Gwaukau Taudia Maorodia Dibaia Dalana
“Lau ese . . . lauegu hesiai tauna ese, peroveta hereva ia gwauraia neganai, bona bema hesiai tauna ta lau siaia, ia ese egu palani do ia hedinaraia totona, unai neganai unai palani bona unai peroveta hereva, be do lau hamomokania.”—ISAIA 44:25, 26.
IEHOVA DIRAVA be ena gwaukau taudia momokanidia Hahedinaraia Tauna Badana. Ia ese idia amo ia halasia herevadia ia hagugurua karana amo ia hahedinaraia idia be iena gwaukau taudia momokanidia. Iehova be gwaukau taudia koikoidia Hahedinaraia Tauna Badana danu. Edena dala amo idia ia hahedinaraia? Edia toa bona hereva do idia momokani dalana ia koua. Unai amo ia hahedinaraia idia be sibodia peroveta taudia ai idia halaoa taudia, edia hereva be sibona edia lalohadai koikoidia—oibe, edia lalohadai kavakavadia unai!
2 Isaia bona Esekiela ruaosi idia gwau idia be Iehova Dirava ena gwaukau taudia. Unai be momokani, a? Mani ita itaia. Isaia be Ierusalema ai ia peroveta, lagani 778 B.C.E. bamona amo ela bona lagani 732 B.C.E. murinai. Esekiela be Babulonia ai idia abia lao lagani 617 B.C.E. lalonai. Unuseniai ia ese ena Iuda tadikakadia ia peroveta henia. Peroveta taudia ruaosi be mai gari lasi ida idia peroveta Ierusalema be do idia hadikaia ore. Peroveta taudia ma haida idia gwau Dirava ese unai do ia koua. Daidia be gwaukau taudia maorodia?
Iehova ese Peroveta Taudia Koikoidia Ia Hahedinaraia
3 Babulonia dekenai ia noho neganai, mata hanai amo Esekiela ese Ierusalema ena dubu ai idia vara gaudia ia itaia. Dubu ena dina ia daekau kahana iduarana dekenai be tatau 25. Idia bogaraginai be lohia rua, Iasanaia bona Pelataia. Iehova ese edena bamona idia ia laloa? Esekiela 11:2, 3 ia haere, ia gwau: “Tanobada tauna e, inai taudia ese palani dikadia idia karaia noho, bona sisiba dikana danu inai hanua lalonai idia henia noho, idia gwau, ‘Ita ese nega sisina lalonai ruma be do ita haginidia lou iniseni.’ ” Unai maino gwauraia taudia koikoidia idia gwau, ‘Ierusalema do ia dika lasi. Nega daudau lasi ruma ma haida be ia lalonai do ita haginia!’ Unai dainai Iehova ese Esekiela ia hagania do ia peroveta, unai koikoi taudia edia hereva do ia gorea. Karoa 11 ena siri 13 ai, Esekiela ese idia ta dekenai ia vara gauna be ita ia hamaoroa, ia gwau: “Vadaeni lau Esekiela ese inai peroveta hereva lau gwauraia noho neganai, Pelataia Benaia ia moru, ia mase momokani.” Unai be reana ia vara badina Pelataia be lohia tauna bona kaivakuku tomadiho henia tauna badana. Ia mase haraga ese ia hahedinaraia ia be peroveta koikoi tauna!
4 Ena be Iehova ese Pelataia ia hamasea, to ma peroveta koikoi taudia idia koikoi noho. Edia kavakava karana idia hadokoa lasi, Dirava ena ura idia dadaraia herevadia idia gwauraia noho. Unai dainai Iehova Dirava be Esekiela dekenai ia gwau: “Peroveta taudia kavakavadia, idia sibona edia laloa gaudia idia gwauraia noho, to gau ta idia itaia lasi taudia be do idia dika momokani!” Pelataia bamona, do “idia ore,” badina mai goada ida idia gwau Ierusalema taudia be “maino do idia abia, to idia abia diba lasi momokani.”—Esekiela 13:3, 15, 16.
