ia henia edia headava idia rejista neganai, ia moale bada herea. Bena ena adavana be aksiden ia davaria bona gau ta ia karaia diba lasi, wilisea dekenai ia helai sibona. Hari inai matakepulu hahinena be ia gaukara goada mauri durua gaudia abia totona. Ruma gaukara ibounai ia karaia, bona ena adavana ena ura gaudia ibounai ia karaia danu. To Gloria ese Iehova ia hanamoa! Iena Keristani tadikaka bona taihu edia heduru ida, Braille Baibel ia stadilaia, bona Kingdom Hall dekenai Keristani hebou amo goada bada ia abia. Ia gwau: “Lau diba lasi edena bamona do lau gwauraia, to ena be lau matakepulu, ia be hegeregere lau itaia diba bamona.”

Nega haida taunimanima be Dirava idia hanamoa neganai haida ese idia dagedage henidia. Croatia dekenai, hahine ta be Dirava ia dibaia neganai ia moale, to ena tau ese ia davaria abidadama matamatana ia inai henia, ena hahine ia dadaraia bona edia lagani tamona natuna kekeni ia abia. Dala dekenai ia noho, adavana bona ena bese ese idia dadaraia, ruma be lasi, gaukara be lasi, bona natuna danu be lasi, matamanai ia lalohisihisi bada herea. Ena be iena natuna kekeni be nega ta ta sibona ia itaia ela bona unai kekeni maragi ia bada, to ena lalokau Dirava dekenai ese ia durua. Unai hahine ese “davana bada nadi” ia davaria vadaeni bona do ia rakatania lasi. (Mataio 13:​45, 46) Unai mauri aukana negana lalonai, edena bamona ia moale noho? Ia gwau: “Moale be Dirava ena lauma ena huahua ta. Herevana dahaka ia vara ita dekenai, iseda moale ita habadaia diba, ia be hegeregere hatubua rumana lalonai tubutubu gaudia idia bada idia lao diba, herevana murimuri ai dahaka ia vara.”

Finland dekenai, Markus, ena mauri lagani be 6 merona, idia hamaoroa ia be hanamoa diba lasi masolo gorerena ia abia. Daudau lasi murinai wilisea dekenai ia helai sibona. Lagani haida murinai, ena sinana ese Pentecostal tauna dekenai ia abia lao, momo idia gwau unai tauna ese gorere taudia ia hanamodia. To Markus be hoa dalana amo ia hanamoa lasi. Unai dainai Markus ese Dirava ia dadaraia bona saiens bona ma gau haida ia stadilaia. Bena lagani ima gunanai, wilisea dekenai ia helai hahine ta bona ena bamona, tauhau ta ese Markus ia noholaia rumana dekenai idia lao. Idia be Iehova ena Witness taudia. Unai nega lalonai Markus ese Dirava ia noho lasi lalohadai ia abia dae vadaeni, to tomadiho kikilaia karana ia dadaraia lasi bona ia abidia dae.

Gabeai, headava tauna mai ena adavana ese idia vadivadi henia, bona Baibel stadi idia hamatamaia. Dokonai, Baibel ena hereva momokani ena siahu ese Markus ena lalona ia haidaua, bona ia lalo-parara ena be ia gorere, to ia be mai ena badina Dirava ia hanamoa totona. Ia gwau: “Lau moale bada badina hereva momokani lau davaria bona Iehova ese ia gaukaralaia oreana lau davaria vadaeni. Hari, egu mauri be mai ena anina bona mai ena badina. Ia boio mamoe ma ta idia davaria vadaeni bona ia ura lasi Iehova ena mamoe serina ia rakatania!”​—⁠Mataio 10:6 itaia.

Ibounai “Iah Hanamoa”

Ekspiriens be momo, to ita herevalaia vadaeni ekspiriens haida sibona ese idia hahedinaraia hari inai negai, herevana dahaka ia vara, taunimanima be mai edia badina Dirava idia hanamoa totona. Aposetolo Paulo ese inai bamona ia gwauraia: “Iseda lauma idia namo neganai, durua do ita abia inai tanobada ena mauri dekenai, bona gabeai do ita abia mauri dekenai danu.” (1 Timoteo 4:⁠8) Bema Dirava ena ura ita karaia, iena gwauhamata “inai tanobada ena mauri dekenai” do ia hamomokania. Momokani, inai tanobada lalonai ia ese ogogami taudia be taga taudia ai do ia halaodia lasi eiava gorere taudia edia gorere do ia hanamodia lasi. To ia idia hesiai henia taudia dekenai ena lauma ia henia, unai amo herevana dahaka ia vara, moale bona lalo-maino idia davaria. Oibe, ‘inai mauri dekenai’ danu, gorere taudia, hisihisi taudia, bona ogogami taudia be mai edia badina Dirava idia hanamoa totona.

To “gabeai do ita abia mauri” be edena bamona? Namona be unai ita laloa neganai ita ia doria mai eda lalona ibounai ida Dirava ita hanamoa! Ogogami be lasi negana ita laloa neganai ita moale; unai neganai “idia noho taudia ta ese do ia gwau lasi, ‘Lau be gorere’ ”; bona Iehova Dirava ese “matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.” (Isaia 33:24; Apokalupo 21:​3, 4; Salamo 72:16) Dirava ese ia gwauhamatalaia gaudia dekenai dahaka oi laloa?

El Salvador dekenai ia noho tau matamatana ese unai gaudia ia herevalaia Baibel pepapepa ta ia abia. Ia henia Witness hahinena dekenai ia gwau, “Hahine, inai pepapepa ese ia gwauraia gaudia be namo herea momokani, reana do idia vara diba lasi.” Momo be unai bamona idia hereva. To, unai gwauhamata be guba bona tanobada ia havaraia Tauna ese ia gwauraia, ia ese tanobada ena heau daladia ia karaia, bona ogogami taudia bona gorere taudia ia durudia moale idia davaria totona. Ia gwauraia gaudia ita abidadama henia diba. Ataiai ai gwauraia tau matamatana be Iehova ena Witness taudia ida Baibel ia stadilaia bona ia davaria unai be momokani. Bema Baibel stadi oi do karaia lasi, oi ai hagoadaia do oi karaia. Bena, inai tanobada ia ore neganai, mauri gaudia ibounai ida do oi boiboi: “Aleluia! Dirava ita hanamoa!”​—⁠Apokalupo 19:6; Salamo 135:⁠1.

[Footnotes]

[Picture on page 5]

Namona be mauri gaudia iboudiai be nega tamona “Aleluia” idia boiboi neganai oi danu oi noho