Iehova Ena Ruma Ena Hairai Hereadaena
“Dubu Helaga be hairai dekenai do ia honu. Lau Siahu Ibounai Lohiabada lau hereva inai.”—HAGAI 2:7.
1. Lauma helaga ena anina abidadama dekenai bona gaukara dekenai be dahaka?
RUMA-TA-RUMA-TA haroro gaukarana ai, Iehova ena Witness hahinena ta be Pentecostal hahinena ta ia davaria, bona unai hahine ia gwau, ‘Ai be lauma helaga ai abia, to umui be ena gaukara karaia taudia.’ Mai manau ida ia hahedinaraia lauma helaga ia abia momokani tauna ese Dirava ena gaukara do ia ura ia karaia. Iamesi 2:17 ia gwau: “Bema abidadama sibona ia noho, to kara be lasi, unai abidadama be anina lasi.” Iehova ena lauma ena heduru amo, ena Witness taudia edia abidadama ia goada, bona edia kara maoromaoro gaukaradia—badana be ‘tanobada ibounai dekenai Basileia ena sivarai namona harorolaia’ gaukarana—ia henidia bona idia karaia amo ‘ena ruma be hairai amo ia hahonua.’ Iehova ia laloa ia hegeregere neganai unai gaukara do ia ore, bena “dokona be do ia ginidae.”—Mataio 24:14.
2. (a) Iehova ena hesiai gaukara ita karaia mai iseda lalona ibounai ida neganai, dahaka hahenamo do ita abidia? (b) Dahaka dainai toana be dokona ena “mai be haraga lasi” ita moalelaia be namo?
2 Iesu ena hereva amo, ita itaia diba iseda gaukara badana be “moale Diravana ena sivarai namona mai hairaina” ita abia be taunimanima dekenai ita harorolaia. (1 Timoteo 1:11, NW) Iehova ena hesiai gaukara ita karaia mai iseda lalona ibounai bona mai moale ida neganai, ita dekenai toana be dokona ia mai haraga. Habakuku 2:2, 3 ai, Iehova ena hereva ita duahia, ia gwau: “Lau ese oi dekenai lau hedinaraia gauna be nadi palaka dekenai do oi torea, vadaeni duahia taudia ese do idia duahia haraga diba. To inai lau palania kara be harihari do ia vara lasi. Unai dainai ena anina do oi torea, ia noho. To ia be nega daudau lasi lalonai do ia vara. Lau koikoi lasi. Sedira oi laloa iena mai be haraga lasi, to do oi naria noho, ia be do ia vara momokani.” Oibe, ia “palania kara” do ia vara momokani, herevana do ia vara “haraga lasi.” Lagani 83 lalodiai Iesu be Basileia ia lohiaia vadaeni, haida idia laloa hari be dokona ia mai haraga lasi negana. To namona be ita moale dokona ia do mai lasi, ani? Lagani 1990 amo ia mai hari, sivarai namona harorolaia lasi taravatudia Eastern Europe, Africa ena tano haida, bona ma tano idauidau haida lalonai idia kokia vadaeni. Toana be dokona ia ‘mai haraga lasi,’ to unai ese nega ia henia “mamoe” taudia ma haida be hari sibona idia kehoa teritori amo ita gogoa totona.—Ioane 10:16.
3. Dahaka dainai hari dala matamatana ai “inai nega idia noho taudia” ita lalo-pararalaia ese ita ia hagoadaia Dirava ena gaukara ita karaia goadagoada be namo?
