Iehova ese Oi Ia Hamauria Totona Ia Karaia Gauna Oi Laloa Bada, A?
“Lohiabada, Israela ena Dirava, ita hanamoa, badina be ia ese iena bese taudia ia durua vadaeni, bona idia dekenai ia hamauria vadaeni.”—LUKA 1:68.
1, 2. Hari ita dekenai ia vara gauna be edena bamona ita haheitalaia? Edena henanadai do ita herevalaia?
INAI haheitalai oi laloa: Oi be hospital wodi ta ai oi noho. Unai wodi ai idia hekure gorere taudia ibounai be mase havaraia gorere tamona idia abia, bona doketa be hanamoa dalana idia diba namonamo lasi. To bema oi kamonai doketa ta be unai gorere hanamoa dalana ia tahua, do oi moale bada, bona dina ta ta ai oi ura diba gau ta idia davaria vadaeni o lasi. Dina ta ai, oi kamonai doketa be muramura ta ia davaria! Doketa be gau momo ia karaia unai muramura ia davaria totona, ani? Dahaka do oi karaia? Oibe, doketa do oi tanikiu henia bona matauraia bada, badina dala ia kehoa oi bona ma haida be mase havaraia gorerena amo ia hamauria totona.
2 Reana ita laloa unai haheitalai be anina lasi, to unai ese ita dekenai ia vara gauna ta ia hahedinaraia. Ita ta ta be mase havaraia gorerena ta ita abia bamona dainai, ta ese ita ia hamauria be namo. (Roma 7:24 duahia.) Iehova bona ena Natuna be gau badana ta idia karaia ita idia hamauria totona. Unai dainai, henanadai foa ita laloa. Dahaka dainai tau ta ese ita ia hamauria be namo? Edena dala ai Iesu be ita ia hamauria? Edena dala ai Iehova be ita ia hamauria? Edena dala ai ita hahedinaraia diba ita be Dirava ena hamauria dalana ita laloa bada?
Dahaka Dainai Tau ta ese Ita Ia Hamauria be Namo?
3. Edena dala ai iseda kara dika be daihanai gorere dikana ta bamona?
3 Vanegai ripoti ta ia gwau, lagani 1918 ai kuru gorerena ladana Spanish influenza be gorere dikana ta, badina unai ese taunimanima milioni momo ia hamasea. Gorere ma haida be dika rohoroho. Reana haida sibona be unai gorere idia abia, to idia momo idia mase.a Edena dala ai iseda kara dika be daihanai gorere dikana ta bamona? Roma 5:12 ena hereva oi laloa, ia gwau: “Tau tamona dekena amo kara dika ia vareai mai tanobada dekenai, bona iena kara dika ese mase ia mailaia. Unai dainai mase be taunimanima ibounai ese idia abia, badina ibounai be mai edia kara dika.” Oibe, goevadae lasi taudia be mai edia kara dika. (Roma 3:23 duahia.) To taunimanima hida be kara dika amo idia mase? Paulo ia gwau, “taunimanima ibounai.”
4. Iehova ia ura iseda mauri laganidia be edena bamona, bona edena dala ai hari momo edia lalohadai be Iehova ena lalohadai amo ia idau?
4 Kara dika be unai gorere bamona, taunimanima momo ia hamasea noho, to taunimanima be unai idia laloa lasi. Matamata taudia idia mase neganai taunimanima idia daradoko, to buruka taudia idia mase neganai unai idia laloa momo lasi. Taunimanima be Havaraia Tauna ena ura idia laloaboio diba. Dirava ia ura eda mauri laganidia idia noho daudau, to hari eda mauri laganidia be idia kwadogi. Momokani, Dirava ena vairanai, tau ta be “dina tamona” ia do mauri lasi. (2 Pet. 3:8) Unai dainai Baibel ia gwau, eda mauri dinadia be kwadogi bona idia ore haraga, rei bamona ia tubu bena ia mase eiava hahodi tamona sibona bamona. (Sal. 39:5; 1 Pet. 1:24) Iehova ena ura ita laloaboio lasi be namo. Dahaka dainai? Bema kara dika ese mase ia havaraia be ita itaia, ita ura tau ta ese ita ia hamauria be namo, muramura ta ese gorere ta ia hanamoa hegeregerena.