5 To Isaia ena hereva, Ierusalema idia gwauraia herevadia, Dirava amo ia abia herevadia ibounai, idia momokani. Lagani 607 B.C.E. ena siahu negana lalonai, Babulonia taudia ese unai hanua idia hadikaia ore bona Iuda taudia oredia be Babulonia dekenai idia abidia lao. (2 Sivarai 36:15-21; Esekiela 22:28; Daniela 9:2) Unai dika idia vara dainai peroveta koikoi taudia ese Dirava ena taunimanima dekenai idia gwauraia anina lasi herevadia idia hadokoa, a? Lasi, unai gwaukau taudia mai edia koikoi ese edia kara idia karaia noho!
6 Ma danu, Babulonia dekenai idia abidia lao Israela taudia ese Babulonia ena babalau taudia, ena meamea taudia, bona ena hisiu edia toa idia tahua taudia edia peroveta herevadia idia kamonai danu. To, Iehova ese ia hahedinaraia unai gwaukau taudia koikoidia be kavakava taudia, do idia vara lasi gaudia perovetalaia taudia. Gabeai ia hahedinaraia Isaia bamona, Esekiela danu be iena gwaukau tauna momokanina. Iehova ese idia amo ia halasia herevadia iboudiai edia anina ia havaraia, guna ia gwauhamata bamona: “Lau ese peroveta koikoi taudia, edia hereva lau koua noho, bona meamea dika taudia dekenai, laloa kavakava lau henia. Aonega taudia edia hereva, be lau ese lau negea, bona edia aonega be kavakava dekenai lau halaoa noho. To bema lauegu hesiai tauna ese, peroveta hereva ia gwauraia neganai, bona bema hesiai tauna ta lau siaia, ia ese egu palani do ia hedinaraia totona, unai neganai unai palani bona unai peroveta hereva, be do lau hamomokania.” —Isaia 44:25, 26.
Idia Gwauraia Hoa Herevadia Babulonia Bona Ierusalema Dekenai
7 Iuda bona Ierusalema do idia noho kava bona taunimanima be idia dekenai do idia noho lasi ela bona lagani 70 do idia ore. To, Iehova ese Isaia bona Esekiela amo ia hereva, ia gwauraia hedinarai negana ai unai hanua do idia haginia lou bona unai tano do idia noholaia lou! Unai be hoa herevana. Dahaka dainai? Badina taunimanima idia diba Babulonia taudia ese idia abia mauri taudia be idia ruhaia lasi. (Isaia 14:4, 15-17) Unai dainai, daika ese unai abia mauri taudia do ia ruhaia diba? Daika ese siahu bada hanuana Babulonia, ena magu bada hereadia bona sinavai ese idia gegea ahu hanuana, do ia halusia diba? Siahu Ibounai Diravana Iehova ese do ia karaia! Bona ia sibona ia gwau: “Lauegu oda hereva dekena amo, davara mai ena ranu dobudia [hanua idia gegea ahu ranudia unai] be do idia kaukau. Lau ese king Kurese dekenai do lau hereva, lau gwau, ‘Oi ese lauegu ladana dekenai, tanobada do oi gunalaia. Lauegu ura be oi ese do oi karaia. Oi ese do oi oda, vadaeni Ierusalema do idia haginia lou. Bona oi ese do oi oda, vadaeni Dubu Helaga ena badina nadidia do idia haginia!’ ”—Isaia 44:25, 27, 28.
8 Mani unai oi laloa! Taunimanima ese Eufrate Sinavaina idia hanaia be auka herea, to Iehova vairanai ia be ranu sisina siahu masemase gauna ta latanai ia moru bamona! Maoromaoro do ia ore! Babulonia do ia moru. Ena be lagani 150 bamona idia do noho ela bona Kurese, Parasa tauna, do ia vara, to Iehova ese Isaia ia hasiahua ia gwau Kurese ese Babulonia do ia halusia bona idia abidia lao Iuda taudia ia ruhaia bona gwaumaoro do ia henia. Ierusalema bona ena dubu do idia haginia lou.