3 Peroveta tauna ia gwau “nega daudau lasi lalonai do ia vara.” Iesu ia gwau iseda negai idia noho taudia dikadia do idia ore lasi neganai, “inai gaudia ibounai do idia vara momokani.” (Mataio 24:34) Iena hereva be hari dala matamatana ai ita lalo-pararalaia ena anina be iseda haroro gaukara ita karaia goadagoada be anina lasi, a?a Lasi, idia vara gaudia idia hahedinaraia unai be momokani lasi! Hari iseda nega ai idia noho taudia edia kara ia dika rohoroho ia lao bona edia kara bodaga hegeregerena be guna ia vara lasi. (Kara 2:40 itaia.) Hari ita haroro goadagoada be gau badana. (2 Timoteo 4:2) Hisihisi bada herea idia perovetalaia herevadia ibounai idia gwau karaharaga do ia vara, hehuni dalana amo—henaoa tauna hegeregerena. (1 Tesalonika 5:1-4; Apokalupo 3:3; 16:15) “Unai dainai, do umui hegaegae, badina be Taunimanima ena Natuna do ia mai ena hora be umui diba lasi.” (Mataio 24:44) Hari iseda nega ai idia noho Dirava badinaia lasi taudia be kahirakahira do ia hamasedia dainai, ita ura lasi iseda mauri hanaihanai helarona ita negea bona tanobada ena lalona veria “kopukopu dekenai” ita giroa!—2 Petero 2:22; 3:10; Luka 21:32-36.
4. Dahaka ia vara dainai, lauma “aniani” do ita abia nega korikori ai be mai anina bada, bona edena dala ai unai ia vara?
4 Iesu ena peroveta hereva hegeregerena, lagani 1914 ai ‘hisihisi nega ia matamaia’ bona taunimanima be ‘tanobada ena dokona’ negana ai idia vareai. Hisihisi, dika badadia idauidau, bona taravatu hamakohia karadia idia bada idia lao ema bona hari. (Mataio 24:3-8, 12) Unai neganai danu, Iehova be ena horoa hesiai tauna mai ena kamonai bona mai ena kara maoromaoro oreana dekenai gaukara ia henia; nega korikori ai “aniani do ia henia” edia Biaguna, Keriso, ena ruma taudia dekenai. (Mataio 24:45-47) Hari, ena guba terona amo, unai Mesia Pavapavana ese tanobada hegegemadai lauma aniani henia gaukarana ia biagua noho.
“Aniani” be Bada Herea
5. Lauma “aniani” badana abia totona, dahaka ia vara?
5 Mani “aniani” hegaegaelaia dalana oi laloa. (Luka 12:42) Keristani taudia edia lauma aniani listana lalonai, aniani badana be Dirava ena Hereva, Baibel. Baibel ena hereva ita hadibaia namonamo totona, gau badana be ita gaukaralaia bukana duahia be auka lasi, bona ena hereva ibounai be maoro. Idia ore laganidia lalonai, unai bamona Baibel ai hahanaia noho, lagani 1950 ai, New World Translation of the Christian Greek Scriptures be English gado dekenai ai halasia. Lagani 1961 ai, New World Translation Baibel ibounai ita abia diba, bona daudau lasi murinai gado badadia ma haida dekenai ita abia matamaia diba. Lagani 1996 haroro laganina ai, volume toi ai halasia, ena anina be unai Baibel be gado 27 ai idia noho, bona idia amo 14 be Baibel ibounai. Baibel bona Baibel ena hereva idia hahedinaraia buka bona magasin karaia totona, edia mauri idia gwauhamatalaia Keristani taudia 1,174 be ful-taim hahanaia gaukarana idia karaia tano idauidau 77 lalodiai.
6. Society be edena dala ai Baibel bukadia bona magasin idia ura abia taudia idia durua?
6 Hahanaia taudia hutuma edia gaukara idia hagugurua totona, Watch Tower Society ena brens opesi 24 ese buka bona magasin, idia momo idia lao gaudia, idia printaia noho. Unai idia karaia totona, idia heau haraga rotary press masini ma haida idia atoa brens badadia dekenai. Gima Kohorona bona Awake! magasin idia printaia namba be hua ta ta ai ia bada ia lao ela bona lagani dokonai kopi 943,892,500 idia printaia, 13.4 pesen amo ia bada daekau. Idia printaia Baibel bona kopina aukana bukadia United States, Brazil, Finland, Germany, Italy, Japan, Korea, bona Mexico dekenai sibona, edia namba be lagani 1995 amo 40 pesen ia bada daekau, bona lagani 1996 ai kopi 76,760,098 idia karaia. Brens ma haida danu ese buka bona magasin idia printaia dainai, printaia gaukara ia bada herea.
