Duahia Taudia Edia Henanadai

Mataio 24:34 ena hereva, “inai nega idia noho taudia,” dekenai lalohadai matamata ita abia dainai, ita gwau diba toana be dokona be do daudau herea, a?

Lasi, to unai lalo-parara matamata ese ita do ia durua dokona do ita naria noho mai eda ura bada ida. Dahaka dainai unai bamona ita hereva diba?

November 1, 1995 ena Gima Kohorona lalonai ia hedinarai hegeregerena, Iesu ese iena nega lalonai idia noho taudia dikadia ia herevalaia neganai, inai hereva, “inai nega noho taudia,” ia gwauraia. (Mataio 11:​7, 16-​19; 12:​39, 45; 17:​14-​17; Kara 2:​5, 6, 14, 40) Ia ese nega ta mai ena matamana bona mai ena dokona ia herevalaia lasi.

Oibe, unai Gima Kohorona tamona lalonai “Duahia Taudia Edia Henanadai” henunai, kahana badadia rua ia hahedinaraia badabada: “Nega ta ai idia noho taudia edia nega ena lagani edia momo ita gwauraia diba lasi” bona, ‘Nega ta ai idia noho taudia edia nega be ia kwadogi, daudau herea lasi.’

Nega momo ita ese ‘nega ta ai idia noho taudia’ be unai bamona ita gwauraia. Hegeregere, reana ita gwau, ‘Napoleon ena nega ai idia noho tuari taudia ese peleini bona atom bomu idia diba lasi.’ Unai hereva amo ita ese Napoleon ia vara laganina lalonai idia vara tuari taudia ita herevalaia, a? Ia do mase lasi neganai idia mase guna tuari taudia sibona ita herevalaia unai, a? Lasi vaitani; bona inai hereva, “inai nega noho taudia” ita gaukaralaia dalana amo nega ta ena lagani edia momo ita gwauraia toho lasi. To, ita ese nega kwadogina ita herevalaia unai, Napoleon ena nega amo lagani handred haida vaira neganai ita herevalaia lasi.

Iseda lalohadai Iesu ese Olive Ororona ai ia gwauraia peroveta herevana dekenai be unai hegeregerena. Unai peroveta hereva ena kahana idauidau idia guguru noho ese idia hahedinaraia inai nega ena dokona be ia kahirakahira. (Mataio 24:​32, 33) Oi laloatao, Apokalupo 12:​9, 10 ena hereva hegeregerena, lagani 1914 ai Dirava ena guba Basileiana ia haginia neganai, Satani idia negea diho tanobada dekenai. Apokalupo bukana ma ia gwau Satani be hari ia badu dikadika. Badina be dahaka? “Badina ia diba iena nega be ia kwadogi sibona.”​—⁠Apokalupo 12:⁠12.

Unai dainai, November 1 Gima Kohorona ena kwara herevana maragina ta ena hereva be maoro, ia gwau “ ‘Umui Naria Noho’!” Unai hereva henunai ia noho paragraf ia gwau: “Unai dina bona hora ita diba guna be anina lasi. To namona be do ita gima namonamo, iseda abidadama do ita hagoadaia, bona Iehova ena gaukara do ita goadalaia​—⁠lagani do ita duahidia lasi, unai dina do ita laloa davari totona.” Unai murinai Iesu ena hereva ia gwauraia, ia gwau: “Umui naria namonamo, umui noga noho, badina be inai gaudia idia mai nega umui diba lasi. Inai hereva lau hamaoroa umui, taunimanima ibounai dekenai danu lau hamaoroa, lau gwau, ‘Umui naria noho.’ ”​—⁠Mareko 13:​33, 37.