5. Ita ta ta be mai eda kara dika dainai, dahaka ita abia lasi?
5 Eda kara dika ena dika ita lalopararalaia totona, namona be kara dika ese ita dekenai ia havaraia gauna ita lalopararalaia toho. Matamanai unai be auka, badina kara dika ia kokia gauna—guna Adamu bona Heva idia abia gauna—be nega ta ita do mamia lasi. Matamanai, Adamu bona Heva be mauri goevadaena idia moalelaia. Edia lalona bona tauanina idia goevadae dainai, edia lalohadai, hemami bona kara idia biagua namonamo diba. Idia be Iehova Dirava ena hesiai taudia dainai, kara namodia sibona idia hahedinaraia noho diba. To lasi, idia be unai harihari gauna hereadaena idia dadaraia. Iehova dekenai idia kara dika neganai, Iehova ese idia bona edia bese dekenai ia henia mauri namona idia haboioa. (Gen. 3:16-19) Unai negai danu, idia ese ita dekenai kara dika, gorere dikana ta unai, idia henia hanai. Maoromaoro Iehova ese idia ia hahemaoro henia. To ita dekenai, Dirava ese hahemauri dalana ia gwauraia hedinarai.—Sal. 103:10.
Edena Dala ai Iesu be Ita Ia Hamauria?
6, 7. (a) Edena dala ai Iehova ese matamanai ia hahedinaraia ia be gau ta do ia henia ita ia hamauria totona? (b) Abela bona bese kwaradia edia boubou karadia amo dahaka ita dibaia?
6 Iehova ia diba ia be gau ta do ia henia, Adamu bona Heva edia bese ia hamauria totona. Genese 3:15 (BHğ) ena peroveta herevana amo unai gauna ita dibaia. Iehova be “garana” ta eiava hamauria tauna ta do ia henia—nega ta unai garana be Satani do ia hamasea. Danu, hamauria tauna be hisihisi bada do ia abia, badina peroveta herevana ia gwau gaigai ese ena aena do ia haberoa. To, gaigai ese hamauria tauna ena aena do ia haberoa ena anina be dahaka? Iehova ia Abia Hidi Tauna be dahaka do ia haheaukalaia?
7 Hamauria tauna ese kara dika ena davana ia karaia be namo, unai amo taunimanima be mase amo ia hamauria bona Dirava ida maino idia karaia diba. Edena dala ai unai do ia karaia? Idaunegai, haida be gau ta idia bouboulaia. Abidadama tauna ginigunana, Abela, be Iehova dekenai animal ia bouboulaia neganai, Dirava ese unai ia abia dae. Gabeai, Dirava idia gari henia bese kwaradia hegeregere, Noa, Aberahamo, Iakobo, bona Iobu be animal idia bouboulaia danu, bona Dirava ese unai ia abia dae. (Gen. 4:4; 8:20, 21; 22:13; 31:54; Iobu 1:5) Lagani momo murinai, Mose ena Taravatu be boubou daladia ia kikilaia namonamo.
8. Kara Dika Ena Davana Karaia Dinana ai, hahelaga tauna badana be dahaka ia karaia?
8 Taravatu lalonai, Kara Dika Ena Davana Karaia Dinana ai idia karaia bouboudia be mai anina bada. Unai dina ai, hahelaga tauna badana be kara haida ia karaia, idia ese anina bada gaudia haida idia laulaulaia. Ia ese boubou gaudia ia henia Iehova dekenai, orea rua edia kara dika ena davana karaia totona—ginigunana be hahelaga taudia, bona iharuana be hahelaga lasi iduhu taudia totona. Hahelaga tauna badana be palai dubu o dubu helaga ena Helaga Herea Gabuna lalonai ia vareai—lagani ta ta ai unai dina sibona lalonai ia sibona ia vareai diba. Unuseniai, ia ese taravatu maua vairanai ia bouboulaia animal edia rarana ia negea. Nega haida, maua helagana ena ataiai be ori ta mai ena diari ia hedinarai, unai be Iehova Dirava ena noho ia laulaulaia.—Eso. 25:22; Lev. 16:1-30.
