Oi Mamia Emu Mauri Oi Moalelaia Lasi Neganai

“Lau abia hemami lau moalelaia lasi. Unai dainai lau laloa sibona lau hamasea be namo.”—Adriana, Brazil amo.

NEGA TA oi mamia emu mauri oi moalelaia lasi dainai oi ura sibona oi hamasea, a? Bema oibe, reana Adriana ena hemami oi lalopararalaia diba. Ia be ia lalohekwarahi bada bona ia mamia heduru abia dalana ta be lasi. Ia be lalometau gorerena (clinical depression) ia abia dainai hanaihanai ia lalohisihisi bada.

Japan tauna ta ladana Kaoru, mani ita laloa. Ia be ena tama sina burukadia ia naria. Ia gwau: “Unai negai, moni gaukara ena hekwakwanai idauidau dainai lau lalohekwarahi bada. Danu, lau aniani namonamo lasi, bona lau mahuta namonamo lasi. Lau laloa bema lau mase, egu hekwakwanai ibounai do idia ore.”

Nigeria tauna ta ladana Ojebode, ia gwau: “Nega momo lau lalohisihisi dainai lau tai, unai dainai dala lau tahua sibona lau hamasea totona.” Moale gauna be Ojebode, Kaoru, bona Adriana be sibona idia hamasea lasi. To lagani ta ta ai taunimanima tausen momo be sibona idia hamasea.

EDESENIAI HEDURU ITA ABIA DIBA?

Sibona idia hamasea taudia momo be tatau, bona idia be hemarai dainai heduru totona idia noinoi lasi. Iesu ia gwau gorere taudia ese doketa edia heduru idia tahua be namo. (Luka 5:31) Unai dainai bema sibona hamasea lalohadaina oi abia, namona be oi hemarai lasi bona heduru totona oi noinoi. Lalometau gorerena idia abia taudia momo idia davaria, medikol heduru amo unai gorere idia haheaukalaia diba. Ojebode, Kaoru, bona Adriana be medikol heduru namona idia abia dainai idia haheauka diba.

Doketa ese lalometau gorerena ia abia tauna idia durua totona, muramura eiava durua herevadia (talk therapy) idia henia diba. Danu, unai gorere idia abia taudia be edia ruma bese bona turadia amo heduru idia abia be namo. Iehova Dirava be tura namona badina ia ese ena Hereva, Baibel amo, heduru namona ia henia.

LALOMETAU GORERENA HANAMOA DALANA TA IA NOHO, A?

Nega momo lalometau gorerena idia abia taudia be nega daudau lalonai medikol heduru idia abia bona edia mauri dalana idia haidaua. To, bema lalometau gorerena oi abia, oi lalohekwarahi lasi be namo; Ojebode bamona, vaira negana ai do oi moale diba. Ia gwau, “Lau ura vaira negana ai Isaia 33:24 ena hereva do ia guguru karana lau itaia, unai siri ia gwau unai negai tanobada ai ta do ia gwau lasi, ‘Lau be gorere.’” Ojebode bamona, Dirava ena gwauhamata “tanobada matamata” totona oi abia dae, unuseniai “hisihisi” be do idia ore. (Apokalupo 21:1, 4) Unai gwauhamata ena anina be lalometau bona lalohisihisi ibounai be do idia ore vaitani. Emu hisihisi ibounai ‘do oi laloa lou lasi, do oi laloaboio momokani.’—Isaia 65:17.

Oi Idia Durua Diba Baibel Siridia

Dirava ese emu hemami ia lalopararalaia.

“Lau be [Iehova], emui Dirava. Lau ese umui lau hagoadaia noho, lau gwau, ‘Do umui gari lasi, lau ese umui do lau durua.’”—Isaia 41:13.

Iehova ese eda hemami ia lalopararalaia goevagoeva, bona ia ura ita ia durua.

Dirava ena Hereva oi laloa dobu.

“Elia . . . ia noinoi do ia mase. Lohiabada dekenai ia guriguri, ia gwau, ‘Mani lauegu mauri do oi hadokoa.’”—⁠1 King Taudia 19:4.

Ojebode ia gwau: “Dirava ena Hereva laloa dobu karana ese lau ia durua. Lau laloparara egu hemami be peroveta tauna Elia ena hemami hegeregerena.”

Baibel sivaraidia amo diba oi abia.

“Lau [Iesu] be lau guriguri vadaeni oi [Petero] dainai, oiemu abidadama do ia moru lasi totona.”—Luka 22:32.

Aposetolo Petero be nega toi ia gwau Iesu ia diba lasi neganai, ia lalohisihisi bada bona ia tai dikadika. Kaoru ia gwau: “Petero ena ekspiriens amo lau laloparara Iehova ese Petero ena hemami ia laloa bada. Unai ese lau ia hagoadaia bada.”

Emu hisihisi ibounai ‘do oi laloa lou lasi, do oi laloaboio momokani.’—Isaia 65:17