9 Unai peroveta herevana be Isaia 45:1-3 ai ita davaria, ia gwau: “Lohiabada ese Kurese ia abia hidi [“horoa,” NW] vadaeni, king dagi totona! Lohiabada ese Kurese ia abia hidi, bese idauidau tuari dekenai do ia halusia totona. Lohiabada ese Kurese ia siaia noho, king edia siahu do ia hamanokaia totona. Lohiabada ese hanua badadia edia magu iduara do ia kehoa, Kurese do ia raka vareai totona. Kurese dekenai Lohiabada ia hereva, ia gwau, ‘Lau sibona ese oiemu dala do lau kehoa, vadaeni ororo badadia bona maragidia do lau hapalakaia. Lau ese magu iduara, auri gaudia do lau makohia. Lau ese dibura bona hunia gabudia dekenai idia noho kohu, be oi dekenai do lau henia. Unai neganai do oi diba lau be Lohiabada, bona do oi diba Israela ena Dirava ese, oiemu ladana ia atoa vadaeni.’ ”
10 Oi itaia Iehova ese Kurese dekenai ia hereva ia mauri noho vadaeni bamona. Unai be Paulo ena hereva hegeregerena, ia gwau Iehova “ese idia do vara lasi gaudia ia havaraia diba.” (Roma 4:17) Ma danu, Dirava ia hahedinaraia Kurese be iena “horoa” tauna. Dahaka dainai unai bamona ia hereva? Ita diba Iehova ena hahelaga tauna badana ese dehoro helagana Kurese ena kwarana dekenai ia bubua lasi. Momokani, to unai horoa karana be peroveta herevana amo. Ia hahedinaraia dagi badana totona ia abia hidi vadaeni. Unai dainai lagani momo gunanai ia abia hidi neganai Dirava ia gwau diba Kurese ia horoa.—1 King Taudia 19:15-17 itaia; 2 King Taudia 8:13.
Dirava ese Ena Gwaukau Taudia Edia Hereva Ia Hamomokania
11 Kurese be Babulonia tuari henia totona ia lao neganai, idia noholaia taudia idia gari lasi. Ranu koupa badana, ia be dobu bona lababa gauna, ese edia hanua ia koua hegege, unai be Eufrate Sinavaina amo ia aru ranuna. Sinavai be hanua bogaraginai ia aru lao bona ist kahana ena isena dekenai bouti atoa gabudia idia karaia. Hanua amo idia hapararaia totona, Nebukanesa ese magu badana ia haginia, unai magu ia gwauraia “magu bada hereana, ororo ta bamona, idia hamarerea diba lasi gauna. . . . [Ia] atoa daekau ororo ta bamona.”a Unai magu ena geiti be mai edia kapa iduara bada hereadia. Taunimanima be unai geiti ai idia vareai totona, sinavai ena isena amo idia daekau. Ita hoa lasi Babulonia ese ia guia taudia idia laloa do idia heau mauri dalana be lasi!
12 To unai hanua lalonai idia koua Iuda taudia mai abidadama be unai bamona idia laloa lasi! Edia helaro be ia goada. Ena peroveta taudia amo, Dirava ia gwauhamata do ia ruhadia nege. Dirava ese edena bamona ena gwauhamata ia hamomokania? Kurese be ena tuari oreadia ia hagania idia ese Eufrate Sinavaina ena ranu idia hakaua siri, kilomita haida Babulonia ena not kahana dekenai. Unai dalana ai, hanua ena inai taudia ia gimaia gauna badana be sinavai kaukau ai ia lao. Unai hanuaboi ai, pati lalonai idia inuinu noho Babulonia taudia ese Eufrate ena isena badinai idia noho iduara idia koua lasi. Iehova ese unai kapa iduaradia ia hamakohia momokani lasi; bona unai iduara auridia ia utua momokani lasi, to ia karaia karadia dainai unai iduara be auri amo idia koudia lasi bena idia kehoa noho, hegeregere ia ese unai bamona ia karaia. Babulonia ena magu be anina lasi. Kurese ena tuari taudia be unai magu dekenai idia daekau lasi, hanua lalonai idia vareai totona. Iehova be Kurese vairanai ia lao, “ororo” ia hapalakadia, oibe, iena dala idia koua gaudia ibounai ia kokia. Unai amo ia hedinarai Isaia be Dirava ena gwaukau tauna momokanina.