9. (a) Hahelaga tauna badana be daika ia laulaulaia, bona boubou gaudia be dahaka idia laulaulaia? (b) Hahelaga tauna badana be Helaga Herea Gabuna ai ia vareai karana ese dahaka ia laulaulaia?
9 Dirava ena lauma amo, aposetolo Paulo be unai gaudia edia anina ia gwauraia hedinarai. Ia hahedinaraia hahelaga tauna badana be Mesia, Iesu Keriso, ia laulaulaia, bona animal bouboulaia karana be Keriso ena mase amo ena mauri ia bouboulaia karana idia laulaulaia. (Heb. 9:11-14) Unai boubou gauna goevadaena be orea rua do ia hamauria—ginigunana be hahelaga taudia o Keriso ena horoa tadikaka 144,000 totona, bona iharuana be “mamoe idaudia” taudia totona. (Ioa. 10:16) Hahelaga tauna badana be Helaga Herea Gabuna ai ia vareai karana ese inai ia laulaulaia: Iesu be guba ai ia vareai, bena ena mauri davalaia boubouna be Iehova Dirava dekenai ia henia.—Heb. 9:24, 25.
10. Peroveta herevadia ese Mesia dekenai do idia vara gaudia be edena bamona idia gwauraia?
10 Ia hedinarai goevagoeva, Mesia be Adamu bona Heva edia bese do ia hamauria. Anina be iena mauri do ia bouboulaia! Heberu Revarevadia idia torea peroveta taudia be unai idia hamomokania. Hegeregere, peroveta tauna Daniela ia gwau, taunimanima be “Mesia do idia hamasea,” bena ia ese ‘kara dika davana do ia karaia haorea.’ (Dan. 9:24-26) Isaia ia gwau, Mesia be taunimanima ese do idia dadaraia, dagedage henia, bona hamasea, o gwadaia, unai amo ia be goevadae lasi taudia edia dika do ia huaia.—Isa. 53:4, 5, 7.
11. Edena dala ai Iehova ena Natuna ese ia hahedinaraia, ia ura ena mauri ia henia ita ia hamauria totona?
11 Dirava sibona ia havaraia Natuna tamona be tanobada ai ia do mai lasi neganai, unai Natuna ia diba dahaka do ia davaria, ita ia hamauria totona. Ia be hisihisi bada do ia abia guna, bena Satani ese do ia hamasea. Tamana be ena Natuna dekenai do idia vara momokani gaudia ia hadibaia neganai, Natuna ia gwau-edeede bona Tamana ena ura ia dadaraia, a? Lasi, ia ura Tamana ena hadibaia hereva ia badinaia. (Isa. 50:4-6) Danu tanobada ai, Iesu be ena Tamana ena ura ia karaia. Dahaka dainai? Ena haere ginigunana be, “Lau ese egu Tamana lau lalokau henia.” Iharuana be, “Lalokau namo herea momokani be inai, tau ta ese ena mauri do ia atoa diho, iena turana totona.” (Ioa. 14:31; 15:13) Iehova ena Natuna be ita ia lalokau henia dainai, ita ia hamauria. Ena be ia diba ena mauri goevadaena do ia haboioa, to mai moale ida ena mauri ia henia, ita ia hamauria totona.
Edena Dala ai Iehova be Ita Ia Hamauria?
12. Daika ena ura dainai mauri davalaia boubouna ia karaia, bona dahaka dainai?
12 Iesu be mauri davalaia boubouna ena Palani Karaia Tauna lasi. To, Iehova ena ura dainai, unai hamauria dalana ia karaia. Paulo ese ia hahedinaraia, dubu ena boubou patana—boubou gaudia idia atoa gauna—be Iehova ena ura ia laulaulaia. (Heb. 10:10) Unai dainai, Iehova be Keriso ena boubou gauna amo eda hamauria dalana ia karaia tauna ginigunana bona badana. (Luka 1:68) Unai be ena ura goevadaena, bona taunimanima ia lalokau henia bada dalana.—Ioane 3:16 duahia.