7. Dahaka dainai Isaia 54:2 ena hereva ena anina be bada herea hari?
7 Unai gaukara habadaia ena badina badana be lagani 1990 murinai, Eastern Europe bona Africa tanodia haida lalodiai Iehova ena Witness taudia dekenai idia atoa taravatudia idia kokia neganai. Unai tano taudia be lauma aniani totona idia hitolo. Unai dainai inai hereva ita badinaia haraga be mai anina bada hari: “Oiemu palai ruma do oi habadaia. Iena varo do oi halataia, bona palai ena ikoko do oi hagoadaia.”—Isaia 54:2.
8. Edena harihari bada karana be moni dalana ai ia durua bada?
8 Unai dainai, Society be ena brens opesi ibounai 104 amo momo ia habadaia. Unai teritori matamata lalodiai taunimanima idia ogogami bada herea dainai, unai habadaia gaukarana ena davana be taga sisina tanodia amo ia mai. Ai moale kongregesen bona tadikaka sibodia danu be mai edia kudouna ibounai ida heduru idia henia, Esodo 35:21 ena hereva hegeregerena: “Harihari gaudia idia ura idia henia taudia ibounai ese edia harihari gaudia be Lohiabada dekenai idia mailaia.” Hari, ai ura durua taudia iboudiai ai tanikiu henia edia hariharibada karadia dainai.—2 Korinto 9:11.
9 Lagani 1996 ai, Watch Tower Society ena buka bona magasin ese tanobada ena dokona kahana momokani dekenai Iehova ena ladana bona ena ura idia abia isi. Ia be Aposetolo Paulo ese ia gwauraia guna hegeregerena. Peroveta tauna Ioela bona Salamo 19 edia hereva ia herevalaia lou, bona ia gwau: “ ‘Dirava ena ladana idia noinoi henia taudia ibounai, be mauri do idia davaria.’ To lau henanadai, lau gwau, ‘Momokani inai Sivarai Namona idia kamonai lasi, a? Lasi, idia kamonai vadaeni, Buka Helaga ia torea bamona, ia gwau: “Edia gadona ena sivarai, be tanobada ibounai dekenai idia gwauraia loaloa, bona edia hereva, be tanobada ena dokona momokani dekenai idia lao.” ’ ” (Roma 10:13, 18) Unai dava bada ladana Iehova abia isi karana amo, ena taunimanima be ena tomadiho rumana idia hahairaia. To, edena dala ai unai kara be ia bada momokani lagani 1996 ai? Mani rau 18 ia lao 21 ai idia noho gaudia oi itaia namonamo.
Tanobada Hegegemadai Anina Gogoa Gaukarana
10. Rau 18 ia lao 21 ai idia noho gaudia amo, Iehova ena taunimanima edia gaukara badadia be dahaka dahaka?
10 Hari Iesu ena hereva Luka 10:2 ai ena anina be bada herea: “Uiti anina be ia momo herea vadaeni, to utua taudia be momo lasi. Unai dainai uma biaguna dekenai do umui noinoi, ia ese utua taudia haida do ia siaia, iena uiti do idia utua.” Unai noinoi oi kamonaia, a? Tanobada ibounai dekenai taunimanima milioni momo ese idia kamonaia. Unai ia hamomokania gauna be lagani 1996 dekenai haroro gaukara idia ripotilaia Basileia pablisa taudia edia namba be ia daekau 5,413,769. Danu, tadikaka bona taihu matamata 366,579 idia bapatiso. “Bese ibounai edia kohu namodia” taudia ita laloa bada, hari idia be Iehova ena ‘Dubu Helaga be hairai dekenai ia honu’ gaukarana lalonai idia vareai danu!—Hagai 2:7.
