Gari Dainai Taunimanima Oi Abidadama Henia Lasi, A?

‘TAU ta dekenai lau hereva diba lasi. Taunimanima idia lalo-parara lasi. Sibona edia hekwakwanai dainai idia bisi. Edia nega be hegeregere lasi egu hekwakwanai idia laloa totona.’ Momo be unai bamona idia laloa dainai, edia lalohadai idia gwauraia hedinarai lasi. Nega momo ma haida ese edia namo idia nanadaia neganai, idia ura hereva, to idia hereva lasi. Edia lalohadai idia hahedinaraia diba lasi.

Momokani, taunimanima haida idia ura lasi ma haida edia heduru idia abia. To, momo be heduru idia ura to gari dainai, sibona edia lalohadai, lalona ena mamina, bona idia dekenai idia vara gaudia idia hahedinaraia lasi. Oi be unai bamona tauna ta, a? Momokani oi abidadama henia diba tauna ta ia noho lasi, a?

Unai Gari Oi Lalo-Pararalaia

Hari inai negai tanobada taudia idia abidadama heheni lasi. Matamata taudia be edia tama sina idia hereva henia lasi. Tamana bona sinana be idia hereva heheni diba lasi. Haida sibona idia ura siahu taudia idia hereva henia. Edia lalohadai be ta dekenai idia gwauraia diba lasi dainai, momo be kekero muramura idia inua, drag idia ania, eiava lebulebu karadia idia karaia, edia hekwakwanai idia laloaboio diba totona.​—Aonega Herevadia 23:29-​35; Isaia 56:12.

Siahu taudia, hegeregere pris taudia, doketa taudia, doketa idia durua taudia, bona tisa taudia abidadama henia karana ia dika ia lao, badina hanaihanai edia koikoi karadia bona lebulebu karadia idia hedinarai dainai. Hegeregere, haida idia laloa pris taudia 10 pesen ese lebulebu karadia idia karaia noho. Toretore tauna ta ia gwau unai “abidadama hadikaia taudia” ese ”taunimanima edia kara heheni lalonai koura badadia bona maragidia idia geia.” Edia kongregesen taudia dekenai dahaka ia havaraia? Edia abidadama heheni karana ia hadikaia.

Taunimanima ese kara maoromaoro idia negea dainai ruma bese lalonai hekwakwanai badadia idia vara. Toana be vaia hari ruma bese momo edia mauri ia dika, to ruma bese namodia be ta ta sibona. Guna ruma bese ena noho gabuna be lalokau bona naria namonamo gabuna. Hari, nega momo ia be aniani abia steiseni bamona sibona. Natuna ta be ‘lalokau idia diba lasi’ ruma besena lalonai ia tubu neganai, ia be ia bada neganai ma haida abidadama henia karana ia diba lasi.​—2 Timoteo 3:3.

Ma danu, tanobada ia dika ia lao lalonai, ita idia hadikaia diba gaudia idia momo idia lao. Peroveta tauna Mika ese unai ia davaria neganai, ia gwau: “Oiemu badibadinai ia noho tauna do oi abidadama henia lasi.” (Mika 7:5) Unai bamona oi laloa diba, bema gau ta ese oiemu moale ia kokia, bema ta ese oiemu hunia gauna ia halasia, eiava bema gau ta dainai kahirakahira oi mase. Oi davaria ma haida oi abidadama henia lou be auka bona emu lalona dekenai hemami ta be lasi, dina ta ta ai emu lalona ia haginia maguna henunai oi hunia. (Salamo 102:​1-7 itaia.) Momokani, reana unai bamona kara dainai do oi gaukara noho diba, to emu “lalohisihisi” ese emu mauri lalonai moale korikorina ia kokia. (Aonega Herevadia 15:13) To inai be momokani, lauma dalanai do oi goada, bona oiemu hemami, lalona, bona tauanina do idia namo totona, unai magu bamona gauna do ia moru bona taunimanima abidadama henia karana do oi diba be namo. Momokani unai do ia vara diba, a? Oibe.

Dahaka Dainai Unai Magu Do Ia Moru be Namo?