13, 14. Edena dala ai Aberahamo ia karaia karana ese ita ia durua diba Iehova ese ita totona ia karaia karana ita lalopararalaia namonamo totona?
13 Iehova be dahaka ia karaia, unai amo ia hahedinaraia ita ia lalokau henia? Ia karaia karana ita lalopararalaia be ia auka. To Baibel ena sivarai ta ese ita do ia durua, unai ita lalopararalaia namonamo totona. Iehova ese abidadama tauna Aberahamo ia noia kara aukana ta ia karaia totona—ena natuna Isako be boubou gauna ta bamona Dirava do ia henia. To, Aberahamo be natuna ia lalokau henia bada. Oibe, Iehova be Aberahamo dekenai Isako ia herevalaia neganai, ia gwau: “Oiemu natuna korikori, Isako, oi lalokau henia merona.” (Gen. 22:2) Ena be Aberahamo be Isako ia lalokau henia bada, to ia itaia Iehova ena ura ia karaia be gau badana. Unai dainai, Iehova ena ura gauna ia karaia. To, Iehova ia ura lasi ia ese nega ta do ia karaia karana be Aberahamo ese ia karaia. Unai dainai, Aberahamo be ena natuna ia do bouboulaia lasi neganai, Dirava be aneru ta ia siaia Aberahamo ia koua totona. Unai hahetoho badana lalonai, Aberahamo ia ura bada Dirava ia badinaia, bona ia abia dae momokani ena natuna be mase amo do ia toreisi lou bena do ia itaia. Momokani, ia abia dae Dirava be mai ena siahu unai bamona toreisi lou karana ia havaraia totona. Oibe, Paulo ia gwau Aberahamo ese Isako be toreisi lou amo ia abia lou “bamona.”—Heb. 11:19, BHğ.
14 Aberahamo be ena natuna bouboulaia totona ia hegaegae neganai, oi laloa ia lalohisihisi, a? Oibe, bona unai amo ita laloparara Iehova be ena Natuna—Ia gwauraia “lauegu Natuna, egu lalokau”—ia henia neganai, Iena hemami be Aberahamo ena hemami bamona. (Mat. 3:17) Ita laloatao, Iehova ia lalohisihisi bada. Ia bona ena Natuna be lagani milioni momo—lagani bilioni momo—lalodiai idia hebamo namo herea. Natuna be mai moale ida Tamana ida ia gaukara, Tamana ese ia lalokau henia “gaukara karaia namonamo tauna” bona “Hereva.” (Aon. 8:22, 30, 31, NW; Ioa. 1:1) To ita diba taunimanima ese Iehova ena Natuna idia hahisia, kirikirilaia, bona raskol ta bamona idia hamasea neganai, Iehova be ia haheauka. Iehova be ena Natuna ia henia, ita ia hamauria totona! Edena dala ai ita hahedinaraia diba ita be Iehova ena hahemauri dalana ita laloa bada?
Edena Dala ai Oi Hahedinaraia Diba Oi be Iehova Ena Hahemauri Dalana Oi Laloa Bada?
15. Edena dala ai Iesu be kara dika ena davana ia karaia guguru, bona unai ese dahaka hahenamo ia havaraia?
15 Iesu ia toreisi lou bona guba ia lao murinai, kara dika ena davana ia karaia guguru. Ia bona ena lalokau Tamana idia hedavari lou, bona iena boubou ena davana be Ia dekenai ia henia. Unai ese hahenamo momo ia havaraia. Ginigunana be, Keriso ese ena horoa tadikaka edia dika ia gwauatao bona iharuana be “taunimanima ibounai edia dika” ia gwauatao. Keriso ena boubou dainai, edia kara dika amo idia helalo-kerehai bona Keriso murinai idia raka taudia ibounai be Iehova Dirava ena lalonamo idia abia diba. (1 Ioa. 2:2) Edena dala ai oi dekenai unai be mai anina bada?