11. Ita moale bada herea ena badina ta be dahaka?
11 Idia kehoa gabudia edia ripoti namodia ita kamonai neganai, ita hoa. Ita haida be unai taudia edia gaukara bona moale ita itaia neganai, ita mama, a? Lasi, idia danu ita moale bada herea. Tano iboudiai edia gaukara ena matamana be maragi. Hagai ena negai ia noho peroveta tauna, Sekaraia, ia gwau: “Gaukara idia hamatamaia dina dekenai gaukara maragina sibona idia karaia dainai do umui badu henidia lasi.” (Sekaraia 4:10) Ita moale bada herea haroro gaukara be nega daudau vadaeni idia karaia tanodia lalonai hari Basileia pablisa taudia milioni momo idia noho, edia teritori idia karaia nega momo, bona siti badadia haida lalonai wiki ta ta ai edia teritori idia karaia lou. Guna idia taravatua tanodia dekenai hari Iehova ese hamauria dala ia kehoa noho lalonai, ita be mai iseda badina iseda gaukara goadalaia lasi totona, a? Lasi! Iesu ia gwau: “Uma be tanobada.” (Mataio 13:38) Taunimanima ita haroro henia noho be gau badana, hahediba taudia ginigunadia ese uitnesi namona idia henia Iuda taudia edia oromana ia ore gwauraia neganai hegeregerena.—Kara 2:40; 10:42; 20:24; 28:23.
Idia Lao Sibona
12. Dahaka kara ese ita ia hagoadaia ita “lao sibona” totona? (“ ‘Daudau Tanodia Dekena amo’ Anina Gogoa Gaukarana” mauana itaia danu.)
12 Oibe, iseda gaukara ita goadalaia noho, Iehova ena kariota mai anerudia ida ita “lao sibona.” (Esekiela 1:12) Petero ena hereva ita laloa noho: “Lohiabada ia gwauhamata vadaeni, kara haida do ia karaia. Ia ese iena gwauhamata badinaia totona ia hesiku lasi, haida idia laloa bamona. Lasi, to umui totona ia haheauka noho. Badina be ia ura lasi tau ta ia mase. Ia ura taunimanima ibounai ese dika dekena amo edia lalona do idia giroa.” (2 Petero 3:9) Ogogami tanodia ai iseda tadikaka edia haroro goadagoada karana ese ita ia hagoadaia be namo. Bema toana be Aramagedono ia mai haraga lasi, dala be do ia noho taunimanima handred tausen ma haida ita gogoa unai tanodia bona nega momo ita haroro henidia teritori dekena amo danu. Sibona oi koia lasi: “Lohiabada ena dina badana be ia kahirakahira vadaeni inai. Ia be ia mai noho haraga.” (Sepanaia 1:14) Namona be ita karaharaga hadibaia hereva ginigabena ita henia namonamo totona!
13, 14. (a) Lagani 1996 ai, iseda magasin bona buka hariharilaia gaukara be edena bamona? (b) Lagani ta ta ai kongregesen momo be edena bamona gaukara idia palanilaia diba, bona do umui karaia danu, a?
13 Ena be haroro ripotina ai gau ibounai ai hahedinaraia lasi, to lagani gunanai Baibel, buka, bona magasin hariharilaia gaukarana ita habadaia momokani. Haheitalai ta be, magasin hariharilaia gaukara tanobada ibounai lalonai ia bada daekau 19 pesen amo, kopi 543,667,923 ita hariharilaia. Iseda magasin ita gaukaralaia gabu idauidau ai—dala dekenai, loaloa uma gabudia ai, PMV gabudia ai, bona bisinesi gabudia ai. Ripoti haida ai abia bona idia gwau teritori haida dekenai Basileia haroro gaukara idia karaia nega momo gabudia ai bisinesi taudia ese iseda magasin namodia idia laloa bada dainai, idia haida be Baibel stadi idia abia dae.
