Emu Lalona Do Ia Goada, Hahemauri be Kahirakahira Dainai
“Inai lau noho, bona oi do lau durua. Lau Lohiabada lau hereva inai.”—IEREMIA 1:19.
HAHEMAURI! Iseda lalona hagoadaia herevana unai! Ta ese ita ia hamauria, anina be moale lasi noho dikana amo ita ia ruhaia nege bena noho namona mai moalena ita davaria.
2 Hari inai negai ta ese tanobada taudia be unai bamona ia hamauridia be namo! Gabu iboudiai dekenai, hekwakwanai aukadia ese edia lalodia idia hametaua bona idia hamanokaia—ogogami, kara dikadia, gorere, kavakava bona lalohisihisi dainai idia vara gaudia unai. Taunimanima momo herea ese tanobada ena toana idia moalelaia lasi, bona idia ura do ia idau bona do ia namo.—Isaia 60:2; Mataio 9:36.
“Metau Dikadia Momo”
3 Inai nega ena hisihisi ese nega gunadia edia ia hereaia, unai dainai ta ese ita do ia hamauria be mai anina bada. Hari inai negai taunimanima bilioni ta mai kahana be idia ogogami momokani, bona lagani ta ta amo unai bamona taudia be milioni 25 bamona amo idia momo daekau. Lagani ta ta ai, memero kekeni milioni 13 bamona idia mase, edia aniani be hegeregere lasi dainai, eiava ogogami karana ta dainai—dina tamona lalonai 35,000 mai kahana idia mase! Bona taunimanima badadia milioni momo be idia do buruka momokani lasi to gorere idauidau dainai idia mase haraga.—Luka 21:11; Apokalupo 6:8.
4 Tuari bona heiriheiri ese hisihisi bada herea idia havaraia vadaeni. Buka ta ladana Death by Government lalonai ia gwau, bese idauidau bona tomadiho oreadia idia tuari bona idia heiriheiri bona gavamani haida ese sibodia edia tano taudia momo idia alaia mase lalonai, “taunimanima milioni 203 mai kahana idia alaia mase, idia hanaia laganidia 96 lalodiai.” Ma ia gwau: “Idia mase taudia be reana milioni 360 bamona. Unai be mase gorerena badana ese ita taunimanima ia hadikaia vadaeni bamona. Momokani, ita ia hadikaia vadaeni, to unai be Lohia Siahuna ese ia havaraia gauna, jems ese idia havaraia gauna lasi.” Toretore tauna Richard Harwood ia gwau: “Idaunegai tuaridia be idau; idia be maragi.”—Mataio 24:6, 7; Apokalupo 6:4.
5 Vanegai laganidia edia hisihisi habadaia gaudia ma haida be inai: Dagedage karadia bona lebulebu karadia idia momo daekau, bona famili momo idia parara. United States ena Edukeisini ena Seketere gunana ta, William Bennett, ia gwau, lagani 30 lalodiai U.S. taudia be 41 pesen amo idia momo daekau, to dagedage karadia be 560 pesen amo, idia havaraia kava natudia be 400 pesen amo, headava hadokoa karadia be 300 pesen amo, bona memero kekeni badadia sibodia idia hamasea karadia be 200 pesen amo idia momo daekau. Princeton University ena profesa ta ladana John DiIulio ia gwau “raskol dika hereadia” be idia momo daekau noho, bona “idia ala-ala, idia heatu, idia reipi, idia dadidadi, idia henaohenao bona heiriheiri bada idia havaraia. Pulisi ese do idia dogodiatao garina idia gari lasi, bona dibura ena hisihisi bona sibodia edia lalodia edia mamina be idia garilaia lasi.” Unai tano ai, memero kekeni, lagani 15 ela bona 19 taudia, edia mase ena badina badana iharuana be ala-ala. Bona lagani hani idia do abia lasi natudia momo be dagedage karadia dainai idia mase, gorere dainai lasi.