13 Kurese ese hanua ia abia vaitani murinai, ia ese hanua ena dava bada kohudia ia abia, dibura daiutu hehunidia ai idia haboua gaudia danu. Dahaka dainai Iehova Dirava ese unai ibounai be Kurese dainai ia karaia? Badina ia ura Kurese ese do ia diba Iehova, ‘ena ladana Ia atoa’ tauna, be peroveta hereva momokanina ena Dirava bona guba bona tanobada edia Atai Herea Lohiabadana. Do ia diba, Dirava ese dala ia kehoa king dagina ia abia, Ena bese taudia, Israela taudia, do ia ruhaia nege totona.
14 Mani oi kamonai Iehova be Kurese dekenai ia hereva, ia gwau: “Kurese e, oi lau boiria vadaeni, egu abia hidi besena Israela do oi durua totona. Oi ese lau oi diba lasi, to lau ese oiemu ladana lau habadaia herea. Lau be Lohiabada, dirava idauna ta ia noho lasi. Dirava ta be lasi, lau sibona. Kurese e, oi diba lasi lau, to lau ese oi lau hagoadaia noho. Vadaeni dina ia daekau kahana dekena amo, bona dina ia diho kahana dekena amo, taunimanima be do idia diba, lau hegeregerena ta ia noho lasi. Lau inai Lohiabada, bona dirava idauna ta be lasi. Diari lau karaia noho, bona dibura lau havaraia noho. Namo lau karaia noho [unai be iena abidia lao taudia totona], bona dika danu lau havaraia noho [Babulonia taudia totona]. Lau be Lohiabada, inai kara ibounai lau karaia noho.”—Isaia 45:4-7.
15 Kurese ese Babulonia ia halusia be Iehova dainai, badina Ia ese Kurese ia hagoadaia Iena ura gauna unai hanua dikana dekenai do ia karaia bona Iena abidia taudia do ia ruhaia nege totona. Unai bamona ia karaia neganai, Dirava ese ena guba ia boiboi henia kara maoromaoro siahudia do ia hadihoa. Iena tanobada ia boiboi henia do ia kehoa bona kara maoromaoro bona hahemauri do ia havaraia, iena bese taudia, idia abidia lao taudia, durua totona. Bona ena guba bona tanobada ese unai oda hegeregerena idia karaia. (Isaia 45:8) Isaia ia mase bena lagani handred mai kahana murinai, ia hedinarai Isaia be Iehova ena gwaukau tauna momokanina!
Gwaukau Tauna Ena Sivarai Namona Siona Dekenai
16 To unai sibona lasi. Isaia 52:7 ese Ierusalema totona sivarai namona ia herevalaia. Ia gwau: “Ororo dekenai idia raka mai noho taudia, edia aena be mai hairaidia danu. Badina be sivarai namona idia mailaia noho, maino ena sivarai idia gwauraia noho. Kwalimu bona hamauria herevana danu idia gwauraia noho. Siona dekenai idia gwau, ‘Oiemu Dirava be ia King noho.’ ” Edia moale bada mani oi laloa, ororo amo Ierusalema dekenai ia mai noho gwaukau tauna idia itaia neganai! Ia ese sivarai namona ia mailaia. Unai sivarai be dahaka? Unai be sivarai namo hereana Siona totona. Maino sivaraina ia mailaia, oibe, Dirava ena lalo-namo sivaraina. Ierusalema bona ena dubu do idia haginia lou! Bona gwaukau tauna be ia boiboi mai ena kwalimu moalena ida, ia gwau: “Oiemu Dirava be ia King noho.”