14 Lagani ta ta April lalonai, kongregesen momo ese magasin hariharilaia dinana badana idia abia hidi, bona ruma ta ruma ta ai bona taunimanima momo gabudia ai magasin idia hariharilaia. April 1997 ai emu kongregesen ese unai do ia karaia danu, a? April ena Gima Kohorona bona Awake! magasin namodia ai hegaegaelaia, bona nega tamona ai ita hariharilaia ese anina namona do ia havaraia momokani! Cyprus motumotu ai, ena kongregesen idauidau ese inai hereva badana idia badinaia: “Taunimanima ibounai dekenai Basileia sivaraina ita harorolaia.” Hua ta ta ai unai murinai, magasin gaukara idia hegaegaelaia bona lagani gunanai magasin 275,359 idia hariharilaia, unai be 54 pesen amo idia habadaia namba.
Hagai Ena Sivarai Ginigabena
15. (a) Dahaka dainai Iehova be sivarai ma haida ia siaia Hagai amo? (b) Hagai ena sivarai ihatoina amo dahaka ita dibaia?
15 Sivarai iharuana ia henia bena dina 63 murinai Iehova ese Hagai ia siaia sivarai ihatoina henia totona, bona unai sivarai ita kamonai henia hari be mai anina. Hagai ia hereva neganai, ia be hegeregere Iuda taudia be dubu ena badina idia haginia matamaia, to lagani 17 gunanai unai gaukara idia karaia vadaeni. Unai neganai danu, Iehova ia laloa hagoevaia karana ia vara be namo. Hahelaga taudia bona Iuda taudia ese edia maduna idia naria namonamo lasi; unai dainai Iehova ena matana ai idia goeva lasi. Reana hari Iehova ena taunimanima haida be edia gaukara idia hesikulaia, bona tanobada ena taravatu lasi bona kohu ura henia dikadika nohona idia tohotohoa, a? Namona be ita ibounai be iseda lalona ita hadaia hari dina amo ia lao dokona Iehova ena ladana do ita hahairaia, bona ita diba momokani ena gwauhamata do ia hagugurua: “Harihari ia lao, lau ese umui do lau hanamoa.”—Hagai 2:10-19; Heberu 6:11, 12.
16 Unai dina tamona ai, Hagai ese “Siahu Ibounai Lohiabada” Iehova ena hereva namba 4 bona hereva ginigabena ia abia. Ia hahedinaraia “guba bona tanobada . . . hamarerea” karana lalonai dahaka do ia vara, Ia gwau: “Bese idauidau edia basileia bona edia siahu be do lau hadikaia ore. Kariota mai edia guia taudia be do lau habubua, hosi bona hosi guia taudia be do idia mase, idia ta ta ese edia bamona, edia bamona, be edia tuari kaia dekena amo do idia alaia mase.” (Hagai 2:6, 21, 22) Unai “hamarerea” do ia bada ia lao bena Iehova ese tanobada do ia hagoevaia momokani Aramagedono ai. Unai neganai “bese ibounai edia kohu namodia” be ia gogoa vadaeni, bona tanobada matamatana ena besena ena badina ai do idia lao. Unai gaudia dainai ita moale bona Iehova ita hanamoa!—Hagai 2:7; Apokalupo 19:6, 7; 21:1-4.
17 Hagai be ena peroveta herevana ena dokona ai ia gwau: “Siahu Ibounai Lohiabada ia gwau, ‘Serubabele e, . . . unai dina dekenai lau ese oi do lau abia hidi, egu ladana dekenai bese do oi biagua totona, badina oi be egu ima kwakikwakina ena rini bamona.’ ” (Hagai 2:23) Hari Keriso Iesu be dagi gaukara rua nega tamona ia karaia guba dekenai, ia be Iehova ena Mesia Pavapava bona Hahelaga Tauna Badana; guna, tanobada Ierusalema ai, Iesu ena dagi rua idia laulaulaia taudia be Gavana Serubabele bona Hahelaga Tauna Badana Iosua. Iesu be Iehova ena idibana imana ai ia noho lohia ena hamomokania maka ia karaia rini bamona, badina ia be “Dirava ena gwauhamata ibounai edia ‘oibe,’ ” ia be Iehova ena tulu bamona, unai gwauhamata idia vara momokani totona ia gaukaralaia gauna. (2 Korinto 1:20; Efeso 3:10, 11; Apokalupo 19:10) Baibel ena peroveta herevadia iboudiai ese Iehova do ia henia King ta bona Mauri Hoia Lou hahelaga tauna, Keriso, idia gwauraia.—Ioane 18:37; 1 Petero 1:18, 19.