Ma haida dekenai oiemu lalohadai oi gwauraia hedinarai karana ese lalohisihisi ia kokia. Hana dekenai unai ia vara. Ena headava ia namo, ena ruma bese lalonai dika ia vara lasi, to ia lalo-hekwarahi bada. Ena be “ena lalona ia hisihisi bada,” to aonega karana ia karaia, “Lohiabada dekenai ia guriguri” mai momokani ida, bona unai neganai ena bibina idia mareremarere. Oibe, ena lalohadai be Iehova dekenai ia gwauraia hedinarai. Bena ia ese ena hemami ibounai ia gwauraia Dirava ena gwaukau tauna Eli dekenai. Unai amo dahaka ia vara? “[Hana] be iena dala dekenai ia lao, ia aniani, bona iena lalohisihisi ia ore.”​—1 Samuela 1:​1-​18.

Tanobada besedia momo be lalohadai gwauraia karana ena namo idia diba. Hegeregere, ta ese ena lalohadai bona ia dekenai idia vara gaudia bona ena hemami be unai bamona gaudia idia davaria taudia dekenai ia herevalaia karana ese namo do ia havaraia diba. Unai gauna idia tahua taudia idia gwau: “Iseda hemami ita hunia karana ese gorere ia havaraia​—ita laloa namonamo noho totona namona be ita gwauraia hedinarai.” Saiens taudia idia davaria gaudia momo ese Dirava ena lauma amo idia torea aonega herevana idia hamomokania, ia gwau: “Ia sibona ia noho, turana lasi tauna, ese sibona ena ura mo ia tahua noho. Ia ese taunimanima haida edia laloa namodia [“aonega,” NW] ia ura lasi.”—Aonega Herevadia 18:1.

Bema ma haida dekenai oiemu lalohadai oi hahedinaraia lasi, edena bamona oi idia durua diba? Iehova Dirava be lalona ena hemami ia diba, to oiemu lalohadai hehunidia bona emu hemami be ruma bese taudia bona turadia idia diba lasi​—bema oi hahedinaraia lasi. (1 Sivarai 28:9) Bema oiemu hekwakwanai be Dirava ena taravatu oi utua, oi gwauraia hedinarai haraga lasi karana ese dika ia habadaia sibona.​—Aonega Herevadia 28:13.

Momokani, lalohisihisi ita gwauraia hedinarai ena namo be bada herea bona unai ese ita hereva henia tauna be iseda lalona reana do ia hahisia ena dika ia hanaia. To ita gwau lasi anina be hunia gaudia be ita hahedinaraia kava. Lasi. (Gunalaia Taudia 16:18; Ieremia 9:4; Luka 21:16 itadia.) Aonega Herevadia 18:24 ia gwau: “Turana haida be turana koikoi taudia sibona,” to ma ia gwau: “To turana ta ia noho, iena turana kara, ese tadikaka ta ena lalokau ia hereaia noho.” Unai bamona turana be edeseniai oi davaria diba?

Oiemu Ruma Bese Taudia Oi Abidadama Henia

Bema oi lalo-hekwarahi, oiemu adavana eiava tama sina ida oi herevalaia toho, a? Sisiba henia tauna ta ia gwau: “Nega momo herevalaia namonamo karana sibona ia hegeregere, hekwakwanai hanaia totona.” (Aonega Herevadia 27:9) Keristani tatau, ‘edia adavana be sibona idia lalokau henia hegeregerena idia lalokau henia’ taudia, ‘edia adavana idia kamonai henia’ hahinedia, bona Dirava ia henia maduna, ‘Lohiabada ena hadibaia hereva natudia dekenai idia hadibaia’ maduna unai, idia laloa bada tama sina idia hekwarahi goadagoada, kamonai bona sisiba henia namonamo taudia ai do idia lao totona. (Efeso 5:​22, 33; 6:4) Ena be tauanina dalanai Iesu be mai ena adavana eiava natudia lasi, to unai kara dekenai ena haheitalai be namo herea!​—Mareko 10:13-​16; Efeso 5:​25-​27.