6 Unai kara dika bona dagedage be bese tamona lalonai lasi. Tano momo dekenai idia vara. Badina ta be drag ania kava karana ese taunimanima milioni momo ia hakereredia. Australia ena Sydney Morning Herald ia gwau: “Bese idauidau dekenai drag hoihoilaia karana amo moni bada herea idia davaria; tuari gaudia hoihoilaia karana sibona ese ia hereaia.” Badina ma ta be hari inai negai TV be dagedage bona matabodaga karadia amo ia honu. Tano momo dekenai, mero ta ena lagani be 18 neganai, ia ese dagedage karadia momo herea bona matabodaga karadia momo herea be TV dekenai ia itaia vadaeni. Unai taunimanima hakereredia siahuna be bada, badina iseda lalona dekenai ita atoa vareai gaudia ese iseda kara idia haidaua.—Roma 12:2; Efeso 5:3, 4.
7 Unai gau dikadia iseda nega lalonai idia vara be Baibel ese guna ia perovetalaia maoromaoro. Ia gwau tuari badadia, daihanai goreredia, hitolo, bona kara dikadia do idia bada daekau. (Mataio 24:7-12; Luka 21:10, 11) Bona 2 Timoteo 3:1-5 dekenai ia torea peroveta herevana ita duahia neganai, unai be dina ta ta ai idia halasia nius ita kamonaia bamona. Ia hahedinaraia hari be “nega ena dokona,” bona taunimanima be inai bamona ia gwauraidia ‘sibodia edia ura idia tahua, moni do idia mataganigani henia, edia tamana bona sinana do idia kamonai henia lasi, helaga karadia do idia negea, lalokau do idia diba lasi, do idia lebulebu, do idia dagedage, do idia hekokoroku, lebulebu karadia do idia ura henia bada, to Dirava do idia ura henia maragi.’ Hari inai negai tanobada be unai hereva hegeregerena momokani. William Bennett ia gwau: “To momo herea amo ia hedinarai . . . taunimanima edia kara ia dika rohoroho.” Haida idia gwau tanobada ibounai tuarina ginigunana ia vara neganai noho namo dalana ia boio.
8 Hari inai nega ena dika be Abata Badana be Noa ena negai ia do vara lasi negana ia hereaia. Unai neganai, “dika be gabu ibounai dekenai,” bona taunimanima be edia dala dikadia amo idia helalo-kerehai lasi. Unai dainai Dirava ia gwau: “Ibounai do lau hamasea haorea, badina tanobada be edia kara dika dekenai ia honu momokani.” Abata Badana ese unai dagedage tanobadana ia haorea.—Genese 6:11, 13; 7:17-24.
Taunimanima ese Ita Idia Hamauria Diba Lasi
9 Taunimanima ese ita be unai gau dikadia amo idia hamauria diba, a? Dirava ena Hereva ena haere be inai: “King taudia do umui abidadama henia lasi, badina taunimanima ese umui do idia hamauria diba lasi.” “Taunimanima ta lasi ese iena mauri ia biagua noho.” (Salamo 146:3; Ieremia 10:23) Lagani tausen momo sivaraidia ese unai hereva idia hamomokanidia vadaeni. Ena be taunimanima ese politikol daladia iboudiai, moni davaria bona naria daladia iboudiai, bona bese naria daladia iboudiai idia tohoa vadaeni, to dika ia bada ia lao. Bema taunimanima be mai edia dala, unai dala be hari ia hedinarai vadaeni. To, momokani, “haida ese ma haida idia biagua noho, bona idia hisihisi henidia noho.”—Hadibaia Tauna 8:9; Aonega Herevadia 29:2; Ieremia 17:5, 6.