18 Momokani iseda nega ai, hairai hereadaena ita davaria Iehova ena lauma dubu diaridiarina ai! Bona kahirakahira, Iehova ese Satani ena tanobada oromana do ia abia oho, bena dala namona ai Hagai 2:9 do ia guguru: “Inai gabu dekenai, egu bese taudia dekenai noho namo bona maino do lau henia.” Maino do ia noho!—do ia ore lasi, tanobada bona guba ai maino do ia noho. Iehova ena “rini,” Iesu Keriso, “Maino ena Lohia,” ese ia hamomokania. Baibel ese ia herevalaia, ia gwau: “Iena King siahuna, be do ia bada daekau lao, bona iena basileia be nega ibounai, mai maino danu do ia noho. . . . Siahu Ibounai Lohiabada ese do ia karaia momokani.” (Isaia 9:6, 7) Ela bona hanaihanai Iehova ena tomadiho rumana ena hairai do ita itaia, ia lohiaia tanobada bona guba mai mainona lalonai. Namona be ena ruma dekenai do ita noho!—Salamo 27:4; 65:4; 84:10.
[Footnotes]
a Namona be Gima Kohorona, November 1, 1995 gauna, ena hereva “ ‘Unai Nega Taudia Dikadia’ amo Ia Hamauridia” bona “Ita Noga Noho be Namo” oi itaia.
Anina Oi Gwauraia Diba, A?
◻ Hari iseda negai, edena dala ai Iehova ena ruma be ‘hairai amo ia hahonua’?
◻ Dahaka dainai sivarai namona harorolaia gaukarana be mai anina bada herea hari?
◻ Lagani 1996 Ena Haroro Ripoti be edena dala ai ita ia hagoadaia do ita haroro goadagoada totona?
◻ Edena dala ai Keriso be Iehova ena hamomokania “rini”?
9. Hari iseda negai, Roma 10:13, 18 be edena dala ai ia guguru?
16. Edena bamona “hamarerea” karana be kahirakahira, bona ia dainai dahaka do ia vara?
17. Edena dala ai Iesu be hamomokania “rini” bamona?
18. “Siahu Ibounai Lohiabada” Iehova ena hereva ginigabedia be edena dala namona ai do idia vara?
[Box on page 15]
“Daudau Tanodia Dekena amo” Anina Gogoa Gaukarana
ISAIA 43:6 ai, Iehova ena oda ta ita duahia, ia gwau: “Lau ura egu bese taudia ese, daudau tanodia dekena amo do idia giroa mai, tanobada ena kahana ibounai dekena amo.” Dala badana ai, unai siri ia guguru noho Eastern Europe dekenai. Hegeregere, mani guna Komiunis tanona Moldova ita laloa. Hari hanua haida lalonai, idia noho taudia 50 pesen be Witness taudia. Haroro teritori idia davaria totona, daudau gabudia ai idia lao, to idia hekwarahi noho! Unai kongregesen lalodiai pablisa taudia momo edia tama sina be lagani 1950 ia lao 1955 bamona ai Siberia dekenai idia lulua. Hari edia natudia ese anina gogoa gaukarana idia gunalaia. Pablisa 12,565 amo, idia 1,917 be lagani gunanai sibona bapatiso idia abia. Kongregesen 43 ta ta ai pablisa 150 bamona idia noho. Hesiai laganina matamatana lalonai, edia sekit 4 be sekit 8 ai idia lao.