17 Babulonia taudia ese Iehova ena terona ia laulaulaia gauna, Davida ena iduhu pavapavadia ese ia latanai idia helai gauna, idia hamorua karana Iehova ese ia koua lasi neganai, reana toana be Iena pavapava dagina ia doko. Toana be Merodaka, Babulonia ena dirava badana, be iena gabunai ia pavapava. To, Siona ena Dirava ese Babulonia ia hamorua neganai, ia hahedinaraia ia be guba bona tanobada edia lohia—King hereadaena. Unai gauna ia hamomokania totona, Ierusalema, “King badana ena hanua,” do idia haginia lou, mai ena dubu ida. (Mataio 5:35) Ena be unai sivarai namona ia mailaia tauna, ena aena be kahu ese ia hamiroa bona idia hisihisi, to Siona idia ura henia taudia bona ena Dirava ena matadia ai, idia be mai edia hairai bada!
18 Peroveta dalanai, Babulonia ena moru ena anina be Dirava ese ena terona ia haginia bona sivarai namona ia mailaia tauna ese unai sivarai ia gwauraia. Ma danu, unai gwaukau tauna gunana, Isaia ese ia herevalaia tauna, ese sivarai hereadaena ia gwauraia tauna ia laulaulaia—ia be hereadae badina ena hereva bona ena Basileia sivaraina ena anina be bada abidadama taudia iboudiai dekenai.
19 Esekiela danu ese Ierusalema haginia lou peroveta herevadia namodia ia abia. Ia peroveta: “Lohiabada Dirava ma ia gwau, ‘. . . emui hanua korikori dekenai umui do lau atoa lou, unuseni do umui noho. Bona idia hadikaia ore gabudia ibounai be do umui haginia lou. Vadaeni taunimanima ibounai be do idia gwau, “Inai tano, guna ia be dika, to hari ia be Eden ena Uma Gabuna bamona.” ’ ”—Esekiela 36:33, 35.
20 Babulonia dekenai, Dirava ena taunimanima ese Siona idia taitailaia. (Salamo 137:1) Hari, idia moale diba. Isaia ia hereva, ia gwau: “Ierusalema ena hadikaia gabudia e, do umui boiboi mai moale bada danu. Lohiabada ese iena hanua badana Ierusalema do ia hamauria, bona iena bese taudia do ia hagoadaia. Lohiabada ese iena siahu helagana do ia gaukaralaia. Ia ese iena bese do ia hamauria, bona tanobada taudia ibounai ese, iena hamauria kara do idia itaia.”—Isaia 52:9, 10.
21 Oibe, Iehova ena abia hidi besena be mai badina badana dainai idia moale. Idia ese unai gabu, edia inai taudia ese idia hadikaia vadaeni gabudia, be do idia noholaia lou, Eden umana hegeregerena ai do idia halaodia. Iehova ese ena “siahu helagana” idia totona ia gaukaralaia. Ia ese hegeregere iena imana helagana ia toia bamona, iena bese taudia ese idia ura henia tanona dekenai do ia mailaidia lou totona. Unai be histori lalonai ia vara kava gauna lasi. Lasi, taunimanima iboudiai ese Dirava ena ‘imana’ idia itaia, tanobada besedia huanai ia gaukaralaia bese ta ia hamauria totona. Idia diba momokani Isaia bona Esekiela be Iehova ena gwaukau taudia momokanidia. Unai ese ia hamomokania vaitani, Siona ena Dirava sibona be mauri Diravana momokanina tamona, tanobada ibounai dekenai. Isaia 35:2 ai ita duahia: “Lohiabada ena hairaina do idia itaia. Iena diaridiari badana, bona iena siahu do idia itaia.” Iehova ena Dirava dagina ia hamomokania gauna idia abia dae taudia ese ia idia tomadiho henia.