Bema ruma bese lalonai hekwakwanai umui hanamoa diba lasi neganai be edena bamona? Keristani kongregesen lalonai turana namodia bogaraginai ita noho. Aposetolo Paulo ia gwau: “Bema Keristani tauna ta ia manoka neganai, lau danu iena manoka ena mamina lau abia.” (2 Korinto 11:29) Ma ia gwau: “Umui ta ta dekenai umui durua henia, emui metau do umui huaia totona.” (Galatia 6:2; Roma 15:1) Iseda tadikaka bona taihu lauma dalanai edia bogaraginai, ‘nega dika ia vara neganai, ena lalokau ia hedinaraia noho tadikakana’ tamona sibona lasi to momo do ita davaria.​—Aonega Herevadia 17:17.

Kongregesen Taudia Oi Abidadama Henia

Tanobada hegegemadai, Iehova ena Witness taudia edia kongregesen 80,000 idia hanaia lalonai, manau tatau idia noho bona idia be ‘umui danu idia gaukara hebou, emui moale do idia havaraia totona.’ (2 Korinto 1:​24) Idia be elda taudia. Isaia ia gwau: “Idia ta ta ibounai be lai koua gabuna hegeregere do idia lao. Idia be guba bada ia toa neganai hunia gabudia namodia hegeregere. Idia be tano kaukau gabudia lalonai sinavai maragidia hegeregere. Idia be nadi badana ena ikerukeru bamona, tano kaukau dekenai.” Elda taudia idia gaukara goadagoada unai bamona taudia ai do idia lao totona.​—Isaia 32:2; 50:4; 1 Tesalonika 5:​14.

Elda taudia ese Baibel ena taravatu idia badinaia vadaeni murinai ‘lauma helaga ese ia abia hidi.’ Unai oi diba dainai idia oi abidadama henia karana ia habadaia diba. (Kara 20:28; 1 Timoteo 3:​2-7; Tito 1:​5-9) Elda ida oi herevalaia gaudia do ia halasia lasi. Idia be ita abidadama henia diba taudia dainai, idia hegeregere elda gaukarana idia karaia.​—Esodo 18:21; Nehemia 7:2, NW, itadia danu.

Kongregesen lalonai elda taudia ese “emui lauma idia naria noho, nega ibounai. Gabeai idia ese Dirava ena vairanai, edia gaukara ibounai ena anina do idia gwauraia hedinarai.” (Heberu 13:17) Unai ese oiemu lalona ia hagoadaia idia do oi abidadama henia totona, ani? To ita diba vadaeni, elda iboudiai edia kara namodia be hegeregere lasi. Reana emu mamina be haida dekenai oi hereva be auka lasi, badina edia lalokau eiava hebogahisi idia hahedinaraia bada. (2 Korinto 12:15; 1 Tesalonika 2:​7, 8, 11) Ena kara oi ura henia elda ta dekenai emu lalohadai do oi gwauraia be namo, ani?

Unai tatau be moni dainai elda gaukarana idia karaia lasi. To, idia be “harihari gaudia,” Iehova ese oi durua totona ia henia taudia. (Efeso 4:​8, 11-​13; Galatia 6:1) Edena dala ai oi idia durua? Baibel idia gaukaralaia namonamo karana amo, idia ese ena hanamoa siahuna amo oiemu mauri do idia durua. (Salamo 107:20; Aonega Herevadia 12:18; Heberu 4:​12, 13) Idia be oi ida bona oi totona do idia guriguri. (Filipi 1:​9; Iamesi 5:​13-​18) Unai bamona sisiba henia taudia mai edia lalokau ese heduru bada idia henia diba lalo-hekwarahi kokia bona lalo-maino havaraia totona.