Albania dekenai, orea ia bada ia lao be hoa gauna danu. Unuseniai Dirava idia badinaia Witness taudia edia namba be momo lasi, to lagani 50 lalonai lohia taudia aukadia edia hahisia karadia idia haheaukalaia. Idia haida idia hamasea. Iesu ena gwauhamata ita laloa: “Hisihisi do oi abia, to do oi gari henia lasi. Kamonai! Satani ese umui haida dibura ruma dekenai do ia koua, umui do ia dibagania, . . . lau do umui badinaia noho ela bona mase, vadaeni lau ese umui emui kwalimu ahuna, mauri, umui dekenai do lau henia.” (Apokalupo 2:10; Ioane 5:28, 29; 11:24, 25 itaia danu.) Hari Albania dekenai dahaka ia vara? Iehova ena gwauhamata Isaia 60:22 ai ia guguru momokani: ‘Ladana maragi momokani tauna mai ena famili be bese badana mai goadana ai do ia lao’! Lagani 1990 ai, Albania dekenai pablisa tamona sibona be haroro gaukara ia ripotilaia. To, “gaukara taudia” Italy bona tano ma haida amo be Iesu ena hereva idia kamonai henia: “Umui lao, bese ibounai be diba tahua taudia do umui halaoa, . . . umui bapatiso henia.” (Mataio 28:19; Luka 10:2) Lagani 1996 ai, Iesu ena mase laloatao Memorial hebouna ena nega ai pablisa 773 be haroro gaukara idia karaia, bona Memorial dekenai taunimanima 6,523 idia haboua, unai ese pablisa taudia edia namba be nega 8 amo ia hanaia! Daudau gabudia amo ita hoalaia ripoti idia abidia. Ena be pablisa taudia be lasi Kukës bona Divjakë hanuadia dekenai, to idia ta ta ai hebou taudia edia namba be 192 bona 230. Krujë be mai ena pablisa tauna tamona, to taunimanima 212 idia hebou. Korçë ena pablisa taudia 30 be gabu ta idia rentaia, taunimanima 300 bamona totona. To taunimanima 300 be unai ruma idia hahonua murinai, taunimanima ma 200 idia mai to gabu be lasi dainai idia vareai lasi. Momokani, unai uma ena anina ia hegeregere gogoa gaukarana totona!
Romania amo inai ripoti ia mai: “Ai be ruma-ta-ruma-ta gaukara ai karaia neganai, tau ta ai davaria bona ia gwau ia be Iehova ena Witness tauna bona ia be hanua maragina ta amo, to ai laloa unuseniai Witness taudia be lasi. Ia gwau ia sibona lasi, to taunimanima 15 be lagani momo lalodiai hebou ta idia karaia Thursday bona Sunday dekenai, bona idia be ruma-ta-ruma-ta gaukara idia hamatamaia. Dina ta murinai ai lao unai taoni dekenai. Ruma ena daiutu rua lalonai taunimanima 15, tatau, hahine, bona natudia idia naria, bona buka 20 bona magasin matamatadia 20 idia abia dae. Baibel stadi karaia dalana ai hadibadia. Ane ai abia hebou bona edia henanadai badadia ai haerelaia. Inai grup ia hakaua tauna ia gwau: ‘Dina haida gunanai, mai taitai danu Iehova lau noia mamoe naria tauna ta ia henia, bona egu guriguri ia haerelaia hari.’ Ai moale dikadika, bona ai lao gwauraia neganai, unai tau be tamana ia davaria tama lasi natuna bamona, ia gwau: ‘Mani emui kara, ai umui laloaboio lasi. Umui mai bona ai umui itaia lou!’ Unai ai karaia, bona hari Baibel stadi 7 ai karaia unai taoni dekenai. Ai do karaia lasi teritori momo lalodiai, Baibel bukadia bona magasin be dala namona ai aiemai gaukara idia hamatamaia; unai ai laloa bada, bona ia hahedinaraia inai gaukara be Dirava ena amo.”
[Chart on page 18-21]
(For fully formatted text, see publication.)
IEHOVA ENA WITNESS TAUDIA EDIA HESIAI LAGANINA 1996 ENA RIPOTI
[Picture on page 16]
“Bese idauidau edia kohu namodia” idia haboua Davara ena Motumotu idauidau (1), South America (2), Africa (3), Asia (4), North America (5), bona Europe ai(6)