16. Iehova ena hahemauri dalana ita laloa bada ena badina be edena bamona ita haheitalaia diba?
16 Mani paragraf 1 ena haheitalai ita laloa lou. Gorere hanamoa muramura ia davaria doketa be emu wodi dekenai gorere taudia ia hamaoroa: Muramura ia abia bona doketa ena sisiba ia badinaia tauna ena gorere be do ia namo. To bema gorere taudia momo be doketa idia kamonai henia lasi, idia gwau muramura do idia abia lasi bona sisiba do idia badinaia lasi be edena bamona? Idia do oi tohotohoa, herevana oi itaia unai muramura be gorere ia hanamoa diba, a? Lasi! Doketa do oi tanikiu henia badina gorere hanamoa muramurana ia davaria bona sisiba do oi badinaia, reana ma haida dekenai emu abia hidi do oi gwauraia danu. Unai hegeregerena, Iehova be ena Natuna ena mauri davalaia boubouna amo hahemauri dalana ia kehoa dainai, namona be ita ta ta be ita ura bada Iehova dekenai ita hahedinaraia ita be unai hahemauri dalana ita laloa bada.—Roma 6:17, 18 duahia.
17. Edena dala ai ita hahedinaraia diba Iehova ese ita ia hamauria totona ia karaia gauna ita laloa bada?
17 Bema ita be Iehova bona ena Natuna ese kara dika bona mase amo ita idia hamauria dalana ita laloa bada, unai do ita hahedinaraia. (1 Ioa. 5:3) Do ita gaukara goada kara dika do ita karaia lasi totona. Gwau-edeede bona hemarai lasi karadia do ita dadaraia bona eda kerere do ita hunia lasi o koikoi lasi. Unai bamona kara idia karaia taudia be Iesu ena mauri davalaia boubouna idia matauraia lasi. Unai dainai, ita hekwarahi Dirava vairanai ita goeva noho totona, unai amo ita hahedinaraia mauri davalaia boubouna ita laloa bada. (2 Pet. 3:14) Danu, eda hahemauri dalana o helaro hereadaena be ma haida dekenai ita harorolaia, unai amo idia danu be Iehova ena lalonamo do idia abia bona vaira negana do idia naria noho. (1 Tim. 4:16) Momokani, eda nega bona goada ibounai ita gaukaralaia diba, Iehova bona ena Natuna ita hanamoa totona! (Mar. 12:28-30) Mani oi laloa! Nega ta do ia mai, kara dika ibounai do idia ore. Dirava ena ura hegeregerena, do ita goevadae bona do ita mauri hanaihanai—unai bamona do ia vara badina Iehova be dala ia karaia ita ia hamauria totona!—Roma 8:21.
[Footnote]
a Ripoti haida idia gwau, unai negai taunimanima ibounai 100 amo, 20 ia lao 50 bamona be kuru gorerena ladana Spanish influenza idia abia. Reana taunimanima 100 amo, 1 ia lao 10 bamona be unai gorere amo idia mase. Ebola gorerena be idau, ia be nega ta ta sibona ia vara, bona ia vara neganai, taunimanima 100 amo 90 bamona idia mase.
Edena Bamona Do Oi Haere?
• Dahaka dainai ta ese oi ia hamauria haraga be namo?
• Edena dala ai Iesu ese ena mauri ia bouboulaia karana ese oi ia durua?
• Iehova ena harihari gauna, mauri davalaia boubouna be edena bamona oi laloa?
• Iehova ese oi ia hamauria totona ia karaia gauna oi laloa bada dainai, oi ura dahaka oi karaia?
[Picture on page 27]
Kara Dika Ena Davana Karaia Dinana ai, hahelaga tauna badana be Mesia ia laulaulaia
[Picture on page 28]
Aberahamo ia ura ena natuna ia bouboulaia karana ese ita ia hadibaia, Iehova be boubou kara badana ia karaia