10 Lagani haida idia lao vadaeni, U.S. besena gimaia dalana sisibalaia tauna, Zbigniew Brzezinski, be ia gwau: “Tanobada ai idia vara gaudia ia laloa namonamo tauna ese ia abia lalohadaina be inai: Heiriheiri, politikol hepapahuahudia, moni hekwarahilaia karana, bona bese idauidau edia hepapahuahu be do idia momo daekau.” Ma ia gwau: “Taunimanima do ia hadikaia gauna be, tanobada ibounai be heiriheiri amo do ia honu.” Hari inai negai unai hereva be momokani vaitani. New Haven, Connecticut ena niuspepa ladana Register lalonai, ta ese inai dagedage bada negana ia gwauraia, ia gwau: “Toana be ia dika momokani bona hadokoa dalana be lasi.” Oibe, inai tanobada ia dika ia lao dalana do idia koua lasi, badina be inai “nega ena dokona” perovetalaia herevana ma ta be inai: “Kara dika taudia bona koikoi taudia ese edia kara dika bona edia koikoi do idia habadaia. Idia ese tau haida do idia koia, bona ma tau haida ese idia danu do idia koia.”—2 Timoteo 3:13.
11 Taunimanima ese unai kara idia koudia diba lasi, badina be Satani be “inai tanobada ena dirava.” (2 Korinto 4:4) Oibe, “Satani ese tanobada taudia ibounai ia gunalaia noho.” (1 Ioane 5:19; ma danu Ioane 14:30 itaia.) Baibel ese iseda nega be inai bamona ia gwauraia be maoro: “Tanobada bona davara, madi o, nega dika bada do umui davaria! Badina be Satani ese umui dekenai ia lao vadaeni, mai ena badu dikadika. Ia badu, badina ia diba iena nega be ia kwadogi sibona.” (Apokalupo 12:12) Satani ia diba iena lohia siahuna bona ena tanobada be kahirakahira do idia ore, unai dainai ia be “laiona mai ena boiboi bada bamona. . . . Do ia ania ore taudia ia tahua noho.”—1 Petero 5:8.
Hahemauri be Kahirakahira—Daidia Edia?
12 Tanobada dekenai hekwarahi idia bada idia lao; unai ese ia hahedinaraia goevagoeva tanobada do ia haidaua vaitani gauna—hahemauri badana unai—be kahirakahira! Daidia edia? Hahemauri be dokona ena toana idia laloa bona unai hegeregerena idia kara taudia edia. Ioane Ginigunana 2:17 ese ia hahedinaraia edena bamona do idia kara be namo; ia gwau: “[Satani ena] tanobada, mai ena gau dikadia, taunimanima idia ura dikadika gaudia, be kahirakahira do idia ore. To Dirava ena ura ia karaia noho tauna be do ia noho ela bona hanaihanai.”—2 Petero 3:10-13 danu itaia.
13 Iesu ia gwau nega daudau lasi inai nega ena taunimanima dikadia be hisihisi badana lalonai do idia mase ore; ia gwau: “Dirava ese tanobada ia karaia nega dekena amo hisihisi unai bamona idia vara lasi ia mai bona harihari, gabeai danu unai bamona ta do ia vara lou lasi.” (Mataio 24:21) Unai dainai ia gwau: “Do umui naria namonamo, aniani bona kekero muramura bona tanobada ena laloa metau momo gaudia ese emui lalona do idia guia garina, vadaeni Lohiabada ena Dina do ia mai haraga, umui hegaegae lasi garina. Badina be unai Dina be tanobada latanai idia noho taunimanima ibounai dekenai do ia ginidae. Unai dainai, do umui naria, bona nega ibounai do umui guriguri, vadaeni inai dika ibounai dekena amo do umui heau mauri.”—Luka 21:34-36.
14 Idia “naria namonamo” taudia ese Dirava ena ura do idia tahua bona do idia karaia. (Aonega Herevadia 2:1-5; Roma 12:2) Nega daudau lasi Keriso ese Satani ena tanobada do ia hadikaia ore neganai, idia be do idia “heau mauri.” Bona edia lalona idia goada diba, badina be idia diba momokani hahemauri do idia abia.—Salamo 34:15; Aonega Herevadia 10:28-30.