22 Iehova ese ena gwaukau taudia momokanidia ia hahedinaraia dainai ia ita tanikiu henia bada! Bema iena ‘hesiai tauna ese peroveta hereva ia gwauraia neganai, bona bema hesiai tauna ta ia siaia ena palani do ia hedinaraia totona, unai neganai unai palani bona unai peroveta hereva be do ia hamomokania.’ (Isaia 44:26) Isaia bona Esekiela dekenai ia henia peroveta herevadia, Ierusalema idia haginia lou herevadia, ese ena lalokau, hariharibada, bona hebogahisi ia idia tomadiho henia taudia dekenai idia hamomokania. Momokani, unai dainai Iehova do ita hanamoa bada be namo! Bona hari inai negai ita tanikiu henia bada badina gwaukau taudia koikoidia ia hahedinaraia. Badina hari tanobada dekenai idia be momo. Edia hereva badadia ese Iehova ena palani, ia gwauraia palanina, idia hahedinaraia lasi. Hereva gabena ese ita ia durua unai gwaukau taudia koikoidia ita diba totona.
[Footnotes]
a Ira Maurice Price ena buka, The Monuments and the Old Testament, 1925.
Oi Gwauraia Hedinarai Diba, A?
◻ Edena bamona Iehova ese ena gwaukau taudia momokanidia ia hahedinaraia?
◻ Isaia amo, Iehova ese daika ia abia hidi Babulonia do ia halusia totona?
◻ Isaia ese Babulonia do ia moru ia perovetalaia herevadia be edena bamona idia guguru?
◻ Babulonia ena moru ese dahaka namo ia havaraia Iehova ena ladana dekenai?
[Study Questions]
1. Iehova ese gwaukau taudia maorodia bona koikoidia be edena bamona ia hahedinaraia?
2. Israela ena negai, edena dala ai gwaukau taudia edia hereva idia idau?
3, 4. (a) Edena hereva idaudia rua be Babulonia dekenai idia noho Israela taudia dekenai idia halasia, bona edena dala ai Iehova ese gwaukau tauna koikoina ia hahedinaraia? (b) Iehova ia gwau dahaka do ia vara peroveta koikoi taudia dekenai?
5, 6. Ena be gwaukau taudia koikoidia idia noho, to edena bamona ia hedinarai Isaia be peroveta tauna momokanina?
7, 8. Isaia ese Dirava amo Babulonia totona edena hereva ia abia, bona ena hereva ena anina be dahaka?
9. Babulonia ena dika davana henia totona, Iehova ese daika ia abia hidi?
10. Dirava ese edena dala amo Kurese ia “horoa,” bona edena bamona Iehova ese ia hereva henia diba lagani handred ia do vara lasi neganai?
11. Dahaka dainai Babulonia idia noholaia taudia idia laloa dika do idia davaria lasi?
12, 13. Kurese ese Babulonia ia halusia neganai, edena bamona Iehova ese Isaia amo ia halasia herevadia idia momokani?
14, 15. Edena bamona ita diba Kurese ese Babulonia ia halusia karana be Iehova dainai ia vara?
16. Babulonia be ia moru neganai, edena sivarai namona be Ierusalema dekenai idia gwauraia diba?
17, 18. Kurese ese Babulonia ia halusia karana ena anina Iehova ena ladana dekenai be dahaka?
19. Iehova ese Esekiela amo edena hereva ia gwauraia Israela tanona totona?
20. Isaia ese edena moale sivaraina Ierusalema dekenai ia perovetalaia?
21. Isaia 52:9, 10 ena hereva be edena bamona idia guguru Babulonia ia moru murinai?
22. (a) Dahaka dainai Iehova ita tanikiu henia hari? (b) Dahaka dainai Iehova ese gwaukau taudia koikoidia ia hahedinaraia dainai ia ita tanikiu henia bada?
[Picture on page 9]
Esekiela ena negai idia noho besedia idia laloa Babulonia ia moru diba lasi