Turana Karana Abidadama Heheni Dalanai Hagoadaia

Ta oi noia oi do ia durua, sisiba do ia henia, eiava do ia kamonai totona be ia hahedinaraia lasi oi be oi manoka eiava oi be hegeregere lasi. Unai kara ia hahedinaraia oi diba ita be goevadae lasi taudia bona taunimanima ta lasi be hekwakwanai iboudiai edia haere ia diba. Momokani, iseda sisiba henia tauna bona ita abidadama henia tauna badana be iseda guba Tamana, Iehova Dirava. Ita be salamo torea tauna bamona ita laloa, ia gwau: “Lohiabada be egu goada bona egu kesi. Lau ese ia lau abidadama henia noho. Ia ese lau ia durua noho, bona egu kudouna ia hamoalea noho.” (Salamo 28:7) Nega iboudiai, guriguri amo gau iboudiai be ‘ia dekenai ita hamaoroa’ diba, badina ita diba momokani ia ese ita do ia hakala henia bona ia naria.​—Salamo 62:​7, 8; 1 Petero 5:7.

To edena dala ai elda taudia bona ma haida kongregesen lalonai do oi abidadama henia diba? Gau ginigunana be sibona oi laloa. Oiemu gari be mai ena badina momokani, a? Oi ese ma haida edia kara ena badina oi laloa kerere, a? (1 Korinto 13:​4, 7) Ta ese oiemu lalona do ia hahisia dalana oi hamaragia diba, a? Oibe. Edena dala ai? Namona be oi hekwarahi, kongregesen gaukara lalonai ma haida do oi diba namonamo totona. Kongregesen heboudia ai idia ida do oi herevahereva. Ia ida ruma-ta-ruma-ta gaukarana lalonai do umui gaukara hebou. Ta be ena kara namo dainai do idia matauraia hegeregerena, do idia abidadama henia danu be unai bamona. Unai dainai oi haheauka be namo. Hegeregere, mamoe naria Keristani tauna do oi diba neganai, oiemu abidadama ia dekenai do ia bada ia lao. Oiemu lalo-hekwarahi be sisina sisina oi hahedinaraia. Bema dala maorona ai, emu hemami ia lalo-pararalaia mai ena hebogahisi bona aonega ida, reana ma gau haida do oi hahedinaraia.

Oi ida Iehova idia tomadiho henia taudia idia hekwarahi bada, tura heheni karana lalonai Dirava ena kara namodia do idia tohotohoa totona, bona Keristani elda taudia be unai totona idia hekwarahi bada momokani. (Mataio 5:​48) Unai ese kongregesen lalonai abidadama heheni karana ia habadaia. Lagani momo elda gaukarana ia karaia tauna ta ia gwau: “Namona be tadikaka be inai gau tamona idia diba namonamo: Herevana ta ese dahaka ia karaia, to elda ena Keristani lalokauna ia dekenai ia boio lasi. Reana unai kara ia ura henia lasi, to iena tadikaka ia do lalokau henia noho bona ia ura durua.”

Unai dainai badina ta be lasi do oi laloa oiemu hekwakwanai be sibona oi huaia be namo. Oiemu metau huaia totona oi ia durua diba tauna bona lauma dalanai ia goada tauna ta oi hereva henia. (Galatia 6:1) Oi laloatao “laloa metau ese oiemu moale do ia koua,” to “hereva namodia mai bogahisihisi danu, be hani bamona, edia mamina be namo, lauma dekenai, bona tauanina dekenai danu.”—Aonega Herevadia 12:25; 16:24.

[Box on page 26]

Reana varavara ta, turana ta, eiava lauma tadikaka ta ese Keristani tauna ta do ia boiria ena hekwakwanai lalonai do ia durua totona. Durua dalana oi diba, a?

Sisiba Henia Tauna Namona

idia hereva henia be auka lasi: Mataio 11:28, 29; 1 Petero 1:​22; 5:​2, 3

ese gabu bona nega namona ia abia hidi: Mareko 9:​33-​37

ese hekwakwanai ia lalo-pararalaia toho: Luka 8:​18; Iamesi 1:​19

be ena lalona ia biagua diba: Kolose 3:​12-​14

be lalohisihisi lalonai heduru ia henia: 1 Tesalonika 5:​14; 1 Petero 3:8

be ia karaia diba lasi gaudia ia diba: Galatia 6:3; 1 Petero 5:5

be sisiba maorona ia henia: Salamo 19:​7-9; Aonega Herevadia 24:26

ese hunia herevana ia halasia lasi: Aonega Herevadia 10:19; 25:9