Hahemauri Tauna Badana
15 Dirava ena hesiai taudia be hahemauri do idia abia totona, Satani bona ena tanobada ibounai do idia ore be namo. Hahemauri tauna badana, iena siahu ese taunimanima edia ia hereaia momokani tauna, sibona mo be hegeregere do ia haoredia. Tauna be Iehova Dirava, Atai Herea Pavapavana, siahu ibounai Diravana, guba bona tanobada ia karaia Diravana. Ia be Hahemauri Tauna badana. Ia gwau: “Lau inai, lau sibona be Lohiabada. Lau sibona be Hamauria Tauna, hamauria tauna ma ta be lasi.”—Isaia 43:11; Aonega Herevadia 18:10.
16 Iehova ena siahu, aonega, hahemaoro, bona lalokau be hereadae. (Salamo 147:5; Aonega Herevadia 2:6; Isaia 61:8; 1 Ioane 4:8) Unai dainai ita diba momokani ena hahemauri karadia ia karaia neganai do idia maoromaoro. Aberahamo ia henanadai, ia gwau: “Tanobada ibounai ena kota biaguna be kara maoromaoro do ia karaia lasi, a?” (Genese 18:24-33) Paulo ia gwau: “Dirava ena kara be maoromaoro lasi, a? Lasi momokani.” (Roma 9:14) Ioane ese inai ia torea: “Lohiabada Dirava e, Siahu Ibounai Diravana e, momokani, oiemu kota henia kara be momokani bona maoromaoro.”—Apokalupo 16:7.
17 Bema Iehova ese hahemauri ia gwauhamatalaia, ena gwauhamata do ia hamomokania. Iosua ia gwau: “Ia gwauhamata henia gaudia ibounai, be Lohiabada ese ia badinaia momokani.” (Iosua 21:45) Solomona ia gwau: “Iena gwauhamata namodia ibounai, . . . ia badinaia vadaeni.” (1 King Taudia 8:56) Aposetolo Paulo ia gwau: “Aberahamo ia laloa daradara lasi. . . . Ia diba momokani Dirava ese iena gwauhamata do ia hamomokania.” Sara danu “ia diba Dirava ese iena gwauhamata do ia badinaia.”—Roma 4:20, 21; Heberu 11:11.
18 Iehova be taunimanima hegeregeredia lasi; ia be momokani vaitani bona ena hereva ia hamomokania. “Siahu Ibounai Lohiabada ia gwauhamata vadaeni, ia gwau, ‘Lau ese lau palania gauna, be momokani do ia vara, bona lau gwau do lau karaia gauna, be egu hereva hegeregerena do ia vara.’ ” (Isaia 14:24) Unai dainai ita diba inai hereva Baibel lalonai be do ia momokani: “Bema hisihisi bona metau Dirava badinaia taudia dekenai idia noho neganai, Lohiabada ese inai hisihisi dekena amo idia ia hamauria diba. Dirava ese danu kara dika taudia ia guia diba, ela bona Kota Bada Dinana ia ginidae.” (2 Petero 2:9) Edia inai taudia ese idia haoredia gwauraia neganai danu, Iehova ena hesiai taudia edia lalona idia goada, iena lalohadai dainai. Unai lalohadai ia hahedinaraia, ena peroveta taudia ta be inai bamona ia gwauhamata henia neganai: “Oi do idia heai henia, to idia ta ese oi do ia halusia lasi. Badina be, lau be oi dekenai lau noho, bona oi do lau durua. Lau Lohiabada lau hereva inai.”—Ieremia 1:19; Salamo 33:18, 19; Tito 1:2.
Gunaguna Haida Ia Hamauridia
19 Iehova ena hahemauri karadia gunadia haida ita herevalaia ese iseda lalona ia hagoadaia momokani diba. Unai kara ta sivaraina be inai: Lota be Sodoma bona Gomora taudia edia kara dika rohoroho dainai “iena lalona be ia metau.” To Iehova ese unai hanua maumauraidia herevana ia laloa. Nega korikori ai, gwaukau taudia ia siaidia, Lota bona ena ruma bese do idia hagania unai gabu do idia rakatania haraga. Bena dahaka ia vara? Iehova ese “kara maoromaoro tauna Lota ia hamauria,” bona “lahi dekena amo unai hanua ruaosi ia araia ore.” (2 Petero 2:6-8; Genese 18:20, 21) Hari inai negai danu, Iehova ese inai tanobada ena kara dika rohoroho maumauraia herevana ia laloa. Iena gwaukau taudia ese iena ura hegeregerena edia haroro gaukara idia hagugurua murinai, ia ese inai tanobada do ia panisia, bona ena hesiai taudia do ia hamauridia, Lota ia hamauria hegeregerena.—Mataio 24:14.
20 Gunaguna, Aigupito lalonai Dirava ena bese taudia milioni momo be hegui hesiai taudia ai idia halaodia. Iehova ese ia herevalaidia, ia gwau: “Idia taitai, be lau kamonai vadaeni, badina be edia hisihisi lau diba vadaeni. Lau diho mai inai . . . do lau hamauridia totona.” (Esodo 3:7, 8) To Farao ese Dirava ena bese taudia ia kahudia nege murinai, ena lalona ia giroa, bena ia mai ena tuari oreana badana ida ese idia gavadia. Toana be Davara Kakakakana ese Israela taudia edia dala ia koua. To Mose ia gwau: “Umui gari lasi, umui gini auka masemase, Lohiabada ena hamauria kara do umui itaia, hari dina umui dekenai do ia hamauria.” (Esodo 14:8-14) Iehova ese Davara Kakakakana ia hapararaia, bena Israela taudia idia heau mauri. Farao ena tuari oreadia ese idia gavadia, to Iehova ese ena siahu ia gaukaralaia dainai, “davara ese inai tuari taudia ia koua. Idia be davara dekenai idia diho, auri ia metau bamona.” Unai murinai Mose be mai ena moale ida ane ia abia Iehova ena, ia gwau: “Lohiabada e, dirava ibounai edia huanai, oi bamona ta be daika? Oi hegeregere be daika? Helaga dekenai oi be herea momokani. Daika be oi bamona? Hoa karadia oi karaia, bona kara badadia mai gari danu oi karaia noho.”—Esodo 15: 4-12, 19.
21 Ma nega ta ai, Iehova ena bese taudia edia inai taudia, Amono, Moaba, bona Seiri (Edoma) bese taudia, ese idia hadikadia ore gwauraia. Iehova ia gwau: “Do umui gari lasi, bona emui kudoudia do idia manoka lasi inai tuari orea taudia [emui inai taudia] momo herea dainai, badina tuari be emui tuari lasi, to Dirava ena. . . . Inai tuari dekenai be do umui tuari lasi. To emui gabu dekenai do umui gini, bona naria noho sibona, vadaeni Lohiabada ena kwalimu umui dainai do umui itaia.” Iehova edia inai taudia ia hadaradaradia bena sibodia idia ala-ala heheni, unai amo ia ese ena bese taudia ia hamauridia.—2 Sivarai 20:15-23.
22 Asuria Basileiana Badana ese Ierusalema ia tuari henia gwauraia neganai, King Senakeriba ese Iehova ia gonagonalaia; magu dekenai idia helai taudia ia hereva henia, ia gwau: “Inai [lau abia vadaeni tanodia] ibounai edia huanai edena tano ena dirava ese iena tano be Asuria ena king ena siahu dekena amo ia hamauria? Unai dainai Lohiabada ese Ierusalema be edena bamona Asuria dekena amo do ia hamauria diba?” Dirava ena hesiai taudia dekenai, ia gwau: “Hesekaia ese umui ia hamaoroa, Lohiabada do umui abidadama henia, be do umui kamonai henia lasi.” Bena Hesekaia ia guriguri, Dirava ia noia goadagoada do ia hamauridia, bena “tanobada basileia ibounai be do idia diba, oi Lohiabada e, oi sibona be Dirava momokani.” Iehova ese Asuria tuari taudia 185,000 ia alaia mase, bona ena hesiai taudia ia hamauridia. Gabeai, Senakeriba ese ena dirava koikoina ia tomadiho henia neganai, ena natuna rua ese idia alaia mase.—Isaia, karoa 36 bona 37.
23 Iehova ese gunaguna hoa dalanai ena bese taudia ia hamauridia daladia ita diba neganai, momokani iseda lalona idia goada diba. Hari inai nega be edena bamona? Iena hesiai taudia mai edia kamonai ese dahaka dika do idia davaria dainai, hoa dalanai do ia hamauridia be namo? Dahaka dainai ia naria ema bona hari ia hamauridia totona? Iesu ena hereva: “Inai gaudia do idia vara hamatamaia neganai, be emui kwarana do umui abia isi. Badina be umui emui hamauria be ia kahirakahira vadaeni”—ena anina be edena bamona do ia vara? (Luka 21:28) Bona Dirava ena hesiai taudia idia mase vadaeni be edena bamona do ia hamauridia? Hereva gabena lalonai unai do ita tahua.
Riviu Henanadaidia
◻ Dahaka dainai hahemauri do ita abia be mai anina bada?
◻ Dahaka dainai taunimanima do ita abidadama henidia lasi, ita do idia hamauria totona?
◻ Daidia edia hahemauri be kahirakahira?
◻ Dahaka dainai ita diba momokani Iehova ese ita do ia hamauria?
◻ Iseda lalona idia hagoadaia hahemauri karadia gunadia edia sivarai haida be dahaka dahaka?
[Study Questions]
1, 2. Dahaka dainai taunimanima ese hahemauri do idia abia be namo?
3, 4. Dahaka dainai hahemauri be mai anina bada, hari inai negai?
5, 6. Dahaka dainai iseda nega be hisihisi momo negana?
7. Baibel ese hari inai nega ena dika be edena bamona ia perovetalaia?
8. Dahaka dainai Dirava ese Abata Badana ia mailaia Noa ena negai, bona ena anina be dahaka iseda negai?
9, 10. Dahaka dainai namona be taunimanima do ita abidadama henidia lasi, ita do idia hamauria totona?
11. Dahaka dainai taunimanima ese tanobada ia dika ia lao dalana do idia koua diba lasi?
12. Daidia edia hahemauri be kahirakahira?
13, 14. Iesu ese edena bamona ia hahedinaraia goevagoeva do ita gima noho be namo?
15, 16. Daika be Hahemauri Tauna badana, bona dahaka dainai ita diba momokani iena hahemaoro karadia do idia maoromaoro?
17. Gunaguna Iehova ena hesiai taudia ese edena bamona idia hahedinaraia iena gwauhamata idia abidadama henidia?
18. Iehova ena hesiai taudia hari inai negai be edena bamona idia diba momokani do ia hamauridia?
19. Iehova ese Lota be edena bamona ia hamauria, bona iseda negai dahaka be unai hegeregerena?
20. Iehova ese idaunegai Israelana be Aigupito amo ia hamauria sivaraina mani oi gwauraia.
21. Iehova ese ena bese taudia be Amono, Moaba, bona Seiri amo edena bamona ia hamauridia?
22. Iehova ese hoa dalanai Israela be Asuria amo edena bamona ia hamauria?
23. Hari inai negai do ia vara hahemaurina dekenai dahaka henanadai edia haere do ita davaria be namo?
[Picture on page 10]
Aberahamo be Iehova idia abidadama henia momokani taudia ta